1. Ġeħova liema tama tana?

 ĠEĦOVA tana t-tama mill-isbaħ li ngħixu għal dejjem. Xi wħud għandhom it-tama li jgħixu għal dejjem fis-sema bħala ħlejjaq spirti immortali. (1 Kor. 15:50, 53) Però, ħafna għandhom it-tama li jgħixu ferħanin b’ħajja perfetta għal dejjem fuq l-art. (Riv. 21:3, 4) Din it-tama hi prezzjuża għalina, sew jekk inħarsu ’l quddiem li ngħixu għal dejjem fis-sema u sew jekk fuq l-art.

2. It-tama tagħna fuqiex hi bbażata u għala nistgħu ngħidu dan?

² Il-kelma “tama,” li tintuża fil-Bibbja, tistaʼ tfisser li “tistenna li se jiġru affarijiet tajbin.” Nistgħu nkunu ċerti li t-tama li għandna għall-futur se ssir realtà għax ġejja mingħand Ġeħova. (Rum. 15:13) Aħna nafu x’wegħedna u nafu wkoll li hu dejjem iżomm il-wegħdi tiegħu. (Num. 23:19) Aħna ċerti li Ġeħova għandu kemm ix-xewqa kif ukoll il-qawwa biex iwettaq dak kollu li qal li se jagħmel. It-tama tagħna mhix xi ħaġa li nimmaġinaw jew xi ħaġa li nixtiequ. Din hi bbażata fuq xi ħaġa li nafu li hi vera.

3. X’se niddiskutu f’dan l-artiklu? (Salm 27:14)

³ Missierna tas-sema jħobbna u jridna nafdawh. (Aqra Salm 27:14.) Meta t-tama tagħna f’Ġeħova tkun b’saħħitha, aħna se nkunu nistgħu nissaportu l-provi u nibqgħu kuraġġużi u ferħanin jiġri x’jiġri. Ejja naraw kif it-tama tagħna tipproteġina. L-ewwel se naraw kif it-tama  hi bħal ankra u bħal elmu. Imbagħad se niddiskutu kif nistgħu nsaħħu t-tama tagħna.

4. It-tama kif hi bħal ankra? (Ebrej 6:19)

⁴ Fl-ittra tiegħu lill-Ebrej, l-appostlu Pawlu qabbel it-tama m’ankra. (Aqra Ebrej 6:19.) Spiss hu vvjaġġa bil-baħar, għalhekk kien jaf li l-ankra kienet tintuża biex il-vapur ma jinġarrx mal-kurrent. Darba waħda, hu kien fuq vapur u qamet maltempata kbira. Dakinhar hu ra lill-baħrin jitfgħu l-ankri fil-baħar biex il-vapur ma jidħolx ġol-blat. (Atti 27:29, 39-41) Bħalma ankra żżomm vapur, it-tama tagħna żżommna qrib Ġeħova ħalli ma nitbegħdux minnu meta jkollna l-problemi li jkunu bħal maltempata kbira. It-tama tagħna tgħinna nibqgħu kalmi meta niffaċċjaw il-problemi għax nafu li l-affarijiet se jinbidlu. Tinsiex, Ġesù qalilna li se nkunu ppersegwitati. (Ġw. 15:20) Għalhekk, meta nimmeditaw fuq dak li wegħedna Ġeħova, se jgħinna biex inkomplu naqduh.

5. It-tama kif għenet lil Ġesù meta ffaċċja l-mewt?

⁵ Aħseb kif it-tama għenet lil Ġesù biex jibqaʼ leali minkejja li kien jaf li kien se jgħaddi minn dik it-tbatija kollha u jmut. F’Pentekoste tas-sena 33, l-appostlu Pietru kkwota profezija mill-ktieb tas-Salmi li turi kemm Ġesù kien kalm u ċert. Hu qal: “Anki ġismi jgħammar fit-tama; għax int ma tħallix lil ruħi fil-Qabar, lanqas ma tħalli lil-leali tiegħek jara t-taħsir. . . . B’wiċċek timlieni bil-ferħ.” (Atti 2:25-28; Salm 16:8-11) Għalkemm Ġesù kien jaf li se jmut, hu kellu tama soda li Alla se jirxoxtah u li se jkun ferħan li jerġaʼ jmur ħdejn Missieru.—Ebr. 12:2, 3.

6. Ħuna Chinn x’qal dwar it-tama?

⁶ It-tama tagħna għenet lil ħafna minn ħutna biex jibqgħu jissaportu. Aħseb dwar l-eżempju taʼ Leonard Chinn, ħu leali li kien jgħix l-Ingilterra. Fl-Ewwel Gwerra Dinjija, hu spiċċa l-ħabs għax ma riedx jidħol fl-armata. Għal xahrejn żammewh ġo ċella waħdu u wara ġegħluh jagħmel xogħol iebes ħafna. Iktar tard hu kiteb: “Dak li għaddejt minnu għenni nara kemm għandna bżonn it-tama biex nibqgħu nissaportu. Aħna għandna l-eżempju taʼ Ġesù, l-appostli, u l-profeti kif ukoll il-wegħdi sbieħ li nsibu fil-Bibbja. Dan kollu jinkuraġġina għall-futur u jgħinna biex nibqgħu nissaportu.” It-tama kienet bħal ankra għal Leonard, u tistaʼ tkun l-istess għalina wkoll.

7. Il-provi kif isaħħu t-tama tagħna? (Rumani 5:3-5; Ġakbu 1:12)

⁷ It-tama tagħna ssir iktar b’saħħitha wara li nissaportu l-provi, nesperjenzaw l-għajnuna taʼ Ġeħova, u nkunu nafu li hu qed jieħu pjaċir bina. (Aqra Rumani 5:3-5; Ġakbu 1:12.) Għalhekk, issa t-tama tagħna hi b’saħħitha iktar minn meta sibna l-verità. Satana jrid li l-provi tagħna jiskuraġġuna. Imma bl-għajnuna taʼ Ġeħova, aħna nistgħu nibqgħu nissaportu l-provi b’suċċess.

8. It-tama kif inhi bħal elmu? (1 Tessalonikin 5:8)

⁸ Il-Bibbja tqabbel it-tama tagħna m’elmu. (Aqra l-1 Tessalonikin 5:8.) Suldat jilbes l-elmu biex jipproteġi rasu.  Fil-ġlieda li għandna kontra Satana, irridu nipproteġu lil moħħna mill-attakki tiegħu. Hu juża ħafna modi differenti biex jittantana u jġegħelna naħsbu dwar affarijiet ħżiena. Bħalma l-elmu jipproteġi ras is-suldat, it-tama tagħna tipproteġi l-mod kif naħsbu biex nibqgħu leali lejn Ġeħova.

9. X’jiġrilhom in-nies jekk ma jkollhomx tama?

⁹ It-tama li ngħixu għal dejjem tgħinna nuru l-għerf u nieħdu deċiżjonijiet tajbin. Mill-banda l-oħra, jekk it-tama tagħna ma tibqax b’saħħitha u nibdew naħsbu fuq ix-xewqat tagħna, nistgħu ninsew it-tama li ngħixu għal dejjem. Aħseb xi ġralhom xi Kristjani li kienu jgħixu f’Korintu. Huma tilfu l-fidi tagħhom f’wegħda importanti t’Alla—it-tama tal-irxoxt. (1 Kor. 15:12) Pawlu kiteb li dawk li ma kinux jemmnu fl-irxoxt kienu qed jgħixu biex jagħmlu dak li xtaqu huma biss. (1 Kor. 15:32) Illum, ħafna li m’għandhomx tama fil-wegħdi t’Alla jagħmlu dak kollu li jistgħu biex jipprovaw ikunu ferħanin. Imma aħna differenti għax nemmnu fil-futur li wegħedna Alla. It-tama tagħna hi bħal elmu li jipproteġi l-mod kif naħsbu u jgħinna biex ma naħsbux dwarna nfusna. Dan għax nistgħu nagħmlu ħsara l-ħbiberija tagħna maʼ Ġeħova.—1 Kor. 15:33, 34.

10. It-tama kif tipproteġina minn ħsibijiet ħżiena?

¹⁰ It-tama tistaʼ tipproteġina wkoll biex ma naħsbux li hu għalxejn li nipprovaw nogħġbu lil Ġeħova. Pereżempju, xi wħud jistgħu jgħidu: ‘Jien qatt mhu se nkun maʼ dawk li se jgħixu għal dejjem. Jien mhux tajjeb biżżejjed. Jien qatt mhu se jirnexxili ngħix skont il-livelli t’Alla.’ Ftakar li l-ħabib falz taʼ Ġob, Elifaż, uża raġunar simili. Elifaż qal: “Jistaʼ xi ħadd ikun nadif f’għajnejn Alla?” U dwar Alla qal: “Alla lanqas biss għandu fidi fl-anġli tiegħu, u lanqas is-sema mhi nadifa f’għajnejh.” (Ġob 15:14, 15) Dan kollu gideb! Ftakar li Satana jridek taħseb hekk. Hu jaf li jekk tibda taħseb hekk, int tibda titlef it-tama li għandek. Mela taċċettax il-gideb taʼ Satana, u ffoka fuq il-wegħdi taʼ Ġeħova. Żomm f’moħħok li hu jridek tgħix għal dejjem u li se jgħinek biex tgawdi din il-ħajja.—1 Tim. 2:3, 4.

11. Għala għandna nkunu paċenzjużi?

¹¹ Mhux dejjem faċli biex inżommu t-tama tagħna soda. Meta nkunu qed nistennew lil Ġeħova jwettaq il-wegħdi tiegħu, nistgħu nitilfu l-paċenzja. Ġeħova ilu jeżisti minn dejjem u l-mod kif iħares lejn iż-żmien hu differenti minn tagħna. (2 Pt. 3:8, 9) Hu se jagħmel dak li wegħedna bl-aħjar mod, imma forsi mhux meta rridu aħna. Waqt li qed nistennew lil Ġeħova jwettaq il-wegħdi tiegħu, x’jistaʼ jgħinna nżommu t-tama tagħna soda?—Ġak. 5:7, 8.

12. Skont Ebrej 11:1, 6, it-tama kif għandha x’taqsam mal-fidi?

¹² Aħna se nżommu t-tama tagħna soda jekk nibqgħu qrib Ġeħova, għax hu l-wieħed li se jwettaq it-tama li għandna. Fil-fatt, biex ikollna t-tama jrid ikollna l-fidi li Ġeħova jeżisti u li hu “jippremja lil dawk li jfittxuh bil-ħeġġa.” (Aqra Ebrej 11:1, 6.) Iktar ma Ġeħova jkun reali għalina, iktar se nkunu ċerti li hu se jwettaq il-wegħdi tiegħu. Ejja naraw xi  modi kif insaħħu l-ħbiberija tagħna maʼ Ġeħova u nżommu t-tama b’saħħitha.

13. Kif nistgħu nersqu qrib t’Alla?

¹³ Itlob lil Ġeħova u aqra l-Bibbja. Minkejja li ma narawx lil Ġeħova, xorta nistgħu nersqu qrib tiegħu. Nistgħu nitkellmu miegħu fit-talb u nkunu ċerti li se jismagħna. (Ġer. 29:11, 12) Nistgħu nisimgħu lil Alla billi naqraw il-Kelma tiegħu u nimmeditaw fuqha. Meta naqraw dwar kif Ġeħova ħa ħsieb il-qaddejja tiegħu fil-passat, it-tama tagħna se tkompli tissaħħaħ. Kulma nkiteb fil-Kelma t’Alla “nkiteb għall-istruzzjoni tagħna, biex permezz tas-sabar tagħna u permezz tal-faraġ mill-Iskrittura jkollna t-tama.”—Rum. 15:4.

14. Għala għandna naħsbu dwar dak li Ġeħova għamel għal oħrajn?

¹⁴ Immedita fuq kif Ġeħova żamm il-wegħdi tiegħu. Aħseb dwar dak li Alla għamel għal Abraham u Sara. Huma kienu xjaħu u allura ma setax ikollhom tfal. Imma Alla wegħedhom li kien se jkollhom tarbija. (Ġen. 18:10) Abraham x’għamel? Hu “kellu fidi bbażata fuq it-tama li jsir missier taʼ ħafna ġnus.” (Rum. 4:18) Għalkemm Abraham ma kienx jaf kif il-wegħda t’Alla setgħet titwettaq, hu kien ċert li Ġeħova kien se jwettaq il-wegħda tiegħu. Dan ir-raġel leali ma kienx iddiżappuntat. (Rum. 4:19-21) Rakkonti bħal dawn jgħallmuna li Ġeħova dejjem se jwettaq il-wegħdi tiegħu, anki jekk għalina jidhru impossibbli.

15. Għala għandna naħsbu dwar dak li Alla għamel għalina?

¹⁵ Aħseb dwar dak li Ġeħova għamel għalik. Aħseb kif int diġà bbenefikajt  mit-twettiq tal-wegħdi li hemm fil-Bibbja. Pereżempju, Ġesù wegħedna li Missieru se jipprovdilna l-affarijiet li jkollna bżonn biex ngħixu. (Mt. 6:32, 33) Ġesù wiegħdek ukoll li meta titlob lil Ġeħova għall-ispirtu qaddis hu se jagħtihulek. (Lq. 11:13) Ġeħova żamm dawn il-wegħdi. X’aktarx tistaʼ taħseb dwar wegħdi oħrajn li hu żamm miegħek. Pereżempju, hu wiegħdek li se jaħfirlek, jinkuraġġik, u jagħtik dak li għandek bżonn biex tibqaʼ qrib tiegħu. (Mt. 6:14; 24:45; 2 Kor. 1:3) Meta timmedita fuq dak li Ġeħova diġà għamel għalik, int se ssaħħaħ it-tama tiegħek fuq dak li se jagħmel għalik fil-futur.

16. It-tama għala hi rigal prezzjuż?

¹⁶ It-tama li ngħixu ħajja taʼ dejjem hi rigal prezzjuż mingħand Alla. Aħna nħarsu ’l quddiem għal futur mill-isbaħ, u ċerti li dan se jiġri. It-tama hi bħal ankra, li tgħinna nissaportu l-provi, niffaċċjaw il-persekuzzjoni, u anki l-mewt. Hi wkoll bħal elmu, li jipproteġi lil moħħna biex ma naħsbux dwar affarijiet ħżiena, u nagħmlu dak li hu tajjeb. Din it-tama li nsibu fil-Bibbja tgħinna biex insiru nafu lil Alla aħjar u turina kemm iħobbna. Jekk inżommu din it-tama soda, aħna se nibbenefikaw ħafna.

17. It-tama tagħna għala twassal għall-ferħ?

¹⁷ Fl-ittra tiegħu lir-Rumani, l-appostlu Pawlu inkuraġġiehom: “Thennew bit-tama.” (Rum. 12:12) Pawlu setaʼ jkun ferħan għax hu kien ċert li jekk jibqaʼ leali, hu setaʼ jkollu l-ħajja taʼ dejjem fis-sema. Aħna wkoll nistgħu nifirħu bit-tama li għandna għax ċerti li Ġeħova se jżomm il-wegħdi tiegħu. Bħalma kiteb is-salmista, “ferħan hu dak . . . li jittama f’Ġeħova l-Alla tiegħu. . . . Hu dejjem leali.”—Salm 146:5, 6.