1. Ġesù x’qal dwar it-​teżori fis-​sema?

MHUX ir-​rigali kollha nistgħu naraw. Fil-​fatt, l-​iktar rigali prezzjużi ma jidhrux. Fil-​Prietka taʼ fuq il-​Muntanja, Ġesù tkellem dwar teżori fis-​sema li huma ħafna aħjar minn affarijiet bħal flus. Imbagħad qal ukoll: “Fejn hemm it-​teżor tiegħek, hemm tkun qalbek ukoll.” (Mt. 6:19-​21) Meta nqisu xi ħaġa prezzjuża ħafna, se nkunu rridu nakkwistawha. Aħna naħżnu “teżori fis-​sema” billi jkollna reputazzjoni tajba m’Alla. Ġesù spjega li teżori bħal dawn qatt ma jistgħu jiġu meqrudin jew misruqin.

2. (a) Fi qbil mat-​2 Korintin 4:17, 18, Pawlu xi jħeġġiġna nagħmlu? (b) X’se niddiskutu f’dan l-​artiklu?

² L-​appostlu Pawlu jħeġġiġna biex ‘inżommu għajnejna fuq l-​affarijiet . . . li ma jidhrux.’ (Aqra t-​2 Korintin 4:17, 18.) Dawn l-​affarijiet li ma jidhrux jinkludu l-​affarijiet tajbin kollha li se jkollna fis-​sistema l-​ġdida. F’dan l-​artiklu, se nitgħallmu dwar erbaʼ rigali li jistaʼ jkollna issa, imma li ma nistgħux narawhom. Il-​ħbiberija m’Alla, ir-​rigal tat-​talb, l-​għajnuna tal-​ispirtu qaddis t’Alla, u l-​għajnuna li nirċievu fil-​ministeru mingħand Ġeħova, Ġesù, u l-​anġli. Se nitgħallmu wkoll xi rridu nagħmlu biex nuru l-​apprezzament tagħna lil Ġeħova għal dawn ir-​rigali.

3. Liema hu l-​iktar rigal prezzjuż li ma jidhirx, u kif sar possibbli?

³ L-​iktar rigal prezzjuż li ma jidhirx huwa l-​ħbiberija tagħna m’Alla Ġeħova. (Salm 25:14) Peress li aħna nies imperfetti, Alla kif jistaʼ jkun ħabib tagħna u jibqaʼ kompletament  qaddis? Hu jistaʼ jagħmel dan minħabba s-​sagrifiċċju taʼ Ġesù bħala fidwa li neħħa d-​dnub tan-​nies fid-​dinja. (Ġw. 1:29) Anki qabel ma Ġesù miet, Ġeħova kien jaf li Ġesù kien se jkun leali sal-​mewt sabiex b’hekk ikun jistaʼ jsalva lill-​bnedmin. Hu għalhekk li Ġeħova setaʼ jkun ħabib man-​nies li għexu qabel il-​mewt taʼ Ġesù.—Rum. 3:25.

4. Agħti xi eżempji taʼ rġiel li għexu qabel Ġesù u kienu l-​ħbieb t’Alla.

⁴ Ikkunsidra xi eżempji taʼ rġiel li għexu qabel Ġesù u li saru l-​ħbieb t’Alla. Abraham kien raġel li kellu fidi kbira. Madwar elf sena wara li Abraham miet, Ġeħova sejjaħlu “l-​ħabib tiegħi.” (Is. 41:8) Dan ifisser li anki meta n-​nies imutu, għal Ġeħova huma xorta jkunu għadhom il-​ħbieb tiegħu. Fil-​memorja taʼ Ġeħova, Abraham għadu ħaj. (Lq. 20:37, 38) Eżempju ieħor hu Ġob. Meta l-​anġli kollha nġabru flimkien fis-​sema, Ġeħova tkellem b’fiduċja dwaru. Ġeħova sejjaħlu “raġel bla ħtija u rett, jibżaʼ minn Alla u jitbiegħed mill-​ħażen.” (Ġob 1:6-​8) U Ġeħova kif ħassu dwar Danjel li qdieh lealment għal 80 sena f’art fejn in-​nies ma kinux jaqdu lilu? Hu bagħat l-​anġli tliet darbiet biex jgħidu lil Danjel li hu kien “maħbub ferm” minnu. (Dan. 9:23; 10:11, 19) Aħna nistgħu nkunu ċerti li Ġeħova verament irid jirxoxta lill-​ħbieb maħbubin tiegħu li mietu.—Ġob 14:15.

5. X’għandna bżonn nagħmlu biex ingawdu ħbiberija mill-​qrib maʼ Ġeħova?

⁵ Illum, kemm hemm nies imperfetti li qed igawdu ħbiberija mill-​qrib maʼ Ġeħova? Miljuni taʼ nies. Nafu dan minħabba li ħafna rġiel, nisa, u tfal minn madwar id-​dinja qed juru bl-​azzjonijiet tagħhom li jridu jkunu l-​ħbieb t’Alla. Ġeħova għandu ħbiberija mill-​qrib “mar-​retti.” (Prov. 3:32) Minħabba s-​sagrifiċċju taʼ Ġesù bħala fidwa, aħna nistgħu nkunu l-​ħbieb taʼ Ġeħova, niddedikaw ħajjitna lilu, u nitgħammdu. Meta nieħdu dawn il-​passi importanti, aħna se ningħaqdu maʼ miljuni taʼ Kristjani li ddedikaw ħajjithom, tgħammdu, u qed igawdu ħbiberija mill-​qrib mal-​aqwa Persuna fl-​univers!

6. Kif nistgħu nuru li napprezzaw il-​ħbiberija tagħna m’Alla?

⁶ Kif nistgħu nuru li napprezzaw il-​ħbiberija tagħna m’Alla? Bħal Abraham u Ġob, li baqgħu leali lejn Alla għal iktar minn miet sena, aħna rridu nibqgħu leali—ilna kemm ilna naqdu lil Ġeħova f’din is-​sistema. Bħal Danjel, aħna għandna napprezzaw il-​ħbiberija tagħna m’Alla iktar mill-​ħajja tagħna. (Dan. 6:7, 10, 16, 22) Bl-​għajnuna taʼ Ġeħova, aħna nistgħu nissaportu kull prova li niffaċċjaw, u b’hekk nibqgħu ħbieb tiegħu.—Flp. 4:13.

7. (a) Skont Proverbji 15:8, Ġeħova kif iħossu dwar it-​talb tagħna? (b) Ġeħova kif iwieġeb it-​talb tagħna?

⁷ Rigal ieħor li ma jidhirx hu t-​talb. Ħbieb tal-​qalb jieħdu pjaċir jitkellmu flimkien dwar il-​ħsibijiet u s-​sentimenti tagħhom. Tħossok l-​istess int dwar il-​ħbiberija tiegħek maʼ Ġeħova? Hu jkellimna permezz tal-​Kelma tiegħu. Fiha hu jgħidilna l-​ħsibijiet u s-​sentimenti tiegħu. Aħna nitkellmu miegħu fit-​talb, u nistgħu ngħidulu dak li jkun qed jinkwetana u kif inkunu qed inħossuna. Ġeħova jieħu pjaċir jismaʼ t-​talb tagħna. (Aqra Proverbji 15:8.) Bħal Ħabib li jħobbna, Ġeħova mhux biss jismaʼ t-​talb tagħna imma jwieġbu wkoll. Kultant iwieġbu  malajr. Imma kultant ikollna bżonn nibqgħu nitolbu. Però, nistgħu nkunu ċerti li hu jaf eżatt meta u kif għandu jwiġibna. Jistaʼ jkun li t-​tweġiba tkun differenti minn dak li nkunu qed nistennew. Pereżempju, minflok ma jneħħilna l-​prova li nkunu qed niffaċċjaw, hu jaf jagħtina l-​għerf u s-​saħħa biex ‘nissaportuha.’—1 Kor. 10:13.

8. Kif nistgħu nuru l-​apprezzament tagħna għar-​rigal prezzjuż tat-​talb?

⁸ Kif nistgħu nuru l-​apprezzament tagħna għar-​rigal prezzjuż tat-​talb? Mod wieħed hu billi nobdu d-​direzzjoni taʼ Ġeħova biex ‘nitolbu bla waqfien.’ (1 Tess. 5:17) Ġeħova ma jisforzaniex biex nitolbu. Minflok, hu jirrispetta l-​libertà tagħna u jħeġġiġna biex ‘nipperseveraw fit-​talb.’ (Rum. 12:12) Għalhekk, aħna nistgħu nuru l-​apprezzament tagħna billi matul il-​ġurnata nitkellmu miegħu spiss. Ukoll, m’għandniex ninsew nirringrazzjaw u nfaħħru lil Ġeħova fit-​talb tagħna.—Salm 145:2, 3.

9. (a) Chris kif iħossu dwar it-​talb? (b) Int kif tħossok dwar it-​talb?

⁹ Meta nkunu ilna naqdu lil Ġeħova u naraw kif hu wieġeb it-​talb tagħna, l-​apprezzament għat-​talb għandu jkompli jikber. Ejja nieħdu l-​eżempju taʼ Chris, ħu li ilu fis-​servizz full-​time għal dawn l-​aħħar 47 sena. Hu jgħid: “Kemm nieħu pjaċir inqum kmieni filgħodu biex inkun nistaʼ nitlob lil Ġeħova. Hija xi ħaġa sabiħa li titkellem maʼ Ġeħova hekk kif tkun tielaʼ x-​xemx u kollox ikun jidher sabiħ! Dan iġegħelni nirringrazzjah għar-​rigali kollha li tani, inkluż il-​privileġġ tat-​talb. Imbagħad, fl-​aħħar tal-​ġurnata wara li nkun tlabtu, jien inkun nistaʼ norqod b’kuxjenza nadifa.”

10. Għala għandna napprezzaw l-​ispirtu qaddis t’Alla?

¹⁰ L-​ispirtu qaddis t’Alla huwa rigal ieħor li ma jidhirx u li għandna napprezzaw. Ġesù ħeġġiġna biex nibqgħu nitolbu għall-​ispirtu  qaddis. (Lq. 11:9, 13) Ġeħova juża l-​ispirtu qaddis tiegħu biex jagħtina “qawwa iktar min-​normal.” (2 Kor. 4:7; Atti 1:8) Bl-​għajnuna tal-​ispirtu t’Alla, aħna nistgħu nissaportu kull prova li nkunu qed niffaċċjaw.

11. L-​ispirtu qaddis kif jistaʼ jgħinna?

¹¹ L-​ispirtu qaddis jistaʼ jgħinna biex inwettqu l-​inkarigi tagħna fis-​servizz t’Alla. Jistaʼ jgħinna wkoll intejbu l-​abbiltajiet li għandna. Aħna nafu li r-​riżultati tajbin li jkollna fis-​servizz t’Alla huma possibbli biss minħabba li l-​ispirtu tiegħu jgħinna.

12. Skont Salm 139:23, 24, li nitolbu għall-​ispirtu qaddis kif jistaʼ jgħinna?

¹² Mod ieħor kif nuru li l-​ispirtu qaddis t’Alla hu prezzjuż għalina hu billi nitolbu lil Ġeħova jgħinna naraw jekk għandniex xi ħsibijiet ħżiena jew xewqat ħżiena f’qalbna. (Aqra Salm 139:23, 24.) Jekk nitolbu għal dan, Ġeħova, permezz tal-​ispirtu qaddis, jistaʼ jgħinna niġu konxji tal-​ħsibijiet jew tax-​xewqat ħżiena tagħna. U jekk nindunaw li għandna waħda minn dawn in-​nuqqasijiet, għandna nitolbu għall-​ispirtu t’Alla biex jagħtina s-​saħħa ħalli nkunu nistgħu nirreżistuha. Jekk nagħmlu dan, Ġeħova se jara li aħna ma rridu nagħmlu xejn li jwaqqfu milli jgħinna permezz tal-​ispirtu qaddis tiegħu.—Efes. 4:30.

13. Kif nistgħu napprezzaw iktar l-​ispirtu qaddis t’Alla?

¹³ Aħna se napprezzaw iktar l-​ispirtu qaddis meta naħsbu dwar dak li qed jagħmel bħalissa. Qabel ma Ġesù telaʼ fis-​sema, hu qal lid-​dixxipli tiegħu: “Meta l-​ispirtu qaddis jiġi fuqkom tirċievu qawwa u tkunu xhieda tiegħi . . . sa l-​iktar parti mbiegħda taʼ l-​art.” (Atti 1:8) Dan hu eżatt dak li qed jiġri llum. Bl-​għajnuna tal-​ispirtu qaddis, madwar tmien miljun u nofs qaddej taʼ Ġeħova nġabru minn madwar id-​dinja. Ukoll, bħala n-​nies t’Alla, aħna magħqudin flimkien bħala familja waħda minħabba li l-​ispirtu t’Alla jgħinna nikkultivaw kwalitajiet sbieħ. Dawn huma  l-​imħabba, il-​ferħ, il-​paċi, is-​sabar fit-​tul, il-​qalb tajba, it-​tjubija, il-​fidi, il-​ħlewwa, u r-​rażan. Dawn il-​kwalitajiet huma “l-​frott taʼ l-​ispirtu.” (Gal. 5:22, 23) X’rigal prezzjuż hu l-​ispirtu qaddis!

14. Liema għajnuna prezzjuża jkollna meta nkunu fuq il-​ministeru?

¹⁴ Aħna għandna r-​rigal prezzjuż li “naħdmu flimkien” maʼ Ġeħova, Ġesù, u l-​anġli. (2 Kor. 6:1) Aħna nagħmlu dan kull meta nkunu qegħdin fuq il-​ministeru. Pawlu qal li hu u dawk kollha li jieħdu sehem f’dax-​xogħol huma: “Ħaddiema sħab m’Alla.” (1 Kor. 3:9) U f’kull tip taʼ servizz li nagħtu lil Ġeħova, aħna nkunu wkoll ħaddiema sħab maʼ Ġesù. Ftakar, li wara li ta l-​kmand lis-​segwaċi tiegħu, “morru u agħmlu dixxipli min-​nies tal-​ġnus kollha,” Ġesù qal: “Jien magħkom.” (Mt. 28:19, 20) U xi ngħidu dwar l-​anġli? X’barka għandna li nkunu gwidati mill-​anġli meta nkunu qed naqsmu l-​“aħbar tajba taʼ dejjem” maʼ dawk kollha li jgħixu fuq l-​art!—Riv. 14:6.

15. Agħti eżempju mill-​Bibbja li juri l-​għajnuna importanti li jagħtina Ġeħova waqt il-​ministeru.

¹⁵ Din l-​għajnuna li nirċievu mis-​sema liema affarijiet tgħinna nwettqu? Meta niżirgħu l-​messaġġ tas-​Saltna, xi żerriegħa taqaʼ fi qlub tajba u tikber. (Mt. 13:18, 23) Min iġiegħel lil din iż-​żerriegħa tal-​verità tikber u tagħti l-​frott? Ġesù spjega li ħadd ma jistaʼ jkun segwaċi tiegħu jekk “ma jiġbdux il-​Missier.” (Ġw. 6:44) Il-​Bibbja tagħtina eżempju taʼ dan. Ftakar meta Pawlu ta xhieda lill-​grupp taʼ nisa barra l-​belt taʼ Filippi. Innota x’tgħid il-​Bibbja dwar waħda minnhom li kien jisimha Lidja: “Ġeħova fetħilha qalbha beraħ biex taċċetta dak li kien qed jgħid Pawlu.” (Atti 16:13-​15) Bħal Lidja, Ġeħova ġibed lejh miljuni t’oħrajn.

16. Min għandu jieħu l-​unur meta jkollna riżultati tajbin fil-​ministeru?

¹⁶ Min għandu jieħu l-​unur meta jkollna riżultati tajbin fil-​ministeru? Pawlu wieġeb din il-​mistoqsija meta kiteb dan il-​kliem dwar il-​kongregazzjoni f’Korintu: “Jien ħawwilt, Apollo saqqa, imma Alla baqaʼ jkabbar; u b’hekk, la min iħawwel u lanqas min isaqqi m’hu xejn, imma Alla li jkabbar.” (1 Kor. 3:6, 7) Bħal Pawlu, aħna għandna dejjem nagħtu l-​unur lil Ġeħova għal meta jkollna riżultati tajbin fil-​ministeru.

17. Kif nistgħu nuru li napprezzaw il-​privileġġ li “naħdmu flimkien” m’Alla, Kristu, u l-​anġli?

¹⁷ Kif nistgħu nuru li napprezzaw il-​privileġġ li “naħdmu flimkien” m’Alla, Kristu, u l-​anġli? Nistgħu nuru dan billi nieħdu kull opportunità biex naqsmu l-​aħbar tajba m’oħrajn. Hemm ħafna modi kif nistgħu nagħmlu dan, bħal li nagħtu xhieda “pubblikament u minn dar għal dar.” (Atti 20:20) Oħrajn jieħdu pjaċir ukoll jagħtu xhieda informali. Meta jiltaqgħu maʼ xi ħadd li ma jafuhx, huma jkunu dħulin miegħu u jipprovaw jibdew konversazzjoni. Jekk il-​persuna tkun trid tkompli titkellem, huma bit-​tattika jdawru l-​konversazzjoni fuq l-​aħbar tajba tas-​Saltna.

18-19. (a) Kif insaqqu ż-​żerriegħa tal-​verità? (b) Semmi esperjenza li turi kif Ġeħova għen lil student tal-​Bibbja.

¹⁸ Bħala “ħaddiema sħab m’Alla,” aħna mhux biss irridu niżirgħu ż-​żerriegħa tal-​verità imma wkoll insaqquha. Meta xi ħadd juri interess, aħna rridu nerġgħu  mmorru jew niftiehmu maʼ xi ħadd ieħor biex imur hu, bit-​tama li jinbeda studju tal-​Bibbja. Hekk kif l-​istudent jagħmel progress, aħna nkunu ferħanin meta naraw li Ġeħova qed jgħinu jbiddel il-​mod kif jaħseb u jaġixxi.

¹⁹ Ikkunsidra l-​eżempju taʼ Raphalalani, saħħar fl-​Afrika t’Isfel. Hu beda jieħu pjaċir b’dak li beda jitgħallem mill-​istudju tal-​Bibbja. Imma kien diffiċli għalih biex jaċċetta dak li tgħid il-​Kelma t’Alla dwar dawk li jikkomunikaw mal-​mejtin. (Dt. 18:10-​12) Bil-​mod il-​mod, hu ħalla lil Alla jgħinu jbiddel il-​mod kif jaħsibha. Maż-​żmien, hu ma baqax saħħar, minkejja li dan kien l-​uniku xogħol li kellu. Raphalalani, li issa għandu 60 sena, jgħid: “Nirringrazzja lix-​Xhieda taʼ Ġeħova tal-​għajnuna li tawni b’diversi modi, huma anki għenuni nsib xogħol. Imma l-​iktar li nirringrazzja hu lil Ġeħova talli għenni nagħmel bidliet f’ħajti, u b’hekk issa nistaʼ noħroġ fuq il-​ministeru bħala Xhud mgħammed.”

20. X’int determinat li tagħmel?

²⁰ F’dan l-​artiklu aħna ddiskutejna erbaʼ rigali li ma jidhrux. L-​ikbar wieħed hu l-​privileġġ li għandna lil Ġeħova bħala l-​aqwa Ħabib. Din il-​ħbiberija tgħinna nibbenefikaw minn rigali oħra li ma jidhrux: ir-​rigal tat-​talb, l-​għajnuna tal-​ispirtu qaddis tiegħu, u l-​għajnuna li nirċievu mis-​sema fil-​ministeru. Jalla nkunu determinati li nkabbru l-​apprezzament tagħna lejn dawn ir-​rigali li ma jidhrux. U jalla dejjem nirringrazzjaw lil Ġeħova li għażilna biex inkunu l-​ħbieb tiegħu.