ARTIKLU GĦALL-ISTUDJU 49
Hemm ħin biex taħdem u ħin biex tistrieħ
“Ejjew waħedkom f’post imwarrab u strieħu ftit.”—MARKU 6:31.
GĦANJA 143 Ibqaʼ ħabrek, għasses, u stenna
ĦARSA BIL-QUDDIEM *
1. X’inhi l-ħarsa taʼ ħafna nies dwar ix-xogħol?
ĦAFNA nies kif iqisu x-xogħol? F’ħafna pajjiżi, in-nies qed jaħdmu iktar minn qatt qabel. Nies li jaħdmu żżejjed mhux qed ikollhom ċans biex jistrieħu, biex iqattgħu l-ħin mal-familja, jew biex ikomplu jitgħallmu dwar Alla. (Ekk. 2:23) Mill-banda l-oħra, xi nies jobogħdu jaħdmu u jipprovaw iġibu kull skuża biex ma jaħdmux.—Prov. 26:13, 14.
2-3. X’nitgħallmu minn Ġeħova u Ġesù dwar ix-xogħol?
2 Ħafna nies m’għandhomx ħarsa bilanċjata lejn ix-xogħol. Imma issa ejja naraw kif Ġeħova u Ġesù jqisu x-xogħol. M’hemmx dubju li Ġeħova jħobb jaħdem. Ġesù għamel dan ċar billi qal: “Missieri baqaʼ jaħdem s’issa, u jien nibqaʼ naħdem.” (Ġw. 5:17) Aħseb dwar ix-xogħol kollu li Alla għamel waqt li ħalaq ħafna anġli, stilel, u pjaneti. Nistgħu naraw ħafna mix-xogħlijiet sbieħ li għamel anki fid-dinja fejn ngħixu. Is-salmista bir-raġun qal: “Kemm huma kotrana xogħlijietek, O Ġeħova! Kollha bl-għerf għamilthom. L-art mimlija b’dak li pproduċejt.”—Salm 104:24.
3 Ġesù imita lil Missieru. Fil-fatt, hu għen lil Alla meta pprepara s-smewwiet. Hu kien maġenb Ġeħova “bħala ħaddiem tas-sengħa.” (Prov. 8:27-31) Ħafna żmien wara, meta Ġesù kien fuq l-art, hu għamel xogħol eċċellenti. Dan ix-xogħol kien bħal ikel għalih. B’dak kollu li għamel, hu wera li Alla kien bagħtu.—Ġw. 4:34; 5:36; 14:10.
4. X’nistgħu nitgħallmu minn Ġeħova u Ġesù dwar il-mistrieħ?
Eżo. 31:17) Madankollu, milli jidher, dan ifisser li hu waqaf milli joħloq l-affarijiet u ħa l-ħin biex jieħu pjaċir b’dak li kien għamel. Ukoll, għalkemm Ġesù ħadem iebes waqt li kien fuq l-art, hu xorta straħ u gawda ikliet mal-ħbieb tiegħu.—Mt. 14:13; Lq. 7:34.
4 Il-fatt li Ġeħova u Ġesù jaħdmu iebes, ifisser li aħna m’għandniex bżonn nistrieħu? Żgur li le. Ġeħova qatt ma jegħja, allura m’għandux bżonn jistrieħ bħalna. Però, il-Bibbja tgħid li wara li Ġeħova ħalaq is-smewwiet u l-art, hu “waqaf mix-xogħol u beda jistrieħ.” (5. Ħafna minna liema sfida jiffaċċjaw?
5 Il-Bibbja tinkuraġġixxi lin-nies t’Alla biex jieħdu pjaċir jaħdmu. Il-qaddejja tiegħu għandhom ikunu biżlin u mhux għażżenin. (Prov. 15:19) Int forsi taħdem xogħol sekulari biex tkun tistaʼ tmantni l-familja tiegħek. Barra minn hekk, bħala dixxipli taʼ Kristu, aħna responsabbli li nieħdu sehem f’li nippritkaw l-aħbar tajba. Imma għandek bżonn ukoll li tistrieħ biżżejjed. Ġieli ssibha diffiċli biex issib bilanċ bejn ix-xogħol sekulari, il-ministeru, u l-mistrieħ? Kif nistgħu nkunu nafu kemm għandna nqattgħu ħin naħdmu u nistrieħu?
KIF ISSIB BILANĊ
6. Marku 6:30-34 kif juri li Ġesù kellu ħarsa bilanċjata lejn ix-xogħol u l-mistrieħ?
6 Huwa importanti li jkollna l-ħarsa t-tajba lejn ix-xogħol. Is-Sultan Salamun ġie ispirat biex jikteb hekk: “Għal kollox hemm żmien stabbilit.” Fosthom semma li tħawwel, tibni, tibki, tifraħ, u tiżfen. (Ekk. 3:1-8) Biċ-ċar, żewġ affarijiet importanti fil-ħajja huma x-xogħol u l-mistrieħ. Ġesù kellu ħarsa bilanċjata lejn ix-xogħol u l-mistrieħ. Darba minnhom, l-appostli tant ħadmu iebes fil-ministeru li “ma kellhomx ħin għall-mistrieħ lanqas biex jieklu.” Ġesù qal: “Ejjew waħedkom f’post imwarrab u strieħu ftit.” (Aqra Marku 6:30-34.) Għalkemm hu u d-dixxipli mhux dejjem irnexxielhom jistrieħu kemm xtaqu, Ġesù kien jaf li kellhom bżonn jistrieħu.
7. X’nistgħu nitgħallmu mill-arranġament tas-Sabat?
7 Xi kultant, ilkoll ikollna bżonn li nistrieħu jew naqtgħu ftit mir-rutina. Nistgħu naraw dan minn arranġament li Alla għamel għan-nies tiegħu fil-passat—is-Sabat taʼ kull ġimgħa. Aħna m’aħniex taħt il-Liġi Mosajka. Però, dak li nitgħallmu mis-Sabat jistaʼ jgħinna naraw jekk għandniex ħarsa bilanċjata lejn ix-xogħol u l-mistrieħ.
IS-SABAT—JUM TAʼ MISTRIEĦ U QIMA
8. Skont Eżodu 31:12-15, x’kellu jsir f’jum is-Sabat?
8 Il-Kelma t’Alla tgħid li wara sitt “ijiem” taʼ ħolqien, Alla waqaf milli joħloq l-affarijiet fuq l-art. (Ġen. 2:2) Però, Alla jħobb jaħdem, u “baqaʼ jaħdem” f’affarijiet oħra. (Ġw. 5:17) L-arranġament tas-Sabat hu simili għall-jum taʼ mistrieħ taʼ Ġeħova li naqraw dwaru f’Ġenesi. Kif? Ġeħova ħadem għal sitt “ijiem” u straħ fis-sebaʼ “jum,” u hu qal lill-Iżraelin biex jistrieħu fis-sebaʼ jum taʼ kull ġimgħa. Alla qal li s-Sabat kien sinjal bejnu u bejn Iżrael għax kien juri li l-Iżraelin kellhom relazzjoni speċjali miegħu u kien ifakkarhom li Alla ħelishom mill-Eġittu. Is-Sabat kien jum taʼ “mistrieħ komplet . . . , xi ħaġa qaddisa għal Ġeħova.” (Aqra Eżodu 31:12-15.) Ħadd ma kellu jaħdem, inkluż it-tfal, l-iskjavi, u anki l-annimali. (Eżo. 20:10) Dan għamilha possibbli biex in-nies jagħtu iktar attenzjoni għall-affarijiet spiritwali.
9. Ċertu nies fi żmien Ġesù x’mentalità ħażina kellhom dwar is-Sabat?
9 L-arranġament tas-Sabat kien xi ħaġa tajba għan-nies t’Alla. Imma ħafna mexxejja reliġjużi fi żmien Ġesù għamlu regoli stretti ħafna dwar kif in-nies kellhom jobdu l-liġi tas-Sabat. Huma qalu li f’jum is-Sabat kien kontra l-liġi anki li tiġbor ftit qamħ għall-ikel jew li tfejjaq lil xi ħadd marid. (Mk. 2:23-27; 3:2-5) Imma Alla ma riedx hekk, u Ġesù għamel dan ċar għal dawk li riedu jisimgħuh.
10. Skont kif naraw f’Mattew 12:9-12, Ġesù kif kien iqisu s-Sabat?
10 Ġesù u s-segwaċi Lhud tiegħu kienu jistrieħu fis-Sabat għax kienu jobdu l-Liġi Mosajka. * Imma Ġesù wera b’dak li qal u għamel li ma kienx ħażin li tgħin lil oħrajn u tkun qalbek tajba magħhom f’jum is-Sabat. Hu qal ċar u tond: “Tistaʼ skond il-liġi tagħmel ħaġa tajba f’jum is-Sabat.” (Aqra Mattew 12:9-12.) Hu ma rahiex bħala ħaġa ħażina li turi qalb tajba u tgħin lil oħrajn fis-Sabat. L-azzjonijiet taʼ Ġesù wrew x’inhi waħda mir-raġunijiet importanti għala Alla għamel l-arranġament tas-Sabat. Minħabba li n-nies t’Alla straħu f’jum is-Sabat, setgħu jiffokaw fuq affarijiet spiritwali. Ġesù trabba f’familja li bla dubju għamlu hekk. Infatti, il-Bibbja tgħid hekk dwar Ġesù: “U ġie Nazaret, fejn kien trabba; u, kif kien imdorri jagħmel f’jum is-Sabat, daħal fis-sinagoga u qam bil-wieqfa biex jaqra.”—Luqa 4:15-19.
X’INHI L-ĦARSA TIEGĦEK LEJN IX-XOGĦOL?
11. Min kien t’eżempju tajjeb għal Ġesù rigward ix-xogħol?
11 Ġużeppi żgur li żamm f’moħħu l-ħarsa taʼ Ġeħova lejn ix-xogħol meta għallem lil Ġesù x-xogħol taʼ mastrudaxxa. (Mt. 13:55, 56) U Ġesù setaʼ jara lil Ġużeppi jaħdem iebes jum wara jum biex imantni l-familja kbira li kellu. Taʼ interess, Ġesù qal hekk lid-dixxipli tiegħu: “Il-ħaddiem jistħoqqlu ħlasu.” (Lq 10:7) Iva, Ġesù kien jaf x’jiġifieri li taħdem iebes.
12. Liema skritturi juru x’inhi l-ħarsa tal-Bibbja lejn ix-xogħol?
12 L-appostlu Pawlu wkoll kien jaħdem iebes. Ix-xogħol prinċipali tiegħu kien li jitkellem m’oħrajn dwar Ġesù u l-messaġġ tiegħu. Però, Pawlu ħadem ukoll biex ikollu l-flus biex imantni lilu nnifsu. It-Tessalonikin kienu jafu li Pawlu kellu xogħol taʼ ‘taħbit u tbatija’ u li kien jaħdem ‘lejl u nhar biex ma jkun taʼ piż finanzjarju għal ħadd.’ (2 Tess. 3:8; Atti 20:34, 35) Meta Pawlu kiteb dwar xogħlu, hu setaʼ kien qed jirreferi għax-xogħol taʼ li jagħmel it-tined. Waqt li kien f’Korintu, hu qagħad maʼ Akwila u Prixilla u flimkien “kienu jaħdmu billi jagħmlu t-tined, għax din kienet is-sengħa tagħhom.” Il-fatt li Pawlu ħadem “lejl u nhar” ma kienx ifisser li ma kienx jieqaf. Hu kien jieħu brejk mix-xogħol tat-tined, bħal pereżempju f’jum is-Sabat. Dan il-jum tah opportunità biex jipprietka lil-Lhud, li wkoll kienu jieqfu mix-xogħol f’jum is-Sabat.—Atti 13:14-16, 42-44; 16:13; 18:1-4.
13. X’nistgħu nitgħallmu mill-eżempju taʼ Pawlu?
13 L-appostlu Pawlu hu eżempju tajjeb għalina. Għalkemm kellu jaħdem xogħol sekulari, hu għamel ċert li jieħu sehem b’mod regolari fix-“xogħol qaddis taʼ l-aħbar tajba t’Alla.” (Rum. 15:16; 2 Kor. 11:23) Hu ħeġġeġ lil oħrajn biex jagħmlu l-istess. Infatti, Akwila u Prixilla kienu ‘ħaddiema sħabu fi Kristu Ġesù.’ (Rum. 12:11; 16:3) Pawlu ħeġġeġ lill-Korintin biex ‘ikollhom ħafna x’jagħmlu fix-xogħol tal-Mulej.’ (1 Kor. 15:58; 2 Kor. 9:8) Ġeħova ispira lill-appostlu Pawlu biex jikteb hekk: “Min ma jridx jaħdem, ma jikolx.”—2 Tess. 3:10.
14. Ġesù x’ried ifisser b’dak li qal fi Ġwanni 14:12?
14 L-iktar xogħol importanti f’dawn l-aħħar jiem hu li nippritkaw u ngħinu lin-nies biex jibdew jaqdu lil Ġeħova. Fil-fatt, Ġesù qal li d-dixxipli tiegħu kienu se jagħmlu xogħol ikbar minn tiegħu! (Aqra Ġwanni 14:12.) Hu ma riedx jgħid li konna se nagħmlu l-mirakli bħalu. Li ried jgħid hu li s-segwaċi tiegħu kienu se jippritkaw f’iktar postijiet, maʼ iktar nies, u għal iktar żmien minnu.
15. Liema mistoqsijiet għandna nsaqsu lilna nfusna, u għala?
15 Jekk għandek xogħol sekulari, saqsi lilek innifsek dawn il-mistoqsijiet: ‘In-nies jafuni bħala persuna li taħdem iebes? Inlesti x-xogħol fil-ħin u nagħmlu bl-aħjar mod li nistaʼ?’ Jekk wiġibt iva, mela x’aktarx l-imgħallem se jafdak.
Barra minn hekk, hemm iktar ċans li sħabek tax-xogħol jisimgħu l-aħbar tajba. Għandek ukoll issaqsi dawn il-mistoqsijiet lilek innifsek dwar il-ministeru: ‘Jien magħruf bħala persuna li taħdem iebes fil-ministeru? Nipprepara sew għall-ewwel konversazzjonijiet man-nies? Immur malajr fuq żjajjar lura? Nieħu sehem b’mod regolari f’tipi differenti taʼ servizz?’ Jekk wiġibt iva, x’aktarx se tkun ferħan tagħmel ix-xogħol tal-ippritkar.X’INHI L-ĦARSA TIEGĦEK LEJN IL-MISTRIEĦ?
16. Il-ħarsa taʼ ħafna nies lejn il-mistrieħ kif inhi differenti minn dik taʼ Ġesù u l-appostli?
16 Ġesù kien jaf li hu u l-appostli kellhom bżonn jistrieħu. Imma ħafna nies dak iż-żmien u llum jistgħu jitqabblu mar-raġel sinjur fit-tixbiha li ta Ġesù. Dar-raġel qal hekk lilu nnifsu: “Strieħ, kul, ixrob, u gawdi.” (Lq. 12:19; 2 Tim. 3:4) Hu ħaseb li l-iktar ħaġa importanti fil-ħajja kienet li jistrieħ u jgawdi. Imma dan hu differenti ħafna minn kif Ġesù u l-appostli qiesu dawn l-affarijiet. Għalihom, li jagħmlu dak li jixtiequ ma kienx l-iktar ħaġa importanti.
17. Aħna kif nużaw il-ħin meta ma nkunux qed naħdmu?
17 Illum, aħna nipprovaw nimitaw lil Ġesù billi nużaw il-ħin li ma nkunux xogħol mhux biss biex nistrieħu imma anki biex nippritkaw u nattendu l-laqgħat Kristjani. Fil-fatt, għalina hu importanti ħafna li nattendu l-laqgħat u ngħinu n-nies jibdew jaqdu lil Ġeħova. Tant hu hekk li nagħmlu kull sforz biex nieħdu sehem f’dawn l-attivitajiet għal Ġeħova. (Ebr. 10:24, 25) Anki meta nkunu msifrin, aħna nkomplu nattendu l-laqgħat, u nfittxu opportunitajiet biex nitkellmu m’oħrajn dwar il-Bibbja.—2 Tim. 4:2.
18. Is-Sultan tagħna, Ġesù Kristu, x’jixtieqna nagħmlu?
18 Aħna vera napprezzaw il-fatt li Ġesù Kristu, is-Sultan tagħna, hu raġonevoli u jgħinna jkollna ħarsa bilanċjata lejn ix-xogħol u l-mistrieħ! (Ebr. 4:15) Hu jridna nistrieħu kemm hemm bżonn. Iridna wkoll naħdmu iebes biex immantnu lilna nfusna u nieħdu sehem fil-ministeru li jtina tant ferħ. Fl-artiklu li jmiss, se naraw x’għamel Ġesù biex isalvana milli nkunu skjavi t’affarijiet koroh.
GĦANJA 38 Hu se jsaħħek
^ par. 5 Il-Bibbja tgħallimna kif ikollna ħarsa bilanċjata lejn ix-xogħol u l-mistrieħ. Dan l-artiklu se jgħinna neżaminaw l-attitudni tagħna lejn ix-xogħol u l-mistrieħ billi juża l-eżempju tas-Sabat, jum dedikat għall-mistrieħ u l-qima.
^ par. 10 Id-dixxipli tant kienu jirrispettaw il-liġi tas-Sabat li stennew is-Sabat jgħaddi qabel ma marru biex jidilku l-fwejjaħ aromatiċi u ż-żejt ifuħ fuq il-ġisem mejjet taʼ Ġesù.—Luqa 23:55, 56.