1-2. Liema ħaġa spettakolari ġrat f’jum Pentekoste tas-​sena 33 WK?

KIEN nhar il-​Ħadd filgħodu f’Ġerusalemm u kien jum Pentekoste tas-​sena 33 WK. Grupp taʼ madwar 120 dixxiplu nġabru flimkien fil-​kamra taʼ fuq taʼ dar. (Atti 1:13-​15; 2:1) Ftit ġranet qabel, Ġesù kien qalilhom biex jibqgħu Ġerusalemm għax kienu se jirċievu rigal speċjali. (Atti 1:4, 5) X’ġara wara?

² “F’daqqa waħda ġie mis-​sema ħoss bħal kurrent taʼ riħ qawwi.” Dan il-​ħoss instemaʼ mad-​dar kollha. Imbagħad, fuq ras id-​dixxipli dehru bħal ‘ilsna tan-​nar’ u “lkoll imtlew bl-​ispirtu qaddis.” (Atti 2:2-​4) B’dan il-​mod spettakolari, Ġeħova ferraʼ l-​ispirtu qaddis tiegħu fuq dan il-​grupp. (Atti 1:8) Huma kienu l-​ewwel uħud li ġew midlukin bl-​ispirtu qaddis * u li ngħataw it-​tama li jmexxu maʼ Ġesù fis-​sema.

3. Id-​dixxipli li kienu fil-​kamra taʼ fuq f’Pentekoste għala ma kellhomx dubju li ġew midlukin?

³ Kieku int kont wieħed minn dawn id-​dixxipli dakinhar, ma kontx se tinsa din l-​esperjenza. Immaġina bħal  ilsien tan-​nar jiġi fuq rasek, u mbagħad tibda titkellem b’lingwa differenti! (Atti 2:5-​12) Żgur li kieku ma jkollok l-​ebda dubju li ġejt midluk bl-​ispirtu qaddis. Imma dawk li ntgħażlu biex imorru s-​sema, kollha ġew midlukin b’mod spettakolari u fl-​istess żmien f’ħajjithom? Le. Kif nafuh dan?

4. Il-​midlukin tal-​ewwel seklu kollha rċivew l-​ispirtu qaddis fl-​istess żmien f’ħajjithom? Spjega.

⁴ Ejja nitkellmu dwar meta persuna tistaʼ tiġi midluka. Mhux il-​grupp taʼ madwar 120 Kristjan biss ġie midluk f’jum Pentekoste tas-​sena 33 WK. Iktar tard dakinhar, madwar 3,000 persuna oħra rċiviet l-​ispirtu qaddis li wiegħed Ġesù. Huma ġew midlukin meta tgħammdu. (Atti 2:37, 38, 41) Imma fis-​snin taʼ wara, dawk li ġew magħżulin biex jgħixu fis-​sema mhux kollha ġew midlukin meta tgħammdu. Is-​Samaritani ġew midlukin xi żmien wara li tgħammdu. (Atti 8:14-​17) U f’każ differenti ħafna, Kornelju u dawk taʼ daru ġew midlukin saħansitra qabel ma tgħammdu.—Atti 10:44-​48.

5. Skont it-​2 Korintin 1:21, 22, x’jiġri meta xi ħadd jiġi midluk bl-​ispirtu qaddis?

⁵ Ejja nikkunsidraw ukoll x’jiġri meta persuna tiġi midluka bl-​ispirtu qaddis. Jistaʼ jkun li għall-​ewwel xi wħud li jiġu midlukin isibuha diffiċli biex jaċċettaw li Ġeħova għażel lilhom. Forsi jaħsbu, ‘Alla għala għażel lili?’ Oħrajn forsi jħossuhom differenti. Hu x’inhu l-​każ, l-​appostlu Pawlu jispjega x’jiġri lil dawk kollha li jiġu midlukin: “Wara li emmintu, ġejtu mmarkati bis-​siġill * taʼ l-​ispirtu qaddis imwiegħed, li hu garanzija bil-​quddiem tal-​wirt tagħna.” (Efes. 1:13, 14) Allura Ġeħova juża l-​ispirtu qaddis tiegħu biex il-​Kristjani li jagħżel ma jkollhomx dubju li ġew magħżulin. B’dan il-​mod,  l-​ispirtu qaddis hu “garanzija” jew wegħda li taċċertahom li fil-​futur se jgħixu għal dejjem fis-​sema u mhux fuq l-​art.—Aqra t-​2 Korintin 1:21, 22.

6. X’għandu jagħmel Kristjan midluk biex jitlaʼ s-​sema?

⁶ Jekk Kristjan jiġi midluk, ifisser li żgur se jirċievi l-​premju biex jitlaʼ s-​sema? Le. Hu sempliċiment se jkun ċert li ntgħażel biex jitlaʼ s-​sema. Però, għandu jiftakar f’din it-​twissija: “Ħuti, iktar u iktar agħmlu l-​almu tagħkom biex taċċertaw ruħkom mis-​sejħa u l-​għażla tagħkom; għax jekk tibqgħu toktru f’dawn l-​affarijiet żgur li ma tonqsu qatt.” (2 Pt. 1:10) Allura anki jekk Kristjan midluk jiġi magħżul, jew imsejjaħ, biex imur is-​sema, hu se jirċievi l-​premju tiegħu dment li jibqaʼ leali.—Flp. 3:12-​14; Ebr. 3:1; Riv. 2:10.

7. Il-​midlukin kif ikunu jafu li ġew imsejħin biex imorru s-​sema?

⁷ Raġel jew mara kif tkun taf jekk ġietx imsejħa biex tmur fis-​sema? It-​tweġiba hi ċara fil-​kliem li Pawlu kiteb lill-​Kristjani f’Ruma li ġew “imsejħin biex ikunu qaddisin.” Hu qalilhom: “Intom ma rċivejtux spirtu taʼ jasar li jerġaʼ jġib il-​biżaʼ, imma rċivejtu spirtu t’adozzjoni bħala wlied; b’dan l-​ispirtu aħna ngħajtu: ‘Abba, Missier!’ L-​ispirtu nnifsu jixhed maʼ l-​ispirtu tagħna li aħna wlied Alla.” (Rum. 1:7; 8:15, 16) Allura, permezz tal-​ispirtu qaddis tiegħu, Alla jaċċerta lill-​midlukin li ġew imsejħin biex imorru s-​sema.—1 Tess. 2:12.

8. Skont l-​1 Ġwanni 2:20, 27 hemm bżonn li ħaddieħor jikkonferma li persuna hi midluka? Spjega.

⁸ Ġeħova għamel ċert li l-​midlukin ma jifdlilhom l-​ebda dubju li ġew magħżulin biex imorru fis-​sema. (Aqra l-​1 Ġwanni 2:20, 27.) Ovvjament, il-​Kristjani midlukin għandhom bżonn jiġu mgħallma minn Ġeħova permezz tal-​kongregazzjoni eżatt bħalma jagħmel kulħadd. Imma ħadd m’għandu bżonn jikkonferma li huma midlukin. Ġeħova juża l-​iktar qawwa b’saħħitha fl-​univers, l-​ispirtu qaddis tiegħu, biex jagħmilhielhom ċara li huma mill-​midlukin!

9. Skont Efesin 1:18, meta xi ħadd jiġi midluk, x’bidla jesperjenza?

⁹ Il-​maġġorparti tal-​qaddejja t’Alla tal-​lum forsi jsibuha diffiċli biex jifhmu x’jiġri lil xi ħadd meta jiġi midluk minn Alla. Dan hu normali għax huma stess ma jkunux ġew midlukin. Alla ħalaq lin-​nies biex jgħixu għal dejjem fuq l-​art, mhux fis-​sema. (Ġen. 1:28; Salm 37:29) Imma Ġeħova għażel lil xi wħud biex jgħixu fis-​sema. Allura meta jsejħilhom għas-​sema, hu jbiddlilhom it-​tama u kif jaħsbuha, tant li jibdew iħarsu ’l quddiem biex jgħixu fis-​sema.—Aqra Efesin 1:18.

10. Xi jfisser li ‘titwieled mill-​ġdid’? (Ara wkoll in-​nota taʼ taħt.)

¹⁰ Meta l-​Kristjani jkunu midlukin bl-​ispirtu qaddis, huma ‘jitwieldu mill-​ġdid.’ * Ġesù wera wkoll li hu impossibbli li xi ħadd li mhux midluk jifhem eżatt kif wieħed iħossu meta ‘jitwieled mill-​ġdid,’ jew ‘jitwieled mill-​ispirtu.’—Ġw. 3:3-​8.

11. Xi ħadd li jiġi midluk kif jibda jaħseb b’mod differenti?

¹¹ Meta l-​Kristjani jiġu midlukin, kif  jibdew jaħsbu b’mod differenti? Qabel ma jiġu midlukin minn Ġeħova, dawn il-​Kristjani jkollhom it-​tama li jgħixu għal dejjem fuq l-​art. Huma jkunu jħarsu ’l quddiem b’entużjażmu għal meta Ġeħova jneħħi l-​ħażen u jagħmel l-​art ġenna. Forsi kienu jimmaġinaw lilhom infushom jilqgħu lil xi membru tal-​familja jew ħabib li kien miet. Imma wara li ġew midlukin, bdew jaħsbu b’mod differenti. Għala? Mhux għax ma kinux sodisfatti bit-​tama li jgħixu fuq l-​art jew għax biddlu fehmthom minħabba l-​istress jew il-​problemi. U lanqas ma ħassew li se jkun tad-​dwejjaq li jgħixu għal dejjem fuq l-​art. Minflok, Ġeħova uża l-​ispirtu qaddis tiegħu biex jibdlilhom it-​tama li kienu jgħożżu u l-​mod kif jaħsbu.

12. Skont l-​1 Pietru 1:3, 4, il-​Kristjani midlukin kif iħossuhom dwar it-​tama tagħhom?

¹² Xi ħadd li jiġi midluk jistaʼ jħoss li ma jistħoqqlux jingħata dal-​privileġġ prezzjuż. Imma hu fl-​ebda punt ma jiddubita li Ġeħova għażlu. Hu jħossu ferħan u grat immens meta jaħseb dwar it-​tama li għandu għall-​futur.—Aqra l-​1 Pietru 1:3, 4.

13. Il-​midlukin kif iħossuhom dwar il-​ħajja hawn fuq l-​art?

¹³ Ifisser dan li l-​midlukin jixtiequ jmutu? L-​appostlu Pawlu jwieġeb din il-​mistoqsija. Hu qabbel il-​ġisem uman tagħhom maʼ tinda u qal: “Fil-​fatt, aħna li qegħdin f’din it-​tinda nokorbu għax imtaqqlin; mhux għax irridu ninżgħuha, imma għax irridu nilbsu l-​oħra, biex dak li hu mortali jinbelaʼ mill-​ħajja.” (2 Kor. 5:4) Dawn il-​Kristjani ma tilfux l-​interess f’din il-​ħajja u ma jixtiquhiex tispiċċa malajr. Anzi, huma jgawdu ħajjithom u jridu jużaw kull ġurnata biex jaqdu lil Ġeħova mal-​familja u l-​ħbieb tagħhom. Imma jagħmlu x’jagħmlu, huma dejjem iżommu f’moħħhom it-​tama mill-​isbaħ li għandhom għall-​futur.—1 Kor. 15:53; 2 Pt. 1:4; 1 Ġw. 3:2, 3; Riv. 20:6.

14. Kristjan kif jistaʼ jħossu, imma dan għala ma jfissirx li hu midluk?

¹⁴ Jistaʼ jkun li taħseb dwar jekk intix midluk bl-​ispirtu qaddis. F’dan il-​każ, staqsi lilek innifsek dawn il-​mistoqsijiet importanti: Għandek xewqa kbira li tagħmel dak li jrid Alla? Tħoss li int vera żeluż fix-​xogħol tal-​ippritkar? Tieħu pjaċir tistudja l-​Kelma t’Alla u titgħallem dwar “l-​affarijiet profondi t’Alla”? (1 Kor. 2:10) Tħoss li Ġeħova tak riżultati tajbin fil-​ministeru? Tħoss li għandek ir-​responsabbiltà li tgħin lil oħrajn spiritwalment? Esperjenzajt l-​għajnuna taʼ Ġeħova b’ħafna modi speċifiċi f’ħajtek? Jekk wiġibt iva għal kull mistoqsija, ifisser li int midluk? Le. Għala? Għax il-​qaddejja kollha taʼ Ġeħova jistgħu jħossuhom hekk, kemm jekk huma midlukin u kemm jekk le. U permezz tal-​ispirtu tiegħu, Ġeħova jistaʼ jagħti l-​qawwa lil kull qaddej tiegħu, hi x’inhi t-​tama tiegħu. Fil-​fatt, jekk għandek dubju jekk ġejtx midluk bl-​ispirtu qaddis, dan hu sinjal li m’intix midluk. Dawk li Ġeħova sejħilhom biex imorru fis-​sema m’għandhom l-​ebda dubju li ġew midlukin! Huma jafu!

15. Kif nafu li mhux kull min irċieva l-​ispirtu t’Alla ġie magħżul biex imur is-​sema?

¹⁵ Fil-​Bibbja hemm ħafna eżempji taʼ wħud leali li rċivew l-​ispirtu qaddis imma ma kellhomx it-​tama li jmorru s-​sema.  David ġie ggwidat mill-​ispirtu qaddis. (1 Sam. 16:13) L-​ispirtu qaddis għenu jifhem affarijiet profondi dwar Ġeħova u anki ggwidah biex jikteb partijiet mill-​Bibbja. (Mk. 12:36) Imma l-​appostlu Pietru qal li David “ma telax fis-​smewwiet.” (Atti 2:34) Ġwanni l-​Battista kien “mimli bl-​ispirtu qaddis.” (Lq. 1:13-​16) Ġesù qal li ma kien hemm ħadd akbar minn Ġwanni, imma mbagħad qal li Ġwanni ma kienx se jagħmel parti mis-​Saltna tas-​smewwiet. (Mt. 11:10, 11) Ġeħova uża l-​ispirtu qaddis biex jagħti lil dawn l-​irġiel il-​qawwa biex jagħmlu affarijiet tal-​għaġeb. Però, ma użax dan l-​ispirtu biex jagħżilhom ħalli jgħixu fis-​sema. Ifisser dan li kienu inqas leali minn dawk li ġew midlukin? Le. Sempliċiment ifisser li Ġeħova se jirxoxtahom biex jgħixu fil-​Ġenna tal-​art.—Ġw. 5:28, 29; Atti 24:15.

16. Il-​biċċa l-​kbira tal-​qaddejja t’Alla llum għal liema premju jħarsu ’l quddiem?

¹⁶ Il-​biċċa l-​kbira tal-​qaddejja t’Alla li jgħixu fuq l-​art illum, m’għandhomx it-​tama li jgħixu fis-​sema. Imma bħal Abraham, Sara, David, Ġwanni l-​Battista, u ħafna personaġġi oħra tal-​Bibbja, huma jħarsu ’l quddiem biex jgħixu fuq l-​art taħt it-​tmexxija tas-​Saltna t’Alla.—Ebr. 11:10.

17. Liema mistoqsijiet se nwieġbu fl-​artiklu li jmiss?

¹⁷ Peress li llum għad hawn uħud mill-​midlukin jgħixu fost in-​nies t’Alla, naturalment iqumu ċerti mistoqsijiet. (Riv. 12:17) Pereżempju, il-​midlukin kif għandhom iqisu lilhom infushom? Jekk xi ħadd fil-​kongregazzjoni tiegħek jibda jieħu mill-​ħobż u l-​inbid fit-​Tifkira, kif għandek taġixxi miegħu? U xi ngħidu jekk in-​numru taʼ dawk li jgħidu li huma midlukin ikompli jiżdied? Għandna ninkwetaw dwar dan? L-​artiklu li jmiss se jwieġeb dawn il-​mistoqsijiet.