1, 2. (a) Ix-​Xhieda taʼ Ġeħova kif iħossuhom dwar il-​Bibbja? (b) Liema hi l-​parti favorita tiegħek mill-​Bibbja?

BĦALA Xhieda taʼ Ġeħova, aħna nħobbu l-​Bibbja. Din tfarraġna, ittina tama u istruzzjonijiet taʼ min joqgħod fuqhom. (Rumani 15:4) Mhix ktieb b’ideat tan-​nies imma hi “l-​kelma t’Alla.”—1 Tessalonikin 2:13.

² Probabbilment, ilkoll għandna l-​parti favorita tagħna mill-​Bibbja. Xi wħud iħobbu l-​Evanġelji għax juru l-​personalità sabiħa taʼ Ġeħova permezz taʼ Ġesù. (Ġwanni 14:9) Oħrajn jippreferu kotba profetiċi bħal tar-​Rivelazzjoni, li juruna “dak li jrid iseħħ dalwaqt.” (Rivelazzjoni 1:1) Xi wħud jiġu mfarrġin meta jaqraw is-​Salmi, u oħrajn jieħdu pjaċir jaqraw il-​pariri t’għajnuna fil-​ktieb tal-​Proverbji. Allura, jidher ċar li l-​Bibbja hi ktieb għal kulħadd.

3, 4. (a) Kif inħossuna dwar il-​pubblikazzjonijiet tagħna? (b) Liema pubblikazzjonijiet nirċievu għal gruppi taʼ nies speċifiċi?

³ Minħabba li nħobbu l-​Bibbja, inħobbu wkoll il-​pubblikazzjonijiet tagħna, li huma bbażati fuq il-​Kelma t’Alla. Kull ktieb, browxer, rivista, u letteratura oħra li nirċievu hu  provvediment minn Ġeħova. Dawn jgħinuna nibqgħu qrib tiegħu u nżommu l-​fidi tagħna b’saħħitha.—Titu 2:2.

⁴ Ħafna mill-​pubblikazzjonijiet tagħna huma miktubin għax-​Xhieda taʼ Ġeħova inġenerali. Madankollu, hemm xi pubblikazzjonijiet li huma miktubin għal gruppi speċifiċi, bħaż-​żgħażagħ jew il-​ġenituri. Il-​maġġorparti tal-​artikli u l-​vidjows fuq il-​Websajt tagħna huma mħejjijin b’mod speċifiku għan-​nies li mhumiex Xhieda taʼ Ġeħova. Varjetà taʼ materjal bħal dan turi li Ġeħova żamm kelmtu dwar li jipprovdi ħafna istruzzjonijiet għan-​nies kollha.—Isaija 25:6.

5. Liema ħaġa nistgħu nkunu ċerti li Ġeħova japprezza?

⁵ Il-​maġġorparti minna jixtiequ jkollhom iktar ħin biex jaqraw il-​Bibbja u l-​pubblikazzjonijiet tagħna. Allura, mhux dejjem inkunu nistgħu nqattgħu l-​istess ammont taʼ ħin biex nistudjaw kull pubblikazzjoni li nirċievu. Nistgħu nkunu ċerti li Ġeħova jieħu pjaċir bina meta nużaw il-​ħin tagħna bil-​għaqal ħalli nkunu nistgħu naqraw u nistudjaw il-​Bibbja u l-​pubblikazzjonijiet tagħna. (Efesin 5:15, 16) Madankollu, hemm periklu li għandna noqogħdu attenti li nevitaw. X’inhu?

6. X’jistaʼ jtellifna mill-​provvedimenti taʼ Ġeħova?

⁶ Jekk ma noqogħdux attenti, għandu mnejn naħsbu li xi partijiet mill-​Bibbja jew ċerti pubblikazzjonijiet ma japplikawx għalina. Pereżempju, xi ngħidu jekk parti mill-​Bibbja ma tidhirx prattika għas-​sitwazzjoni tagħna? Jew xi ngħidu jekk il-​pubblikazzjoni mhix indirizzata direttament għalina? Se naqraw din it-​tip t’informazzjoni fuq fuq jew saħansitra nevitaw li naqrawha għalkollox? Jekk iva, jistaʼ jkun li qed nitilfu mill-​informazzjoni taʼ valur li tkun taʼ ġid għalina. Kif nistgħu nevitaw dan il-​periklu? Għandna niftakru li l-​informazzjoni kollha li nirċievu ġejja mingħand Ġeħova. Fil-​Bibbja naqraw: “Jien, Ġeħova, jien Alla tiegħek, li ngħallmek għall-​ġid tiegħek.” (Isaija 48:17) F’dan l-​artiklu, se niddiskutu tliet suġġerimenti li se jgħinuna nibbenefikaw mill-​provvedimenti kollha li Ġeħova jagħtina.

7. Għala rridu naqraw il-​Bibbja b’moħħ miftuħ?

⁷ Aqra b’moħħ miftuħ. Huwa minnu li xi partijiet mill-​Bibbja ġew miktubin għal persuna partikulari jew grupp taʼ nies. Madankollu, il-​Bibbja tgħid b’mod ċar li “l-​Iskrittura kollha hi mnebbħa minn Alla” u hi taʼ benefiċċju. (2 Timotju 3:16) Huwa għalhekk li għandna bżonn moħħ miftuħ meta naqraw il-​Bibbja. Ħu jipprova jiftakar li hu jistaʼ jitgħallem ħafna lezzjonijiet minn rakkont wieħed biss. Dan jgħinu jifhem lezzjonijiet li mhumiex daqstant ovvji. Allura qabel naqraw il-​Bibbja, nagħmlu tajjeb li nitolbu biex ikollna moħħ miftuħ u biex ikollna l-​għerf ħalli nifhmu l-​lezzjonijiet li Ġeħova jridna nitgħallmu.—Esdra 7:10; aqra Ġakbu 1:5.

8, 9. (a) Meta naqraw il-​Bibbja, liema mistoqsijiet nistgħu nsaqsu lilna nfusna? (b) Il-​kwalifiki għall-​anzjani Kristjani, x’jgħidulna dwar Ġeħova?

⁸ Saqsi mistoqsijiet. Meta taqra l-​Bibbja, ieqaf u saqsi lilek innifsek dawn il-​mistoqsijiet: ‘Dan x’jgħidli dwar Ġeħova?  Kif nistaʼ nuża din l-​informazzjoni f’ħajti? Kif nistaʼ nużaha biex ngħin lil ħaddieħor?’ Meta nimmeditaw fuq dawn il-​mistoqsijiet se nibbenefikaw iktar mill-​qari tal-​Bibbja tagħna. Ejja nikkunsidraw eżempju. Il-​Bibbja tiddeskrivi ċerti kwalifiki għall-​anzjani Kristjani. (Aqra l-​1 Timotju 3:2-​7.) Madankollu l-​maġġorparti minna mhumiex anzjani, allura għandu mnejn naħsbu li din l-​informazzjoni ma tistaʼ tgħinna bl-​ebda mod. Madankollu, ejja nużaw it-​tliet mistoqsijiet li ssemmew qabel biex naraw kif din il-​lista taʼ kwalifiki tistaʼ tgħin lil kulħadd.

⁹ “Dan x’jgħidli dwar Ġeħova?” Ġeħova tana l-​lista taʼ kwalifiki għall-​anzjani. Hu għandu livelli għoljin għall-​irġiel li jieħdu ħsieb il-​kongregazzjoni. Dan juri li l-​kongregazzjoni hi prezzjuża għal Ġeħova. Il-​Bibbja tgħid li hu xtraha “bid-​demm taʼ Ibnu stess.” (Atti 20:28) Allura Ġeħova jistenna li l-​anzjani jkunu t’eżempju tajjeb, u huma jridu jagħtu kont lilu għal mod kif jittrattaw lill-​membri tal-​kongregazzjoni. Hu jridna nħossuna fis-​sigurtà taħt il-​ħarsien tagħhom. (Isaija 32:1, 2) Meta nitgħallmu dwar dawn il-​kwalifiki, se naraw kemm Ġeħova verament jieħu ħsiebna.

10, 11. (a) Meta naqraw il-​kwalifiki għall-​anzjani, kif nistgħu napplikaw l-​informazzjoni f’ħajjitna? (b) Kif nistgħu nużaw din l-​informazzjoni biex ngħinu lil ħaddieħor?

 ¹⁰ “Kif nistaʼ nuża din l-​informazzjoni f’ħajti?” Jekk int diġà anzjan, għandek tirrivedi din il-​lista taʼ kwalifiki b’mod regulari u tipprova titjieb. Jekk ‘qed tirsisti għal kariga taʼ indokratur,’ għandek tipprova tilħaq dawn il-​kwalifiki bl-​aħjar mod li tistaʼ. (1 Timotju 3:1) Imma l-​Kristjani kollha jistgħu jitgħallmu minn dawn il-​kwalifiki. Pereżempju, Ġeħova jistenna minna lkoll li nkunu raġunevoli u li nagħmlu ġudizzju tajjeb. (Filippin 4:5; 1 Pietru 4:7) Meta l-​anzjani jkunu taʼ ‘eżempju għall-​merħla,’ inkunu nistgħu nitgħallmu mingħandhom u ‘nimitaw il-​fidi tagħhom.’—1 Pietru 5:3; Ebrej 13:7.

¹¹ “Kif nistaʼ nuża din l-​informazzjoni biex ngħin lil ħaddieħor?” Aħna nistgħu nużaw din il-​lista taʼ kwalifiki għall-​anzjani Kristjani biex ngħinu studenti tal-​Bibbja u oħrajn interessati biex jifhmu kif l-​anzjani huma differenti mill-​kleru reliġjuż. Din il-​lista tistaʼ wkoll tgħin lilna biex niftakru x-​xogħol iebes li l-​anzjani jagħmlu fil-​kongregazzjoni tagħna. U b’hekk, din se tgħinna nirrispettaw dawn l-​aħwa. (1 Tessalonikin 5:12) Iktar ma nirrispettawhom, iktar se jkunu ferħanin fl-​inkarigu tagħhom.—Ebrej 13:17.

12, 13. (a) Permezz tal-​għodod disponibbli għalina, liema tip taʼ riċerka nistgħu nagħmlu? (b) Agħti eżempju taʼ kif riċerka għandha mnejn tgħinna nitgħallmu lezzjonijiet li ma jkunux daqshekk ovvji.

¹² Agħmel riċerka. Meta nistudjaw il-​Bibbja, nistgħu nfittxu għat-​tweġibiet tal-​mistoqsijiet li ġejjin:

• Min kiteb din il-​parti tal-​Bibbja?

• Fejn u meta nkitbet?

• Liema ġrajjiet importanti kienu qed iseħħu meta inkiteb dan il-​ktieb?

Informazzjoni bħal din tistaʼ tgħinna nitgħallmu lezzjonijiet li ma jkunux daqshekk ovvji għalina.

¹³ Pereżempju, Eżekjel 14:13, 14 jgħid: “Jekk pajjiż jidneb kontrija billi jaġixxi bla fedeltà, jien immidd idi kontrih u nkissirlu l-​bsaten li jdendlu l-​ftajjar magħhom, u nibgħat fuqu l-​ġuħ u naqtaʼ minnu l-​bniedem u l-​annimal domestiku. ‘U kieku kellu jkun hemm fih dawn it-​tlett irġiel, Noè, Danjel, u Ġob, kienu jeħilsu biss lilhom infushom minħabba s-​sewwa tagħhom,’ hija l-​kelma tal-​Mulej Sovran Ġeħova.” Jekk nagħmlu ftit riċerka, nitgħallmu li Eżekjel kiteb dan il-​kliem madwar 612-​il sena qabel Kristu (QK). Noè u Ġob diġà kienu ilhom mejtin mijiet taʼ snin, imma Ġeħova baqaʼ jiftakar il-​lealtà tagħhom. Madankollu, Danjel, kien għadu ħaj. Aktarx, kellu xi 20 sena meta Ġeħova qal li kien ġust bħal Noè u Ġob. X’nitgħallmu? Ġeħova jara u japprezza lill-​qaddejja kollha tiegħu, inkluż iż-​żgħażagħ.—Salm 148:12-​14.

14. Il-​materjal ippubblikat għaż-​żgħażagħ kif jgħinhom, u kif jistaʼ jkun taʼ benefiċċju għal oħrajn ukoll? (Ara l-​ewwel stampa.)

¹⁴ Letteratura għaż-​żgħażagħ. Aħna tgħallimna li nistgħu nibbenefikaw mill-​partijiet kollha tal-​Bibbja. B’mod simili, aħna nistgħu nibbenefikaw mill-​pubblikazzjonijiet kollha. Ejja nikkunsidraw ftit eżempji. Fis-​snin reċenti, Ġeħova pprovda ħafna informazzjoni għaż-​żgħażagħ. ^[1] (Ara n-​nota fl-​aħħar.) Din l-​informazzjoni tgħinhom ikampaw mal-​pressjoni tal-​iskola u l-​isfidi li jkollhom huma u jikbru. Imma kif jistaʼ jibbenefika kulħadd mill-​qari taʼ dawn l-​artikli u l-​kotba? Meta naqraw din l-​informazzjoni, nitgħallmu dwar il-​problemi li għandhom iż-​żgħażagħ u nkunu f’pożizzjoni aħjar biex ngħinuhom u ninkuraġġuhom.

15. Il-​Kristjani adulti għala għandhom ikunu interessati fl-​informazzjoni għaż-​żgħażagħ?

¹⁵ Il-​Kristjani adulti m’għandhomx ikunu tant imkabbrin li ma jaqrawx l-​informazzjoni għaż-​żgħażagħ. Ħafna mill-​problemi diskussi fl-​artikli għaż-​żgħażagħ jeffettwaw lill-​Kristjani kollha. Pereżempju, ilkoll kemm aħna għandna bżonn li niddefendu t-​twemmin tagħna, nikkontrollaw l-​emozzjonijiet tagħna, nirrifjutaw pressjoni minn dawk taʼ madwarna, u nevitaw sħubija ħażina u divertiment ħażin. Allura, anki jekk dawn il-​pubblikazzjonijiet inkitbu għaż-​żgħażagħ, l-​informazzjoni taʼ ġo fihom ġejja mill-​Bibbja u l-​Kristjani kollha jistgħu jibbenefikaw minnha.

16. Il-​pubblikazzjonijiet tagħna x’jistgħu jgħinuhom jagħmlu iktar liż-​żgħażagħ?

¹⁶ Il-​pubblikazzjonijiet miktubin għaż-​żgħażagħ jistgħu jgħinuhom ukoll biex isaħħu r-​relazzjoni li għandhom maʼ Ġeħova. (Aqra Ekkleżjasti 12:1, 13.) U l-​adulti jistgħu jibbenefikaw minnhom ukoll. Pereżempju, il-​ħarġa taʼ Stenbaħ! taʼ Lulju 2009 kien fiha l-​artiklu “Iż-​Żgħażagħ Jistaqsu . . . Kif Nistaʼ Nagħmel il-​Qari tal-​Bibbja Pjaċevoli?” Dan l-​artiklu kellu ħafna suġġerimenti t’għajnuna u kellu kaxxa li setgħet tiġi mqasqsa, merfugħa, u użata għall-​istudju. L-​adulti bbenefikaw mill-​artiklu? Omm miżżewġa qalet li l-​qari tal-​Bibbja dejjem kien diffiċli għaliha. Imma hi użat is-​suġġerimenti f’dan l-​artiklu u issa tħares ’il quddiem għall-​qari tal-​Bibbja. Hi tgħid li qed tieħu pjaċir tara kif il-​kotba tal-​Bibbja huma relatati maʼ xulxin u tistaʼ toħloq stampa ċara f’moħħha u żżid tgħid, “Qatt ma kont daqshekk eċċitata biex naqra l-​Bibbja.”

17, 18. Kif nistgħu nibbenefikaw billi naqraw materjal miktub għall-​pubbliku? Agħti eżempju.

¹⁷ Letteratura għall-​pubbliku. Mill-​2008 ħadna pjaċir bl-​edizzjoni għall-​istudju tat-​Torri tal-​Għassa. Din il-​ħarġa  hi miktuba l-​iktar għax-​Xhieda taʼ Ġeħova, imma għandna wkoll rivisti li huma iktar għall-​pubbliku. Kif nistgħu nibbenefikaw minn dawn ukoll? Ejja naraw eżempju. Żgur li tkun eċċitat meta tkun stidint individwu biex jiġi s-​Sala tas-​Saltna u dan jiġi. Waqt li l-​kelliemi jkun qed jagħti taħdita, tkun qed taħseb dwar il-​mistieden tiegħek. Int tibda taħseb dwar kif qed iħossu dan l-​individwu dwar l-​affarijiet li jkun qed jismaʼ u kif l-​informazzjoni tistaʼ tbiddillu ħajtu. B’hekk, qalbek titqanqal u tkun saħansitra iktar grat għal dak is-​suġġett.

¹⁸ Xi ħaġa simili għandu mnejn tiġri lilna meta naqraw letteratura għall-​pubbliku. Pereżempju, l-​edizzjoni għall-​pubbliku tat-​Torri tal-​Għassa u artikli fuq jw.org jispjegaw il-​Bibbja billi jintużaw kliem u espressjonijiet li jkunu faċli biex jiġu mifhuma. Meta naqraw din l-​informazzjoni, ikollna fehma aħjar u aktar imħabba għall-​verità tal-​Bibbja li diġà konna nafu. Apparti minn hekk, għandu mnejn nitgħallmu modi ġodda kif nispjegaw it-​twemmin tagħna fil-​ministeru. B’mod simili, ir-​rivista Stenbaħ! issaħħilna t-​twemmin tagħna dwar li hemm Ħallieq. Tgħinna wkoll nitgħallmu kif niddefendu t-​twemmin tagħna.—Aqra l-​1 Pietru 3:15.

19. Kif nistgħu nuru lil Ġeħova li aħna grati għall-​provvedimenti tiegħu?

¹⁹ B’mod ċar, Ġeħova pprovda ħafna pariri u istruzzjonijiet għall-​ġid tagħna. (Mattew 5:3) Ejja nkomplu naqraw u napplikaw l-​informazzjoni kollha li tana. Jekk nagħmlu hekk, se nibbenefikaw u nuru lil Ġeħova li aħna grati għall-​provvedimenti kollha tiegħu.—Isaija 48:17.