TINNOTA li n-nies illum iħossu li għandhom jiġu trattati aħjar minn oħrajn jew li għandhom ħafna drittijiet? Anki meta jiġu trattati b’mod tajjeb, huma jħossu li ħaqqhom iktar. Dan ir-raġunar ġej mill-attitudni egoista u ingrata li l-Bibbja tgħid li kellu jkollhom in-nies fl-aħħar jiem.—2 Tim. 3:2.

Però nistgħu ngħidu li minn dejjem kien hawn nies egoisti. Adam u Eva riedu d-dritt li jagħżlu huma x’inhu tajjeb u ħażin u dan wassal biex ilkoll kemm aħna nbatu minħabba fihom. Eżempju ieħor hu Użżija, ir-Re taʼ Ġuda. Hu ħass li kellu joffri l-inċens fit-tempju avolja ma kellux dritt jagħmel dan. (2 Kron. 26:​18, 19) Ukoll, il-Fariżej u s-Sadduċej ħassew li Alla kellu jittrattahom aħjar minħabba li huma kienu jiġu minn Abraham.—Mat. 3:9.

Aħna mdawrin b’nies egoisti u din l-attitudni tistaʼ tinfluwenzana. (Gal. 5:26) Nistgħu nibdew naħsbu li ħaqqna xi tip taʼ privileġġ jew li niġu trattati aħjar minn oħrajn. Imma x’jistaʼ jgħinna ma nibdewx naħsbu b’dan il-mod? L-ewwel, irridu nifhmu kif iħossu Ġeħova dwar din it-tip t’attitudni. Hemm żewġ prinċipji li jistgħu jgħinuna.

Ġeħova ta lil kull wieħed minna ċertu drittijiet. Ejja naraw xi eżempji.

• Fil-familja, Ġeħova jixtieq li r-raġel iħoss li  l-mara tiegħu tirrispettah u li l-mara tħoss li r-raġel tagħha jħobbha. (Efes. 5:33) Huma għandhom juru mħabba romantika lejn xulxin biss. (1 Kor. 7:3) Ukoll, it-tfal għandhom jobdu lill-ġenituri tagħhom u l-ġenituri għandhom jieħdu ħsiebhom u jħobbuhom.—2 Kor. 12:14; Efes. 6:2.

• Fil-kongregazzjoni, l-anzjani jaħdmu iebes allura ħaqqhom ir-rispett tagħna. (1 Tes. 5:12) Fl-istess ħin, l-anzjani m’għandhomx dritt jikkontrollaw x’jagħmlu l-aħwa.—1 Pt. 5:​2, 3.

• Alla ta lill-gvernijiet id-dritt li jitolbu t-taxxi u tahom id-dritt li jiġu rrispettati min-nies.—Rum. 13:​1, 6, 7.

Ġeħova bi mħabba jagħtina ħafna iktar milli ħaqqna. Minħabba li aħna writna d-dnub, kulma ħaqqna hu l-mewt. (Rum. 6:23) Minkejja dan, Ġeħova jtina ħafna barkiet minħabba l-imħabba u l-lealtà tiegħu. (Slm. 103:​10, 11) Kull barka jew privileġġ li nirċievu ġej mill-qalb tajba kbira taʼ Ġeħova.—Rum. 12:​6-8; Efes. 2:8.

Oqgħod attent li ma tiġix influwenzat mill-attitudni tan-nies tad-dinja. Jaf mingħajr ma nindunaw nibdew naħsbu li ħaqqna iktar minn oħrajn. Ġesù darba qal eżempju li wera kemm hu faċli li nibdew naħsbu b’dan il-mod. Hu tkellem dwar ħaddiema li ftiehmu maʼ sid t’għalqa biex jaħdmu għalih ġurnata u jitħallsu dinar. Iktar tard fil-ġurnata, sid l-għalqa qabbad iktar ħaddiema u filgħaxija ħallas lill-ħaddiema kollha dinar, anki lil dawk li ħadmu siegħa. Imma l-ħaddiema li kienu bdew minn filgħodu ħassew li kien ħaqqhom iktar wara ġurnata jaħdmu fix-xemx. (Mat. 20:​1-16) B’dan l-eżempju, Ġesù kien qed jgħallem lid-dixxipli tiegħu li kellhom ikunu kuntenti b’dak li Alla jipprovdi.

Apprezza u tistenniex affarijiet mingħand oħrajn. (1 Tes. 5:18) Imita lill-appostlu Pawlu li ma talabx lill-aħwa f’Korintu jagħtuh l-affarijiet li kellu bżonn, avolja kieku ried setaʼ talabhom. (1 Kor. 9: 11-14) Aħna għandna napprezzaw dak kollu li jagħtuna n-nies u ma nistennewx affarijiet minn oħrajn.

Kun umli. Meta xi ħadd jibda jaħseb li hu aħjar minn oħrajn, jibda jħoss li ħaqqu iktar milli għandu. Li nkunu umli se jgħinna biex qatt ma naħsbu b’dan il-mod perikoluż.

Il-profeta Danjel hu eżempju tajjeb ħafna t’umiltà. Hu kien jiġi minn familja importanti, kien gustuż, intelliġenti, u kien kapaċi jagħmel ħafna affarijiet. Allura setaʼ ħass li kien ħaqqu jiġi trattat aħjar minn oħrajn u li jkollu l-privileġġi li kellu. (Dan. 1:​3, 4, 19, 20) Imma Danjel baqaʼ umli u din il-kwalità għamlitu prezzjuż għal Ġeħova.—Dan. 2:30; 10:​11, 12.

Mela ejja nagħmlu dak kollu li nistgħu biex ma nkunux egoisti bħan-nies tad-dinja. Minflok ejja nsibu l-ferħ f’dak kollu li tana Ġeħova grazzi għall-qalb tajba kbira tiegħu.