JIEN twelidt fl-​1926 fi Crooksville, Ohio, l-​Istati Uniti. Missieri u ommi ma kinux reliġjużi, imma kienu jibagħtu lili u lil ħuti l-​Knisja. Konna tmint itfal b’kollox, u jien kont immur il-​Knisja Metodista. Meta kelli 14-​il sena, il-​ministru tal-​knisja tani premju għax kont mort il-​knisja kull nhar taʼ Ħadd għal sena sħiħa.

Madwar dak iż-​żmien, ġara jisimha Margaret Walker waħda mix-​Xhieda taʼ Ġeħova, bdiet iżżur lil ommi u tkellimha dwar il-​Bibbja. Darba minnhom, iddeċidejt li noqgħod magħhom għad-​diskussjoni. Ommi ħasbet li kont se noqgħod intellef l-​istudju, u allura bagħtitni barra. Imma bqajt nipprova nismaʼ d-​diskussjonijiet tagħhom. Wara xi żjajjar oħra, Margaret staqsietni, “Taf x’jismu Alla?” Jien għedtilha, “Kulħadd jaf x’jismu—Alla.” Hi qalet, “Ġib il-​Bibbja tiegħek u fittex Salm 83:18.” Għamilt kif qaltli, u skoprejt li isem Alla hu Ġeħova. Ħriġt niġri ħdejn sħabi u għedtilhom, “Xħin tmorru d-​dar illejla, fittxu Salm 83:18 fil-​Bibbja u araw x’jismu Alla.” Tistaʼ tgħid li bdejt nagħti xhieda mill-​ewwel.

Studjajt il-​Bibbja u tgħammidt fl-​1941. Ftit wara dan, ġejt inkarigat nikkonduċi l-​istudju tal-​ktieb tal-​kongregazzjoni. Inkuraġġejt lil ommi u lil ħuti biex jiġu, u kollha bdew jattendu l-​istudju tal-​ktieb li kont nikkonduċi. Imma missieri ma kienx interessat.

Ġejt mogħti iktar responsabbiltà fil-​kongregazzjoni, u ġbart ħafna kotba ppubblikati mix-​Xhieda taʼ Ġeħova. Ġurnata fost l-​oħrajn, missieri pponta lejn il-​kotba tiegħi u qalli: “Qed tarah dak l-​imbarazz? Irridu barra mid-​dar, u int tistaʼ titlaq ukoll.” Tlaqt mid-​dar u mort ngħix f’Zanesville, Ohio, li ma kienx ’il bogħod. Imma kont nivvjaġġa spiss lura d-​dar biex ninkuraġġixxi lill-​familja tiegħi.

Missieri pprova jwaqqaf lil ommi milli tattendi l-​laqgħat. Kultant, hi u sejra lejn il-​laqgħa, kien joħroġ jiġri warajha u jkaxkarha lura ġod-​dar.  Imma hi sempliċement kienet toħroġ tiġri mill-​bieb l-​ieħor u tmur il-​laqgħa. Jien għedt lil ommi: “Toqgħodx tinkwieta. Eventwalment, se jixbaʼ jiġri warajk.” Maż-​żmien missieri qataʼ qalbu jipprova jwaqqafha, u attendiet il-​laqgħat bil-​libertà.

Meta bdiet l-​Iskola tal-​Ministeru Teokratiku fl-​1943, bdejt nagħti taħditiet tal-​istudenti fil-​kongregazzjoni tiegħi. Il-​pariri li ngħatajt wara l-​inkarigi tiegħi fl-​iskola għenuni nkun kelliemi aħjar.

Fl-​1944, matul it-​Tieni Gwerra Dinjija, inqbadt bil-​lieva. Mort nirrapporta f’Fort Hayes ġo Columbus, Ohio, qgħadt għall-​eżami fiżiku, u mlejt il-​karti li tawni. Ukoll, għedt lill-​fizzjali li ma kontx se nkun suldat. Ħallewni mmur lura d-​dar. Imma ftit ġranet wara, ġie jħabbatli uffiċjal u qalli, “Corwin Robison, għandi ordni biex narrestak.”

Fil-​qorti xi ħmistax wara, l-​imħallef qal: “Li kieku kien f’idejja biss, kont intik sentenza għal għomrok. Hemm xi ħaġa li tixtieq tgħid?” Jien weġibt: “Sur Imħallef, jien imissni ġejt ikklassifikat bħala ministru tar-​reliġjon. * L-​għatba taʼ kulħadd hi l-​pulptu tiegħi, u jien ippritkajt l-​aħbar tajba tas-​Saltna lil ħafna nies.” L-​imħallef qal lin-​nies tal-​ġurija: “M’intomx hawn biex tiddeċiedu jekk dan il-​ġuvni huwiex ministru jew le. Qegħdin hawn biex tiddeċiedu jekk irrifjutax biex jidħol fl-​armata jew le.” F’inqas minn nofs siegħa, in-​nies tal-​ġurija ddeċidew li kont ħati. L-​imħallef tani s-​sentenza taʼ ħames snin ħabs f’Ashland, Kentucky.

Qattajt l-​ewwel ħmistax f’ħabs f’Columbus, Ohio, u l-​ewwel ġurnata qattajtha ġoċ-​ċella. Tlabt lil Ġeħova u għedtlu: “Ma nistax nibqaʼ ġoċ-​ċella għal ħames snin. Ma nafx x’se nagħmel.”

L-​għada, il-​gwardji ħarġuni. Mort ħdejn priġunier twil u mibni, u qgħadna bilwieqfa ħdejn xulxin, nittawlu mit-​tieqa. Saqsieni, “Għala tefgħuk il-​ħabs, Qsajjar?” Għedtlu, “Jien wieħed mix-​Xhieda taʼ Ġeħova.” Qalli, “Eħe? Allura għala qiegħed hawn?” Għedtlu, “Ix-​Xhieda taʼ Ġeħova ma jmorrux għal gwerra u ma joqtlux lin-​nies.” Qalli, “Mela lilek tefgħuk il-​ħabs għax ma tridx toqtol lin-​nies. U jitfgħu nies oħra l-​ħabs għax qatlu n-​nies. Jagħmel sens għalik dan?” Għedtlu, “Le, lanqas xejn.”

Imbagħad qal, “Għal 15-​il sena kont ġo ħabs ieħor, u hemm qrajt ftit mil-​letteratura tagħkom.” Meta smajt dan, tlabt, “Ġeħova, għinni biex dan ir-​raġel ikun fuq in-​naħa tiegħi.” Dak il-​ħin, il-​ħabsi, li kien jismu Paul, qal: “Jekk xi ħadd minn dawn  l-​irġiel imissek, kulma trid tagħmel hu li tgħajjat u tħallih f’idi.” Għalhekk, waqt li kont hemm xejn ma kelli inkwiet mal-​50 priġunier f’dik is-​sezzjoni.

Meta l-​uffiċjali tefgħuni f’ħabs f’Ashland, iltqajt maʼ xi aħwa rġiel maturi li diġà kienu hemm. Għenu lili u lil oħrajn biex nibqgħu qrib taʼ Ġeħova. Kull ġimgħa inkarigawna b’qari tal-​Bibbja, u ppreparajna mistoqsijiet u tweġibiet għal-​laqgħat li kienu jorganizzaw l-​aħwa rġiel. Konna f’ċella kbira li kellha s-​sodod tul il-​kamra. Kien hemm ħu li kien jorganizza t-​territorju tagħna. Kien jgħidli: “Robison, int responsabbli għal din is-​sodda. Kull min jorqod f’dik is-​sodda hu t-​territorju tiegħek. Għamel ċert li tagħtih xhieda qabel ma jitlaq.” U b’hekk konna nippritkaw b’mod organizzat.

It-​Tieni Gwerra Dinjija spiċċat fl-​1945, imma jiena bqajt fil-​ħabs għal xi żmien wara dan. Inkwetajt dwar il-​familja tiegħi għax missieri kien qalli, “Jekk jirnexxili neħles minnek, l-​oħrajn malajr joqogħdu għal li rrid jien.” Wara li nħlist, kelli sorpriża sabiħa. Sebgħa mill-​familja tiegħi kienu qed jattendu l-​laqgħat u waħda minn ħuti l-​bniet kienet tgħammdet, minkejja l-​oppożizzjoni taʼ missieri.

Meta bdiet il-​gwerra mal-​Korea fl-​1950, erġajt inqbadt bil-​lieva għat-​tieni darba. Intqalli li kelli mmur nirrapporta f’Fort Hayes. Wara li għamluli xi testijiet tal-​abbiltajiet tiegħi, fizzjal qalli, “Għandek waħda mill-​ogħla marki fil-​grupp tiegħek.” Jien għedtlu, “Tajjeb, imma m’iniex se nidħol fl-​armata.” Ikkwotajt l-​2 Timotju 2:3 u għedt, “Jien diġà suldat taʼ Kristu.” Wara pawsa twila, qalli, “Tistaʼ titlaq.”

Ftit wara dan, attendejt il-​laqgħa taʼ Betel f’konvenzjoni f’Cincinnati, Ohio. Ħuna Milton Henschel qalilna li kien hemm bżonn kbir f’Betel għal aħwa rġiel li riedu jaħdmu iebes għas-​Saltna. Applikajt biex naqdi f’Betel u ġejt aċċettat. Bdejt naqdi ġo Brooklyn f’Awwissu tal-​1954, u għadni Betel sal-​lum il-​ġurnata.

Minn dejjem kelli ħafna xogħol x’nagħmel ġo Betel. Għal diversi snin, ħadt ħsieb il-​bojlers ġol-​istamperija u l-​bini tal-​uffiċċji, kont insewwi l-​magni, u nirranġa s-​serraturi. Ukoll, ħdimt fis-​Swali tal-​Assembleat fil-​belt taʼ New York.

Veru nħobb il-​programmi f’Betel, bħal pereżempju l-​qima taʼ filgħodu u l-​istudju tat-​Torri tal-​Għassa bħala familja Betel, kif ukoll li nipprietka mal-​kongregazzjoni. Meta toqgħod taħseb, dawn huma l-​affarijiet li kull familja tax-​Xhieda taʼ Ġeħova jmissha tkun qed tagħmel b’mod regulari. Meta l-​ġenituri u t-​tfal jikkunsidraw l-​iskrittura  tal-​jum flimkien, ikollhom sessjonijiet taʼ qima bħala familja b’mod regulari, jipparteċipaw fil-​laqgħat, u jkunu żelużi għall-​ippritkar tal-​aħbar tajba, il-​membri kollha tal-​familja x’aktarx se jibqgħu qrib taʼ Ġeħova.

Għandi ħafna ħbieb f’Betel u fil-​kongregazzjoni. Xi wħud minnhom kienu midlukin u issa qegħdin fis-​sema. Oħrajn ma kinux midlukin. Imma l-​qaddejja taʼ Ġeħova huma lkoll imperfetti, inkluż il-​Beteliti. Jekk ikolli argument maʼ xi ħu, dejjem nipprova nżomm il-​paċi. Dejjem naħseb f’​Mattew 5:23, 24 u f’kif għandna nittrattaw maʼ xi nuqqas taʼ qbil. Mhuwiex dejjem faċli li tgħid “Skużani,” imma kważi kull nuqqas taʼ qbil jissolva b’dan il-​mod.

Issa nsibha bi tqila biex nipprietka minn dar għal dar minħabba l-​età, imma ma qtajtx qalbi b’daqshekk. Tgħallimt ftit Ċiniż Mandarin u nieħu pjaċir navviċina lil nies Ċiniżi fit-​triq. Xi kultant f’għodwa waħda nħalli 30 jew 40 rivista maʼ wħud interessati.

Saħansitra għamilt żjara lura fiċ-​Ċina! Ġurnata minnhom, tfajla dħulija tbissmitli hekk kif qassmet riklami għal kjosk tal-​frott. Tbissimt lura u offrejtilha It-​Torri tal-​Għassa u Stenbaħ! biċ-​Ċiniż. Ħadithom u qaltli li jisimha Katie. Wara dan, kull meta kienet tarani, Katie kienet tiġi ħdejja u kienet toqgħod titkellem miegħi. Għallimtha l-​ismijiet tal-​frott u l-​ħaxix bl-​Ingliż, u kienet tirripetihom warajja. Ukoll, spjegajtilha versi mill-​Bibbja, u hi aċċettat il-​ktieb Il-​Bibbja X’Tgħallem? Iżda, wara ftit ġimgħat sparixxiet.

Xi xhur wara, offrejt ir-​rivisti lil tfajla oħra li kienet qed tqassam ir-​riklami, u aċċettathom. Il-​ġimgħa taʼ wara, tatni l-​mowbajl tagħha u qaltli, “Tkellem maċ-​Ċina.” Għedtilha, “Ma naf lil ħadd fiċ-​Ċina.” Imma insistiet, u allura ħadt il-​mowbajl u għedt, “Hello, jien Robison.” Il-​persuna fuq in-​naħa l-​oħra tal-​linja qaltli, “Robby, jien Katie. Ġejt lura ċ-​Ċina.” Għedtilha, “Iċ-​Ċina?” Katie wieġbet, “Iva. Robby, dik it-​tfajla li tatek il-​mowbajl hi oħti. Int għallimtni ħafna affarijiet tajbin. Jekk jogħġbok għallimha kif għallimt lili.” Għedtilha, “Katie, se nagħmel l-​aħjar li nistaʼ. Grazzi talli għedtli fejn int.” Ftit wara dan, tkellimt maʼ oħt Katie għall-​aħħar darba. Huma fejn huma dawk iż-​żewġ tfajliet, nittama li jitgħallmu iktar dwar Ġeħova.

Qdejt lil Ġeħova għal 73 sena, u jien ferħan ħafna li għenni nibqaʼ newtrali u nkun leali fil-​ħabs. Ukoll, ħuti jgħiduli li kienu inkuraġġiti għax iffaċċjajt l-​oppożizzjoni taʼ missieri mingħajr ma qtajt qalbi. Eventwalment, ommi u sitta minn ħuti tgħammdu. Anki l-​attitudni taʼ missieri nbidlet xi ftit, u attenda għal xi laqgħat qabel ma miet.

Jekk inhi r-​rieda t’Alla, il-​membri tal-​familja tiegħi u l-​ħbieb li mietu se jirxoxtaw għall-​ħajja fid-​dinja l-​ġdida. Immaġina l-​ferħ tagħna hekk kif inqimu lil Ġeħova għal dejjem maʼ dawk li nħobbu! *—Ara n-​nota taʼ taħt.