1. Il-​Kelma t’Alla x’tgħallimna?

BIS-​saħħa tal-​Istruttur Grandjuż tagħna, Ġeħova, aħna nistgħu niffaċċjaw kwalunkwe sfida. (Is. 30:20, 21) Kelmtu tgħallimna dak kollu li għandna bżonn biex inkunu “kapaċi għalkollox” u ‘armati bis-​sħiħ għal kull għemil tajjeb.’ (2 Tim. 3:17) Meta ngħixu skont it-​tagħlim tal-​Bibbja, aħna nsiru iktar għorrief minn dawk li jippromwovu “l-​għerf taʼ din id-​dinja.”—1 Kor. 3:19; Salm 119:97-​100.

2. X’se neżaminaw f’dan l-​artiklu?

² Kif se naraw, l-​għerf tad-​dinja spiss jingħoġob mix-​xewqat egoistiċi tagħna. Allura jistaʼ jkun li nsibuha diffiċli li ma naħsbux u ma naġixxux bħal uħud li huma parti mid-​dinja. Mhux taʼ b’xejn li l-​Bibbja tgħid: “Oqogħdu attenti li ma jkunx hemm xi ħadd li jaħtafkom taħt difrejh b’filosofija u qerq fieragħ skond it-​tradizzjoni tal-​bnedmin.” (Kol. 2:8) F’dan l-​artiklu, se neżaminaw l-​istorja taʼ kif saru popolari żewġ gidbiet li jgħallem Satana. F’kull aspett, se naraw kif l-​għerf tad-​dinja hu bluha u kif l-​għerf tal-​Kelma t’Alla hu bil-​wisq superjuri minn kwalunkwe ħaġa li d-​dinja toffri.

3-4. Bejn l-​1900 u l-​1930, x’bidliet kien hemm fil-​ħarsa lejn il-​moralità sesswali fl-​Istati Uniti?

³ Fl-​Istati Uniti, bejn l-​1900 u l-​1930 kien hemm bidla kbira fil-​ħarsa lejn il-​moralità sesswali. Qabel, ħafna kienu jemmnu li s-​sess kellu jsir biss fiż-​żwieġ u ma kienx suġġett li titkellem dwaru fil-​pubbliku. Imma dawn il-​livelli ħadu tisbita kbira, u bdiet tinfirex ħarsa iktar tolleranti.

 ⁴ Iż-​żmien bejn l-​1920 u l-​1929 sar magħruf bħala r-​Roaring Twenties, għax il-​mod taʼ kif in-​nies aġixxew u l-​attitudni tagħhom lejn is-​sess inbidlu ħafna. “Il-​films, ir-​reċti, id-​diski, il-​kotba, u r-​reklamar bdew juru ħafna affarijiet li għandhom x’jaqsmu mas-​sess,” tgħid riċerkatriċi. Matul dawk is-​snin, l-​istil taż-​żfin ġiegħel lin-​nies jaħsbu fis-​sess u l-​istil tal-​ilbies sar inqas modest. Kif bassret il-​Bibbja dwar l-​aħħar jiem, in-​nies kienu se jsiru “jħobbu l-​pjaċiri.”—2 Tim. 3:4.

5. Mill-​1960 ’il quddiem, id-​dinja kif bdiet tqis il-​livelli morali?

⁵ Wara l-​1960, iktar u iktar nies bdew jgħixu flimkien mingħajr ma jiżżewġu u l-​omosesswalità u d-​divorzju saru iktar komuni. Ħafna tipi taʼ divertiment bdew juru s-​sess iktar bil-​miftuħ. X’kien ir-​riżultat taʼ dan kollu? Awtriċi kitbet li l-​kawża taʼ familji mkissrin, familji b’ġenitur wieħed, ġrieħi emozzjonali, nies li jiddependu mill-​pornografija, u affarijiet taʼ niket bħal dawn għandha x’taqsam mal-​fatt li n-​nies waqfu jagħtu kas il-​livelli morali. Iż-​żieda taʼ mard trasmess sesswalment, bħall-​AIDS, hu biss sinjal wieħed li l-​għerf tad-​dinja hu bluha.—2 Pt. 2:19.

6. Il-​mod kif id-​dinja tqis is-​sess kif inhu eżatt dak li jrid Satana?

⁶ Il-​mod kif id-​dinja tqis is-​sess hu eżatt dak li jrid Satana. Bla dubju, hu jitgħaxxaq jara n-​nies jużaw is-​sess b’mod li Alla ma jridx, u b’hekk ma jurux rispett lejn ir-​rigal taż-​żwieġ li Alla ta lill-​bnedmin. (Efes. 2:2) Din l-​immoralità sesswali mhux biss tnaqqas il-​valur tar-​rigal mill-​isbaħ taʼ Ġeħova biex in-​nies ikollhom it-​tfal, imma wkoll tistaʼ ma tħallix lil dawk li jieħdu sehem fiha jirtu l-​ħajja taʼ dejjem.—1 Kor. 6:9, 10.

7-8. Il-​ħarsa tal-​Bibbja dwar l-​imġiba sesswali għala hi bil-​wisq aħjar minn dik tad-​dinja?

⁷ In-​nies li jaċċettaw l-​għerf taʼ din id-​dinja jwaqqgħu għaċ-​ċajt il-​livelli morali tal-​Bibbja, billi jgħidu li mhumiex realistiċi. Xi wħud forsi jistaqsu, ‘Alla għala ħalaqna b’xewqat sesswali u mbagħad jgħidilna biex inrażżnuhom?’ Huma jistaqsu dil-​mistoqsija għax b’mod żbaljat jaħsbu li jekk xi ħadd jixtieq jagħmel xi ħaġa, għandu jagħmilha. Imma  l-​Bibbja ma tgħidx hekk. Din tagħtina dinjità billi tgħallem li aħna nistgħu nagħżlu li nikkontrollaw xewqat mhux xierqa. (Kol. 3:5) Ukoll, Ġeħova tana r-​rigal taż-​żwieġ, arranġament fejn xewqat sesswali xierqa jistgħu jkunu sodisfati kif suppost. (1 Kor. 7:8, 9) Fiż-​żwieġ, raġel u mara jistgħu jgawdu s-​sess mingħajr id-​dispjaċir u l-​inkwiet li spiss jirriżultaw mill-​immoralità.

⁸ B’kuntrast mal-​għerf tad-​dinja, il-​Bibbja tgħallimna l-​ħarsa xierqa lejn is-​sess. Din tgħid li s-​sess jistaʼ jkun taʼ pjaċir. (Prov. 5:18, 19) Madankollu, tgħid: “Kull wieħed minnkom [“għandu”] jkun jaf kif jikkontrolla ġismu bil-​qdusija u bl-​unur, mhux b’aptit sesswali mimli xenqa bħalma għandhom ukoll dawk il-​ġnus li ma jafux lil Alla.”—1 Tess. 4:4, 5.

9. (a) Il-​poplu taʼ Ġeħova bejn l-​1900 u l-​1930, kif ġie inkuraġġit isegwi l-​għerf superjuri tal-​Kelma t’Alla? (b) X’parir għaqli hemm fl-​1 Ġwanni 2:15, 16? (ċ) Skont Rumani 1:24-​27, kontra liema prattiki immorali għandna niġġieldu?

⁹ Bejn l-​1900 u l-​1930, il-​poplu taʼ Ġeħova ma ġiex imqarraq mill-​ħarsa taʼ dawk li “tilfu kull sens morali.” (Efes. 4:19) Huma pprovaw iżommu qrib mal-​livelli taʼ Ġeħova. It-​Torri tal-​Għassa bl-​Ingliż tal-​15 taʼ Mejju 1926 qal li “l-​irġiel u n-​nisa għandhom ikunu nodfa moralment u bla ebda tebgħa fil-​ħsibijiet u l-​azzjonijiet tagħhom, speċjalment maʼ dawk tas-​sess oppost.” Minkejja dak li kien qed jiġri fid-​dinja, il-​poplu taʼ Ġeħova segwa l-​għerf superjuri tal-​Kelma t’Alla. (Aqra l-​1 Ġwanni 2:15, 16.) Kemm aħna grati li għandna l-​Kelma t’Alla! Aħna grati wkoll li Ġeħova jipprovdi ikel spiritwali fil-​ħin u fil-​waqt biex jgħinna niġġieldu kontra l-​ħarsa tad-​dinja dwar il-​moralità sesswali. *—Aqra Rumani 1:24-27.

10-11. Il-​Bibbja x’wissiet li se jiġri matul l-​aħħar jiem?

¹⁰ Il-​Bibbja wissiet li matul l-​aħħar jiem, in-​nies kienu se jsiru “jħobbu lilhom infushom.” (2 Tim. 3:1, 2) Mhix taʼ sorpriża li d-​dinja tinkuraġġixxi din l-​attitudni egoista. Enċiklopedija tgħid li matul is-​snin sebgħin “kotba li jagħtu pariri kif ikollok ħajja taʼ suċċess kienu popolari ħafna.” Xi kotba “ħeġġew lill-​qarrejja tagħhom biex isiru jafu u jaċċettaw lilhom infushom u biex ma jinbidlux.” Pereżempju, ikkunsidra dak li qal wieħed mill-​kotba: “Ħobb lilek innifsek għax int l-​iktar persuna sabiħa u eċċitanti li qatt eżistiet.” Il-​ktieb jgħid li persuna għandha tiddeċiedi għaliha nfisha kif taġixxi, u tagħmel dak li hi tħoss li hu tajjeb u konvenjenti għaliha.

¹¹ Familjari għalik din l-​idea? Satana inkuraġġixxa lil Eva biex tagħmel xi ħaġa simili. Hu qal li hi setgħet ‘tkun bħal Alla, tagħraf it-​tajjeb u l-​ħażin.’ (Ġen. 3:5) Illum, ħafna tant huma kburin li jaħsbu li ħadd ma jistaʼ jgħidilhom x’inhu tajjeb u ħażin, lanqas Alla. Pereżempju, din l-​attitudni saret evidenti b’mod speċjali fil-​mod kif in-​nies iqisu ż-​żwieġ.

12. Id-​dinja liema ħarsa lejn iż-​żwieġ tinkuraġġixxi?

¹² Il-​Bibbja tgħallem lill-​miżżewġin biex juru rispett lejn xulxin u jżommu  l-​wegħdi li għamlu meta żżewġu. Din tinkuraġġihom ikunu determinati li jibqgħu flimkien billi tgħid: “Raġel iħalli lil missieru u lil ommu u jrid jingħaqad maʼ martu u huma jsiru ġisem wieħed.” (Ġen. 2:24) B’kuntrast, dawk influwenzati mill-​għerf tad-​dinja jinkuraġġixxu ħarsa differenti, billi jgħidu li kull persuna miżżewġa għandha tiffoka fuq il-​bżonnijiet tagħha stess. “F’xi ċerimonji,” jgħid ktieb dwar id-​divorzju, “il-​wegħda tradizzjonali li jibqgħu miżżewġin ‘sakemm it-​tnejn li huma jgħixu’ ġiet mibdula bil-​wegħda iktar limitata, dik li jibqgħu miżżewġin ‘sakemm it-​tnejn li huma jħobbu lil xulxin.’” Peress li n-​nies iqisu ż-​żwieġ bħala li mhux permanenti, hawn ħafna u ħafna familji mkissrin u wġigħ emozzjonali kbir. Bla dubju, il-​ħarsa tad-​dinja lejn iż-​żwieġ hi bluha.

13. Semmi raġuni waħda għala Ġeħova jobgħod lin-​nies kburin.

¹³ Il-​Bibbja tgħid: “Kulmin hu kburi f’qalbu hu xi ħaġa mistkerrha għal Ġeħova.” (Prov. 16:5) Ġeħova għala jistkerrah, jew jobgħod, lin-​nies kburin? Raġuni waħda hi li dawk li jiżviluppaw u jinkuraġġixxu mħabba kburija lejhom infushom isiru arroganti bħal Satana. Immaġina naqra kemm kien arroganti Satana meta ħaseb li Ġesù, il-​wieħed li Alla uża biex joħloq l-​affarijiet kollha, kellu jqim lilu! (Mt. 4:8, 9; Kol. 1:15, 16) Dawk li għandhom din il-​ħarsa kburija lejhom infushom jikkonfermaw li l-​għerf tad-​dinja hu bluha għal Alla.

14. Rumani 12:3 kif jgħinna jkollna ħarsa bilanċjata tagħna nfusna?

¹⁴ Il-​Bibbja tgħinna jkollna ħarsa bilanċjata tagħna nfusna. Din tgħid li huwa xieraq li jkollna xi ftit imħabba lejna nfusna. Ġesù qal: “Ħobb lill-​proxxmu tiegħek bħalek innifsek.” Dan juri li għandna nagħtu ammont raġonevoli  t’attenzjoni għall-​bżonnijiet tagħna. (Mt. 19:19) Madankollu, il-​Bibbja ma tgħallimx li għandna naħsbu li aħna iktar importanti minn oħrajn. Pjuttost tgħid: “Tagħmlu xejn bi ġlied jew bi kburija, imma b’umiltà tqisu lill-​oħrajn superjuri għalikom.”—Flp. 2:3; aqra Rumani 12:3.

15. Int għala tħoss li l-​pariri tal-​Bibbja dwar l-​imħabba lejna nfusna huma tajbin?

¹⁵ Illum, ħafna nies li huma meqjusin għorrief iwaqqgħu għaċ-​ċajt il-​pariri tal-​Bibbja dwar l-​imħabba lejna nfusna. Huma jgħidu li jekk taħseb li oħrajn huma superjuri għalik, dan jagħmlek vulnerabbli, u oħrajn se jieħdu vantaġġ minnek. Imma x’kien verament ir-​riżultat tal-​attitudni inkuraġġita mid-​dinja taʼ Satana? Xi nnotajt int? Huma ferħanin in-​nies egoisti? Għandhom familji ferħanin? Għandhom ħbieb veri? Għandhom ħbiberija mill-​qrib m’Alla? Minn dak li rajt, liema għerf għandu l-​aħjar riżultati—dak tad-​dinja jew dak li nsibu fil-​Kelma t’Alla?

16-17. Għal xiex għandna nkunu grati, u għala?

¹⁶ In-​nies li jimxu fuq il-​pariri taʼ dawk li d-​dinja tqishom għorrief huma bħal turist li jitlob lil turist ieħor biex jgħidlu fejn irid imur, meta t-​tnejn huma mitlufin. Dwar l-​irġiel “għorrief” taʼ żmienu, Ġesù qal: “Dawk gwidi għomja. Għalhekk, jekk agħma jmexxi lil agħma, it-​tnejn jaqgħu f’ħofra.” (Mt. 15:14) Verament, l-​għerf taʼ did-​dinja hu bluha għal Alla.

¹⁷ Il-​pariri għaqlin tal-​Bibbja dejjem urew li ‘jiswew biex jgħallmu, iwiddbu, jikkoreġu, jiddixxiplinaw fis-​sewwa.’ (2 Tim. 3:16) Kemm għandna nkunu grati li Ġeħova, permezz tal-​organizzazzjoni tiegħu, ipproteġiena mill-​għerf taʼ din id-​dinja! (Efes. 4:14) L-​ikel spiritwali li provda hu jagħtina s-​saħħa li neħtieġu biex insegwu l-​livelli taʼ Kelmtu. Xi privileġġ għandna li niġu gwidati mill-​għerf infallibbli li hemm fil-​Bibbja!