1. X’jiġik f’moħħok meta taħseb f’Ġeħova?

 ĠIELI provajt timmaġina l-karattru taʼ Ġeħova? X’jiġik f’moħħok meta titolbu? Aħna ma nistgħux naraw lil Ġeħova, imma l-Bibbja tiddeskrivih b’modi differenti. Il-Bibbja tgħid li hu “bħal xemx u . . . tarka” u bħal “nar li jeqred.” (Salm 84:11; Ebr. 12:29) Eżekjel qal li f’viżjoni ra lil Ġeħova bħal ġawhra prezzjuża, jixgħel bħall-metall, u qawsalla. (Eżek. 1:​26-28) Dawn l-affarijiet dwar Ġeħova jaf jimpressjonawna ħafna jew iġegħluna nħossuna daqs naqra.

2. X’jistaʼ jagħmilha diffiċli biex nersqu qrib Ġeħova?

² Minħabba li lil Ġeħova ma narawhx, jistaʼ jkun diffiċli biex nemmnu li jħobbna. Xi nies forsi jaħsbu li Ġeħova ma jistax iħobbhom minħabba affarijiet ħżiena li ġrawlhom fil-ħajja. Forsi ma kellhomx missier li jurihom li jħobbhom. Ġeħova jifhem kif inħossuna u jaf li xi kultant ma jkunx faċli biex nersqu qrib tiegħu. Biex jgħinna, fil-Bibbja jurina x’karattru għandu.

3. Għala għandna naħsbu dwar l-imħabba taʼ Ġeħova?

³ L-iżjed kelma li tiddeskrivi lil Ġeħova sew hi l-imħabba. Fil-fatt il-Bibbja tgħid li “Alla hu mħabba.” (1 Ġw. 4:8) Kull ħaġa li jagħmel jagħmilha bi mħabba. Tant għandu mħabba u tant hi b’saħħitha li hu juriha maʼ kulħadd, mhux maʼ dawk li jħobbuh biss. (Mt. 5:​44, 45) F’dan l-artiklu se niddiskutu kif Ġeħova juri din il-kwalità.  Iktar ma nitgħallmu dwaru, iktar se nsiru nħobbuh.

ĠEĦOVA JĦOBBNA ĦAFNA

4. L-affezzjoni tenera li għandu Ġeħova kif iġġiegħlek tħossok? (Ara l-istampa.)

⁴ “Ġeħova juri affezzjoni b’tenerezza kbira.” (Ġak. 5:11) Fil-Bibbja, hu jqabbel lilu nnifsu maʼ omm li tħobb. (Is. 66:​12, 13) Immaġina omm li tħobb u tieħu ħsieb lit-tifel tagħha. Hi żżommu fuqha u titkellem miegħu bil-ħlewwa. Meta jkun muġugħ jew qed jibki tagħmel ċert li tieħu ħsiebu. Meta aħna nkunu inkwetati, nistgħu nibqgħu ċerti li Ġeħova jħobbna. Is-salmista kiteb: “Meta kelli ħafna ansjetà, int għentni u ferraħtni.”—Salm 94:19.

5. Xi tfisser l-imħabba u l-lealtà taʼ Ġeħova għalik?

⁵ Ġeħova hu leali. (Salm 103:8) Meta niżbaljaw, hu mhux ħa jieqaf iħobbna. L-Iżraelin weġġgħu lil Ġeħova għal ħafna drabi. Imma meta kien jiddispjaċihom u kienu jieqfu jagħmlu l-ħażin, hu kien jaċċertahom li se jibqaʼ jħobbhom. Pereżempju hu qalilhom: “Int kont prezzjuż f’għajnejja, qistek onorabbli, u ħabbejtek.” (Is. 43:​4, 5) Nistgħu nkunu ċerti li l-imħabba taʼ Ġeħova ma nbidlitx illum. Ġeħova mhux ħa jabbandunana, anki jekk għamilna żbalji kbar. Meta jiddispjaċina u nerġgħu lura għand Ġeħova, aħna ħa naraw li għadu jħobbna. Hu jwegħedna li “hu jaħfer bil-kbir.” (Is. 55:7) Il-Bibbja tgħid li meta jaħfrilna, Ġeħova jtina “żmien taʼ serħan il-moħħ.”—Atti 3:19.

6. Żakkarija 2:8 x’jgħallimna dwar Ġeħova?

⁶ Aqra Żakkarija 2:8. Peress li jħobbna, Ġeħova mill-ewwel jinduna kif inħossuna u jkun irid li jipproteġina. Hu jkun imdejjaq meta nkunu inkwetati. B’hekk nistgħu nkunu ċerti li hu ħa jismagħna meta nitolbu: “Ipproteġini bħall-mimmi t’għajnejk.” (Salm 17:8) L-għajn hi waħda mill-iktar partijiet sensittivi u importanti fil-ġisem. Allura meta Ġeħova jqabbilna mal-mimmi t’għajnejh, qisu qed jgħid, ‘Kull min iweġġagħkom qed iweġġaʼ xi ħaġa vera importanti għalija.’

7. Għala rridu nsiru iżjed ċerti li Ġeħova jħobbna?

 ⁷ Ġeħova jridek tkun ċert li hu jħobbok. Imma hu jaf li jistaʼ jkollna d-dubji jekk iħobbniex minħabba ċertu affarijiet li ġrawlna fil-passat. Jew forsi bħalissa stess għaddejjin minn xi ħaġa li ġġegħelna niddubitaw jekk Ġeħova jħobbniex. X’ħa jgħinna biex inkunu iżjed ċerti? Billi nitgħallmu kif Ġeħova juri mħabba maʼ Ġesù, mal-midlukin, u magħna.

KIF ĠEĦOVA JURI L-IMĦABBA

8. Ġesù għala kien ċert li Ġeħova jħobbu?

⁸ Peress li qattgħu biljuni taʼ snin fis-sema flimkien, Ġeħova u Ġesù saru close u jħobbu ħafna lil xulxin. Bħalma naraw f’​Mattew 17:​5, Ġeħova qal ċar kemm iħobb lil Ġesù. Ġeħova setaʼ sempliċiment qal, ‘Dan hu l-wieħed li jien ferħan ħafna bih.’ Imma biex jurina kemm kien iħobbu, hu qal: “Ibni l-maħbub.” Ġeħova kien kburi b’Ġesù, speċjalment għax kien lest li jmut għan-nies. (Efes. 1:7) U Ġesù ma kellux dubji li Ġeħova kien iħobbu. Għal darba wara l-oħra qal li kien ċert li Missieru kien iħobbu.—Ġw. 3:35; 10:17; 17:24.

9. Rumani 5:5 kif juri li Ġeħova jħobb lill-midlukin?

⁹ Ġeħova jgħid ukoll li jħobb lill-midlukin. (Aqra Rumani 5:5.) L-appostlu Pawlu qal li l-imħabba t’Alla “tferrgħet fi qlubna.” Dizzjunarju tal-Bibbja jqabbel l-imħabba t’Alla maʼ “xmara.” Dan l-eżempju juri kemm Ġeħova jħobb lill-midlukin. Huma jafu li Ġeħova jħobbhom. (Ġuda 1) L-appostlu Ġwanni spjega kif iħossuhom meta kiteb: “Ara liema xorta taʼ mħabba tana l-Missier, sabiex nissejħu wlied Alla.” (1 Ġw. 3:1) Imma Ġeħova jħobb lill-midlukin biss? Le, Ġeħova wera li jħobbna kollha.

10. X’juri l-iżjed kemm iħobbok Ġeħova?

¹⁰ X’juri l-iżjed kemm iħobbok Ġeħova? Is-sagrifiċċju taʼ Ġesù. Ħadd qatt ma wera mħabba bħalma wera Ġeħova b’dan is-sagrifiċċju. (Ġw. 3:16; Rum. 5:8) Hu ħalla lil Ġesù, Ibnu l-għażiż, imut biex b’hekk jinħafru d-dnubiet tan-nies kollha u nkunu nistgħu nsiru ħbieb taʼ Ġeħova. (1 Ġw. 4:10) Iktar ma naħsbu dwar is-sagrifiċċju li għamlu Ġeħova u Ġesù, iktar ħa nifhmu kemm iħobbu lil kull wieħed u waħda minna. (Gal. 2:20) Ġeħova ma bagħatx lil Ġesù biex iħallas il-fidwa għax hu ġust biss, imma għax iħobbna wkoll. Ġeħova wera kemm iħobbna billi ta l-iktar ħaġa prezzjuża għalih—Ibnu Ġesù. Hu ħalla lil Ġesù jbati u jmut minħabba fina.

11. X’nitgħallmu minn Ġeremija 31:3?

¹¹ Bħalma rajna, Ġeħova mhux biss iħobbna, imma jgħidilna wkoll kemm iħobbna. (Aqra Ġeremija 31:3.) Ġeħova ġibidna lejh għax iħobbna. (Ara l-prinċipju f’​Dewteronomju 7:​7, 8.) Xejn u ħadd ma jistaʼ jifridna minn dik l-imħabba. (Rum. 8:​38, 39) Int kif tħossok dwar dan? Aqra Salm 23, ara kif David ħassu dwar l-imħabba taʼ Ġeħova u kif tħossok int.

KIF TĦOSSOK DWAR L-IMĦABBA TAʼ ĠEĦOVA?

12. Salm 23 fuq xiex jitkellem?

¹² Aqra Salm 23:​1-6. F’​Salm 23, David qal kemm kien ċert li Ġeħova jħobbu u jieħu ħsiebu. Hu jitkellem dwar kemm kienu ħbieb hu u Ġeħova, u hemmhekk  iqabblu maʼ Ragħaj. David ħassu komdu jħalli lil Ġeħova jmexxih u hu kien jafdah f’kollox. David kien jaf li Ġeħova se jurih li jħobbu għal ħajtu kollha. Imma għala kien daqshekk ċert?

13. David għala kien ċert li Ġeħova qed jieħu ħsiebu?

¹³ “Mhu se jonqosni xejn.” David ħass li Ġeħova kien qed jieħu ħsiebu għax dejjem tah li kellu bżonn. Barra minn hekk, hu kien jaf li Ġeħova hu l-ħabib tiegħu u li kien ferħan bih. Minħabba f’hekk kien ċert li jiġri x’jiġri fil-futur, Ġeħova kien ħa jibqaʼ jieħu ħsiebu. Peress li David kien ċert li Ġeħova kien iħobbu u ħa jieħu ħsiebu, dan għenu biex ma jinkwetax u jibqaʼ ferħan.—Salm 16:11.

14. Ġeħova kif jistaʼ juri li jħobbna?

¹⁴ Ġeħova jħobbna u jibqaʼ jieħu ħsiebna, speċjalment meta jiġrulna affarijiet koroh. Claire, a li ilha taqdi f’Betel għal iktar minn 20 sena, ma kinitx taf kif ħa tgħin lill-familja tagħha meta għaddew minn ħafna problemi f’daqqa. Missierha tatu puplesija (stroke) u waħda minn ħutha ġiet maqtugħa mis-sħubija. Apparti minn hekk, il-familja kellhom problema taʼ flus, u l-bank ħadilhom id-dar. Ġeħova kif ħa ħsiebhom u wriehom li jħobbhom? Claire tgħid: “Ġeħova dejjem ħa ħsieb il-bżonnijiet tal-familja tiegħi. Hu kemm-il darba tana iżjed milli kellna bżonn! Spiss naħseb kif Ġeħova għenna u qatt mhu ħa ninsa kemm iħobbna. Dawn il-ħsibijiet għenuni nibqaʼ ferħana naqdi lil Ġeħova, anki meta nqalgħu problemi oħrajn.”

15. David għala ħassu b’saħħtu? (Ara l-istampa.)

 ¹⁵ “Hu jsaħħaħni.” Kien hemm drabi li David ħassu inkwetat ħafna minħabba l-problemi li kellu. (Salm 18:​4-6) Imma hu ħassu b’saħħtu għax Ġeħova kien iħobbu u ħa ħsiebu. Ġeħova ħa ħsieb lill-ħabib tiegħu billi ħadu “f’art mimlija ħaxix” u “f’postijiet taʼ mistrieħ li fihom ħafna ilma.” Minħabba f’hekk, David ħassu b’saħħtu u setaʼ jibqaʼ jaqdi lil Ġeħova bil-ferħ.—Salm 18:​28-32.

16. Ġeħova kif saħħaħ lilek?

¹⁶ Bħal David, l-imħabba u l-lealtà taʼ Ġeħova jgħinuna nissaportu meta ngħaddu mill-problemi. (Lam. 3:22; Kol. 1:11) Ara minn xiex għaddiet Rachel. Hi kienet ixxokkjata u mdejqa meta waqt il-pandemija tal-COVID-19, ir-raġel tagħha telaq lilha u lil Ġeħova. Ġeħova kif għenha? Hi tgħid: “Ġeħova wrieni li jħobbni. Hu tani ħafna ħbieb li qattgħu l-ħin miegħi, sajruli, bagħtuli ħafna messaġġi sbieħ u skritturi inkuraġġanti, tbissmuli, u fakkruni li Ġeħova jimpurtah minni. Jien dejjem nirringrazzja lil Ġeħova li tani familja li tħobbni.”

17. David għala ‘ma beżax li jweġġaʼ’?

¹⁷ “Ma nibżax li nweġġaʼ, għax int miegħi.” David kemm-il darba kien fil-periklu li jmut, u kellu ħafna għedewwa b’saħħithom. Imma hu ħassu protett għax Ġeħova kien iħobbu. David setaʼ jagħmel il-kuraġġ għax kien jaf li Ġeħova dejjem kien miegħu. B’hekk setaʼ jkanta: “[Ġeħova] ħelisni minn dak kollu li kien qed ibeżżagħni.” (Salm 34:4) Minkejja li David għadda minn żminijiet tal-biżaʼ, hu setaʼ jagħmel il-kuraġġ għax kien jaf li Ġeħova jħobbu.

18. Meta tkun taf li Ġeħova jħobbok, kif se jtik il-kuraġġ fi żminijiet diffiċli?

¹⁸ Meta tkun taf li Ġeħova jħobbok, kif se jtik il-kuraġġ fi żminijiet diffiċli? Pijuniera jisimha Susi qalet kif ħassewhom hi u r-raġel meta t-tifel tagħhom neħħa ruħu b’idejh: “Meta tiġri xi ħaġa daqshekk kerha, tant taffettwak li tibda tibżaʼ li ħa jiġru iżjed affarijiet koroh. Imma l-imħabba li wriena Ġeħova għenitna nħossuna protetti.” Rachel, li ssemmiet qabel, tgħid: “Darba minnhom, tant kont imdejqa u inkwetata li  bdejt nitlob ngħajjat lil Ġeħova. Dak il-ħin ħassejt li kkalmani, bħal meta omm tikkalma lit-tarbija tagħha, u rqadt. Qatt mhu ħa ninsa kif għenni.” Anzjan jismu Tasos għamel erbaʼ snin fil-ħabs għax ma riedx jidħol fl-armata. Kif ħass lil Ġeħova jgħinu? Hu jgħid: “Ġeħova tani iktar milli kelli bżonn. Dan għenni nkun ċert li jien nistaʼ nafdah. U Ġeħova, permezz tal-ispirtu tiegħu, għenni nkun ferħan avolja l-ħabs vera post taʼ dwejjaq. Dan għenni nifhem li iktar ma nafda fih, iktar se nara kemm iħobbni. Allura meta kont il-ħabs bdejt naqdi bħala pijunier regulari.”

ERSAQ QRIB LEJN L-ALLA TAL-IMĦABBA

19. (a) Kif se nitolbu meta nkunu nafu li Alla jħobbna? (b) X’jogħġbok l-iktar dwar l-imħabba taʼ Ġeħova? (Ara l-kaxxa “ Versi li Jgħinuna Nħossu l-Imħabba taʼ Ġeħova.”)

¹⁹ L-affarijiet li rajna f’dan l-artiklu juruna li Ġeħova, “l-Alla taʼ l-imħabba,” hu magħna! (2 Kor. 13:11) Hu interessat f’kull wieħed u waħda minna. Aħna ċerti li ‘protetti bl-imħabba u l-lealtà tiegħu.’ (Salm 32:10) Iktar ma naħsbu dwar kif uriena li jħobbna, iktar se nersqu qrib tiegħu. Aħna m’għandniex niddejqu nitolbuh u ngħidulu kemm għandna bżonn l-imħabba tiegħu. Aħna nistgħu ngħidulu kull ħaġa li tinkwetana għax ċerti li hu jifhimna u jixtieq jgħinna.—Salm 145:​18, 19.

20. L-imħabba taʼ Ġeħova kif tgħinna nersqu qrib tiegħu?

²⁰ Bħalma n-nar isaħħanna fix-xitwa, l-imħabba li Ġeħova jurina tistaʼ tgħinna meta jkollna l-problemi. Mela kun ferħan, għax Ġeħova jħobbok. Imbagħad urih kif tħossok billi tgħid: “Jien inħobbu lil Ġeħova”!—Salm 116:1.