1. Biex xi ħadd isir Kristjan matur x’għandu jagħmel?

 NISTAGĦĠBU kemm jikbru malajr it-tfal, filli żgħar u filli kbar. Imma hi xi ħaġa differenti biex issir Kristjan matur, għax hemm bżonn sforz. b (1 Kor. 13:11; Ebr. 6:1) Biex insiru Kristjani maturi, irid ikollna ħbiberija b’saħħitha maʼ Ġeħova. Barra minn hekk, għandna bżonn l-ispirtu tiegħu biex jgħinna jkollna kwalitajiet li jogħġbuh, inkunu kapaċi nagħmlu affarijiet differenti, u nippreparaw għal responsabbiltajiet li jistaʼ jkollna ’l quddiem.—Prov. 1:5.

2. X’nitgħallmu minn Ġenesi 1:​27, u x’se naraw f’dan l-artiklu?

² Ġeħova ħalaq lin-nies bħala raġel jew mara. (Aqra Ġenesi 1:27.) L-irġiel u n-nisa huma differenti kif jidhru minn barra, imma hemm ukoll affarijiet oħra li huma differenti fihom. Pereżempju, Ġeħova ma tahomx l-istess responsabbiltajiet, allura biex jieħdu ħsiebhom għandhom bżonn kwalitajiet u abbiltajiet differenti. (Ġen. 2:18) F’dan l-artiklu se naraw x’jistgħu jagħmlu t-tfajliet biex isiru nisa Kristjani aħjar. Fl-artiklu taʼ wara se naraw x’jistgħu jagħmlu l-ġuvintur.

3-4. It-tfajliet fejn jistgħu jsibu eżempji tajbin biex jimitawhom? (Ara l-istampa.)

³ Il-Bibbja ssemmi ħafna nisa li spikkaw minħabba li kienu jħobbu u jaqdu lil Ġeħova. (Ara l-artiklu “Nisa fil-Bibbja —X‘Nistgħu Nitgħallmu Minnhom?” fuq jw.org.) Bħalma ssemmi l-iskrittura prinċipali taʼ dan l-artiklu, huma kienu ‘bbilanċjati’ u ‘leali f’kollox.’ Anki fil-kongregazzjoni, it-tfajliet jistgħu jsibu eżempji tajbin t’aħwa nisa li jħobbu lil Ġeħova u li jistgħu jimitawhom.

⁴ Tfajliet, aħsbu f’aħwa nisa li huma taʼ eżempju tajjeb u li tistgħu timitaw. Aħseb dwar il-kwalitajiet sbieħ li għandhom u ara kif tistaʼ timitahom. Fil-paragrafi li ġejjin ħa niddiskutu tliet kwalitajiet importanti li għandu jkollhom l-aħwa nisa.

5. L-umiltà għala hi kwalità importanti biex tkun oħt matura?

⁵ L-umiltà hi kwalità importanti ħafna biex inkunu Kristjani aħjar. Jekk mara tkun umli se jkollha ħbiberija tajba maʼ Ġeħova u m’oħrajn. (Ġak. 4:6) Pereżempju, oħt li tħobb lil Ġeħova se tkun umli u taċċetta dak li jgħid l-​1 Korintin 11:​3, fejn jgħidilna min hu l-kap tal-kongregazzjoni u min hu l-kap tal-familja. c

6. It-tfajliet x’jistgħu jitgħallmu minn Rebekka?

⁶ Aħseb dwar l-eżempju taʼ Rebekka. Hi kienet intelliġenti, ħadet deċiżjonijiet tajbin, u kienet taf kif u meta kellha taġixxi. (Ġen. 24:58; 27:​5-17) Imma hi xorta wriet rispett u kienet ubbidjenti. (Ġen. 24:​17, 18, 65) Jekk int tkun umli bħal Rebekka u tissapportja lil dawk li qed imexxu fil-kongregazzjoni, int se tkun taʼ eżempju tajjeb għall-familja u għall-aħwa.

7. It-tfajliet kif jistgħu jimxu fuq l-eżempju taʼ Ester u juru l-modestja?

⁷ Il-modestja hi kwalità importanti oħra li l-Kristjani għandhom bżonn. Il-Bibbja tgħid li “l-għerf hu mal-modesti.” (Prov. 11:2) Ester kienet modesta,  jiġifieri kienet taf sa fejn kellha tasal, u kienet qaddejja leali t’Alla. Peress li kienet modesta ma tkabbritx meta saret reġina. Hi semgħet mill-parir li kien taha l-kuġin tagħha Mordekaj. (Est. 2:​10, 20, 22) Tfajliet, intom tistgħu tkunu modesti billi ssaqsu għal pariri tajbin t’oħrajn u timxu fuqhom.—Titu 2:​3-5.

8. L-​1 Timotju 2:​9, 10 kif se jgħin lill-aħwa nisa jkunu jafu kif għandhom jilbsu?

⁸ Ester kienet modesta b’mod ieħor. Hi kienet “gustuża u kellha figura sabiħa,” imma ma pprovatx tiġbed l-attenzjoni lejha nfisha. (Est. 2:​7, 15) In-nisa Kristjani x’jistgħu jitgħallmu mill-eżempju taʼ Ester? It-tweġiba nsibuha fl-1 Timotju 2:​9, 10. (Aqra.) L-appostlu Pawlu qal lill-aħwa nisa biex jilbsu modest u b’moħħ f’loku, jiġifieri b’mod li juri rispett lejn Alla. Il-kliem Grieg li uża Pawlu juri li mara dejjem għandha tilbes b’mod diċenti u żżomm f’moħħha kif ħa jħossuhom oħrajn minħabba l-ilbies tagħha. Aħna vera kburin bl-aħwa nisa li jimxu fuq dan il-parir!

9. X’nistgħu nitgħallmu mill-eżempju taʼ Abigajl?

⁹ L-għaqal hu kwalità oħra li se jkollok bżonn biex tkun oħt matura. X’jiġifieri li jkollok l-għaqal? Dan hu li tkun taf x’inhu tajjeb jew ħażin u mbagħad tieħu d-deċiżjoni t-tajba. Aħseb dwar l-eżempju taʼ Abigajl. Ir-raġel tagħha ħa deċiżjoni ħażina li kienet ħa taffettwa n-nies kollha li kienu jgħixu fid-dar tiegħu. Abigajl aġixxiet mill-ewwel u minħabba l-għaqal li wriet salvat lil ħafna nies. (1 Sam. 25:​14-23, 32-35) L-għaqal jistaʼ jgħin lilna wkoll biex inkunu nafu meta għandna nitkellmu u meta għandna noqogħdu kwieti. U din il-kwalità tgħinna nieħdu interess f’oħrajn mingħajr ma nġegħluhom iħossuhom skomdi.—1 Tess. 4:11.

10-11. Liema riżultati tajbin se jkollok jekk tkun taf tikteb u taqra sew? (Ara l-istampa.)

¹⁰ Oħt għandha titgħallem tagħmel affarijiet li se jgħinuha f’ħajjitha. Dawn l-affarijiet tistaʼ tibda titgħallimhom minn meta tkun għadha żgħira. Ejja naraw xi eżempji.

¹¹ Tgħallem ikteb u aqra sew. F’xi postijiet, in-nies jaħsbu li mhux importanti li mara titgħallem tikteb u taqra. Imma hu importanti għall-Kristjani kollha li jitgħallmu jiktbu u jaqraw. d (1 Tim. 4:13)  Mela anki jekk issibha diffiċli biex titgħallem, ibqaʼ pprova. Dawn kif se jgħinuk? Dawn jistgħu jgħinuk issib xogħol. Se jkun iktar faċli għalik biex tistudja l-Bibbja u tgħallem lil oħrajn dwarha. U l-iktar importanti, meta taqra l-Bibbja u taħseb sew dwarha, se tersaq eqreb taʼ Ġeħova.—Ġoż. 1:8; 1 Tim. 4:15.

12. X’nitgħallmu minn Proverbji 31:26?

¹² Tgħallem ismaʼ u tkellem m’oħrajn sew. Hu importanti li l-Kristjani jitgħallmu jitkellmu bil-ħlewwa u jisimgħu sew. Dwar dan, l-appostlu Ġakbu tana dan il-parir importanti: “Kull bniedem irid ikun ħafif biex jismaʼ, tqil biex jitkellem.” (Ġak. 1:19) Meta tismaʼ sew lil oħrajn tkun qed turi li qed tħoss għalihom. (1 Pt. 3:8) Jekk tħoss li ma fhimtx sew dak li qed jgħidulek jew kif qed iħossuhom, saqsi xi mistoqsijiet. Imbagħad ħu ftit ħin biex taħseb qabel titkellem. (Prov. 15:28) Saqsi lilek innifsek: ‘Dak li se ngħid hu veru u inkuraġġanti? Qed nuri rispett u qalb tajba?’ Tgħallem minn aħwa nisa oħra li jafu jitkellmu bil-ħlewwa u jisimgħu sew. (Aqra Proverbji 31:26.) Oqgħod attenta għall-mod kif jitkellmu. Meta titgħallem tagħmel dan sew, se jkun iktar faċli biex tagħmel ħbieb m’oħrajn.

13. Kif tistaʼ titgħallem tieħu ħsieb id-dar? (Ara l-istampa.)

¹³ Tgħallem kif tieħu ħsieb id-dar. F’ħafna pajjiżi, il-mara tieħu ħsieb il-biċċa l-kbira mix-xogħol tad-dar. Forsi ommok jew oħt matura tistaʼ tgħinek titgħallem kif tagħmel dan ix-xogħol sew. Oħt jisimha Cindy tgħid: “Waħda mill-isbaħ affarijiet li għallmitni ommi hi li meta taħdem iebes se tkun ferħan. Peress li għallmitni nsajjar, innaddaf, inħit, u nuża l-flus sew stajt nieħu ħsieb tiegħi nnifsi u naħdem iktar għal Ġeħova. Ommi għallmitni wkoll kif inkun qalbi tajba u ġeneruża, u b’hekk stajt niltaqaʼ m’aħwa li llum nistaʼ nimita.” (Prov. 31:​15, 21, 22) Mara li taħdem iebes u hi ġeneruża se tgħin ħafna biex il-familja tagħha u l-aħwa fil-kongregazzjoni jkunu iżjed ferħanin.—Prov. 31:​13, 17, 27; Atti 16:15.

14. X’titgħallem minn Crystal, u x’għandek tiftakar?

¹⁴ Tgħallem agħmel l-affarijiet waħdek. Hu importanti li l-Kristjani kollha jitgħallmu jieħdu ħsieb tagħhom infushom u jkunu kuntenti b’dak li għandhom. (Flp. 4:11) Oħt jisimha Crystal tgħid: “Il-ġenituri inkuraġġewni biex l-iskola nagħżel suġġetti li se jgħinuni iktar fil-futur. Missieri tani l-parir biex nistudja l-accounts, u dan vera għenni.” Ikun tajjeb  ukoll li titgħallem kif tuża sew il-flus li taqlaʼ. (Prov. 31:​16, 18) Jekk tkun ferħana b’dak li għandek u ma tixtrix affarijiet li ma taffordjax, se tkun tistaʼ tagħmel iżjed għal Ġeħova.—1 Tim. 6:8.

15-16. L-aħwa nisa single kif jistgħu jgħinu lil oħrajn? (Marku 10:​29, 30)

¹⁵ Jekk taħdem biex ikollok kwalitajiet li jogħġbu lil Ġeħova u titgħallem xi abbiltajiet, se jgħinuk fil-futur. Ejja naraw xi affarijiet li tistaʼ tagħmel.

¹⁶ Tistaʼ tiddeċiedi li tibqaʼ single għal xi żmien. Bħalma qal Ġesù, xi nisa jiddeċiedu li ma jiżżewġux, anki jekk ma tkunx normali fil-pajjiż tagħhom. (Mt. 19:​10-12) Oħrajn jibqgħu single minħabba raġunijiet oħra. Tistaʼ tkun ċerta li għal Ġeħova u Ġesù, int importanti avolja m’intix miżżewġa. L-aħwa nisa single mad-dinja kollha huma eżempju tajjeb fil-kongregazzjoni tagħhom. Peress li jħobbu u jieħdu ħsieb lil oħrajn, huma jsiru bħal aħwa u ommijiet għalihom.—Aqra Marku 10:​29, 30; 1 Tim. 5:2.

17. Oħt single x’tistaʼ tagħmel biex tibda taqdi fis-servizz full-time?

¹⁷ Tistaʼ tibda taqdi fis-servizz full-time. L-aħwa nisa jagħmlu ħafna mix-xogħol tal-ippritkar madwar id-dinja. (Salm 68:11) Tistaʼ tibda taħseb minn issa biex taqdi fis-servizz full-time? Forsi tistaʼ tibda taqdi bħala pijuniera, tgħin fix-xogħol tal-bini, jew taqdi f’Betel. Itlob dwar dak li tixtieq tagħmel. Tkellem m’oħrajn li diġà qed jaqdu fis-servizz full-time, u ara x’tistaʼ tagħmel biex tibda taqdi full-time int wkoll. Imbagħad agħmel pjan biex tkun tistaʼ tilħaq il-mira tiegħek. Jekk tibda taqdi fis-servizz full-time se jkollok iktar opportunitajiet sbieħ biex taqdi lil Ġeħova.

18. Oħt għala għandha toqgħod attenta lil min tiżżewweġ? (Ara l-istampa.)

¹⁸ Tistaʼ tagħżel li tiżżewweġ. Il-kwalitajiet u l-abbiltajiet li semmejna se jgħinuk biex issir mara kapaċi. Jekk tixtieq tiżżewweġ, għandek toqgħod attenta lil min tagħżel għax din hi waħda mill-iktar deċiżjonijiet importanti li se tieħu. Tinsiex li r-raġel li se tiżżewweġ se jkun il-kap tiegħek. (Rum. 7:2; Efes. 5: 23, 33) Saqsi lilek innifsek: ‘Jipprova jimita lil Ġesù b’dak li jaħseb u jagħmel? Ipoġġi lil Ġeħova l-ewwel f’ħajtu? Jieħu deċiżjonijiet tajbin? Meta jiżbalja jammetti? Jirrispettahom lin-nisa? Hu kapaċi jgħinni nżomm il-ħbiberija tiegħi maʼ Ġeħova b’saħħitha? Jistaʼ jipprovdili l-affarijiet li jkolli bżonn? Se jkun lest li jismagħni u jitkellem miegħi? Hu persuna responsabbli? Pereżempju, x’responsabbiltajiet għandu fil-kongregazzjoni u kif jieħu ħsiebhom?’ (Lq. 16:10; 1 Tim. 5:8) Jekk trid issib raġel tajjeb għaż-żwieġ, int għandek tkun mara tajba għaż-żwieġ.

19. Mara għala tistaʼ tkun ferħana li hi t’għajnuna għar-raġel tagħha?

¹⁹ Il-Bibbja tgħid li mara tajba hi “għajnuna” li taqbel għar-raġel tagħha. (Ġen. 2:18) Dan ifisser li hi inqas importanti minnu? Le! Il-mara jixirqilha rispett għar-responsabbiltà li għandha fil-familja. Fil-fatt, il-Bibbja tgħid li anki Ġeħova ‘jgħin.’ (Salm 54:4; Ebr. 13:6) Meta mara tissapportja lir-raġel tagħha, hi tkun qed tgħinu. Pereżempju, meta jieħu deċiżjoni għall-familja, hi tgħinu. Peress li tħobb lil Ġeħova, hi tagħmel li tistaʼ biex tgħin lil oħrajn jaraw il-kwalitajiet tajbin tar-raġel tagħha. (Prov. 31:​11, 12; 1 Tim. 3:11) Jekk tixtieq tiżżewweġ, saħħaħ il-ħbiberija tiegħek maʼ Ġeħova u għin lill-oħrajn fil-familja u fil-kongregazzjoni.

20. Omm kif tistaʼ tgħin lill-familja tagħha?

²⁰ Tistaʼ ssir omm. Wara li tiżżewweġ, int u r-raġel jistaʼ jkollkom it-tfal. (Salm 127:3) Allura jkun tajjeb li tara minn qabel xi trid tagħmel biex tkun omm tajba. Il-kwalitajiet u l-abbiltajiet li tkellimna dwarhom f’dan l-artiklu se jgħinuk biex issir mara u omm tajba. Meta turi mħabba, qalb tajba, u paċenzja, tgħin il-familja tkun ferħana, u t-tfal se jħossuhom protetti u jaraw li tħobbhom.—Prov. 24:3.

21. Kif inħossuna dwar l-aħwa nisa, u għala? (Ara l-istampa tal-qoxra.)

²¹ Aħna nħobbukom, aħwa nisa, minħabba dak kollu li tagħmlu għal Ġeħova u n-nies tiegħu. (Ebr. 6:10) Intom taħdmu iebes biex ikollkom kwalitajiet u abbiltajiet ħalli intom u dawk taʼ madwarkom tkunu iktar ferħanin, u biex tkunu preparati għall-futur. Intom tiswew ħafna fl-organizzazzjoni taʼ Ġeħova!