1, 2. (a) Ġesù kif wieġeb meta Pietru qallu biex ikun ħanin miegħu nnifsu? (Ara l-​ewwel stampa.) (b) Ġesù għala wieġeb b’dan il-​mod?

ID-​DIXXIPLI taʼ Ġesù kienu xxokkjati! Huma ħasbu li Ġesù kien se jerġaʼ jistabbilixxi s-​saltna t’Iżrael, imma Ġesù qal li hu kien dalwaqt se jbati u jmut. L-​ewwel li tkellem kien l-​appostlu Pietru: “Kun ħanin miegħek innifsek, Mulej; żgur li mhux se jiġrilek dan.” Imma Ġesù wieġbu: “Itlaq minn quddiemi, Satana! Int tfixkil għalija, għax m’intix taħseb il-​ħsibijiet t’Alla imma tal-​bnedmin.”—Mattew 16:21-23; Atti 1:6.

² B’dan il-​kliem, Ġesù għamilha ċara li l-​ħsibijiet taʼ Ġeħova huma differenti mill-​ideat taʼ din id-​dinja kkontrollata minn Satana. (1 Ġwanni 5:19) Pietru inkuraġġixxa lil Ġesù biex ikollu l-​attitudni egoista li ħafna nies fid-​dinja għandhom. Imma Ġesù kien jaf li Ġeħova riedu jipprepara lilu nnifsu għal dak li kien se jgħaddi minnu dalwaqt, tbatija u mewt. It-​tweġiba taʼ Ġesù wriet biċ-​ċar li hu aċċetta li jaħseb bħal Ġeħova u li rrifjuta kompletament il-​ħsieb tad-​dinja.

3. Għala hu diffiċli li naċċettaw il-​ħsibijiet taʼ Ġeħova u nirrifjutaw dawk tad-​dinja?

 ³ Xi ngħidu għalina? Naħsbu aħna bħal Ġeħova jew bħan-​nies tad-​dinja? Bħala Kristjani, aħna nagħmlu sforz biex naraw li dak li nagħmlu jogħġob lil Alla. Imma xi ngħidu għall-​mod kif naħsbu? Qegħdin nagħmlu sforz biex naħsbu bħal Ġeħova, jiġifieri, biex naraw sitwazzjoni bil-​mod kif jaraha hu? Dan jeħtieġ sforz kbir. Mill-​banda l-​oħra, biex naħsbu bħan-​nies tad-​dinja hu veru faċli. Dan għaliex l-​ispirtu taʼ din id-​dinja qiegħed kullimkien. (Efesin 2:2) Ukoll, in-​nies tad-​dinja spiss jiffokaw fuqhom infushom, u aħna jaf nitħajru naħsbu bħalhom. Iva, hu diffiċli li naħsbu bħal Ġeħova, imma hu veru faċli li naħsbu bħan-​nies tad-​dinja.

4. (a) X’jistaʼ jiġri jekk inħallu d-​dinja tinfluwenza l-​ħsibijiet tagħna? (b) X’se nitgħallmu f’dan l-​artiklu?

⁴ Jekk inħallu d-​dinja tinfluwenza l-​ħsibijiet tagħna, hemm ċans li nsiru egoisti u nkunu rridu niddeċiedu aħna x’inhu tajjeb u ħażin għalina. (Marku 7:21, 22) Għalhekk, huwa importanti ħafna li nitgħallmu naħsbu “l-​ħsibijiet t’Alla,” u mhux “tal-​bnedmin.” Dan l-​artiklu se jgħinna nagħmlu dan. Se nikkunsidraw raġunijiet għala li naraw sitwazzjoni bil-​mod kif jaraha Ġeħova mhuwiex daqshekk taʼ sikkatura, imma hu taʼ ġid għalina. Se nikkunsidraw ukoll kif nistgħu nevitaw li niġu influwenzati, jew magħġunin, mill-​ħsibijiet taʼ din id-​dinja. Fl-​artiklu li jmiss, se nitgħallmu kif jistaʼ jkollna l-​ħarsa taʼ Ġeħova dwar ċerti sitwazzjonijiet u kif naħsbuha bħalu.

5. Xi nies għala ma jridu lil ħadd jinfluwenzahom?

⁵ Xi nies ma jridu lil ħadd jinfluwenza l-​mod kif jaħsbuha. Huma jgħidu, “Naħseb kif irrid.” Probabbilment, iridu jfissru li jridu jiddeċiedu huma x’jagħmlu u ma jagħmlux u li għandhom dritt jagħmlu dan. Huma ma jridu lil ħadd jikkontrollahom jew jisforzahom ikunu bħal ħaddieħor. * (Ara n-​nota taʼ taħt.)

6. (a) Ġeħova liema libertà jagħtina? (b) Hija din il-​libertà bla limitu?

⁶ Huwa tajjeb inżommu f’moħħna li jekk naċċettaw il-​ħsibijiet taʼ Ġeħova, xorta jistaʼ jkollna l-​opinjonijiet tagħna. It-​2 Korintin 3:17 jgħid: “Fejn hemm l-​ispirtu taʼ Ġeħova, hemm il-​libertà.” Ġeħova jagħtina l-​libertà li nagħżlu aħna x’tip taʼ persuna rridu nkunu. Jistaʼ jkollna l-​preferenzi tagħna u nagħżlu affarijiet li jogħġbuna. Ġeħova ħalaqna b’dan il-​mod. Imma dan ma jfissirx li għandna libertà bla limitu. (Aqra l-​1 Pietru 2:16.) Meta jkollna bżonn inkunu nafu x’inhu tajjeb jew ħażin, Ġeħova jridna nużaw il-​Kelma tiegħu bħala l-​gwida tagħna. Huwa dan daqshekk taʼ sikkatura jew hu taʼ ġid għalina?

7, 8. Huwa daqshekk taʼ sikkatura li nqisu sitwazzjoni bil-​mod kif iqisha Ġeħova? Agħti eżempju.

⁷ Ejja nieħdu eżempju. Il-​ġenituri jipprovaw jgħallmu lit-​tfal tagħhom valuri  tajbin. Huma għandhom mnejn jgħallmuhom ikunu onesti, jaħdmu iebes, u biex jimpurtahom minn oħrajn. Dan mhuwiex daqshekk taʼ sikkatura. Minflok, huma qed jippreparaw lit-​tfal biex dawn jirnexxu fil-​ħajja. Meta t-​tfal jikbru u jitilqu mid-​dar, huma se jkunu liberi li jagħmlu l-​għażliet tagħhom. Jekk jagħżlu li jgħixu bil-​valuri tajbin li għallmuhom il-​ġenituri, huma għandhom iktar ċans li jieħdu deċiżjonijiet tajbin u jevitaw ħafna problemi, inkwiet, u dispjaċiri.

⁸ Bħal ġenitur tajjeb, Ġeħova jrid li t-​tfal tiegħu jkollhom l-​aqwa ħajja possibbli. (Isaija 48:17, 18) Għalhekk, hu jgħallimna prinċipji bażiċi dwar l-​imġiba morali u kif għandna nittrattaw lil oħrajn. Hu jistidinna nitgħallmu nqisu sitwazzjoni bil-​mod kif iqisha hu u biex ngħixu fi qbil mal-​livelli tiegħu. Dan mhuwiex daqshekk taʼ sikkatura. Minflok, dan jagħmilna iktar għaqlin u jgħinna nieħdu deċiżjonijiet aħjar. (Salm 92:5; Proverbji 2:1-5; Isaija 55:9) Xorta jistaʼ jkollna l-​preferenzi personali tagħna, imma se nagħmlu għażliet li se jagħmluna ferħanin. (Salm 1:2, 3) Meta naħsbu bħal Ġeħova, se jkun taʼ ġid kbir għalina!

9, 10. X’jagħti prova li l-​ħsibijiet taʼ Ġeħova huma superjuri minn dawk tad-​dinja?

⁹ Raġuni oħra għala rridu li jkollna l-​ħsibijiet tagħna iktar jixbhu lil dawk taʼ Ġeħova hi għax il-​ħsibijiet tiegħu huma ħafna iktar superjuri minn dawk tad-​dinja. Id-​dinja tagħti pariri dwar kondotta morali, kif ikollna familji ferħanin, u kif nirnexxu fil-​karriera tagħna u aspetti oħra tal-​ħajja. Imma fil-​biċċa l-​kbira dawn il-​pariri ma jaqblux maʼ kif jaħseb Ġeħova. Pereżempju, id-​dinja spiss tħeġġeġ lin-​nies biex jiffokaw biss fuq dak li jogħġob lilhom u biex iqisu l-​immoralità sesswali bħala aċċettabbli. U xi kultant tissuġġerixxi li koppja miżżewġa se jkunu iktar ferħanin jekk jisseparaw jew jiddivorzjaw għal raġunijiet żgħar. Dawn il-​pariri jmorru kontra dak li tgħallem il-​Bibbja. Imma huma llum il-​pariri tad-​dinja aħjar minn dawk tal-​Bibbja?

¹⁰ Ġesù qal: “L-​għerf jintwera li hu sewwa minn għemilu.” (Mattew 11:19) Għalkemm id-​dinja għamlet progress kbir fit-​teknoloġija, għadha ma rnexxilhiex issolvi l-​problemi li ma jħalluniex inkunu ferħanin, bħalma huma l-​gwerer, ir-​razziżmu, u l-​kriminalità. Ukoll, id-​dinja tħares lejn l-​immoralità sesswali bħala xi ħaġa aċċettata. Imma ħafna nies jammettu li din tkisser il-​familji, toħloq problemi taʼ saħħa, u għandha konsegwenzi koroh oħra. Imma xi ngħidu għall-​pariri taʼ Ġeħova? Kristjani li aċċettaw il-​ħarsa  taʼ Ġeħova għandhom familji iktar ferħanin, saħħa aħjar, u għandhom il-​paċi maʼ ħuthom madwar id-​dinja kollha. (Isaija 2:4; Atti 10:34, 35; 1 Korintin 6:9-11) Dan jagħti prova li l-​ħsibijiet taʼ Ġeħova huma superjuri minn dawk tad-​dinja.

11. Min influwenza l-​ħsibijiet taʼ Mosè, u x’kien ir-​riżultat?

¹¹ Qaddejja leali taʼ Ġeħova fil-​passat għarfu li l-​ħsibijiet taʼ Ġeħova huma superjuri. Pereżempju, għalkemm Mosè kien mgħallem “fl-​għerf kollu taʼ l-​Eġizzjani,” hu kien jaf li l-​għerf veru jiġi mingħand Ġeħova. (Atti 7:22; Salm 90:12) Għalhekk hu talab lil Ġeħova: “Ġegħelni nkun naf, jekk jogħġbok, il-​mogħdijiet tiegħek.” (Eżodu 33:13) Minħabba li Mosè ħalla lil Ġeħova jinfluwenza l-​ħsibijiet tiegħu, Ġeħova użah b’mod tal-​għaġeb biex iwettaq l-​iskop Tiegħu u onorah billi sejjaħlu raġel taʼ fidi kbira.—Ebrej 11:24-27.

12. Pawlu fuqiex ibbaża d-​deċiżjonijiet tiegħu?

¹² L-​appostlu Pawlu kien raġel intelliġenti, taʼ edukazzjoni kbira, u kien jitkellem minn tal-​inqas b’żewġ lingwi. (Atti 5:34; 21:37, 39; 22:2, 3) Imma hu rrifjuta l-​għerf tad-​dinja u bbaża d-​deċiżjonijiet tiegħu fuq il-​Kelma t’Alla. (Aqra Atti 17:2; 1 Korintin 2:6, 7, 13.) B’hekk, hu kellu ministeru taʼ suċċess kbir u ħares ’il quddiem għal premju li kien se jibqaʼ għal dejjem.—2 Timotju 4:8.

13. Min hu responsabbli biex iġib il-​ħsibijiet tiegħu fi qbil mal-​mod kif Ġeħova jaħseb?

¹³ Biċ-​ċar, il-​ħsibijiet t’Alla huma ħafna iktar superjuri minn dawk tad-​dinja. Jekk insegwu l-​livelli t’Alla, aħna se nkunu verament ferħanin u nirnexxu. Imma Ġeħova mhux se jisforzana naħsbu bħalu. La “l-​ilsir leali u għaqli” u lanqas l-​anzjani ma jikkontrollaw il-​ħsibijiet tagħna. (Mattew 24:45; 2 Korintin 1:24) Kull wieħed u waħda minna hu responsabbli biex iġib il-​ħsibijiet tiegħu fi qbil mal-​mod kif Ġeħova jaħseb. Kif nistgħu nagħmlu dan?

14, 15. (a) Fuq xiex għandna nimmeditaw biex naħsbu bħal Ġeħova? (b) Għala m’għandniex inħallu ideat tad-​dinja jidħlu f’moħħna? Agħti eżempju.

¹⁴ Rumani 12:2 jgħid: “Tibqgħux magħġunin skond din is-​sistema, imma nbidlu billi ġġeddu moħħkom, biex tagħtu prova lilkom infuskom dwar x’inhi r-​rieda tajba u aċċettabbli u perfetta t’Alla.” Din l-​iskrittura tgħallimna li kien x’kien li influwenza l-​ħsibijiet tagħna qabel ma tgħallimna l-​verità, aħna nistgħu nbiddlu l-​ħsibijiet tagħna u nġibuhom iktar bħal taʼ Alla. Għalkemm dak li nirtu mill-​ġenituri u l-​esperjenzi tal-​ħajja influwenzaw xi ftit il-​mod kif naħsbu, moħħna jistaʼ jkompli jinbidel. U dan se jinbidel l-​iktar skont dak li nagħżlu li naħsbu dwaru. Jekk nimmeditaw fuq il-​ħsibijiet taʼ Ġeħova, se nikkonvinċu lilna nfusna li l-​ħsibijiet tiegħu huma dejjem tajbin. Imbagħad, se jkollna x-​xewqa li naraw l-​affarijiet bil-​mod li jarahom hu.

¹⁵ Imma biex inġeddu moħħna ħalli naħsbu bħal Ġeħova, aħna m’għandniex ‘nibqgħu magħġunin skond din  is-​sistema.’ Dan ifisser li għandna nieqfu naraw, naqraw, u nisimgħu dak kollu li jmur kontra l-​ħsibijiet t’Alla. Biex nifhmu kemm dan hu importanti, ejja nieħdu l-​eżempju tal-​ikel. Jekk xi ħadd irid ikun iktar f’saħħtu għandu mnejn jiddeċiedi li jiekol ikel aħjar. Imma l-​isforzi kollha tiegħu jkunu għalxejn jekk hu regolarment jiekol ikel ikkontaminat! Bl-​istess mod, l-​isforzi kollha tagħna biex nitgħallmu dwar il-​ħsibijiet taʼ Ġeħova se jkunu għalxejn jekk inħallu l-​ideat tad-​dinja jidħlu f’moħħna.

16. Minn xiex għandna nipproteġu lilna nfusna?

¹⁶ Nistgħu nevitaw kompletament l-​ideat tad-​dinja? Le, minħabba li ngħixu fiha xi ftit jew wisq se nkunu esposti għalihom. (1 Korintin 5:9, 10) Anki meta nippritkaw, se nisimgħu lin-​nies jesprimu ideat ħżiena u twemmin falz. Imma għalkemm ma nistgħux nevitaw għalkollox ideat ħżiena, m’għandniex għalfejn nibqgħu naħsbu dwarhom jew naċċettawhom. Bħal Ġesù, għandna mill-​ewwel nirrifjutaw ħsibijiet li Satana jixtieqna jkollna. Ukoll nistgħu nipproteġu lilna nfusna billi nevitaw li nkunu esposti bla bżonn għall-​ideat tad-​dinja.—Aqra Proverbji 4:23.

17. Kif nistgħu nevitaw li nkunu esposti bla bżonn għall-​ideat tad-​dinja?

¹⁷ Pereżempju, għandna noqogħdu attenti xi ħbieb nagħżlu. Il-​Bibbja twissina li jekk insiru ħbieb maʼ nies li ma jaqdux lil Ġeħova, aħna se nibdew naħsbu bħalhom. (Proverbji 13:20; 1 Korintin 15:12, 32, 33) Għandna wkoll nagħżlu d-​divertiment tagħna bil-​għaqal. Meta nirrifjutaw divertiment li jippromwovi t-​teorija tal-​evoluzzjoni, il-​vjolenza, jew l-​immoralità, aħna nevitaw li nivvelenaw lil moħħna b’ideat li huma “kontra l-​għarfien dwar Alla.”—2 Korintin 10:5.

18, 19. (a) Għala għandna noqogħdu attenti minn ideat tad-​dinja li huma preżentati b’mod sottili? (b) Liema mistoqsijiet għandna nsaqsu lilna nfusna, u għala?

¹⁸ Għandna nagħrfu u nirrifjutaw  ukoll ideat tad-​dinja li jiġu preżentati b’modi sottili. Pereżempju, xi rapporti fuq l-​aħbarijiet jintqalu b’mod li jxaqilbu lejn ċerti opinjonijiet politiċi. U xi stejjer tal-​aħbarijiet jippromwovu miri u suċċessi li d-​dinja tammira. Xi films u kotba jinkuraġġixxu l-​ħsieb taʼ “l-​ewwel jien” u “l-​ewwel il-​familja” u jagħmlu dan ir-​raġunar jidher li hu ġust, jingħoġob, anki tajjeb. Però, dal-​ħsieb jinjora l-​Bibbja. Din tgħid li aħna u l-​familji tagħna se nkunu verament ferħanin meta nħobbu lil Ġeħova qabel kollox. (Mattew 22:36-39) Ukoll, xi stejjer tat-​tfal li nsibu fil-​kotba, films, jew kartuns, għalkemm fil-​biċċa l-​kbira jistgħu jkunu aċċettabbli, jistgħu b’mod sottili jġiegħlu t-​tfal jaċċettaw imġiba immorali.

¹⁹ Dan ma jfissirx li hu ħażin li ngawdu divertiment tajjeb. Imma għandna nsaqsu lilna nfusna: ‘Ninduna jien bl-​ideat tad-​dinja anki meta dawn ikunu preżentati b’mod sottili? Qiegħed jien nipproteġi lit-​tfal tiegħi u lili nnifsi minn xi programmi tat-​televixin u materjal li naqraw? Ngħin lit-​tfal tiegħi jkollhom il-​ħarsa taʼ Ġeħova dwar sitwazzjoni sabiex ma jiġux influwenzati mill-​ideat tad-​dinja li jaraw u jisimgħu?’ Jekk nagħrfu d-​differenza li hemm bejn il-​ħsieb t’Alla u tad-​dinja, nistgħu nevitaw li niġu “magħġunin skond din is-​sistema.”

20. X’se jiddetermina jekk aħniex influwenzati mill-​ħsibijiet t’Alla jew dawk tad-​dinja?

²⁰ Għandna niftakru li hemm biss żewġ sorsi minn fejn nieħdu l-​informazzjoni. Wieħed hu Ġeħova u l-​ieħor hu Satana u d-​dinja tiegħu. Min qed jinfluwenzak? It-​tweġiba hi, il-​wieħed li tieħu l-​informazzjoni minnu. Jekk naċċettaw l-​ideat tad-​dinja, id-​dinja se tinfluwenza l-​ħsibijiet tagħna u se naħsbu u naġixxu b’egoiżmu. Għalhekk huwa importanti ħafna li noqogħdu attenti x’nagħżlu li naraw, naqraw, nisimgħu, u dwar xiex naħsbu.

21. X’se niddiskutu fl-​artiklu li jmiss?

²¹ F’dan l-​artiklu tgħallimna li biex ikollna l-​ħsibijiet taʼ Ġeħova għandna nevitaw l-​ideat tad-​dinja. Għandna wkoll nimmeditaw fuq il-​ħsibijiet t’Alla ħalli naħsbu iktar bħalu. Fl-​artiklu li jmiss, se nitgħallmu kif nagħmlu dan.