Ibqaʼ aqdi lil Ġeħova bil-ferħ
AĦSEB fl-iktar ġurnata ferħana taʼ ħajtek. Kienet meta żżewwiġt jew meta twieled l-ewwel tifel jew tifla tiegħek? Jew kienet il-ġurnata meta tgħammidt? Din x’aktarx li kienet l-iktar ġurnata importanti u taʼ ferħ f’ħajtek. Dakinhar, kemm kienu ferħanin ħutek meta rawk turi b’mod ċar li tħobb lil Alla b’qalbek kollha, b’ruħek kollha, b’moħħok kollu, u b’saħħtek kollha!—Marku 12:30.
Wisq probabbli, esperjenzajt ħafna ferħ f’li taqdi lil Ġeħova minn mindu tgħammidt. Però, għadd taʼ pubblikaturi tilfu ftit mill-ferħ li darba kellhom. X’wassal biex ġara dan? Liema raġunijiet għandna biex inkomplu naqdu lil Ġeħova bil-ferħ?
XI WĦUD GĦALA TILFU L-FERĦ TAGĦHOM?
Il-messaġġ tas-Saltna jġibilna ħafna ferħ. Għala? Għax Ġeħova jwiegħed li s-Saltna dalwaqt se ttemm lil din id-dinja mill-agħar u ġġib id-dinja l-ġdida t’Alla. Sofonija 1:14 jgħid: “Il-jum il-kbir taʼ Ġeħova fil-qrib. Fil-qrib u qed jgħaġġel ħafna.” Imma jekk inħossu li kellna nistennew iktar milli ħsibna, jistaʼ jkun li nitilfu l-ferħ li darba kellna. Dan jistaʼ jġegħelna nnaqqsu s-servizz tagħna lil Alla.—Proverbji 13:12.
Meta nqattgħu ħin maʼ ħutna rġiel u nisa, inħossuna inkuraġġiti biex nibqgħu naqdu lil Ġeħova bil-ferħ. Il-kondotta tajba tan-nies taʼ Ġeħova forsi ġibditna lejn il-qima vera u għenitna nibdew naqdu lil Alla bil-ferħ. (1 Pietru 2:12) Però, x’jistaʼ jiġri jekk xi ħadd minn ħutna jkun ġie dixxiplinat minħabba li ma jkunx obda l-kmandi t’Alla? Dan jistaʼ jiskuraġġixxi lil xi wħud fil-kongregazzjoni u jġegħelhom jitilfu l-ferħ tagħhom.
Il-materjaliżmu wkoll jistaʼ jwassalna biex nitilfu l-ferħ tagħna. Kif? Id-dinja taʼ Satana tipprova tikkonvinċina li jmissna nixtru affarijiet li verament m’għandniex bżonn. Allura forsi niftakru fil-kliem taʼ Ġesù: “Ħadd ma jistaʼ jkun ilsir taʼ żewġ sidien; għax jew jobgħod lil wieħed u jħobb lill-ieħor, jew jintrabat maʼ wieħed u jistmerr lill-ieħor. Ma tistgħux tkunu lsiera t’Alla u tal-flus.” (Mattew 6:24) Ma nistgħux naqdu lil Ġeħova bil-ferħ u fl-istess ħin nipprovaw nieħdu kemm nistgħu minn din id-dinja.
FERĦANIN FIS-SERVIZZ TAʼ ĠEĦOVA
Dawk li jħobbu lil Ġeħova ma jsibuhiex bi tqila biex jaqduh. (1 Ġwanni 5:3) Ftakar li Ġesù qal: “Ejjew għandi, intom ilkoll li mħabbtin u mgħobbijin, u jien inserraħkom. Ħudu l-madmad tiegħi fuqkom u tgħallmu minni, għax jien ġwejjed u umli f’qalbi, u intom issibu serħan għal ruħkom. Għax il-madmad tiegħi ħelu u t-tagħbija tiegħi ħafifa.” (Mattew 11:28-30) Il-fatt li aħna Kristjani veri jserraħna u jferraħna. Żgur li għandna raġunijiet tajbin biex inkunu ferħanin aħna u naqdu lil Ġeħova. Ejja nikkunsidraw tlieta minn dawn ir-raġunijiet.—Ħabakkuk 3:18.
Aħna naqdu lid-Donatur tal-ħajja, l-Alla l-hieni. (Atti 17:28; 1 Timotju 1:11) Aħna nirrealizzaw li ħajjitna nafuha lill-Ħallieq tagħna. Allura ejja nkomplu naqduh bil-ferħ, għaddew kemm għaddew snin minn mindu tgħammidna.
Ikkunsidra l-eżempju taʼ Héctor, li qeda lil Ġeħova bħala indokratur li jivvjaġġa għal 40 sena. Anke issa ‘meta xagħru sar griż,’ għadu jħobb jaqdi lil Ġeħova. (Salm 92:12-14) Il-marda taʼ martu ma tippermettilux jagħmel kemm kien jagħmel fis-servizz t’Alla, imma Héctor ma tilifx il-ferħ tiegħu. Hu jgħid: “Għalkemm inħossni mnikket meta nara s-saħħa taʼ marti sejra lura bil-mod il-mod u minkejja li hu taʼ sfida biex nieħu ħsiebha, ma ħallejtx dan jisraqli l-ferħ f’li naqdi lill-Alla l-veru. Peress li naf li hu grazzi għal Ġeħova li jien ħaj, u li Alla ħalaq lill-bniedem bi skop, dan hu raġuni biżżejjed biex inħobbu mill-fond taʼ qalbi u naqdih b’qalbi kollha. Nagħmel l-almu tiegħi biex nibqaʼ attiv fl-ippritkar, u nipprova nżomm it-tama tas-Saltna l-ewwel u qabel kollox f’moħħi sabiex ma nitlifx il-ferħ.”
Ġeħova pprovda s-sagrifiċċju tal-fidwa, u b’hekk għamilha possibbli li jkollna ħajja ferħana. Tabilħaqq, “Alla tant ħabb lid-dinja li ta l-Iben uniġenitu tiegħu, biex kulmin jeżerċita l-fidi fih ma jinqeridx imma jkollu l-ħajja taʼ dejjem.” (Ġwanni 3:16) Iva, dnubietna jistgħu jinħafrulna u jistaʼ jkollna l-ħajja taʼ dejjem meta nuru fidi fil-fidwa, li hi rigal kollu mħabba mingħand Alla. Din tassew hi raġuni eċċellenti biex inkunu grati! U l-gratitudni għall-fidwa se tqanqalna naqdu lil Ġeħova bil-ferħ.
Ħu jismu Jesús, li għex fil-Messiku, qal: “Kont ilsir tax-xogħol, tant li xi drabi kont naħdem ħames shifts wieħed wara l-ieħor avolja ma kontx obbligat li nagħmel dan. Għamilt hekk sempliċement biex naqlaʼ iktar flus. Imbagħad tgħallimt dwar Ġeħova u dwar kif ta lil Ibnu l-għażiż għall-bnedmin. Kelli xewqa kbira li naqdih. Għalhekk, iddedikajt ħajti lil Ġeħova, u wara li kont ili naħdem għall-kumpanija għal 28 sena, iddeċidejt li nitlaq u nidħol fis-servizz full-time.” Dan hu kif Jesús beda jaqdi lil Ġeħova bil-ferħ.
Ngħixu ħajja nadifa moralment, u dan iferraħna. Tiftakar kif kienet ħajtek qabel ma sirt taf lil Ġeħova? L-appostlu Pawlu fakkar lill-Kristjani f’Ruma li darba kienu “l-ilsiera tad-dnub” imma li kienu saru “lsiera tal-ġustizzja.” Peress li kienu qed jgħixu ħajja nadifa, setgħu jħarsu ’l quddiem Rumani 6:17-22) Aħna wkoll insegwu l-livelli taʼ Ġeħova, u għalhekk aħna meħlusin min-niket li jiġi minn mod taʼ ħajja immorali jew vjolenti. Dan jagħtina raġuni kbira biex nifirħu!
għall-ħajja taʼ dejjem. (Ikkunsidra lil Jaime, li kien ateu u evoluzzjonist u li wkoll kien boxer. Jaime beda jattendi l-laqgħat Kristjani u qalbu ntmessitlu mill-imħabba li sab hemm. Sabiex jabbanduna l-istil taʼ ħajja li kellu qabel, Jaime kellu jitlob lil Ġeħova biex jgħinu jemmen Fih. “Bil-mod il-mod, skoprejt l-eżistenza taʼ Missier kollu mħabba u Alla mimli ħniena,” jgħid Jaime. “Il-fatt li nżomm mal-livelli ġusti taʼ Ġeħova hu taʼ protezzjoni għalija. Li kieku ma biddiltx ħajti, stajt ġejt maqtul, bħalma ġara lil ftit minn sħabi tal-boxing li kelli qabel. L-iktar snin taʼ ferħ f’ħajti kienu dawk li qattajt f’li naqdi lil Ġeħova.”
TAQTAX QALBEK!
Kif għandna nħossuna hekk kif nistennew it-tmiem taʼ din id-dinja mill-agħar? Tinsiex, qed nagħmlu r-rieda t’Alla u qed inħarsu ’l quddiem għall-ħajja taʼ dejjem. “Għalhekk, ħa ma niqfux nagħmlu dak li hu tajjeb, għax meta jasal iż-żmien naħsdu jekk ma negħjewx.” (Galatin 6:8, 9) Bl-għajnuna taʼ Ġeħova, ejja nissaportu, nistinkaw biex nikkultivaw il-kwalitajiet li għandna bżonn biex ngħaddu ħajjin “mit-tribulazzjoni l-kbira,” u nkomplu naqdu lil Ġeħova bil-ferħ.—Rivelazzjoni 7:9, 13, 14; Ġakbu 1:2-4.
Nistgħu nkunu fiduċjużi li Ġeħova se jippremja s-sabar tagħna għax hu jaf ix-xogħol li qed nagħmlu u l-imħabba li nuru għalih u għal ismu. Jekk nibqgħu naqduh bil-ferħ, se nkunu bħas-Salmista David, li qal: “Qegħedt lil Ġeħova quddiemi l-ħin kollu. Bih fuq leminti, m’iniex se nitħarrek. Għalhekk, qalbi tifraħ, u kulma hu glorjuż fija jithenna. U ġismi jgħammar fis-sigurtà.”—Salm 16:8, 9.