1. Għalkemm iż-​żwieġ normalment jibda b’ferħ, dawk li jiżżewġu x’jistgħu jistennew li jesperjenzaw? (Ara l-​ewwel stampa.)

META l-​għarus u l-​għarusa jaraw lil xulxin dakinhar tat-​tieġ, huma jħossu ferħ kbir. Waqt li kienu qed joħorġu flimkien, l-​imħabba tagħhom għal xulxin tant kibret li riedu jiżżewġu, u b’hekk għamlu wegħda li jibqgħu leali lejn xulxin. Wara t-​tieġ, hekk kif bdew il-​ħajja tagħhom flimkien, kellhom bżonn jagħmlu bidliet sabiex jibqgħu magħqudin. Ġeħova, il-​Ħallieq taż-​żwieġ, irid li kull koppja jkollha żwieġ ferħan u taʼ suċċess, u b’hekk ta parir għaqli fil-​Kelma tiegħu, il-​Bibbja. (Proverbji 18:22) Minkejja dan, bħala nies imperfetti, il-​Bibbja tgħidilna li dawk li jiżżewġu se jkollhom il-​problemi, jew “tribulazzjoni f’laħamhom.” (1 Korintin 7:28) Il-​koppji kif jistgħu jnaqqsu dawn il-​problemi? U l-​Kristjani kif jistaʼ jkollhom suċċess fiż-​żwieġ?

2. Liema tipi taʼ mħabba għandhom juru l-​miżżewġin?

² Il-​Bibbja tgħallimna li l-​imħabba hi kwalità importanti. Imma hemm tipi differenti taʼ mħabba li l-​miżżewġin  għandhom juru fiż-​żwieġ. Pereżempju, m’għandux ikun hemm biss imħabba bħal dik taʼ bejn żewġt iħbieb imma mħabba romantika wkoll. U jekk għandhom it-​tfal, l-​imħabba bejn il-​membri tal-​familja ssir saħansitra iktar importanti. Imma hija l-​imħabba bbażata fuq prinċipji Kristjani li tagħmel żwieġ verament taʼ suċċess. L-​appostlu Pawlu ddeskriva din it-​tip taʼ mħabba meta qal: “Kull wieħed minnkom għandu jħobb lil martu bħalu nnifsu; mill-​banda l-​oħra, il-​mara għandu jkollha rispett profond lejn żewġha.”—Efesin 5:33.

3. Kemm għandha tkun b’saħħitha l-​imħabba fi żwieġ?

³ Pawlu kiteb: “Irġiel, komplu ħobbu lin-​nisa tagħkom, bħalma l-​Kristu wkoll ħabb lill-​kongregazzjoni u ta lilu nnifsu għaliha.” (Efesin 5:25) Illum, il-​Kristjani jimitaw l-​eżempju taʼ Ġesù billi jħobbu lil xulxin sewwasew bħalma Ġesù ħabb lid-​dixxipli tiegħu. (Aqra Ġwanni 13:34, 35; 15:12, 13.) Raġel u mara miżżewġin u li huma Kristjani tant għandu jkollhom imħabba għal xulxin li jkunu lesti li jmutu għal xulxin. Imma meta jkun hemm problemi serji fiż-​żwieġ, xi wħud forsi jħossu li l-​imħabba tagħhom mhix b’saħħitha ħafna. X’jistaʼ jgħinhom? L-​imħabba bbażata fuq prinċipju. Fil-​fatt din “kollox tiflaħ, kollox temmen, kollox tittama, kollox tissaporti.” Din it-​tip taʼ mħabba “ma tbatti qatt.” (1 Korintin 13:7, 8) Il-​miżżewġin għandhom jiftakru li huma għamlu wegħda. Huma wiegħdu li se jħobbu lil xulxin u li se jkunu leali lejn xulxin. Meta l-​Kristjani miżżewġin jiftakru x’wiegħdu, dan se jqanqalhom biex ifittxu l-​għajnuna taʼ Ġeħova u jaħdmu flimkien biex isolvu kwalunkwe problema.

4, 5. (a) Ir-​raġel, bħala l-​kap tal-​familja, x’inhi r-​responsabbiltà tiegħu? (b) Il-​mara kif għandha tqis lill-​kap tal-​familja? (ċ) Liema aġġustamenti kellha tagħmel koppja?

⁴ Pawlu ddeskriva r-​responsabbiltajiet li għandhom l-​imseħbin fiż-​żwieġ meta qal: “In-​nisa ħa jkunu sottomessi lejn żwieġhom bħallikieku lejn il-​Mulej, għax ir-​raġel hu l-​kap taʼ martu bħalma l-​Kristu wkoll hu l-​kap tal-​kongregazzjoni.” (Efesin 5:22, 23) Dan ma jfissirx li r-​raġel hu aħjar minn martu. Ġeħova tkellem dwar l-​irwol prezzjuż taʼ mara meta qal: “Mhux tajjeb li r-​raġel jibqaʼ waħdu. Se nagħmillu għajnuna, sieħba li taqbel għal miegħu.” (Ġenesi 2:18) Mara għandha tgħin lil żewġha biex ikun kap tal-​familja tajjeb. U raġel għandu bżonn jimita l-​eżempju taʼ mħabba li wera Ġesù, li hu “l-​kap tal-​kongregazzjoni.” Meta raġel jagħmel hekk, martu tħossha fis-​sigurtà u jkun iktar faċli għaliha biex tirrispettah u tappoġġjah.

⁵ Cathy, mart Fred, tammetti: “Meta kont single, kont indipendenti u kont nieħu ħsieb tiegħi nnifsi. Imma meta żżewwiġt kelli bżonn nagħmel aġġustamenti. Dan għamiltu hekk kif tgħallimt nistrieħ fuq żewġi. Mhux dejjem kien faċli. Imma meta bħala koppja għamilna l-​affarijiet kif irid Ġeħova, dan għenna nersqu ħafna eqreb taʼ xulxin.” ^[1] (Ara n-​nota fl-​aħħar.) Fred jgħid: “Li nieħu deċiżjonijiet qatt ma kien faċli għalija. Fiż-​żwieġ, l-​isfida tikber minħabba li mhux biss irrid naħseb fija imma wkoll f’marti. Imma billi  nfittex il-​gwida taʼ Ġeħova fit-​talb u nagħti widen għal dak li jkollha xi tgħid marti, kuljum issir iktar faċli. Inħossni li aħna team taʼ veru!”

6. L-​imħabba kif tistaʼ tkun “rabta perfetta li tgħaqqad” meta jinqalgħu l-​problemi fi żwieġ?

⁶ Iż-​żwiġijiet jistgħu jkunu b’saħħithom jekk ir-​raġel u l-​mara miżżewġin ‘ikomplu jissaportu lil xulxin u jaħfru lil xulxin mill-​qalb.’ Minħabba li huma imperfetti, it-​tnejn li huma se jiżbaljaw. Meta jiġri hekk, jistgħu jitgħallmu mill-​iżbalji tagħhom stess, jitgħallmu jaħfru, u juru mħabba bbażata fuq il-​prinċipji tal-​Bibbja. Din l-​imħabba “hi rabta perfetta li tgħaqqad.” (Kolossin 3:13, 14) Il-​miżżewġin jistgħu juru din l-​imħabba billi jkunu paċenzjużi u qalbhom tajba u billi ‘ma jżommux kont tal-​ħsara.’ (1 Korintin 13:4, 5) Meta jkun hemm xi nuqqas taʼ qbil, il-​koppja għandha ssolvi dan kemm jistaʼ jkun malajr, qabel ma tispiċċa l-​ġurnata. (Efesin 4:26, 27) Hemm bżonn l-​umiltà u l-​kuraġġ biex tgħid “Skużani talli weġġajtek,” imma permezz t’hekk tkun qed tgħin biex issolvi l-​problemi u tkun eqreb tas-​sieħeb jew is-​sieħba tiegħek fiż-​żwieġ.

7, 8. (a) Liema pariri tagħti l-​Bibbja dwar is-​sess fiż-​żwieġ? (b) L-​imseħbin fiż-​żwieġ għala għandhom juru tenerezza?

⁷ Il-​Bibbja tagħti pariri tajbin li jistgħu jgħinu koppja biex ikollha l-​ħarsa xierqa lejn is-​sess fiż-​żwieġ. (Aqra l-​1 Korintin 7:3-​5.) Huwa essenzjali għal raġel u mara miżżewġin biex jikkunsidraw is-​sentimenti u l-​bżonnijiet taʼ xulxin. Jekk raġel ma jurix tenerezza maʼ martu, hi għandha mnejn issibha diffiċli biex tieħu pjaċir bir-​relazzjonijiet sesswali. L-​irġiel għandhom jittrattaw lin-​nisa tagħhom “skond l-​għarfien.” (1 Pietru 3:7) Ħadd mill-​koppja m’għandu jġiegħel jew jisforza biex ikollu x’jaqsam sesswalment. Anzi dan għandu jiġi b’mod naturali min-​naħa tat-​tnejn. Raġel hu differenti minn mara. Spiss jiġri li raġel jitqanqal iktar malajr. Imma r-​raġel u l-​mara għandu jkollhom x’jaqsmu sesswalment biss meta t-​tnejn li huma jkunu lesti li jagħmlu dan.

⁸ Il-​Bibbja m’għandhiex regoli speċifiċi dwar it-​tipi differenti u l-​limiti taʼ intimità sesswali li jkun hemm bejn raġel u mara miżżewġin. Imma tenfasizza l-​importanza taʼ li tintwera l-​affezzjoni. (L-​Għanja taʼ Salamun 1:2; 2:6) Kristjani miżżewġin għandhom jittrattaw lil xulxin b’tenerezza.

9. Għaliex mhuwiex aċċettabbli għal xi ħadd li jkollu interess sesswali f’xi ħadd barra ż-​żwieġ?

⁹ Meta jkollna mħabba kbira għal Alla u għall-​proxxmu tagħna, ma nħallu xejn jew lil ħadd ipoġġi ż-​żwieġ tagħna fil-​periklu. Xi wħud dgħajfu jew saħansitra kissru ż-​żwieġ tagħhom billi qabdu l-​vizzju tal-​pornografija. Jeħtieġ li nirreżistu kwalunkwe xenqa li twassalna  għall-​pornografija jew affarijiet oħra li jqanqlu l-​aptit sesswali mhux xieraq. Hemm bżonn li nevitaw ukoll li nagħmlu xi ħaġa li tkun tidher bħallikieku qed nifflertjaw maʼ xi ħadd barra ż-​żwieġ. Ma nkunux qed nuru mħabba meta nagħmlu hekk. Hemm bżonn li niftakru li Alla jaf il-​ħsibijiet u l-​azzjonijiet kollha tagħna. Dan se jgħinna nsaħħu x-​xewqa tagħna biex nogħġbuh u biex nibqgħu leali fiż-​żwieġ.—Aqra Mattew 5:27, 28; Ebrej 4:13.

10, 11. (a) Kemm hu komuni d-​divorzju? (b) Il-​Bibbja x’tgħid dwar is-​separazzjoni? (ċ) X’se jgħin lill-​miżżewġin biex ma jisseparawx mill-​ewwel?

¹⁰ Meta problemi serji ma jiġux solvuti, xi koppji għandhom mnejn jiddeċiedu li jisseparaw jew jiddivorzjaw. F’xi pajjiżi, iktar minn nofs il-​koppji jiddivorzjaw. Naturalment, id-​divorzju mhuwiex daqshekk komuni fil-​kongregazzjoni Kristjana. Madankollu, il-​koppji Kristjani qed ikollhom problemi serji fiż-​żwieġ iktar minn qatt qabel.

¹¹ Il-​Bibbja tagħti dawn l-​istruzzjonijiet: “Il-​mara m’għandhiex tinfired minn żewġha; imma jekk tinfired, ħa tibqaʼ ma tiżżewwiġx, inkella terġaʼ tirranġa maʼ żewġha; u r-​raġel m’għandux jitlaq lil martu.” (1 Korintin 7:10, 11) Xi koppji għandhom mnejn iħossu li l-​problemi tagħhom tant huma diffiċli li jkollhom jisseparaw. Madankollu, Ġesù wera kemm hi serja s-​separazzjoni meta rripeta dak li Alla kien qal oriġinarjament dwar iż-​żwieġ, u mbagħad żied jgħid: “Dak li Alla għaqqad flimkien ħa ma jifirdu ebda bniedem.” (Mattew 19:3-​6; Ġenesi 2:24) Allura, Ġeħova jrid li l-​miżżewġin jibqgħu flimkien. (1 Korintin 7:39) Kulħadd irid jiftakar li rridu nagħtu rendikont tal-​azzjonijiet tagħna lil Ġeħova. Dan jistaʼ jgħinna nsolvu l-​problemi qabel ma jsiru iktar serji.

12. X’għandu mnejn iwassal lil xi ħadd miżżewweġ biex jikkunsidra li jissepara?

¹² Xi koppji għala jesperjenzaw problemi serji? Għal xi wħud, iż-​żwieġ tagħhom ma kienx dak li kienu qed jittamaw għalih, u b’hekk iħossuhom iddiżappuntani jew irrabjati. Spiss, il-​problemi jinqalgħu minħabba d-​differenzi fil-​mod kif in-​nies ikunu trabbew jew fil-​mod kif jaġixxu emozzjonalment. Diffikultajiet mal-​kunjati jew xi nuqqas taʼ qbil dwar kif jonfqu l-​flus jew kif irabbu t-​tfal, jistgħu wkoll jikkaġunaw problemi. Madankollu, ikun tajjeb li ninnotaw li l-​maġġorparti tal-​koppji Kristjani qed isibu soluzzjonijiet għall-​problemi tagħhom għax iħallu ’l Alla jiggwidahom.

13. X’inhuma xi raġunijiet validi għal separazzjoni?

¹³ Jistaʼ jkun hemm raġunijiet validi għal koppja biex tissepara. Sitwazzjonijiet estremi bħal nuqqas taʼ manteniment  magħmul bi ħsieb, abbuż fiżiku estrem, u periklu assolut għall-​ħajja spiritwali Kristjana huma raġunijiet għala xi wħud għażlu li jisseparaw. Meta jkun hemm problemi serji, il-​miżżewġin għandhom jitolbu l-​għajnuna tal-​anzjani. Dawn l-​irġiel għandhom ħafna esperjenza u jkunu jistgħu jgħinu koppja biex tapplika l-​pariri t’Alla fiż-​żwieġ. U meta l-​miżżewġin jitolbu għall-​ispirtu qaddis taʼ Ġeħova, dan jistaʼ jgħinhom japplikaw prinċipji Bibliċi u juru kwalitajiet Kristjani. (Galatin 5:22, 23) ^[2]—Ara n-​nota fl-​aħħar.

14. X’tgħid il-​Bibbja lill-​Kristjani li huma miżżewġin lil xi ħadd li mhuwiex qaddej taʼ Ġeħova?

¹⁴ Il-​Bibbja turi li hemm raġunijiet tajbin għal koppja biex tibqaʼ flimkien anki jekk xi ħadd minnhom mhuwiex jaqdi lil Ġeħova. (Aqra l-​1 Korintin 7:12-​14.) Is-​sieħba jew is-​sieħeb “jitqaddes” minħabba li jkun miżżewweġ persuna li taqdi ’l Alla. It-​tfal żgħar tal-​koppja jkunu kkunsidrati “mqaddsin,” u b’hekk ikunu taħt il-​protezzjoni t’Alla. Pawlu inkuraġġixxa lill-​miżżewġin Kristjani: “Mara, kif taf jekk issalvax lil żewġek? Jew, raġel, kif taf jekk issalvax lil martek?” (1 Korintin 7:16) Hemm ħafna eżempji tajbin taʼ rġiel u nisa Kristjani li għenu lill-​imseħbin tagħhom fiż-​żwieġ biex isiru qaddejja taʼ Ġeħova.

15, 16. (a) Liema parir tagħti l-​Bibbja lin-​nisa Kristjani li r-​raġel tagħhom ma jkunx qaddej t’Alla? (b) X’inhi l-​pożizzjoni taʼ Kristjan “jekk dak li ma jemminx ikun irid jinfired”?

¹⁵ L-​appostlu Pietru jagħti l-​parir biex in-​nisa Kristjani jkunu sottomessi lejn żwieġhom, “sabiex, jekk xi wħud ma jkunux ubbidjenti lejn il-​kelma, dawn jintrebħu mingħajr ebda kelma permezz tal-​kondotta tan-​nisa tagħhom, għax ikunu raw b’għajnejhom stess il-​kondotta safja tagħkom flimkien mar-​rispett profond.”  Oħt miżżewġa, minflok ma toqgħod titkellem dwar it-​twemmin tagħha l-​ħin kollu, għandu mnejn li tkun iktar t’għajnuna għal żewġha biex jaċċetta l-​verità meta jkollha “spirtu kwiet u ġwejjed li ma jitħassarx u li hu taʼ valur kbir f’għajnejn Alla.”—1 Pietru 3:1-​4.

¹⁶ Xi ngħidu jekk xi ħadd mill-​miżżewġin li mhux Xhud jagħżel li jissepara? Il-​Bibbja tgħid: “Jekk dak li ma jemminx ikun irid jinfired, ħa jinfired; il-​ħu jew l-​oħt m’hijiex fil-​jasar f’dawn iċ-​ċirkustanzi, imma Alla sejħilkom għall-​paċi.” (1 Korintin 7:15) Għalkemm is-​separazzjoni tistaʼ ġġib ċerta paċi, skont il-​Bibbja ma jkunx possibbli li Kristjan jerġaʼ jiżżewweġ. Imma ma jistax jipprova jisforza lis-​sieħba tiegħu biex tibqaʼ miegħu. Maż-​żmien, is-​sieħba li ma tkunx Xhud għandu mnejn tiddeċiedi li tirritorna biex tirranġa ż-​żwieġ. U din għandha mnejn issir qaddejja taʼ Ġeħova fil-​futur.

17. X’għandha tkun l-​ewwel prijorità għall-​miżżewġin Kristjani?

¹⁷ Minħabba li qed ngħixu fit-​tmiem tal-​“aħħar jiem,” qed nesperjenzaw “żminijiet kritiċi li diffiċli biex issib tarfhom.” (2 Timotju 3:1-​5) Huwa għalhekk li għandna bżonn il-​protezzjoni taʼ relazzjoni b’saħħitha maʼ Ġeħova. “Iż-​żmien li fadal tqassar,” kiteb Pawlu. “Minn issa ’l quddiem, dawk li għandhom in-​nisa ħa jkunu bħallikieku m’għandhomx, . . . u dawk li jużaw id-​dinja bħal dawk li ma jużawhiex bis-​sħiħ.” (1 Korintin 7:29-​31) Pawlu ma riedx jgħid li l-​miżżewġin għandhom jittraskuraw lil xulxin. Imma minflok, jeħtieġ li nagħtu prijorità ’l-​qima tagħna lil Ġeħova minħabba li qed ngħixu fl-​aħħar jiem.—Mattew 6:33.

18. Għala hu possibbli għall-​Kristjani li jkollhom żwieġ ferħan u taʼ suċċess?

¹⁸ F’dawn iż-​żminijiet diffiċli, naraw ħafna żwiġijiet li qed ifallu. Huwa possibbli li jkollna żwieġ ferħan u taʼ suċċess? Iva, jekk nibqgħu qrib Ġeħova u l-​poplu tiegħu, napplikaw il-​prinċipji Bibliċi, u naċċettaw il-​gwida tal-​ispirtu qaddis taʼ Ġeħova. Meta nagħmlu dan, inkunu qed nonoraw “dak li Alla għaqqad flimkien.”—Marku 10:9.