Ngħixu b’Fidi fil-​Wegħdi t’Alla

“Jien hu Alla, u ħadd ħliefi m’hemm. Jien Alla u m’hemm ħadd bħali. Sa mill-​bidu ngħarraf it-​tmiem, u sa minn qabel dak li ma seħħx.”—ISAIJA 46:9, 10.

1, 2. Liema huma xi opinjonijiet differenti dwar l-​involviment t’Alla f’dak li jiġri fuq l-​art?

 KEMM hu involut Alla f’dak li jiġri fuq l-​art? L-​opinjonijiet ivarjaw. Ħarsa waħda hija li m’hu involut assolutament xejn. Wara li beda l-​proċess tal-​ħajja permezz tal-​ħolqien, hu jew ma jridx jew ma jistax jaġixxi għan-​nom tagħna. F’din il-​ħarsa, Alla hu bħal missier li jpoġġi lil ibnu fuq rota ġdida, jissodaha, u jagħtiha tefgħa biex lil ibnu jqabbdu t-​triq. Wara dan, il-​missier jitlaq ’l hemm. It-​tifel intelaq għal riħu; għandu mnejn jaqaʼ, jew għandu mnejn le. Jiġri x’jiġri, il-​missier ħasel idejh.

² Ħarsa oħra hi li Alla qed jidderieġi b’mod attiv kull aspett taʼ ħajjitna u li hu involut direttament f’dak kollu li qed jiġri mal-​ħolqien kollu tiegħu. Iżda jekk dan hu minnu, xi wħud jaslu biex jikkonkludu li Alla ma jikkaġunax biss l-​affarijiet tajbin li jseħħu imma wkoll il-​kriminalità u t-​traġedji li jkiddu lill-​umanità. Li nkunu nafu l-​verità dwar kif jaġixxi Alla se jgħinna nkunu nafu x’għandna nistennew minnu. Dan se jsaħħaħ ukoll il-​fidi tagħna fit-​twettiq ċert tal-​wegħdi tiegħu.—Lhud 11:1.

3. (a) Kif nafu li Jehovah hu Alla taʼ skop? (b) Jehovah għala jintqal fuqu bħala li ‘jħejji’ u ‘jsawwar’ l-​iskop tiegħu?

³ Il-​fatt li Jehovah hu Alla taʼ skop hu ċentrali għall-​kwistjoni dwar kemm Alla hu involut fil-​ġrajjiet umani. Dan hu implikat fl-​istess ismu. “Jehovah” jfisser “Hu Jikkaġuna li Jsir.” B’azzjoni progressiva, Jehovah jikkaġuna lilu nnifsu li jsir Dak li Jwettaq il-​wegħdi tiegħu kollha. Għaldaqstant, dwar Jehovah jintqal li hu ‘jħejji,’ jew ‘isawwar,’ l-​iskop tiegħu rigward ġrajjiet jew azzjonijiet futuri. (2 Slaten 19:25; Isaija 46:11) Dawn it-​termini ġejjin mill-​kelma Ebrajka ya·tsarʹ, li hija relatata mal-​kelma li tfisser “fuħħari.” (Ġeremija 18:4) Sewwa sew bħalma fuħħari tas-​sengħa jistaʼ jifforma vażun sabiħ minn ċappa tafal, Jehovah jistaʼ jifforma, jew jimmanuvra, l-​affarijiet biex iwettaq ir-​rieda tiegħu.—Efesin 1:11.

4. Alla kif ħejja l-​art għall-​abitazzjoni umana?

⁴ Per eżempju, Alla kellu l-​iskop li l-​art issir post taʼ ġmiel skwiżit u li kellha tiġi abitata minn bnedmin perfetti u ubbidjenti. (Isaija 45:18) Ħafna qabel ma ħalaq lill-​ewwel raġel u mara, Jehovah b’imħabba għamel tħejjijiet għalihom. Il-​kapitli tal-​ftuħ tal-​ktieb taʼ Ġenesi jiddeskrivu kif Jehovah stabbilixxa n-​nhar u l-​lejl, l-​art u l-​baħar. Imbagħad hu ħalaq il-​ħxejjex u l-​annimali. Din it-​tħejjija taʼ l-​art għall-​abitazzjoni umana involviet ħafna eluf taʼ snin. Il-​proġett tlesta b’suċċess. L-​ewwel raġel u mara bdew ħajjithom f’Għeden, ġenna li tgħaxxaq u li kienet mgħammra bis-​sħiħ sabiex huma setgħu jgawdu l-​ħajja. (Ġenesi 1:31) B’hekk Jehovah kien involut direttament f’dak li kien qed jiġri fuq l-​art, billi sawwar progressivament ix-​xogħlijiet tiegħu għall-​iskop nobbli  tiegħu. Biddel it-​tkabbir tal-​familja umana l-​involviment tiegħu?

Jehovah Jillimita l-​Involviment Tiegħu mal-​Bnedmin

5, 6. Alla għala jillimita l-​involviment tiegħu mal-​bnedmin?

⁵ Jehovah ma jidderiġix u jikkontrolla kull dettall taʼ attività umana, għalkemm għandu s-​setgħa li jagħmel dan. Hemm raġunijiet għal dan. Raġuni waħda hi li l-​bnedmin inħolqu fix-​xbiha t’Alla, billi għandhom ir-​rieda ħielsa u b’hekk huma aġenti morali ħielsa. Jehovah ma jisforzaniex biex nagħmlu li jgħid hu; u lanqas m’aħna pupazzi. (Dewteronomju 30:19, 20; Ġożwè 24:15) Għalkemm hu jitlob kont minna taʼ dak li nagħmlu, Alla b’imħabba ħallielna ħelsien konsiderevoli biex niddeċiedu kif nimmaniġġaw ħajjitna.—Rumani 14:12; Lhud 4:13.

⁶ Raġuni oħra għala Alla ma jidderiġix kulma jiġri għandha x’taqsam mal-​kwistjoni li Satana qajjem f’Għeden. Satana sfida s-​sovranità t’Alla. Huwa offra lil Eva dik li dehret bħala opportunità biex tkun indipendenti​—offerta li hi u iktar tard żewġha, Adam, aċċettaw. (Ġenesi 3:1-6) B’riżultat taʼ dan, Alla ppermetta lill-​bnedmin li jaħkmu lilhom infushom għal perijodu taʼ żmien biex tingħata prova dwar jekk l-​isfida taʼ Satana kinitx ġustifikata jew le. Għal din ir-​raġuni, l-​affarijiet ħżiena li l-​bnedmin jagħmlu llum ma jistax jiġi akkużat bihom Alla. Mosè kiteb dan dwar nies ribellużi: “Mxew ħażin miegħu; m’humiex uliedu, għajb għalihom; nisel taʼ inkwiet u għawġ.”—Dewteronomju 32:5.

7. X’inhu l-​iskop taʼ Jehovah għall-​art u għall-​umanità?

⁷ Madankollu, filwaqt li ppermetta l-​għażla libera u esperimenti f’ħakma indipendenti, Jehovah ma adottax attitudni taʼ x’jimpurtani rigward dak li qed jiġri fuq l-​art, u b’hekk konna nitħallew mingħajr tama li hu se jwettaq il-​wegħdi tiegħu. Għalkemm Adam u Eva rribellaw kontra s-​sovranità t’Alla, Jehovah ma biddilx l-​iskop taʼ mħabba tiegħu għall-​art u għall-​umanità. Hu żgur mhux se jonqos li jbiddel l-​art f’ġenna abitata b’nies perfetti, ubbidjenti, u hienja. (Luqa 23:42, 43) Ir-​rakkont tal-​Bibbja minn Ġenesi sa Apokalissi jiddeskrivi kif Jehovah b’mod progressiv ħadem biex iwettaq dan l-​għan.

Alla Jaġixxi biex Iwettaq ir-​Rieda Tiegħu

8. X’kien hemm involut biex l-​Iżraeliti jinġabu fl-​Art Imwegħda?

⁸ Mill-​mod kif ittratta mal-​ġens taʼ Iżrael, Alla wera li hu se jwettaq l-​iskop tiegħu. Per eżempju, Jehovah żgura lil Mosè li Hu kien se jeħles lill-​Iżraeliti mill-​Eġittu u jdaħħalhom fl-​Art Imwegħda, art tnixxi l-​ħalib u l-​għasel. (Eżodu 3:8) Din kienet proklamazzjoni rassiguranti u taʼ importanza kbira. Dan kien jinvolvi li jinħelsu l-​Iżraeliti​—li flimkien maʼ sħabhom kienu jgħoddu mat-​tliet miljuni—​minn ġens setgħan li kien jopponi bil-​qawwa t-​tluq tagħhom. (Eżodu 3:19) Il-​pajjiż li kellhom jittieħdu fih kien abitat minn ġnus setgħana li kienu se jirreżistu l-​wasla tagħhom. (Dewteronomju 7:1) Jifridhom kien hemm xagħri li fih l-​Iżraeliti kien se jkollhom bżonn ikel u ilma. Din kienet sitwazzjoni li ppermettiet lil Jehovah juri l-​qawwa suprema u d-​Divinità tiegħu.—Levitiku 25:38.

9, 10. (a) Ġożwè għala setaʼ jixhed li l-​wegħdi taʼ Jehovah huma taʼ min joqgħod fuqhom? (b) Kemm huwa importanti li jkollna fiduċja fl-​abbiltà t’Alla li jippremja lil dawk leali lejh?

⁹ Alla ħareġ lill-​Iżraeliti mill-​Eġittu permezz taʼ serje taʼ atti setgħana. L-​ewwel, hu ġab għaxar kastigi li kkaġunaw ħerba kbira fuq il-​ġens taʼ l-​Eġittu. Imbagħad, hu feraq il-​Baħar l-​Aħmar, u b’hekk għen lill-​Iżraeliti jaħarbu filwaqt li nqerdet l-​armata Eġizzjana li kienet qed issegwihom. (Salm 78:12, 13, 43-51) Wara dan, hu ħa ħsieb l-​Iżraeliti matul l-​40 sena li damu fix-​xagħri, billi temagħhom il-​manna, ipprovdielhom l-​ilma, u  saħansitra ħa ħsieb li ħwejjiġhom ma therrewx u li saqajhom ma ntefħulhomx. (Dewteronomju 8:3, 4) Wara li l-​Iżraeliti daħlu fl-​Art Imwegħda, Jehovah tahom rebħa fuq l-​għedewwa tagħhom. Ġożwè, li eżerċita fidi qawwija fil-​wegħdi taʼ Jehovah, kien wieħed li ra b’għajnejh stess dawn l-​affarijiet kollha. B’hekk hu setaʼ jgħid bil-​fiduċja kollha lill-​irġiel anzjani taʼ żmienu: “Kunu afu b’qalbkom kollha u b’ruħkom kollha li ebda waħda mill-​wegħdiet taʼ ġid li għamlilkom il-​Mulej, Alla tagħkom, ma naqset. Kollha seħħulkom.”—Ġożwè 23:14.

¹⁰ Bħal Ġożwè tal-​qedem, il-​Kristjani llum huma fiduċjużi bis-​sħiħ li Alla hu lest u kapaċi jaġixxi għan-​nom taʼ dawk li jaqduh. Din il-​konvinzjoni hija parti essenzjali mill-​fidi tagħna. L-​appostlu Pawlu kiteb: “Mingħajr il-​fidi ma jistax ikun li wieħed jogħġob lil Alla. Għax kull min jersaq lejn Alla jeħtieġlu jemmen li . . . hu jagħti l-​ħlas xieraq lil dawk li jfittxuh.”—Lhud 11:6.

Alla Jara l-​Futur bil-​Quddiem

11. Liema fatturi jgħinu lil Alla jwettaq il-​wegħdi tiegħu?

¹¹ S’issa, rajna li filwaqt li Alla jippermetti r-​rieda ħielsa u l-​ħakma umana indipendenti, hu għandu kemm is-​setgħa u kemm il-​volontà li jaġixxi biex iwettaq l-​iskop tiegħu. Madankollu, hemm fattur ieħor li jikkontribwixxi għat-​twettiq ċert tal-​wegħdi t’Alla. Jehovah jistaʼ jara l-​futur bil-​quddiem. (Isaija 42:9) Permezz tal-​profeta tiegħu, Alla qal: “Ftakru fl-​ibgħad żminijiet, għax jien hu Alla, u ħadd ħliefi m’hemm. Jien Alla u m’hemm ħadd bħali! Sa mill-​bidu ngħarraf it-​tmiem, u sa minn qabel dak li ma seħħx, u ngħid: ‘Il-​ħsieb tiegħi għad iseħħ, u nagħmel kull ma rrid.’” (Isaija 46:9, 10) Bidwi taʼ l-​esperjenza jaf meta u fejn għandu jiżraʼ ż-​żerriegħa, imma xorta waħda jistaʼ jkun hemm xi inċertezza dwar kif se jiżviluppaw l-​affarijiet. Madankollu, is-​“Sultan taʼ dejjem” għandu għarfien eżatt biex jara bil-​quddiem preċiżament meta u fejn għandu jaġixxi biex iwettaq l-​iskop tiegħu.—1 Timotju 1:17.

12. Jehovah b’liema mod eżerċita s-​setgħa tiegħu li jara bil-​quddiem fi żmien Noè?

¹² Ikkunsidra kif Alla eżerċita s-​setgħa tiegħu li jara bil-​quddiem fi żmien Noè. Minħabba l-​ħażen mifrux li kien mela l-​art kollha, Alla ddetermina li jtemm lill-​umanità diżubbidjenti. Hu stabbilixxa żmien meta kien se jagħmel dan, 120 sena iktar ’il quddiem. (Ġenesi 6:3) Biex stabbilixxa dak il-​perijodu speċifiku, Jehovah ma kkunsidrax biss il-​qerda tal-​ħżiena, xi ħaġa li setaʼ jagħmilha fi kwalunkwe żmien. L-​iskeda taʼ Jehovah għamlet tajjeb ukoll għall-​preservazzjoni tat-​twajbin. (Qabbel Ġenesi 5:29.) Fl-​għerf tiegħu, Alla kien jaf bil-​quddiem meta kellu jinkariga x-​xogħol li kellu jwassal għal dan l-​għan. Hu ta lil Noè informazzjoni dettaljata b’mod suffiċjenti. Noè kellu jibni arka “biex isalva l-​familja tiegħu,” u l-​ħżiena kienu se jinqerdu permezz taʼ għarqa globali.—Lhud 11:7; Ġenesi 6:13, 14, 18, 19.

Proġett Kolossali taʼ Bini

13, 14. Il-​bini taʼ l-​arka għala kien inkarigu taʼ sfida?

¹³ Ikkunsidra dan l-​inkarigu mill-​ħarsa taʼ Noè. Peress li Noè kien raġel midħla m’Alla, hu kien jaf li Jehovah setaʼ jeqred lin-​nies li jiċħduH. Madankollu, qabel ma dan setaʼ jseħħ, kien hemm xogħol xi jsir​—xogħol li kien jirrikjedi l-​fidi. Il-​kostruzzjoni taʼ l-​arka kienet se tkun proġett kolossali. Alla kien speċifika l-​qisien tagħha. L-​arka kellha tkun itwal minn xi grawnds moderni tal-​futbol u għolja daqs bini taʼ ħames sulari. (Ġenesi 6:15) Il-​bennejja kienu ftit u bla esperjenza. Ma kellhomx l-​għodda u l-​apparat sofistikati disponibbli llum. Iktar minn hekk, ladarba ma kellux l-​abbiltà taʼ Jehovah li jkun jaf il-​futur bil-​quddiem, Noè ma setax ikun jaf x’sitwazzjonijiet kienu se jiżviluppaw matul is-​snin li setgħu jgħinu jew itellfu l-​proġett  tal-​bini. Noè x’aktarx li rrifletta fuq ħafna mistoqsijiet. Kif kien se jinġabar il-​materjal tal-​bini? Kif kien se jiġbor l-​annimali? Liema ikel kien meħtieġ u kemm? Eżatt meta kellha sseħħ l-​Għarqa mbassra?

¹⁴ Imbagħad kien hemm il-​kundizzjonijiet soċjali. Il-​ħażen kien abbundanti. In-​Nefilim setgħana​—in-​nisel ibridu taʼ l-​anġli ħżiena u n-​nisa—​imlew l-​art bil-​vjolenza. (Ġenesi 6:1-4, 13) Barra minn hekk, il-​bini taʼ l-​arka ma kienx se jkun xi proġett li setaʼ jsir bil-​moħbi. In-​nies kienu se jistaqsuh lil Noè dwar x’kien qed jagħmel, u hu kien se jgħidilhom. (2 Pietru 2:5) Setaʼ jistenna li kienu se jaqblu miegħu? Ma tantx! Xi snin qabel, Enok li kien leali, kien ipproklama l-​qerda tal-​ħżiena. Tant ma kienx popolari l-​messaġġ tiegħu li Alla “ħadu,” jew qassarlu ħajtu, evidentement biex jiskansah milli jinqatel mill-​għedewwa Tiegħu. (Ġenesi 5:24; Lhud 11:5; Ġuda 14, 15) Noè mhux biss kellu jipproklama messaġġ simili li ma kienx popolari, imma kellu wkoll jibni arka. Waqt li kienet qed tinbena, din l-​arka kienet se sservi taʼ tfakkira qawwija dwar il-​fedeltà taʼ Noè waqt li kien iffaċċjat minn kontemporanji mill-​agħar!

15. Noè għala kellu fiduċja li hu setaʼ jwettaq l-​inkarigu tiegħu?

¹⁵ Noè kien jaf li l-​proġett kellu l-​appoġġ u l-​barka t’Alla li Jistaʼ Kollox. Ma kienx Jehovah stess li inkarigah ix-​xogħol? Jehovah kien  żgura lil Noè li hu u l-​familja tiegħu kienu se jidħlu f’arka li kellha titlesta u li kienu se jinżammu ħajjin fid-​Dilluvju globali. Alla saħansitra enfasizza ċ-​ċertezza taʼ dan permezz taʼ ftehim solenni. (Ġenesi 6:18, 19) X’aktarx li Noè rrealizza li Jehovah antiċipa u wiżen kulma kien involut qabel ma tah l-​inkarigu. Iktar minn hekk, Noè kien jaf li Jehovah kellu s-​setgħa li jintervieni biex jgħinu meta jkun hemm bżonn. Għalhekk il-​fidi taʼ Noè qanqlitu għall-​azzjoni. Bħal Abraham, id-​dixxendent tiegħu, Noè “żamm bis-​sħiħ li min kien għamillu l-​wegħda kien qawwi biżżejjed biex iżomm kelmtu.”—Rumani 4:21.

16. Hekk kif il-​kostruzzjoni taʼ l-​arka mxiet ’il quddiem, kif issaħħet il-​fidi taʼ Noè?

¹⁶ Hekk kif bdew igerbu s-​snin u l-​arka bdiet tifforma, il-​fidi taʼ Noè ssaħħet. Problemi taʼ kostruzzjoni u taʼ loġistika ssolvew. Il-​provi ġew superati. L-​ebda oppożizzjoni ma setgħet twaqqaf ix-​xogħol. Il-​familja taʼ Noè esperjenzat l-​appoġġ u l-​protezzjoni taʼ Jehovah. Hekk kif Noè baqaʼ għaddej ’il quddiem, ‘it-​tiġrib tal-​fidi tiegħu nissel is-​sabar.’ (Ġakbu 1:2-4) Eventwalment, l-​arka tlestiet, id-​Dilluvju ġie, u Noè u l-​familja tiegħu salvaw. Noè esperjenza t-​twettiq tal-​wegħdi t’Alla, bħalma għamel iktar tard Ġożwè. Il-​fidi taʼ Noè ġiet premjata.

Jehovah Jappoġġa x-​Xogħol

17. Żmienna b’liema modi huwa parallel maʼ żmien Noè?

¹⁷ Ġesù bassar li żmienna kellu jkun parallel maʼ żmien Noè. Alla ddetermina għal darb’oħra li jeqred lill-​ħżiena u stabbilixxa żmien biex dan iseħħ. (Mattew 24:36-39) Hu ħejja wkoll l-​affarijiet biex it-​twajbin ma jintilfux. Filwaqt li Noè kellu jibni arka, il-​qaddejja t’Alla llum iridu jipproklamaw l-​iskopijiet taʼ Jehovah, jgħallmu l-​Kelma tiegħu, u jagħmlu dixxipli.—Mattew 28:19.

18, 19. Kif nafu li l-​ippridkar taʼ l-​aħbar tajba għandu l-​appoġġ taʼ Jehovah?

¹⁸ Li kieku Jehovah ma kienx maʼ Noè biex jappoġġah u jwieżnu, l-​arka ma kinitx tinbena. (Qabbel Salm 127:1.) Bl-​istess mod, mingħajr l-​appoġġ taʼ Jehovah, il-​Kristjanità vera ma tantx kien ikollha ċans tibqaʼ teżisti, iktar u iktar tipprogressa. Dan ġie rikonoxxut fl-​ewwel seklu minn Gamaljel, Fariżew stmat u għalliem tal-​Liġi. Meta s-​Sinedriju Lhudi ried jeħles mill-​appostli, hu wissa lil dik il-​qorti: “Ħallukom minn dawn in-​nies u itilquhom. Għax dan il-​ħsieb jew ħidma tagħhom, jekk hi ġejja mill-​bnedmin, għad tisfaʼ fix-​xejn; iżda jekk hi ġejja minn Alla, ma jseħħilkomx teqirduhom.”—Atti 5:38, 39.

¹⁹ Is-​suċċess taʼ l-​attività taʼ l-​ippridkar, kemm fl-​ewwel seklu u kemm illum, ta prova li dan m’huwiex xogħol mingħand il-​bnedmin, imma mingħand Alla. L-​artiklu li jmiss se jiddiskuti xi ftit miċ-​ċirkustanzi u l-​iżviluppi eċċitanti li għenu biex jagħmlu dan ix-​xogħol tant taʼ suċċess fuq skala daqstant kbira.

Qatt Iċċedi!

20. Min iwiżinna hekk kif nippridkaw l-​aħbar tajba?

²⁰ Għalkemm qed ngħixu fi “żmien iebes,” nistgħu nkunu żguri li Jehovah qed jikkontrolla bis-​sħiħ is-​sitwazzjoni. Hu qed jappoġġa u jwieżen lill-​poplu tiegħu hekk kif huma  jaħdmu biex ilestu l-​ippridkar taʼ l-​aħbar tajba qabel jasal iż-​żmien maħtur minn Alla biex itemm din is-​sistema t’affarijiet mill-​agħar. (2 Timotju 3:1; Mattew 24:14) Jehovah jistidinna biex inkunu ‘ħaddiema sħab’ miegħu. (1 Korintin 3:9) Aħna żgurati wkoll li Kristu Ġesù qiegħed magħna f’dan ix-​xogħol u li nistgħu nistrieħu fuq appoġġ u direzzjoni anġeliċi.—Mattew 28:20; Apokalissi 14:6.

21. Liema konvinzjoni m’għandna qatt inċedu?

²¹ Peress li Noè u l-​familja tiegħu eżerċitaw fidi fil-​wegħdi taʼ Jehovah, dawn ġew salvati mill-​ilmijiet tad-​dilluvju. Dawk li jeżerċitaw fidi simili llum se jiġu salvati mit-​“taħbit il-​kbir” li ġej. (Apokalissi 7:14) Qed ngħixu fi żmien verament eċċitanti. Ġrajjiet taʼ importanza kbira se jseħħu dalwaqt! Dalwaqt, Alla se jaġixxi biex iġib smewwiet ġodda glorjużi u art ġdida li fiha tgħammar il-​ġustizzja. (2 Pietru 3:13) Qatt u qatt m’għandek iċċedi l-​konvinzjoni tiegħek li kulma jgħid Alla, hu kapaċi jagħmlu wkoll.—Rumani 4:21.

Punti biex Tiftakarhom

◻ Jehovah għala ma jikkontrollax id-​dettalji kollha taʼ l-​attività umana?

◻ L-​abbiltà taʼ Jehovah li jwettaq l-​iskop tiegħu kif kienet evidenti fil-​mod kif ittratta maʼ Iżrael?

◻ L-​abbiltà taʼ Jehovah li jara l-​futur kif intweriet fi żmien Noè?

◻ Liema fiduċja jistaʼ jkollna fil-​wegħdi t’Alla?

[Mistoqsijiet taʼ Studju]