Tħallix il-Korla Tfixklek
Tħallix il-Korla Tfixklek
“ĦU NIFS fil-fond!” “Għodd sa l-għaxra!” “Igdem ilsienek!” Huma dawn il-frażijiet familjari għalik? Forsi tgħidhom f’qalbek biex tikkalma lilek innifsek meta tħossok aġitat. Xi nies, biex jevitaw xi dagħdigħa taʼ korla, imorru passiġġata. Dawn huma modi sempliċi biex trażżan il-korla u żżomm relazzjoni m’oħrajn.
Iżda, fi snin reċenti, parir konfliġġenti minn professjonisti dwar jekk il-korla għandhiex tiġi kontrollata jew imrażżna ħawwad lil ħafna nies. Per eżempju, xi psikoloġi avanzaw it-teorija li għandek tisfoga l-korla tiegħek, “jekk dan iġagħlek tħossok aħjar.” Oħrajn iwissu li jekk wieħed spiss jinfexx f’dagħdigħa taʼ korla dan ikun “taħbira iktar qawwija taʼ mewta prematura iktar milli [huma] riskjużi fatturi oħrajn bħat-tipjip, pressjoni għolja tad-demm, u kolesterol għoli.” Il-Kelma t’Alla tistqarr fi kliem ċar: “Ħallik mill-korla u la tirrabjax; tinkedd xejn, għax deni jiswielek.” (Salm 37:8) Il-Bibbja għala tagħti parir speċifiku bħal dan?
Emozzjonijiet mhux kontrollati jwasslu għal għemejjel mhux kontrollati. Dan sar evidenti kmieni ħafna fl-istorja tal-bniedem. Naqraw: “Kajjin għalhekk saħan sewwa u wiċċu tqarras.” Dan fejn wasslu? Il-korla tiegħu ħakmitu u kellha kontroll fuqu, tant li webbsitlu qalbu għat-twissija taʼ Jehovah biex jibda jagħmel is-sewwa. Il-korla bla rażan taʼ Kajjin wasslitu għal dnub serju—il-qtil taʼ ħuh.—Ġenesi 4:3-8.
Sawl, l-ewwel sultan taʼ Iżrael, ukoll ħakmitu l-korla meta semaʼ li David beda jirċievi ħafna tifħir. In-nisa bdew “jaqbżu u jwieġbu ’l xulxin: ‘L-eluf tiegħu qatel Sawl; u David l-għaxriet taʼ l-eluf tiegħu.’ Dan deher ikrah f’għajnejn Sawl, u saħan bis-sħiħ.” Il-korla tant iddominat il-ħsieb taʼ Sawl li wasslitu biex jagħmel diversi attentati taʼ qtil fuq David. Avolja David ipprova jagħmel ħbieb miegħu, Sawl ma kienx lest li jirrikonċilja u jagħmel paċi. Fl-aħħar mill-aħħar, hu tilef il-favur taʼ Jehovah kompletament.—1 Samwel 18:6-11; 19:9, 10; 24:1-21; Proverbji 6:34, 35.
B’mod inevitabbli, meta xi ħadd iċedi għall-korla mhux kontrollata, dan jgħid u jagħmel affarijiet li jweġġgħu lil kulmin ikun involut. (Proverbji 29:22) Kajjin u Sawl inkorlaw, għaliex kull wieħed minnhom, bil-mod tiegħu, kien għajjur u invidjuż. Madankollu, reazzjonijiet taʼ korla jistgħu jirriżultaw minħabba diversi raġunijiet. Xi kritika mhux ġustifikata, insult, nuqqas taʼ qbil, jew trattament inġust jistgħu jkunu x-xrara li tqabbad dagħdigħa.
L-eżempji taʼ Kajjin u Sawl jissuġġerixxu nuqqas serju li kellhom it-tnejn li huma. L-offerta taʼ Kajjin milli jidher naqqset il-motivazzjoni tal-fidi. (Lhud 11:4) In-nuqqas taʼ Sawl li jobdi l-kmandi preċiżi taʼ Jehovah u l-attentati tiegħu ħalli wara jiġġustifika lilu nnifsu wassluh biex jitlef il-favur u l-ispirtu t’Alla. B’mod ċar, iż-żewġt irġiel kisru r-relazzjoni tagħhom maʼ Jehovah.
Qabbel dawn id-dispożizzjonijiet maʼ dik taʼ David, li kellu raġun jinkorla minħabba t-trattament li esperjenza minn Sawl. David ikkontrolla l-ispirtu tiegħu. Għala? Hu qal: “Iħarisni l-Mulej! Ma jkun qatt li nagħmel 1 Samwel 24:6, 15, NW].
dan lil sidi, il-midluk tal-Mulej.” David kellu r-relazzjoni tiegħu maʼ Jehovah ċara f’moħħu, u din effettwat kif kien jittratta maʼ Sawl. B’umiltà, hu ħalla l-affarijiet f’idejn Jehovah.—1 Samwel 24:7, 16 [Tabilħaqq, l-implikazzjonijiet taʼ korla mhux kontrollata huma serji. L-appostlu Pawlu wissa: “Tinkurlaw? Imma tidinbux.” (Efesin 4:26) Waqt li korla ġustifikata għandha postha, dejjem hemm il-periklu li l-korla tistaʼ ssir tfixkil għalina. Mela, mhux taʼ b’xejn li aħna niffaċċjaw l-isfida li nikkontrollaw il-korla tagħna. Dan kif nistgħu nagħmluh?
L-ewwel hu billi tiżviluppa relazzjoni b’saħħitha maʼ Jehovah. Hu jinkuraġġik biex tiftaħ qalbek u moħħok miegħu. Għidlu l-ħsibijiet u l-interessi tiegħek, u staqsih għal qalb kalma biex trażżan il-korla. (Proverbji 14:30) Kun żgur li “għajnejn il-Mulej huma fuq il-ġusti u widnejh miftuħa għat-talb tagħhom.”—1 Pietru 3:12.
It-talb jistaʼ jifformak u jiggwidak. B’liema mod? Jistaʼ jkollu effett profond fuq kif int tittratta m’oħrajn. Ftakar kif Jehovah ttratta miegħek. Bħalma tgħid l-Iskrittura, Jehovah “ma mexiex magħna skond ma ħaqqhom ħtijietna.” (Salm 103:10) Spirtu taʼ maħfra huwa vitali sabiex ‘ma jegħlbekx ix-Xitan.’ (2 Korintin 2:10, 11) Barra minn hekk, it-talb jiswa biex jiftaħlek qalbek għall-gwida taʼ l-ispirtu qaddis, li jistaʼ jbiddel għalkollox il-modi stabbiliti fis-sod f’ħajjitna. Jehovah b’ferħ jagħti “sliem li jgħaddi kull ma l-moħħ jistaʼ jifhem,” li jistaʼ jeħilsek mill-qabda soda tal-korla.—Filippin 4:7.
Madankollu, it-talb irid ikun akkumpanjat minn eżami regulari taʼ l-Iskrittura sabiex inkomplu ‘nfittxu x’inhi r-rieda tal-Mulej.’ (Efesin 5:17; Ġakbu 3:17) Jekk int stess issibha diffiċli biex tikkontrolla l-korla tiegħek, stinka biex issir taf x’inhu l-ħsieb taʼ Jehovah fuq dan is-suġġett. Irrevedi skritturi relatati speċifikament dwar kif għandek tikkontrolla l-korla.
L-appostlu Pawlu joffri din it-tfakkira importanti: “Ħa nagħmlu l-ġid maʼ kulħadd, l-iktar maʼ qrabatna fil-fidi.” (Galatin 6:10) Iffoka l-ħsibijiet u l-għemejjel tiegħek f’li tagħmel il-ġid lil oħrajn. Attività bnina u pożittiva bħal din se tinkuraġġixxi l-empatija u l-fiduċja u se ttaffi n-nuqqas taʼ ftehim li jistaʼ faċilment jirriżulta f’korla.
Is-salmista qal: “Żomm sħiħ il-mixi tiegħi skond il-wegħda tiegħek, u ebda deni ma jaħkem fuqi. Sliem bil-kotra għal min iħobb il-liġi tiegħek; ma hemm ebda tfixkil għalihom.” (Salm 119:133, 165) Dan jistaʼ jgħodd għalik ukoll.
[Kaxxa/Stampa f’paġna 9]
PASSI BIEX TIKKONTROLLA L-KORLA
□ Itlob lil Jehovah.—Salm 145:18.
□ Eżamina l-Iskrittura kuljum. —Salm 119:133, 165.
□ Żomm ruħek medhi f’attivitajiet siewja.—Galatin 6:9, 10.