1. Abraham għala baqaʼ jittama li se jkollu tifel?

 ĠEĦOVA wiegħed lill-ħabib tiegħu Abraham li kien ħa jkollu tifel u li n-nies kollha kienu se jitbierku minħabba fih. (Ġen. 15:5; 22:18) Peress li Abraham kellu fidi soda f’Alla, kien konvint li l-wegħda t’Alla kienet se tiġri. Imma meta Abraham kellu 100 sena u l-mara tiegħu 90 sena, kien għad ma kellhomx tifel. (Ġen. 21:​1-7) Però, il-Bibbja tgħid: “[Abraham] kellu fidi bbażata fuq it-tama li jsir missier taʼ ħafna ġnus skond ma kien intqal.” (Rum. 4:18) Aħna nafu li dak li Abraham ittama għalih ġara. Hu kellu lil Iżakk. Abraham għala kien ċert li Ġeħova kien se jżomm il-wegħda tiegħu?

2. Abraham għala kien ċert li l-wegħda taʼ Ġeħova kienet se tiġri?

² Abraham kien jaf lil Ġeħova sew, allura “kien konvint bis-sħiħ li dak li wiegħed” se jiġri. (Rum. 4:21) Ġeħova kien ferħan b’Abraham u qal li kien raġel ġust minħabba l-fidi tiegħu. (Ġak. 2:23) Rumani 4:18 jurina li Abraham kellu kemm il-fidi kif ukoll it-tama. Ejja naraw dak li qal l-appostlu Pawlu dwar it-tama f’​Rumani kapitlu 5.

3. Pawlu x’jgħid dwar it-tama?

³ Pawlu jispjega għala nistgħu nkunu ċerti li “t-tama ma twassalx għal diżappunt.” (Rum. 5:5) Hu jgħinna nifhmu wkoll kif nistgħu nsaħħu iktar it-tama  tagħna. Aħna u niddiskutu Rumani 5:​1-5, aħseb dwar kif it-tama tiegħek għall-futur saret iktar b’saħħitha. Dan se jurina wkoll kif nistgħu nkomplu nsaħħu t-tama tagħna. L-ewwel se naraw dwar tama sabiħa ħafna li Pawlu qal li żgur se ssir realtà.

4. Rumani 5:​1, 2 fuq xiex jitkellem?

⁴ Aqra Rumani 5:​1, 2. Pawlu kiteb dawn il-versi lill-kongregazzjoni f’Ruma. L-aħwa t’hemmhekk tgħallmu dwar Ġeħova u Ġesù, kellhom il-fidi, u saru Kristjani. B’hekk, Alla ‘ddikjarahom ġusti minħabba l-fidi’ u għażilhom bl-ispirtu qaddis tiegħu. Setgħu jħarsu ’l quddiem għal premju vera sabiħ u jkunu ċerti li kienu se jirċivuh.

5. Il-midlukin x’tama għandhom?

⁵ Iktar tard, Pawlu kiteb lill-midlukin f’Efesu dwar t-tama li Alla tahom. Kienu ħa jirċievu “wirt għall-qaddisin.” (Efes. 1:18) U Pawlu wera lill-aħwa f’Kolossi fejn kellhom jirċievu l-premju tagħhom. Hu qal: “It-tama li hi merfugħa għalikom fis-smewwiet.” (Kol. 1:​4, 5) It-tama tal-midlukin hi li se jiġu rxoxtati għall-ħajja taʼ dejjem fis-sema fejn se jmexxu maʼ Kristu.—1 Tess. 4:​13-17; Riv. 20:6.

6. Ħuna Franz x’qal dwar it-tama tiegħu?

⁶ It-tama li għandhom il-midlukin hi importanti ħafna għalihom. Wieħed minnhom, Ħuna Frederick Franz, qal kif kien iħossu: “It-tama li għandna ħa ssir żgur, u kull wieħed minna tal-144,000 se jirċievi dak li wegħedna Alla. Il-premju tagħna se jkun ħafna aħjar minn kull ħaġa li stajna immaġinajna.” Fl-1991, wara li qeda lil Alla għal ħafna snin, Ħuna Franz reġaʼ qal: “Din it-tama għadha importanti ħafna għalina. Iżjed ma nistennewha,  iżjed napprezzawha. Aħna lesti nistennewha anki jekk indumu iktar minn miljun sena. Jien napprezza t-tama tagħna iktar minn qatt qabel.”

7-8. Il-biċċa l-kbira tan-nies taʼ Ġeħova x’tama għandhom? (Rumani 8:​20, 21)

⁷ Il-biċċa l-kbira tan-nies li jaqdu lil Ġeħova llum għandhom tama differenti. Huma għandhom it-tama li kellu Abraham—li jgħixu għal dejjem fuq l-art taħt is-Saltna t’Alla. (Ebr. 11:​8-10, 13) L-appostlu Pawlu kiteb dwar din it-tama sabiħa. (Aqra Rumani 8:​20, 21.) X’għoġbok l-iktar meta sirt taf il-wegħda tal-Bibbja għall-futur? Li xi darba se tkun perfett u ma tagħmilx iktar dnubiet? Jew kont ferħan li sirt taf li dawk in-nies li tħobb u mietu se jerġgħu jqumu fil-ġenna tal-art? Minħabba din “it-tama” li tana Alla, hemm ħafna affarijiet sbieħ li int tistaʼ tħares ’il quddiem għalihom.

⁸ Kemm jekk ħa ngħixu għal dejjem fis-sema u kemm jekk fuq l-art, aħna għandna tama li tistaʼ ġġibilna ferħ kbir. U aħna nistgħu nsiru iktar konvinti dwar din it-tama li għandna. Issa se naraw kif nistgħu nagħmlu dan minn dak li qalilna Pawlu.

9-10. Bħalma juri l-eżempju taʼ Pawlu, il-Kristjani llum x’għandhom jistennew? (Rumani 5:3) (Ara l-istampi.)

⁹ Aqra Rumani 5:3. Pawlu qal li meta nbatu ħa nsiru iktar ċerti mit-tama tagħna. Dan jistaʼ jidher stramb. Però, id-dixxipli kollha taʼ Kristu għandhom jistennew li jbatu. Aħseb dwar l-eżempju taʼ Pawlu. Lill-aħwa f’Tessalonika qalilhom: “Meta konna magħkom, konna ngħidulkom minn qabel li kellna nsofru t-tribulazzjoni, bħalma ġara tassew.” (1 Tess. 3:4) U lill-Korintin qalilhom: “Ma nixtiqukomx ma tkunux tafu bit-tribulazzjoni li ġarrabna  . . . Lanqas saħansitra minn ħajjitna ma konna ċerti.”—2 Kor. 1:8; 11:​23-27.

¹⁰ Il-Kristjani llum ukoll jistgħu jistennew xi tip taʼ persekuzzjoni. (2 Tim. 3:12) Int qatt ġejt ippersegwitat għax temmen f’Ġesù u tafda fih? Forsi l-ħbieb u tal-familja waqqgħuk għaċ-ċajt jew trattawk ħażin. Jew jaf l-imgħallem jew dawk li jaħdmu miegħek trattawk ħażin għax int onest. (Ebr. 13:18) Jew forsi l-awtoritajiet qalgħulek il-problemi minħabba li tkellimt m’oħrajn dwar it-tama tiegħek. Pawlu qal li minkejja l-problemi differenti li jistaʼ jkollna, nistgħu nkunu ferħanin. Għala?

11. Għala rridu nkunu determinati li nissaportu kull prova?

¹¹ Aħna nistgħu nkunu ferħanin anki meta nkunu qegħdin inbatu, għax dan jistaʼ jgħinna jkollna kwalità importanti ħafna. Bħalma jgħid Rumani 5:​3, “it-tribulazzjoni tipproduċi s-sabar.” Aħna lkoll ħa jkollna l-problemi, għalhekk irridu nkunu determinati li nissaportu. Jekk nibqgħu nissaportu u naqdu lil Ġeħova biss ħa nkunu nistgħu ngawdu t-tama sabiħa li tana. Aħna ma rridux inkunu bħal dawk li Ġesù qabbilhom maʼ żerriegħa li waqgħet fuq il-blat. Dat-tip taʼ nies jaċċettaw il-messaġġ, imma “meta jinqalgħu l-problemi jew il-persekuzzjoni, jitfixklu mill-ewwel.” (Mt. 13:​5, 6, 20, 21) Hu vera li l-problemi u l-persekuzzjoni mhumiex sbieħ, imma meta nissaportu u nibqgħu naqdu lil Ġeħova se mmorru tajjeb. B’liema mod?

12. Aħna kif immorru tajjeb meta nissaportu l-problemi?

¹² Id-dixxiplu Ġakbu qal għala jkun tajjeb meta nissaportu. Hu kiteb: “Ħallu s-sabar iwettaq xogħlu għalkollox, sabiex b’hekk tkunu kompluti u sħaħ f’kull aspett bla ma jonqoskom xejn.” (Ġak. 1:​2-4) Ġakbu jgħid li s-sabar għandu xogħol x’jagħmel. X’inhu? Dan ħa jgħinek tkun iżjed paċenzjuż, ikollok iktar fidi, u tistrieħ iktar fuq Ġeħova. Imma hemm raġuni oħra għala hu tajjeb li nissaportu.

13-14. X’jiġri meta nissaportu, u dan kif jeffettwa lit-tama tagħna? (Rumani 5:4)

¹³ Aqra Rumani 5:4. Pawlu qal li s-sabar jipproduċi “l-approvazzjoni.” Allura meta tissaporti, Ġeħova jkun ferħan bik. Dan ma jfissirx li hu jieħu pjaċir li jkollok il-problemi. Hu jkun ferħan għax int tkun qed tissaporti u tibqaʼ leali. Kemm hi ħaġa sabiħa li nafu li meta nissaportu, Ġeħova ħa jkun ferħan!—Salm 5:12.

¹⁴ Ftakar li meta Abraham issaporta l-problemi u baqaʼ leali, Ġeħova kien ferħan bih. Ġeħova rah bħala persuna ġusta u qiesu bħala l-ħabib tiegħu. (Ġen. 15:6; Rum. 4:​13, 22) Hu jistaʼ jagħmel l-istess magħna wkoll. Ġeħova jkun ferħan bina mhux għax-xogħol li nagħmlu għalih jew għall-privileġġi li għandna. Hu jkun ferħan bina meta nibqgħu leali minkejja l-provi. Kollha kemm aħna nistgħu nissaportu l-problemi u ma tagħmilx differenza l-età, iċ-ċirkustanzi, jew l-abbiltajiet li għandna. Bħalissa int qiegħed tissaporti xi problema u tibqaʼ leali lejn  Ġeħova? Żomm f’moħħok li Ġeħova hu ferħan bik. Meta nirrealizzaw li Ġeħova hu ferħan bina, it-tama tagħna fil-wegħdi għall-futur se ssir iktar b’saħħitha.

15. Pawlu x’qal f’​Rumani 5:​4, 5, u xi nies x’jistgħu jsaqsu?

¹⁵ Bħalma qal Pawlu, Ġeħova jkun ferħan bina meta nissaportu l-problemi u nibqgħu leali. Ara x’kompla jgħid Pawlu: “L-approvazzjoni t’Alla tipproduċi t-tama, u t-tama ma twassalx għal diżappunt.” (Rum. 5:​4, 5) Dan il-kliem jaf iħawwad lil xi nies. Għala? Għax f’​Rumani 5:​2, Pawlu kien diġà qal li l-Kristjani għandhom jifirħu “bit-tama tal-glorja t’Alla.” Allura, xi nies jaf isaqsu, ‘Jekk dawk il-Kristjani diġà kellhom tama, Pawlu għala iktar tard reġaʼ tkellem dwar it-tama?’

16. Kif tistaʼ ssaħħaħ it-tama tiegħek? (Ara l-istampi.)

¹⁶ Aħna nistgħu nifhmu x’qal Pawlu meta nżommu f’moħħna li t-tama hi xi ħaġa li tistaʼ tissaħħaħ. Pereżempju, tiftakar meta għall-ewwel darba smajt dwar it-tama li hemm fil-Bibbja? Dak iż-żmien jaf ħsibt li hi xi ħaġa sabiħa li tgħix għal dejjem f’ġenna tal-art, imma hi diffiċli wisq biex issir. Imma meta tgħallimt iktar dwar Ġeħova u l-wegħdi fil-Bibbja, it-tama tiegħek issaħħet u sirt iktar konvint li din se tiġri.

17. Wara li tgħammidt, it-tama tiegħek kif kompliet tissaħħaħ?

¹⁷ Wara li tgħammidt, sirt taf aħjar lil Ġeħova u sirt tħobbu iktar, u b’hekk sirt iktar ċert mill-affarijiet li qed tittama għalihom. (Ebr. 5:​13, 14; 6:1) Wisq probabbli għaddejt minn dak li jgħid Rumani 5:​2-4. Jaf għaddejt minn xi problemi, imma ssaportejt u Ġeħova  wriek li qed jieħu pjaċir bik. Minħabba li taf li jħobbok u hu ferħan bik, tħossok iktar ċert li hu se jżomm il-wegħdi tiegħu. Issa tapprezza iktar it-tama li għandek għax din saret iktar b’saħħitha. Din taffettwa iżjed lil ħajtek, pereżempju l-mod kif tittratta mal-familja, il-mod kif tieħu d-deċiżjonijiet, u anka kif tuża l-ħin tiegħek.

18. X’garanzija jagħti Ġeħova?

¹⁸ Pawlu jgħid xi ħaġa importanti oħra dwar it-tama li għandek meta tkun taf li Ġeħova hu ferħan bik. Hu jaċċertana li t-tama se ssir realtà. Int għala tistaʼ tkun ċert? Għax permezz taʼ Pawlu, Ġeħova tana garanzija: “It-tama ma twassalx għal diżappunt; għax l-imħabba t’Alla tferrgħet fi qlubna permezz taʼ l-ispirtu qaddis li kien mogħti lilna.” (Rum. 5:5) Għandek ħafna raġunijiet biex temmen li t-tama li tak Ġeħova se ssir realtà.

19. Minn xiex tistaʼ tkun ċert?

¹⁹ Aħseb dwar il-wegħda li Ġeħova għamel maʼ Abraham, kif hu kien ferħan bih, u qiesu bħala l-ħabib tiegħu. Dak li Abraham ittama għalih ġara. Il-Bibbja tgħid: “Wara li wera l-paċenzja, Abraham kiseb din il-wegħda.” (Ebr. 6:15; 11:​9, 18; Rum. 4:​20-22) Hu żgur ma kienx diżappuntat. Bħal Abraham tistaʼ tkun ċert li jekk tibqaʼ leali, ħa tiġi premjat. Int għandek ħafna raġunijiet għal xiex tkun ferħan għax taf li t-tama li għandek se tiġri żgur. M’intix se tkun diżappuntat! (Rum. 12:12) Pawlu qal: “L-Alla li jagħti t-tama jimliekom b’kull ferħ u paċi talli temmnu, biex toktru fit-tama bil-qawwa taʼ l-ispirtu qaddis.”—Rum. 15:13.