1. Illum ħafna nies għala ma jafdawx il-Bibbja?

 ILLUM ħafna nies ma jafux lil min għandhom jafdaw. Huma mhumiex ċerti jekk nies li jirrispettaw, bħal politikanti, xjentisti, u negozjanti hux vera jinteressahom minnhom. Barra minn hekk, huma ma jirrispettawx lil mexxejja tar-reliġjon li jgħidu li huma Kristjani. Għalhekk ma niħduhiex bi kbira jekk ma jafdawx il-Bibbja, il-ktieb li dawn il-mexxejja jgħidu li jobdu.

2. Skont Salm 119:160, minn xiex għandna nkunu konvinti?

² Bħala qaddejja taʼ Ġeħova, aħna ċerti li hu “l-Alla tal-verità” u li dejjem jixtieq l-aħjar għalina. (Salm 31:5; Is. 48:17) Aħna nafu li nistgħu nafdaw f’dak li naqraw fil-Bibbja u nemmnu li “dak kollu li tgħid hu veru.” (Aqra Salm 119:160.) Aħna naqblu maʼ dak li kiteb studjuż tal-Bibbja: “Dak kollu li qal Alla hu veru u dejjem jiġri. In-nies t’Alla jistgħu jafdaw f’dak li jgħid għax jafdaw fih.”

3. X’se nikkunsidraw f’dan l-artiklu?

³ Kif nistgħu ngħinu lil oħrajn jafdaw fil-Bibbja bħalna? Se naraw tliet raġunijiet għala nistgħu nafdaw il-Bibbja. Se naraw li dak li tgħid ma nbidilx, li l-profeziji tal-Bibbja twettqu, u li għandha l-qawwa li tbiddel il-ħajjiet tan-nies.

4. Xi nies għala jaħsbu li l-messaġġ tal-Bibbja nbidel?

⁴ Alla Ġeħova uża madwar 40 raġel leali biex jiktbu  l-Bibbja. Però l-ebda manuskritt oriġinali m’għadu jeżisti llum. b Dak li għandna huma kopji li ġew ikkopjati. Għalhekk, xi nies jiddubitaw jekk dak li naqraw fil-Bibbja hux eżatt dak li kitbu dawk l-irġiel. Allura kif nistgħu nkunu ċerti li l-Bibbja ma nbidlitx?

5. L-Iskrittura Ebrajka kif ġiet ikkopjata? (Ara l-istampa tal-qoxra.)

⁵ Biex jipproteġi l-Bibbja, Ġeħova qal lin-nies tiegħu biex jagħmlu kopji tagħha. Ġeħova qal lir-rejiet taʼ Iżrael biex jagħmlu kopji tal-Liġi għalihom u qabbad lil-Leviti biex jgħallmu l-Liġi lin-nies. (Dt. 17:18; 31:24-26; Neħ. 8:7) Wara li l-Lhud inħelsu minn Babilonja, grupp taʼ nies li xogħolhom kien li jikkopjaw, bdew jagħmlu ħafna kopji tal-Iskrittura Ebrajka. (Esd. 7:6, ntt.) Dawn l-irġiel kienu joqogħdu attenti ħafna. Infatti, huma mhux biss bdew jgħoddu l-kliem imma anki l-ittri biex ikunu ċerti li dak li kkopjaw kien eżatt. Imma minħabba li kienu imperfetti, f’xi kopji kien hemm żbalji żgħar. Imma peress li għamlu ħafna kopji, dawn l-iżbalji setgħu jsibuhom. Kif?

6. Kif jistgħu jinstabu l-iżbalji fil-kopji tal-Bibbja?

⁶ Illum l-istudjużi għandhom mod tajjeb taʼ kif isibu l-iżbalji meta ġiet ikkopjata l-Bibbja. Immaġina 100 raġel li qed jikkopjaw l-istess paġna. Wieħed minnhom jieħu żball żgħir. Mod wieħed kif insibu l-iżball tiegħu hu billi nqabblu l-kopja tiegħu mal-kopji l-oħrajn. Bl-istess mod, l-istudjużi jistgħu jsibu l-iżbalji meta jqabblu ħafna manuskritti tal-Bibbja.

7. Dawk li kkopjaw il-Bibbja kemm qagħdu attenti?

⁷ Dawk li kkopjaw il-manuskritti tal-Bibbja għamlu sforz biex jikkopjaw kollox bl-eżatt. Aħseb f’eżempju li juri dan. L-iktar kopja antika tal-Iskrittura Ebrajka tlestiet fis-sena 1008 jew 1009 wara Kristu (WK). Dan hu l-Manuskritt taʼ Leningrad. Imma iktar riċenti nstabu manuskritti tal-Bibbja u partijiet minn manuskritti li nkitbu madwar 1,000 sena qabel il-Manuskritt taʼ Leningrad. Xi ħadd jistaʼ jaħseb li wara li dawk il-manuskritti ġew ikkopjati ħafna drabi matul 1,000 sena, dak li hemm miktub fil-Manuskritt taʼ Leningrad huwa differenti ħafna minn dak li nkiteb fil-manuskritti antiki. Imma dan mhux vera. Meta l-istudjużi qabblu l-manuskritti l-antiki maʼ dawk riċenti, sabu li kien hemm biss ftit kliem differenti u li l-messaġġ ma nbidilx.

8. X’inhi d-differenza bejn kopji tal-Iskrittura Griega u kopji taʼ kotba oħrajn?

⁸ Il-Kristjani tal-bidu wkoll għamlu kopji tal-Iskrittura. Huma qagħdu attenti meta kkopjaw il-kotba tal-Iskrittura Griega, u kienu jużawhom fil-laqgħat u meta jippritkaw. Studjuż li qabbel il-manuskritti tal-Iskrittura Griega maʼ kotba oħrajn taʼ dak iż-żmien, qal hekk dwar il-manuskritti tal-Bibbja: “Illum jeżistu iktar [manuskritti tal-Iskrittura Griega] minn kotba oħrajn, . . . u ħafna drabi jkunu kompluti.” Il-ktieb Anatomy of the New Testament jgħid: “Aħna nistgħu nkunu ċerti li dak li naqraw fit-traduzzjonijiet moderni [tal-Iskrittura Griega] jaqbel mal-messaġġ li kitbu l-kittieba fl-antik.”

9. Skont Isaija 40:8, x’nafu dwar il-messaġġ tal-Bibbja?

 ⁹ Għal mijiet taʼ snin, ħafna ħadmu iebes u qagħdu attenti meta kkopjaw il-Bibbja. Hu għalhekk li llum għandna Bibbja eżatt bħall-oriġinal biex naqraw u nistudjaw. c Aħna nafu li Ġeħova għamel ċert li jkollna l-Bibbja u li l-messaġġ tagħha jibqaʼ l-istess. (Aqra Isaija 40:8.) Imma xi wħud jgħidu li l-fatt li l-messaġġ tal-Bibbja ma nbidilx ma jfissirx li din ġejja minn Alla. Allura ejja naraw xi provi li juru li l-Bibbja ġejja mingħand Alla.

10. Agħti eżempju taʼ profezija li twettqet u li turi kemm hu veru dak li jgħid it-2 Pietru 1:21. (Ara l-istampi.)

¹⁰ Fil-Bibbja nsibu ħafna profeziji li twettqu, xi wħud minnhom mijiet taʼ snin wara li nkitbu. Anki l-istorja tikkonferma li ġraw. Din mhux taʼ sorpriża għalina għax nafu li l-profeziji tal-Bibbja ġejjin mingħand Ġeħova. (Aqra t-2 Pietru 1:21.) Aħseb dwar il-profeziji dwar il-qerda tal-belt taʼ Babilonja. Madwar 750 sena qabel Kristu (QK), il-profeta Isaija qal minn qabel li l-belt b’saħħitha taʼ Babilonja kienet se tintrebaħ mill-għedewwa tagħha. Hu anki semma l-isem tar-raġel li kien se jirbaħ lil Babilonja, Ċiru, u d-dettalji taʼ kif kien se jagħmel dan. (Is. 44:27, 28; 45:1, 2) Isaija pprofetizza wkoll li Babilonja kienet se tiġi meqruda u ħadd ma kien se jgħix iktar fiha. (Is. 13:19, 20) U eżatt hekk ġara. Fis-sena 539 QK, il-Medin u l-Persjani rebħu lil Babilonja, u fil-post fejn kienet din il-belt kbira ma baqaʼ xejn.—Ara l-vidjow Il-Bibbja Qalet X’Kien Se Jiġrilha Babilonja fil-ktieb Għix Ħajja Ferħana għal Dejjem, lezzjoni 03 punt 5.

11. Spjega kif il-profezija f’​Danjel 2:41-43 qed titwettaq illum.

¹¹ Il-profeziji tal-Bibbja ma twettqux  biss fil-passat, imma anki llum qed naraw profeziji jitwettqu. Pereżempju, aħseb dwar il-profezija taʼ Danjel dwar il-Qawwa Dinjija Anglo-Amerikana. (Aqra Danjel 2:41-43.) Din il-profezija qalet bl-eżatt li l-Qawwa Dinjija Anglo-Amerikana se jkollha “parti b’saħħitha” bħall-ħadid u “parti dgħajfa” bħat-tafal. Illum nistgħu naraw kemm dan hu veru. Il-Brittanja u l-Amerka kienu b’saħħithom ħafna, bħall-ħadid, billi rebħu ż-żewġ Gwerer Dinjin u baqaʼ jkollhom qawwa militari b’saħħitha. Imma l-qawwa tagħhom iddgħajfet minħabba n-nies li jgħixu f’dawn il-pajjiżi. Spiss, huma jipprotestaw kontra n-negozjanti u l-gvern. Espert fil-politika tad-dinja qal: “L-Istati Uniti hu l-iktar pajjiż demokratiku li ma jaqbilx fil-politika.” U l-Brittanja, il-parti l-oħra tal-qawwa dinjija, ilha mifruda għal dawn l-aħħar snin minħabba li n-nies ma jistgħux jaqblu x’relazzjoni għandu jkollu l-pajjiż mal-Unjoni Ewropea. Din il-firda għamlitha kważi impossibbli għall-Qawwa Dinjija Anglo-Amerikana biex tasal li tieħu d-deċiżjonijiet.

12. Il-profeziji tal-Bibbja minn xiex jikkonvinċuna?

¹² Il-ħafna profeziji tal-Bibbja li diġà twettqu jsaħħu l-fiduċja tagħna li l-wegħdi t’Alla għall-futur se jitwettqu wkoll. Aħna nħossuna bħalma ħassu s-salmista li talab lil Ġeħova: “Jien nixtieq ħafna li ssalvani, għax nittama fil-kelma tiegħek.” (Salm 119:81) Fil-Bibbja, Ġeħova b’qalb tajba tana “futur u tama.” (Ġer. 29:11) It-tama tagħna għall-futur ma tiddependix fuq dak li jagħmel il-bniedem, imma fuq il-wegħdi taʼ Ġeħova. Jalla nkomplu nsaħħu l-fidi tagħna fil-Kelma t’Alla billi nistudjaw sew il-profeziji tal-Bibbja.

13. Skont Salm 119:66, 138, x’inhi raġuni oħra għala nistgħu nafdaw il-Bibbja?

¹³ Raġuni oħra għala nistgħu nafdaw il-Bibbja hi minħabba li tgħin lin-nies meta jobdu l-pariri tagħha. (Aqra Salm 119:66, 138.) Pereżempju, koppji miżżewġin li kienu waslu biex jiddivorzjaw, issa huma ferħanin għax applikaw il-pariri tal-Bibbja. It-tfal tagħhom huma ferħanin li qed jitrabbew f’familja Kristjana u li l-ġenituri tagħhom qed jieħdu ħsiebhom u jħobbuhom.—Efes. 5:22-29.

14. Agħti eżempju li juri kif il-Bibbja tistaʼ tbiddel il-ħajja tan-nies għall-aħjar.

¹⁴ Anki nies li kienu kriminali rnexxielhom ibiddlu ħajjithom għax applikaw il-pariri tajbin li nsibu fil-Bibbja. Ara kif il-pariri tal-Bibbja għenu lil ħabsi jismu Jack. d Hu kien kriminal vjolenti, magħruf bħala wieħed mill-iktar ħabsin perikolużi fost dawk li ngħataw is-sentenza għall-mewt. Darba waħda Jack mar fuq studju tal-Bibbja. Hu kien impressjonat bil-qalb tajba li wrew l-aħwa waqt l-istudju u ddeċieda li jibda jistudja. Hekk kif beda japplika l-pariri tal-Bibbja fil-ħajja tiegħu, hu biddel il-mod kif iġib ruħu u sar persuna aħjar. Maż-żmien, Jack ikkwalifika biex ikun pubblikatur mhux mgħammed u tgħammed. Hu pprietka dwar is-Saltna t’Alla lil ħabsin oħrajn  u għen minn tal-inqas erbgħa biex jitgħallmu l-verità. Meta waslet il-ġurnata li fiha ngħata l-mewt, hu kien raġel differenti. Waħda mill-avukati tiegħu qalet: “Jack mhux l-istess persuna li kont naf 20 sena ilu. It-tagħlim tax-Xhieda taʼ Ġeħova biddillu ħajtu.” Għalkemm Jack ingħata l-mewt, l-eżempju tiegħu jurina li aħna nistgħu nafdaw fil-Kelma t’Alla u fil-qawwa tagħha li tistaʼ tbiddel il-ħajja tan-nies għall-aħjar.—Is. 11:6-9.

15. Il-pariri tal-Bibbja kif jagħmlu lix-Xhieda taʼ Ġeħova differenti minn nies oħra? (Ara l-istampa.)

¹⁵ Minħabba li japplika l-pariri tal-Bibbja, il-poplu t’Alla hu magħqud. (Ġw. 13:35; 1 Kor. 1:10) Ħafna nies jinnotaw il-paċi u l-unità taʼ bejnietna għax il-biċċa l-kbira tan-nies illum huma mifrudin minħabba l-politika, ir-razza, jew affarijiet oħrajn. Żagħżugħ jismu Jean baqaʼ mistagħġeb meta ra din l-għaqda fost ix-Xhieda taʼ Ġeħova. Hu trabba f’pajjiż Afrikan. Meta bdiet gwerra, daħal fl-armata imma mbagħad ħarab lejn pajjiż ieħor. Hemmhekk iltaqaʼ max-Xhieda taʼ Ġeħova. Jean jgħid: “Jien tgħallimt li dawk li għandhom ir-reliġjon vera ma jiħdux sehem fil-politika u m’hemmx firda bejniethom. Minflok, iħobbu lil xulxin.” Hu jkompli jgħid: “Jien użajt ħajti biex niddefendi pajjiż. Imma meta tgħallimt dak li tgħid il-Bibbja, jien iddeċidejt li nuża ħajti biex naqdi lil Ġeħova.” Jean biddel ħajtu kompletament. Minflok ma jiġġieled ma’ nies li huma differenti minnu, issa hu jgħid lil dawk kollha li jiltaqaʼ magħhom dwar il-messaġġ taʼ paċi li tagħti l-Bibbja. Il-fatt li l-pariri tal-Bibbja għenu lil ħafna nies minn pajjiżi differenti juri b’mod ċar li nistgħu nafdaw il-Kelma t’Alla.

16. Għala huwa importanti li nsaħħu l-fidi tagħna fil-Kelma t’Alla?

¹⁶ Is-sitwazzjoni taʼ din id-dinja se tkompli sejra għall-agħar. Għalhekk, se jkun iktar diffiċli għalina biex nafdaw fil-Kelma t’Alla. In-nies jistgħu jipprovaw idaħħlulna d-dubji dwar il-veritajiet tal-Bibbja jew jekk Ġeħova hux qed juża lill-ilsir leali u għaqli biex jiggwida l-poplu tiegħu. Imma jekk inkunu konvinti li dak li tgħid il-Bibbja hu veru, aħna se nkunu nistgħu nirreżistu dawn l-attakki. Se nkunu ‘determinati li nobdu r-regoli taʼ Ġeħova l-ħin kollu, sakemm immutu.’ (Salm 119:112) Aħna ‘mhux se nistħu’ biex ngħidu lil oħrajn dwar il-verità u ninkuraġġuhom biex japplikaw il-pariri tal-Bibbja fil-ħajja tagħhom. (Salm 119:46) U aħna se nibqgħu ‘nissaportu bil-ferħ’ kull sitwazzjoni diffiċli, inkluż il-persekuzzjoni.—Kol. 1:11; Salm 119:143, 157.

17. L-iskrittura għal din is-sena xi tfakkarna?

¹⁷ Kemm napprezzaw li Ġeħova tana l-opportunità li nsiru nafu l-verità! Il-verità tgħinna biex nibqgħu kalmi u tgħallimna b’mod ċar kif għandna ngħixu f’dinja li qed issir iktar imħawda. Din tagħtina tama għal futur aħjar taħt is-Saltna t’Alla. Jalla l-iskrittura għas-sena 2023 tgħinna biex inkunu konvinti li dak kollu li tgħid il-Bibbja hu veru!—Salm 119:160.