1. Ġesù x’se jagħmel dalwaqt?

 QED ngħixu fi żmien li se jkun fih ħafna bidliet! Dalwaqt, Ġesù se jiġġudika lil kulħadd. Hu qalilna x’kien se jiġri qabel dan iż-żmien. Hu ta “sinjal” taʼ meta se jiġi lura u “tat-tmiem taʼ din id-dinja.” (Mat. 24:3) Din il-profezija nsibuha f’​Mattew 24 u 25, Marku 13, u Luqa 21.

2. X’se niddiskutu f’dan l-artiklu, u kif se jgħinna?

² Biex jgħinna, Ġesù qal tliet eżempji. Dawn huma bħal twissijiet għalina. L-ewwel eżempju hu tan-nagħaġ u l-mogħoż, it-tieni tal-10 verġni, u t-tielet tat-talenti. Kull wieħed minnhom jgħinna nifhmu li Ġesù se jiġġudika lil kull persuna skont dak li tagħmel. F’dan l-artiklu se niddiskutu kull eżempju u naraw x’nistgħu nitgħallmu minnhom. L-ewwel wieħed hu tan-nagħaġ u l-mogħoż.

IN-NAGĦAĠ U L-MOGĦOŻ

3. Ġesù meta se jiġġudika lin-nies?

³ Fl-eżempju tan-nagħaġ u l-mogħoż, Ġesù se jiġġudika lin-nies skont jekk aċċettawx l-aħbar tajba u  ssapportjawx lil ħutu l-magħżulin. (Mat. 25:​31-46) Hu se jara jekk humiex nagħaġ jew mogħoż fiż-żmien taʼ tbatija kbira, eżatt qabel Armageddon. (Mat. 24:21) Bħalma ragħaj jifred lin-nagħaġ minn mal-mogħoż, Ġesù se jifred lil dawk li ssapportjaw lill-magħżulin minn dawk li ma ssapportjawhomx.

4. Skont Isaija 11:​3, 4, kif nistgħu nkunu ċerti li Ġesù se jiġġudika b’mod ġust? (Ara l-istampa fuq quddiem tar-rivista.)

⁴ Il-Bibbja tgħid li meta Ġesù jiġġudika għal Ġeħova, dejjem ikun ġust. (Aqra Isaija 11:​3, 4.) Hu qed joqgħod attent għal x’qed jagħmlu, x’qed jaħsbu, u x’qed jgħidu n-nies, inkluż kif qed jittrattaw lill-magħżulin. (Mat. 12:​36, 37; 25:40) Hu se jkun jaf min issapportjahom. a Mod importanti taʼ kif jagħmlu dan hu billi jgħinuhom jippritkaw. Lil dawn l-uħud, Ġesù se jiġġudikahom bħala “nies sewwa” u b’hekk se jkollhom l-opportunità li jgħixu għal dejjem fuq l-art. (Mat. 25:46; Riv. 7:​16, 17) Kemm hu rigal mill-isbaħ! Jekk waqt iż-żmien taʼ tbatija kbira u wara tibqaʼ leali, ismek se jibqaʼ “fil-ktieb tal-ħajja.”—Riv. 20:15.

5. X’nitgħallmu mill-eżempju tan-nagħaġ u l-mogħoż, u fuq min jitkellem b’mod speċjali?

⁵ Uri li int leali. L-eżempju tan-nagħaġ u l-mogħoż jitkellem b’mod speċjali fuq dawk li għandhom it-tama li jgħixu għal dejjem fuq l-art. Huma juru li għandhom il-fidi billi jgħinu lill-magħżulin jippritkaw u billi jobdu d-direzzjoni tal-ilsir leali u għaqli li għażel Ġesù. (Mat. 24:45) Imma anki dawk li għandhom it-tama li jgħixu fis-sema jridu joqogħdu attenti għal din it-twissija. Ġesù qed joqgħod attent għal dak li jagħmlu, jaħsbu, u jgħidu wkoll. Allura anki huma jridu jkunu leali. Ġesù semma żewġ eżempji oħra li jitkellmu b’mod speċjali dwar il-magħżulin. Dawn qegħdin f’​Mattew kapitlu 25. Issa se naraw l-eżempju tal-10 verġni.

L-10 VERĠNI

6. Il-ħames verġni kif urew li kienu għaqlin? (Mattew 25:​6-10)

⁶ Fl-eżempju tal-verġni, Ġesù tkellem dwar 10 verġni li marru jiltaqgħu maʼ għarus. (Mat. 25:​1-4) Huma kollha xtaqu jidħlu fil-festa tat-tieġ miegħu. Ġesù qal li kien hemm ħamsa minnhom “għaqlin” u ħamsa “boloh.” L-għaqlin kienu preparati u kienu lesti jistennew kemm hemm bżonn, anki jekk jiġi tard. Allura, ġabu l-lampi taż-żejt magħhom biex ikollhom id-dawl u ġabu żejt żejjed f’każ li l-għarus idum biex jiġi. Dan juri li huma kienu preparati sew biex iżommu l-lampi mixgħulin. (Aqra Mattew 25:​6-10.) Meta wasal l-għarus, il-verġni li kienu għaqlin daħlu miegħu għall-festa tat-tieġ. Bl-istess mod, il-Kristjani magħżulin li juru li huma lesti billi jibqgħu leali sakemm wasal l-Għarus, jiġifieri Ġesù, se jiġu ppremjati billi jidħlu fis-Saltna t’Alla. b (Riv. 7:​1-3) Imma xi ġralhom il-ħames verġni boloh?

7. Xi ġralhom il-ħames verġni boloh, u għala?

⁷ Il-ħames verġni boloh ma kinux  lesti meta wasal l-għarus, għax il-lampi tagħhom kienu se jintfew u ma kellhomx biżżejjed żejt. Meta ndunaw li ż-żejt kien se jispiċċa, huma marru jixtru. Allura, meta wasal l-għarus ma kinux hemmhekk. Imma “l-verġni li kienu lesti daħlu miegħu għall-festa tat-tieġ, u ngħalaq il-bieb.” (Mat. 25:10) Meta l-ħames verġni boloh waslu lura u xtaqu jidħlu għat-tieġ, hu qalilhom: “Ma nafkomx.” (Mat. 25:​11, 12) Dawk il-verġni ma kinux preparati biex jistennew l-għarus kemm kien hemm bżonn. Il-magħżulin x’jistgħu jitgħallmu minn dan?

8-9. Il-magħżulin x’jistgħu jitgħallmu mill-eżempju tal-verġni? (Ara l-istampa.)

⁸ Uri li int preparat u attent. Ġesù ma kienx qed jgħid li kien se jkun hemm żewġ gruppi taʼ magħżulin, jiġifieri grupp li kienu se jibqgħu leali sal-aħħar u ieħor le. Hu kien qed juri x’kien se jiġri lill-magħżulin li ma jibqgħux jistennewh sal-aħħar. Jekk ma kinux ħa jkunu lesti, ma kinux se jirċievu l-premju. (Ġw. 14:​3, 4) Din hi xi ħaġa serja ħafna! Kemm jekk għandna t-tama li ngħixu fis-sema u anki jekk fuq l-art, għandna nieħdu t-twissija tal-10 verġni bis-serjetà. Kollha kemm aħna għandna nibqgħu attenti u preparati biex nissaportu sal-aħħar.—Mat. 24:13.

⁹ Wara li qal l-eżempju tal-verġni biex juri kemm hu importanti li nkunu preparati u attenti, Ġesù qal l-eżempju tat-talenti. Dan l-eżempju juri kemm hu importanti li dejjem naħdmu iebes.

IT-TALENTI

10. Iż-żewġ ilsiera kif urew li kienu leali? (Mattew 25:​19-23)

¹⁰ Fl-eżempju tat-talenti, Ġesù tkellem dwar żewġ ilsiera li kienu leali u wieħed li ma kienx. (Mat. 25:​14-18) Iż-żewġ  ilsiera wrew li kienu leali għax ħadmu iebes biex jagħmlu iżjed flus għal sidhom. Qabel ma siefer, sidhom ħalla magħhom xi talenti, jiġifieri ammont kbir taʼ flus. Iż-żewġ ilsiera leali ħadmu iebes u għamlu negozju bihom. Għalhekk, meta sidhom ġie lura tawh id-doppju. Sidhom faħħarhom u huma ‘ferħu u gawdew miegħu.’ (Aqra Mattew 25:​19-23.) Imma xi ġralu t-tielet ilsir? X’għamel bil-flus li kien fdalu sidu?

11. Xi ġralu l-ilsir li kien “għażżien,” u għala?

¹¹ It-tielet ilsir irċieva talent wieħed imma kien “għażżien.” Sidu stenna li kien se juża t-talent bil-għaqal. Imma minflok, hu ħbieh fl-art. Allura meta s-sid ġie lura, l-ilsir tah biss talent wieħed. Dak l-ilsir ma kellux attitudni tajba, għax minflok ma skuża ruħu għall-iżball tiegħu, hu qal li sidu hu raġel li ‘jistenna ħafna mingħand oħrajn.’ B’hekk, is-sid ma ħax pjaċir bih, u ħadlu t-talent li kellu. Fl-aħħar, dak l-ilsir ġie mkeċċi.—Mat. 25:​24, 26-30.

12. Iż-żewġ ilsiera leali lil min jirrappreżentaw?

¹² Iż-żewġ ilsiera leali jirrappreżentaw lill-magħżulin li jibqgħu leali. Is-Sid, Ġesù, jistidinhom biex jifirħu miegħu. Huma se jirċievu l-premju tagħhom fis-sema permezz tal-ewwel irxoxt. (Mat. 25:​21, 23; Riv. 20:5b) Min-naħa l-oħra, l-eżempju tal-ilsir għażżien jagħti twissija lill-magħżulin. X’inhi?

13-14. Il-magħżulin x’jitgħallmu mill-eżempju tat-talenti? (Ara l-istampa.)

¹³ Aħdem iebes. Fl-eżempju tat-talenti, Ġesù ma kienx qed jgħid li l-magħżulin kienu se jsiru għażżenin. Hu kien qed juri x’jiġri jekk jitilfu l-ħeġġa tagħhom. Huma ma kinux se jkunu ċerti mis-sejħa u l-għażla tagħhom, u b’hekk ma jirtux is-Saltna tas-sema.—2 Pt. 1:10.

¹⁴ L-eżempji taʼ Ġesù dwar il-verġni u  t-talenti juru li l-Kristjani magħżulin kollha jridu jkunu preparati, attenti, u jaħdmu iebes. Imma Ġesù ta twissija oħra lill-magħżulin. Din insibuha f’​Mattew 24:​40, 41.

MIN SE “JIĠI AĊĊETTAT”?

15-16. Mattew 24:​40, 41 kif juri li l-magħżulin għandhom jibqgħu attenti?

¹⁵ Qabel tkellem dwar it-tliet eżempji, Ġesù wera kif se jiġu ġġudikati l-magħżulin biex jiġu aċċettati fis-Saltna t’Alla. Hu tkellem dwar żewġt irġiel jaħdmu f’għalqa u żewġ nisa jitħnu. Għalkemm l-irġiel jidhru li qed jagħmlu l-istess xogħol, “wieħed se jiġi aċċettat u l-ieħor se jiġi abbandunat,” u l-istess se jiġri liż-żewġ nisa. (Aqra Mattew 24:​40, 41.) Imbagħad qal lid-dixxipli tiegħu: “Għalhekk, ibqgħu għassa, għax ma tafux il-jum meta se niġi jien, il-Mulej tagħkom.” (Mat. 24:42) Ġesù qal xi ħaġa simili wara li tkellem dwar l-eżempju tal-10 verġni. (Mat. 25:13) Jistaʼ jkun li fiż-żewġ każijiet, kliem Ġesù għandu l-istess twissija? Milli jidher, iva. Il-magħżulin li huma leali biss se ‘jiġu aċċettati’ minn Ġesù u jidħlu fis-Saltna tas-sema.—Ġw. 14:3.

¹⁶ Ibqaʼ għassa. Jekk wieħed mill-magħżulin ma jibqax attent, mhux se jiġi aċċettat. (Mat. 24:31) Imma l-qaddejja taʼ Ġeħova kollha, anki dawk li għandhom it-tama li jgħixu fuq l-art, għandhom jibqgħu attenti u leali.

17. Għala m’għandniex għalfejn ninkwetaw jekk fi żmienna Ġeħova għadu jagħżel lil xi wħud biex ikunu magħżulin?

¹⁷ Aħna nafu lil Ġeħova sew, allura ċerti li kulma jagħmel hu tajjeb u ġust. B’hekk, m’għandniex għalfejn ninkwetaw jekk fi żmienna Ġeħova għadu jagħżel lil xi wħud biex ikunu magħżulin. c Nistgħu niftakru f’dak li qal Ġesù fl-eżempju tal-ħaddiema fl-għalqa tad-dwieli. (Mat. 20:​1-16) Il-ħaddiema li bdew jaħdmu fl-għalqa tard filgħaxija qalgħu l-istess paga bħal dawk li bdew jaħdmu kmieni filgħodu. Allura b’mod simili, ma tagħmilx differenza meta Ġeħova jagħżel lil dawk li se jkunu maʼ Ġesù fis-sema. Huma se jieħdu l-premju tagħhom jekk jibqgħu leali.

OQGĦOD ATTENT GĦAT-TWISSIJIET

18-19. X’tgħallimna mill-eżempji li qal Ġesù?

¹⁸ X’rajna f’dan l-artiklu? Iddiskutejna l-eżempju tan-nagħaġ u l-mogħoż. Dan juri li dawk li għandhom it-tama li jgħixu għal dejjem fuq l-art hu importanti li jibqgħu leali lejn Ġeħova mhux biss issa, imma anki fiż-żmien taʼ tbatija kbira. Fil-futur, Ġesù se jiġġudikahom, u dawk li jara li huma leali “se jirċievu l-ħajja taʼ dejjem.”—Mat. 25:46.

¹⁹ Rajna wkoll żewġ eżempji li jagħtu twissijiet lill-magħżulin. Fl-eżempju tal-10 verġni rajna li ħamsa kienu għaqlin. Huma kienu ppreparati u attenti biex jistennew lill-għarus sakemm ikun hemm bżonn. Imma l-ħamsa li kienu boloh ma kinux ippreparati. Allura l-għarus meta wasal ma ħallihomx jidħlu fil-festa tat-tieġ. Aħna wkoll għandna nkunu preparati biex nibqgħu nistennew sakemm Ġesù jeqred  din is-sistema. Imbagħad, fl-eżempju tat-talenti rajna li żewġ ilsiera ħadmu iebes għal sidhom. B’hekk, hu kien ferħan bihom. Imma l-ilsir għażżien tkeċċa. Dan jgħallimna li rridu nibqgħu naħdmu iebes għal Ġeħova sal-aħħar. Fl-aħħar, rajna li l-magħżulin għandhom jibqgħu għassa biex Ġesù jtihom il-premju. Huma jħarsu ’l quddiem biex ‘jinġabru’ maʼ Ġesù fis-sema. Wara Armageddon, huma se jkunu l-għarusa taʼ Ġesù fiż-żwieġ tal-Ħaruf.—2 Tes. 2:1; Riv. 19:9.

20. Ġeħova x’se jagħmel għal dawk li jagħtu kas it-twissijiet tiegħu?

²⁰ Ġesù dalwaqt se jiġġudika, imma m’għandniex għalfejn nibżgħu. Ġeħova jħobbna. Allura, jekk nibqgħu leali se jtina “l-qawwa iktar min-normal” biex jirnexxilna ‘noqogħdu quddiem Bin il-bniedem.’ (2 Kor. 4:7; Luqa 21:36) Kemm jekk għandna t-tama li mmorru fis-sema u anki jekk għandna t-tama li ngħixu għal dejjem fuq l-art, jekk nagħtu kas it-twissijiet li tana Ġesù fl-eżempji tiegħu, se nagħmlu lil Ġeħova ferħan. U Ġeħova hu qalbu tajba u jħobbna. B’hekk, isimna se jkun “fil-ktieb tal-ħajja.”—Dan. 12:1; Riv. 3:5.