1-2. (a) Il-​messaġġ li nsibu f’​Isaija 41:10 kif affettwa lil oħt jisimha Yoshiko? (b) Ġeħova għall-​benefiċċju taʼ min ippreserva dan il-​messaġġ?

OĦT Kristjana leali jisimha Yoshiko rċeviet aħbar kerha. It-​tabiba tagħha qaltilha li kellha biss ftit xhur ħajja. Kif irreaġixxiet? Yoshiko ftakret vers favorit mill-​Bibbja, Isaija 41:10 (nwt), li jgħid: “Tibżax, għax jien miegħek. Tkunx ansjuż, għax jien Alla tiegħek. Jien inqawwik. Jien ngħinek verament. Jien inżommok sod tassew b’idi l-​leminija tas-​sewwa.” Imbagħad bil-​kalma qalet lit-​tabiba tagħha li ma kinitx qed tibżaʼ, għaliex Ġeħova kien qed iżommilha idha b’mod sod. * Il-​messaġġ taʼ faraġ li nsibu f’dan il-​vers għen lil oħtna għażiża biex tafda kompletament f’Ġeħova. Dan l-​istess vers jistaʼ jgħinna nibqgħu kalmi meta ngħaddu minn provi ebsin. Biex nifhmu kif dan jistaʼ jiġri, ejja l-​ewwel neżaminaw għala Alla ta dan il-​messaġġ lil Isaija.

² Primarjament, Ġeħova nebbaħ lil Isaija jikteb dan il-​kliem sabiex ifarraġ lil-​Lhud li iktar tard kellhom jittieħdu fil-​jasar lejn Babilonja. Madankollu, Ġeħova ppreserva dan il-​messaġġ għall-​benefiċċju tal-​poplu tiegħu kollu, u mhux għall-​eżiljati Lhud biss. (Is. 40:8; Rum. 15:4) Illum, aħna ngħixu fi “żminijiet kritiċi li diffiċli biex issib tarfhom,” u iżjed minn qatt qabel, għandna bżonn l-​inkuraġġiment li nsibu fil-​ktieb taʼ Isaija.—2 Tim. 3:1.

3. (a) Liema wegħdi nsibu f’​Isaija 41:10? (b) Għala neħtieġu dawn il-​wegħdi?

³ F’dan l-​artiklu se niffokaw fuq tlieta mill-​wegħdi taʼ Ġeħova  li jsaħħulna l-​fidi mniżżlin f’​Isaija 41:10, l-​iskrittura għas-​sena 2019: (1) Ġeħova se jkun magħna, (2) hu Alla tagħna, u (3) hu se jgħinna. Aħna neħtieġu dawn il-​wegħdi * għax, bħal Yoshiko, niffaċċjaw il-​provi fil-​ħajja. Irridu wkoll nittrattaw maʼ pressjonijiet minħabba kundizzjonijiet fid-​dinja. Uħud minna qegħdin saħansitra jissaportu persekuzzjoni minn gvernijiet b’saħħithom. Ejja nikkunsidraw it-​tliet wegħdi waħda waħda.

4. (a) Liema hi l-​ewwel wegħda li se nikkunsidraw? (Ara wkoll in-​nota taʼ taħt.) (b) Ġeħova b’liema modi jesprimi s-​sentimenti tiegħu għalina? (ċ) L-​espressjonijiet t’Alla kif jaffettwawk?

⁴ Ġeħova l-​ewwel jiżgurana bil-​kliem: “Tibżax, għax jien miegħek.” * Ġeħova juri li qiegħed magħna billi jagħtina l-​attenzjoni kollha tiegħu kif ukoll l-​affezzjoni sinċiera tiegħu. Innota kif jesprimi s-​sentimenti teneri u profondi tiegħu għalina. “Int . . . prezzjuż f’għajnejja,” jgħid Ġeħova. “Qistek onorabbli, u ħabbejtek.” (Is. 43:4) L-​ebda forza fl-​univers ma tistaʼ ġġiegħel lil Ġeħova jabbanduna mħabbtu għal dawk li jaqduh; il-​lealtà tiegħu lejna hi soda u ma tiċċaqlaqx. (Is. 54:10) L-​imħabba u l-​ħbiberija tiegħu jimlewna bil-​kuraġġ. Hu se jipproteġina llum, l-​istess bħalma pproteġa lil Abram (Abraham) ħabibu. Ġeħova qallu: “Tibżax, Abram. Jien tarka għalik.”—Ġen. 15:1.

5-6. (a) Kif nafu li Ġeħova jinteressa ruħu f’li jgħinna fil-​provi personali tagħna? (b) X’lezzjoni nistgħu nitgħallmu mill-​eżempju taʼ Yoshiko?

⁵ Aħna nafu li Ġeħova jinteressa ruħu f’li jgħinna fil-​provi personali tagħna għax hu jwiegħed lill-​poplu tiegħu: “Jekk tgħaddi mill-​ilmijiet, jien inkun miegħek; u mix-​xmajjar, dawn ma jgħarrqukx. Jekk ikollok tgħaddi min-​nar, ma tinħaraqx, u l-​fjamma ma xxawtekx.” (Is. 43:2) Xi jfisser dan il-​kliem?

⁶ Ġeħova ma jwigħedx li jneħħi l-​isfidi li jagħmlu l-​ħajja diffiċli, imma mhux se jħalli “x-​xmajjar” taʼ problemi jgħarrquna  jew “il-​fjamma” taʼ provi ġġegħelna nsofru għal dejjem. Hu jagħtina garanzija li se jkun magħna, u jgħinna ‘ngħaddu’ minn dawn l-​isfidi. X’se jagħmel Ġeħova? Hu se jikkalma l-​beżgħat li jkollna biex inkunu nistgħu nżommu l-​integrità tagħna lejh, anke jekk niffaċċjaw il-​mewt. (Is. 41:13) Yoshiko, li ssemmiet qabel, sabet li dan hu veru. It-​tifla tagħha tgħid: “Konna impressjonati bil-​kalma li kellha ommi. Aħna rajna verament li Ġeħova taha paċi ġewwinija. Sal-​ġurnata li mietet, ommi tkellmet man-​nurses u l-​pazjenti dwar Ġeħova u l-​wegħdi tiegħu.” X’nitgħallmu mill-​eżempju taʼ Yoshiko? Meta nafdaw fil-​wegħda t’Alla “jien inkun miegħek,” aħna wkoll se nkunu kuraġġużi u b’saħħitna waqt li nissaportu l-​provi.

7-8. (a) Liema hi t-​tieni wegħda li se nikkunsidraw, u xi tfisser? (b) Ġeħova għala qal lill-​eżiljati Lhud: ‘Tkunux ansjużiʼ? (ċ) Liema kliem li nsibu f’​Isaija 46:3, 4 żgur li kkalma qalb il-​poplu t’Alla?

⁷ Innota t-​tieni wegħda mniżżla minn Isaija: “Tkunx ansjuż, għax jien Alla tiegħek.” Xi tfisser din l-​istqarrija dwar l-​ansjetà? F’dan il-​vers, il-​kelma bil-​lingwa oriġinali għal ‘tkun ansjużʼ fiha l-​ħsieb taʼ li jkollok “tiċċassa ’l hemm u ’l hawn, qisek qed tistenna li tiġri xi ħaġa tal-​biżaʼ” jew “li tippanikkja għax tkun f’sitwazzjoni perikoluża.” Fi qbil maʼ dan, in-​New World Translation, riveduta bl-​Ingliż fl-​2013, tagħti din il-​frażi “tiċċassax ’l hemm u ’l hawn” bħala “tkunx ansjuż.”

⁸ Ġeħova għala qal lil-​Lhud li kienu se jkunu eżiljati f’Babilonja biex ma ‘jkunux ansjużiʼ? Għax kien jaf li l-​abitanti taʼ dik l-​art kienu se jsiru beżgħanin. X’kien se jikkaġuna dik il-​biżaʼ? Lejn it-​tmiem tas-​70 sena tal-​eżilju Lhudi, Babilonja kienet se tiġi attakkata mill-​armati setgħanin tal-​Medo-​Persja. Ġeħova kien se juża din l-​armata biex jeħles lill-​poplu tiegħu mill-​jasar taʼ Babilonja. (Is. 41:2-4) Meta l-​Babiloniżi u nies minn ġnus oħrajn li kienu jgħixu dak iż-​żmien saru jafu li kien qed joqrob l-​għadu tagħhom, huma pprovaw jibqgħu kuraġġużi billi jgħidu lil xulxin: “Agħmel il-​ħila.” Ukoll, huma għamlu iżjed allat foloz, bit-​tama li dawn kienu se jipproteġuhom. (Is. 41:5-7) Sadanittant, Ġeħova kkalma l-​qlub tal-​eżiljati Lhud billi qalilhom: “Int, O Israel, [kuntrarju għall-​ġirien tiegħek] int il-​qaddej tiegħi . . . Tkunx ansjuż, għax jien Alla tiegħek.” (Is. 41:8-10) Innota li Ġeħova qal: “Jien Alla tiegħek.” B’dan il-​kliem, Ġeħova żgura lill-​adoraturi leali tiegħu li ma kienx nesiehom—xorta kien għadu Alla tagħhom, u huma kienu għadhom il-​poplu tiegħu. Qalilhom: ‘Inġorrkom . . . u nipprovdilkom ħelsien.’ Dan il-​kliem taʼ faraġ u kuraġġ bla dubju saħħaħ lill-​eżiljati Lhud.—Aqra Isaija 46:3, 4.

9-10. Għala m’hemmx għalfejn insiru beżgħanin? Agħti eżempju.

⁹ Issa, iktar minn qatt qabel, in-​nies madwarna jinsabu ansjużi minħabba li l-​kundizzjonijiet fid-​dinja qed imorru għall-​agħar. M’għandniex xi ngħidu, aħna wkoll niġu affettwati minn dawn l-​istess problemi. Imma m’hemmx għalfejn nibżgħu. Ġeħova jgħidilna: “Jien Alla tiegħek.” Din l-​istqarrija għala hi raġuni qawwija biex nibqgħu kalmi?

¹⁰ Ikkunsidra dan l-​eżempju: Żewġ passiġġieri, Jim u Ben, qegħdin ġo ajruplan milqut minn irjieħ qawwijin. Hekk kif l-​ajruplan jibda tielaʼ u nieżel bil-​forza tal-​irjieħ, tinstemaʼ vuċi mil-​lawdspiker: “Żommu ċ-​ċinturin maqful. Se ngħaddu  minn arja instabbli għal xi ħin.” Jim qed jinkwieta bil-​kbir. Imma mbagħad il-​pilota jżid jgħid: “Dan il-​pilota li qed ikellimkom. Kollox qiegħed fil-​kontroll. M’hemmx għalfejn tinkwetaw.” Dak il-​ħin, Jim jibda jiddubita u jgħid, “X’tip taʼ garanzija hi din?” Fl-​istess ħin, hu jinnota li Ben xejn ma jidher ansjuż. Jim jistaqsih: “Għala int daqshekk kalm?” Ben jitbissem u jgħid: “Għax jien nafu sew lil dan il-​pilota. Hu missieri!” Imbagħad Ben jgħid: “Ħa ngħidlek xi ħaġa dwar missieri. Jien ċert li meta ssir tafu u kemm hu kapaċi, int ukoll se tkun kalm.”

11. X’lezzjonijiet nistgħu nitgħallmu mill-​eżempju taż-​żewġ passiġġieri?

¹¹ X’lezzjonijiet nistgħu nitgħallmu minn dan l-​eżempju? Bħal Ben, aħna kalmi għax nafuh sew lil Missierna tas-​sema, Ġeħova. Nafu li se jgħinna biex nissaportu anke l-​iktar problemi diffiċli li qed niffaċċjaw matul l-​aħħar jiem taʼ din is-​sistema. (Is. 35:4) Aħna nafdaw f’Ġeħova, allura nistgħu nibqgħu kalmi filwaqt li l-​bqija tad-​dinja tinsab imwerwra. (Is. 30:15) Ukoll, aħna naġixxu bħal Ben meta lin-​nies ngħidulhom għala nafdaw f’Alla. Imbagħad, anke huma jistgħu jkunu ċerti li kwalunkwe sfida li tiġi fuqhom, Ġeħova se jappoġġjahom.

12. (a) Liema hi t-​tielet wegħda li se nikkunsidraw? (b) Ir-​referenza għad-​“driegħ” taʼ Ġeħova tfakkarna f’liema fatt?

¹² Ikkunsidra t-​tielet wegħda li Isaija niżżel bil-​miktub: “Jien inqawwik. Jien ngħinek verament.” Isaija kien diġà ddeskriva kif Ġeħova kien se jqawwi, jew isaħħaħ, lill-​poplu tiegħu, u qal: “Ġeħova ġej bħal wieħed b’saħħtu, u driegħu se jaħkem għalih.” (Is. 40:10) Il-​Bibbja spiss tuża l-​kelma “driegħ,” jew id, simbolikament biex tfisser qawwa. Allura  l-​istqarrija li “driegħu se jaħkem” tfakkarna li Ġeħova huwa Sultan setgħan. Hu uża din il-​qawwa liema bħalha biex jappoġġja u jiddefendi lill-​qaddejja tiegħu fil-​passat, u hu jkompli jsaħħaħ u jipproteġi lil dawk li jafdaw fih illum.—Dt. 1:30, 31; Is. 43:10.

13. (a) Ġeħova meta speċjalment iżomm il-​wegħda tiegħu li jqawwina? (b) Liema garanzija timliena bis-​saħħa u l-​fiduċja?

¹³ Speċjalment meta l-​għedewwa jippersegwitawna, Ġeħova jżomm il-​wegħda tiegħu: “Jien inqawwik.” F’xi partijiet tad-​dinja llum, l-​għedewwa tagħna qed jagħmlu l-​almu tagħhom biex iwaqqfu x-​xogħol tal-​ippritkar tagħna jew biex b’mod legali ma jħallux l-​organizzazzjoni tagħna taħdem. Xorta waħda, m’aħniex ansjużi żżejjed dwar attakki bħal dawn. Ġeħova tana garanzija li timliena bis-​saħħa u l-​fiduċja. Hu jwegħedna: “Kwalunkwe arma li tissawwar kontrik ma tirnexxix.” (Is. 54:17) Din l-​istqarrija tfakkarna fi tliet fatti importanti.

14. Għala ma niħduhiex b’sorpriża li l-​għedewwa t’Alla jattakkawna?

¹⁴ L-​ewwel, bħala s-​segwaċi taʼ Kristu, aħna nistennew li nkunu mibgħudin. (Mt. 10:22) Ġesù bassar li d-​dixxipli tiegħu kellhom ikunu persegwitati bl-​aħrax matul l-​aħħar jiem. (Mt. 24:9; Ġw. 15:20) It-​tieni, il-​profezija taʼ Isaija twissina minn qabel li l-​għedewwa tagħna mhux biss se jobogħduna imma wkoll jużaw diversi armi kontrina. Dawn l-​armi inkludew qerq sottili, gideb sfaċċat, u persekuzzjoni qalila. (Mt. 5:11) Ġeħova mhux se jwaqqaf l-​għedewwa tagħna milli jużaw dawn l-​armi biex iqajmu gwerra kontrina. (Efes. 6:12; Riv. 12:17) Imma aħna m’għandniex għalfejn nibżgħu. Għala le?

15-16. (a) Liema hu t-​tielet fatt li jeħtieġ li niftakru, u Isaija 25:4, 5 kif jappoġġja dan? (b) Isaija 41:11, 12 kif jiddeskrivi x’se jiġri lil dawk li jiġġieldu kontrina?

¹⁵ Ikkunsidra t-​tielet fatt li jeħtieġ li niftakru. Ġeħova qal li “kwalunkwe arma” użata kontrina “ma tirnexxix.” Bħalma  ħajt jipproteġina mill-​forza taʼ maltempata qerrieda taʼ xita, hekk ukoll Ġeħova jipproteġina mit-​taħbit tal-​għedewwa. (Aqra Isaija 25:4, 5.) L-​għedewwa tagħna qatt mhu se jirnexxilhom iġegħluna nsofru għal dejjem.—Is. 65:17.

¹⁶ Ukoll, Ġeħova jsaħħaħ il-​fiduċja tagħna fih billi jiddeskrivi fid-​dettall x’se jiġri lil dawk li ‘qed jitbaqbqu għalina.’ (Aqra Isaija 41:11, 12.) Jiġġieldu kemm jiġġieldu iebes kontrina l-​għedewwa tagħna jew issir kemm issir b’saħħitha l-​gwerra kontrina, ir-​riżultat se jkun l-​istess: L-​għedewwa kollha tal-​poplu t’Alla “se jisfaw fix-​xejn u jgħibu.”

17-18. (a) Il-​qari tal-​Bibbja kif se jkabbar il-​fiduċja tagħna f’Alla? Agħti eżempju. (b) Il-​meditazzjoni fuq l-​iskrittura magħżula għas-​sena 2019 kif tistaʼ tgħinna?

¹⁷ Aħna nkabbru l-​fiduċja tagħna f’Ġeħova billi nsiru nafuh aħjar. U l-​uniku mod kif nistgħu verament insiru nafu tajjeb lil Alla hu billi naqraw il-​Bibbja sew u mbagħad nimmeditaw fuq dak li naqraw. Il-​Bibbja fiha informazzjoni taʼ min jafdaha dwar kif Ġeħova pproteġa lill-​poplu tiegħu fil-​passat. Din l-​informazzjoni tagħtina l-​fiduċja li issa se jieħu ħsiebna.

¹⁸ Ikkunsidra eżempju tal-​istampa sabiħa li jġibilna quddiem għajnejna Isaija biex jurina kif Ġeħova jipproteġina. Hu jirreferi għal Ġeħova bħala ragħaj u għall-​qaddejja t’Alla bħala ħrief. Dwar Ġeħova, Isaija jgħid: “Bi driegħu se jiġbor flimkien il-​ħrief; u jġorrhom f’ħobbu.” (Is. 40:11) Meta naqraw dwar li ninġarru fid-​dirgħajn b’saħħithom taʼ Ġeħova, ma nħossuniex protetti u kalmi? Biex jgħinna nibqgħu kalmi minkejja l-​problemi li niffaċċjaw, l-​ilsir leali u għaqli għażel Isaija 41:10 bħala l-​iskrittura għas-​sena 2019, “Tkunx ansjuż, għax jien Alla tiegħek.” Immedita fuq dan il-​kliem li jiżgurak. Dan se jsaħħek hekk kif tiffaċċja l-​isfidi li għad iridu jiġu.