1. Għalkemm Ġeħova hu l-Wieħed Suprem, liema stedina ta lil oħrajn?

ĠEĦOVA hu l-Wieħed Suprem. Hu ħalaq kollox, u għandu għerf u qawwa bla limitu. Wara li għen lil Ġob jifhem dan, Ġob qallu: “Sirt naf li int għandek il-ħila tagħmel kollox, u m’hemm ebda idea li ma tistax twettaqha.” (Ġob 42:2) Ġeħova jista’ jagħmel kwalunkwe ħaġa li jiddeċiedi li jagħmel mingħajr l-għajnuna ta’ ħadd. Imma juri mħabba billi jistieden lil oħrajn jaħdmu miegħu f’li jwettaq ir-rieda tiegħu.

2. Ġeħova stieden lil Ġesù biex jagħmel liema xogħol importanti?

² Alla ħalaq lil Ibnu, Ġesù, qabel ma ħalaq kull persuna u kull ħaġa oħra. Imbagħad, Ġeħova ħalla lil Ibnu jgħinu joħloq l-affarijiet l-oħra kollha. (Ġwanni 1:1-3, 18) L-appostlu Pawlu kiteb hekk dwar Ġesù: “Permezz tiegħu  nħolqu l-affarijiet l-oħrajn kollha fis-smewwiet u fuq l-art, dawk viżibbli u dawk inviżibbli, sew jekk huma tronijiet, ħakmiet, gvernijiet, jew awtoritajiet. L-affarijiet l-oħrajn kollha nħolqu permezz tiegħu u għalih.” (Kolossin 1:15-17) Għalhekk, Ġeħova mhux biss ta lil Ibnu xogħol importanti, imma wkoll qal lil oħrajn dwar dan. X’unur!

3. Ġeħova xi stiednu jagħmel lil Adam, u għala?

³ Ġeħova stieden ukoll lill-bnedmin biex jaħdmu miegħu. Pereżempju, ħalla lil Adam jagħti isem lill-annimali. (Ġenesi 2:19, 20) Immaġina l-ferħ li ħass Adam meta għamel dan ix-xogħol! Hu studja bir-reqqa l-mod kif l-annimali kienu jidhru u jaġixxu, u mbagħad għażel isem għal kull wieħed minnhom. Ġeħova kien ħalaq l-annimali kollha, għalhekk seta’ jagħtihom isem hu stess. Però, wera lil Adam kemm kien iħobbu billi ħalla lilu jagħti isem lill-annimali. Ukoll, Alla ta lil Adam l-inkarigu li jagħmel l-art kollha ġenna. (Ġenesi 1:27, 28) Imma Adam eventwalment iddeċieda li jieqaf jaħdem m’Alla, u dan wassal għal ħafna tbatija għalih u għad-dixxendenti kollha tiegħu.—Ġenesi 3:17-19, 23.

4. Oħrajn kif ħadmu m’Alla biex iwettqu r-rieda tiegħu?

⁴ Iktar tard, Alla stieden lil nies oħra biex jaħdmu miegħu. Noè bena arka li żammet lilu u lil familtu ħajjin matul id-Dulluvju. Mosè ħeles lill-ġens tal-Iżrael mill-Eġittu. Ġożwè mexxa lill-Iżraelin għal ġol-Art Imwiegħda. Salamun bena t-tempju f’Ġerusalemm. Marija saret omm Ġesù. Dawn l-uħud leali kollha u ħafna oħrajn ħadmu ma’ Ġeħova biex iwettqu r-rieda tiegħu.

5. F’liema xogħol nistgħu nieħdu sehem, u Ġeħova kellu għalfejn jinvolvina f’dan ix-xogħol? (Ara l-ewwel stampa.)

⁵ Illum il-ġurnata, Ġeħova jistidinna biex nagħmlu kulma nistgħu biex nappoġġaw is-Saltna tiegħu. Hemm ħafna modi kif nistgħu naqdu lil Alla. U għalkemm mhux kollha nistgħu naqduh bl-istess mod, kollha nistgħu nippritkaw l-aħbar tajba tas-Saltna. Ġeħova seta’ għamel dan ix-xogħol waħdu. Seta’ kellem lin-nies fuq l-art direttament mis-sema. Ġesù qal li Ġeħova saħansitra jista’ jġiegħel il-ġebel jgħid lil oħrajn dwar is-Sultan tas-Saltna Tiegħu. (Luqa 19:37-40) Imma Ġeħova jħallina nkunu ‘ħaddiema sħabu.’ (1 Korintin 3:9) L-appostlu Pawlu kiteb: “Waqt li naħdmu flimkien miegħu, nitolbukom bil-ħrara wkoll biex ma taċċettawx il-qalb tajba mhix mistħoqqa t’Alla u titilfu l-iskop tagħha.” (2 Korintin 6:1) Hu unur kbir li tkun mistieden biex taħdem m’Alla. Ejja naraw xi raġunijiet għala dan iġibilna ħafna ferħ.

6. L-ewwel Iben imwieled t’Alla kif iddeskriva kif ħassu dwar li jaħdem flimkien ma’ Missieru?

⁶ Il-qaddejja ta’ Ġeħova dejjem ferħu meta ħadmu m’Alla. Qabel ma ġie fuq l-art, l-ewwel Iben imwieled t’Alla qal: “Ġeħova nissilni bħala l-bidu ta’ l-attività kreattiva tiegħu . . . Kont maġenbu bħala ħaddiem tas-sengħa, u kien jgħożżni b’mod speċjali jum wara l-ieħor, u kont nieħu pjaċir quddiemu l-ħin kollu.” (Proverbji 8:22, 30) Meta Ġesù  ħadem ma’ Missieru, kien ferħan għax wettaq ħafna affarijiet u kien jaf li Ġeħova jħobbu. Imma xi ngħidu għalina?

7. L-ippritkar għala jferraħna?

⁷ Ġesù qal li aħna nkunu ferħanin kemm meta nagħtu u anke meta nirċievu. (Atti 20:35) Fraħna meta rċivejna l-verità, imma għala nifirħu wkoll meta naqsmu l-verità m’oħrajn? Għax narawhom isiru verament ferħanin meta jifhmu dak li tgħallem il-Bibbja u jibdew ikollhom relazzjoni m’Alla. Aħna nħossuna eċċitati meta narawhom ibiddlu l-mod ta’ kif jaħsbu u jgħixu. L-ippritkar hu l-iktar xogħol importanti u sodisfaċenti li jista’ jkollna. Jagħmilha possibbli għal dawk li jsiru l-ħbieb t’Alla li jkollhom il-ħajja ta’ dejjem.—2 Korintin 5:20.

8. Xi wħud x’qalu dwar il-ferħ li jiġi meta naħdmu ma’ Ġeħova?

⁸ Meta ngħinu lil oħrajn jitgħallmu dwar Alla, nafu li qed nogħġbu lil Ġeħova u li hu jgħożż l-isforzi tagħna biex naqduh. Dan ukoll iferraħna. (Aqra l-1 Korintin 15:58.) Marco, li jgħix l-Italja, jgħid: “Għandi ferħ li ma jitkejjilx li jiġi meta nkun naf li qed nagħti l-aħjar tiegħi lil Ġeħova u mhux lil xi ħadd li ma jdumx ma jinsa dak li għamilt.” B’mod simili, Franco, li wkoll jaqdi fl-Italja, jgħid: “Permezz tal-Kelma tiegħu u l-pubblikazzjonijiet u l-laqgħat Kristjani, Ġeħova jfakkarna kuljum li jħobbna u li dak kollu li nagħmlu għalih hu importanti, avolja l-isforzi tagħna forsi jidhru insinifikanti f’għajnejna. Hu għalhekk li meta naħdem m’Alla nkun ferħan u ħajti jkollha skop.”

9. Liema relazzjoni kien hemm bejn Ġeħova u Ġesù, u għala?

⁹ Meta naħdmu flimkien ma’ dawk li nħobbu, nersqu qrib tagħhom. Insiru  nafu iktar dwar il-personalità u l-kwalitajiet tagħhom. Nitgħallmu dwar x’inhuma l-miri tagħhom u kif qed jipprovaw jilħquhom. Ġesù ħadem ma’ Ġeħova għal forsi biljuni ta’ snin. L-imħabba u l-affezzjoni tagħhom għal xulxin tant saru b’saħħithom li xejn ma seta’ jkisser ir-relazzjoni tagħhom. Ġesù spjega kemm kienet mill-qrib dik ir-relazzjoni meta qal: “Jien u l-Missier ħaġa waħda.” (Ġwanni 10:30) Kienu tassew magħqudin, u kkooperaw bis-sħiħ meta ħadmu flimkien.

10. L-ippritkar għala jressaqna eqreb lejn Alla u lejn oħrajn?

¹⁰ Ġesù talab lil Ġeħova biex jipproteġi lid-dixxipli tiegħu. Għala? Hu talab: “Biex ikunu ħaġa waħda bħalna.” (Ġwanni 17:11) Meta ngħixu fi qbil mal-livelli t’Alla u nieħdu sehem fl-ippritkar, nifhmu aħjar il-kwalitajiet mill-isbaħ tiegħu. Nitgħallmu għala nkunu għaqlin jekk nafdaw fih u nsegwu d-direzzjoni tiegħu. U meta nersqu qrib t’Alla, hu jersaq qrib tagħna. (Aqra Ġakbu 4:8.) Aħna nersqu qrib ukoll ta’ ħutna rġiel u nisa għax nesperjenzaw problemi u ferħ simili u għax għandna l-istess miri. Aħna naħdmu flimkien, nifirħu flimkien, u nissaportu flimkien. Octavia, li tgħix il-Britannja, tgħid: “Li naħdem ma’ Ġeħova jressaqni eqreb lejn oħrajn.” Tispjega li dan hu għax il-ħbiberiji tagħha issa huma bbażati fuq “mira u direzzjoni komuni.” Żgur li nħossuna l-istess. Meta naraw l-isforzi li jagħmlu ħutna biex jogħġbu lil Ġeħova, dan iressaqna eqreb lejhom.

11. Għala se nersqu saħansitra eqreb lejn Ġeħova u lejn ħutna fid-dinja l-ġdida?

¹¹ L-imħabba tagħna għal Alla u għal ħutna hi b’saħħitha issa, imma se tkun saħansitra iktar b’saħħitha fid-dinja l-ġdida. Aħseb dwar ix-xogħol eċċitanti kollu li se nagħmlu fil-futur! Se nilqgħu lura lil dawk li jiġu rxoxtati u ngħallmuhom dwar Ġeħova. Ukoll, se nbiddlu l-art f’ġenna. Se jkun sors ta’ ferħ kbir li naħdmu flimkien u li bil-mod il-mod insiru perfetti taħt it-tmexxija ta’ Kristu. Il-bnedmin kollha se jersqu saħansitra iktar qrib ta’ xulxin u ta’ Ġeħova, li żgur se ‘jissodisfa x-xewqa ta’ kull ħaġa ħajja.’—Salm 145:16.

12. L-ippritkar kif inhu ta’ protezzjoni għalina?

¹² Għandna bżonn nipproteġu r-relazzjoni tagħna ma’ Ġeħova. Aħna ngħixu fid-dinja ta’ Satana u lkoll imperfetti, u allura hu faċli għalina li nibdew naħsbu u naġixxu bħal dawk fid-dinja. Hu bħal meta nkunu qed ngħumu kontra l-kurrent. Ikollna nużaw saħħitna kollha biex nagħmlu dan. Bl-istess mod, irridu nagħmlu  l-almu tagħna biex nevitaw li niġu influwenzati mid-dinja ta’ Satana. Allura, l-ippritkar kif jipproteġina? Meta nitkellmu dwar Ġeħova u l-Bibbja, niffokaw fuq affarijiet li huma importanti u tajbin, u mhux fuq affarijiet li se jdgħajfulna l-fidi. (Filippin 4:8) L-ippritkar isaħħaħ il-fidi tagħna għax ifakkarna fil-wegħdi t’Alla u fil-livelli kollhom imħabba tiegħu. Jgħinna wkoll inżommu l-kwalitajiet li għandna bżonn biex nipproteġu ruħna minn Satana u d-dinja tiegħu.—Aqra Efesin 6:14-17.

13. Xhud fl-Awstralja kif iħossu dwar l-ippritkar?

¹³ Meta nibqgħu beżlin f’li nippritkaw, nistudjaw, u nagħmlu affarijiet għal oħrajn fil-kongregazzjoni, inkunu protetti għax ma jkollniex ħin biex noqogħdu ninkwetaw iżżejjed fuq il-problemi tagħna stess. Joel, li jgħix l-Awstralja, jgħid: “L-ippritkar jgħinni nżomm saqajja mal-art u ma ninsiex x’inhi r-realtà. Ifakkarni fl-isfidi li qed iħabbtu wiċċhom magħhom in-nies u fil-benefiċċji li ksibt meta applikajt il-prinċipji tal-Bibbja f’ħajti. L-ippritkar jgħinni nipprova nibqa’ umli; jagħtini opportunità biex nistrieħ fuq Ġeħova u fuq ħuti rġiel u nisa.”

14. Il-fatt li nibqgħu nippritkaw kif juri li l-ispirtu t’Alla qiegħed magħna?

¹⁴ L-ippritkar jagħtina wkoll iktar fiduċja li l-ispirtu t’Alla qiegħed magħna. Biex nagħtu eżempju: Immaġina li x-xogħol tiegħek hu li tqassam il-ħobż lin-nies fil-komunità tiegħek. Ma titħallasx biex tagħmel dan ix-xogħol, u int trid taħseb għall-ispejjeż li jkollok. Ukoll, il-biċċa l-kbira tan-nies ma jridux il-ħobż, u xi wħud minnhom saħansitra jobogħduk talli tiħdilhom il-ħobż. Kemm taħseb li se ddum tagħmel dan ix-xogħol? Mhux se ddum ma tibda taqta’ qalbek, u probabbli tieqaf. Iżda, ħafna minna jkomplu jippritkaw sena wara sena, avolja dan jiswielna l-flus u jiħdilna l-ħin u avolja n-nies jgħadduna biż-żmien jew jirrabjaw magħna. Dan juri biċ-ċar li l-ispirtu t’Alla qed jgħinna.

15. L-ippritkar tal-aħbar tajba kif inhu marbut mal-iskop t’Alla għall-bnedmin?

¹⁵ L-ippritkar kif inhu marbut mal-iskop ta’ Ġeħova għall-bnedmin? L-iskop t’Alla kien li l-bnedmin jgħixu għal dejjem, u l-iskop tiegħu ma nbidilx meta dineb Adam. (Isaija 55:11) Alla għamel arranġament għalina biex ninħelsu mid-dnub u l-mewt. Kif? Ġesù ġie fuq l-art u ssagrifika ħajtu. Imma biex jibbenefikaw mis-sagrifiċċju tiegħu, il-bnedmin kellhom bżonn jobdu lil Alla. Għalhekk, Ġesù għallem  lin-nies dak li jistenna minnhom Alla, u kkmanda lid-dixxipli tiegħu biex jagħmlu l-istess xogħol. Meta nippritkaw u ngħinu lil oħrajn isiru l-ħbieb t’Alla llum, inkunu qed naħdmu direttament m’Alla fl-arranġament kollu mħabba tiegħu biex isalva n-nies mid-dnub u l-mewt.

16. L-ippritkar tagħna kif inhu konness mal-akbar kmandamenti t’Alla?

¹⁶ Meta ngħinu lil oħrajn jaqbdu t-triq għall-ħajja ta’ dejjem, inkunu qed nuru li nħobbu lilhom u lil Ġeħova. Hu “jrid li bnedmin ta’ kull xorta jiġu salvati u jaslu għall-għarfien eżatt dwar il-verità.” (1 Timotju 2:4) Meta Fariżew saqsa lil Ġesù x’kien l-akbar kmandament t’Alla, Ġesù qal: “‘Ħobb lil Ġeħova Alla tiegħek b’qalbek kollha u b’ruħek kollha u b’moħħok kollu.’ Dan hu l-akbar u l-ewwel kmandament. It-tieni jixbhu u hu dan, ‘Ħobb lill-proxxmu tiegħek bħalek innifsek.’” (Mattew 22:37-39) Billi nippritkaw l-aħbar tajba, inkunu qed nobdu dawn il-kmandamenti.—Aqra Atti 10:42.

17. Kif tħossok dwar l-unur li tipprietka l-aħbar tajba?

¹⁷ Kemm aħna mberkin! Ġeħova tana xogħol li jferraħna, li jressaqna eqreb lejh u lejn ħutna, u li jipproteġi r-relazzjoni li għandna miegħu. Ukoll, jagħtina l-opportunità li nuru mħabbitna għal Alla u għal oħrajn. Ġeħova għandu miljuni ta’ qaddejja madwar id-dinja, u kollha għandhom ċirkustanzi differenti ħafna. Imma kemm jekk aħna żgħar jew kbar, sinjuri jew fqar, b’saħħitna jew dgħajfin, aħna nagħmlu kulma nistgħu biex naqsmu l-fidi tagħna m’oħrajn. Inħossuna bħal Chantel minn Franza, li tgħid: “L-iktar Persunaġġ qawwi fl-univers, il-Ħallieq ta’ kollox, l-Alla l-hieni, jgħidli: ‘Mur! Tkellem! Tkellem għalija, tkellem minn qalbek. Jien se nagħtik is-saħħa tiegħi, il-Kelma tiegħi l-Bibbja, appoġġ mis-sema, ħaddiema sħabek fuq l-art, taħriġ kontinwu, u istruzzjonijiet preċiżi f’waqthom.’ Xi privileġġ tal-għaġeb hu li nagħmlu dak li jitlob minna Ġeħova u li naħdmu flimkien mal-Alla tagħna!”