Ix-​xemx qed tgħib bil-​mod il-​mod minn fuq il-​belt taʼ Naħor, fil-​Lvant Nofsani. Raġel Sirjan jismu Eligħeżer jasal b’sarbut t’għaxar iġmla ħdejn bir li jinsab barra l-​belt. Għalkemm bla dubju kien għajjien u mejjet bil-​għatx, Eligħeżer kien jimpurtah iktar mill-​bżonnijiet t’oħrajn. Hu ġie minn art oħra biex isib mara għal iben sidu. Iktar minn hekk, jeħtieġlu jsib lil din il-​mara minn fost il-​qraba taʼ sidu. Kif se jirnexxilu jwettaq din il-​biċċa xogħol diffiċli?

ELIGĦEŻER jemmen fil-​qawwa tat-​talb. B’fidi taʼ l-​għaġeb, bħal dik taʼ tifel ċkejken, hu jlissen din it-​talba umli: “Mulej, Alla taʼ sidi Abraham, agħtini r-​riżq illum, nitolbok, u uri t-​tjieba maʼ sidi Abraham. Hawn jien wieqaf ħdejn l-​għajn taʼ l-​ilma u l-​bniet tan-​nies tal-​belt ħerġin jimlew l-​ilma. Agħmel li ż-​żagħżugħa li ngħidilha: ‘Niżżel il-​qolla tiegħek biex nixrob,’ u tgħidli: ‘Ixrob int, u jien nisqi l-​iġmla tiegħek ukoll,’ tkun hi li int tkun għażilt għall-​qaddej tiegħek Iżakk. Minn dan inkun naf li int urejt it-​tjieba maʼ sidi.”—Ġenesi 24:​12-14.

Il-fiduċja taʼ Eligħeżer fil-​qawwa tat-​talb m’hijiex għalxejn. Oħroġ il-​għaġeb, proprju l-​ewwel mara li tiġi ħdejn il-​bir tkun in-​neputija taʼ ħu Abraham! Din jisimha Rebekka, u hi tfajla moralment nadifa, u sabiħa. Hi mhux talli tagħti x’jixrob lil Eligħeżer, imma talli b’qalb tajba toffri li tisqi lill-​iġmla kollha tiegħu. Iktar tard, wara li ddiskutiet il-​kwistjoni mal-​familja tagħha, Rebekka minn jeddha taċċetta li tmur lura maʼ Eligħeżer f’art ’il bogħod biex issir il-​mara taʼ iben Abraham, Iżakk. Xi tweġiba impressjonanti u ċara għat-​talba taʼ Eligħeżer, lura fi żmien meta Alla xi drabi kien jintervieni mirakolożament f’dak li kien jiġri!

Nistgħu nitgħallmu ħafna mit-​talba taʼ Eligħeżer. Din uriet kemm spikkaw il-​fidi, l-​umiltà, u t-​tħassib mhux egoist għall-​bżonnijiet t’oħrajn li hu kien juri. It-​talba taʼ Eligħeżer uriet ukoll is-​sottomissjoni tiegħu għall-​mod li bih Jehovah jittratta maʼ l-​umanità. Bla dubju, hu kien konxju tar-​rabta speċjali li Alla kellu m’Abraham, kif ukoll tal-​wegħda Tiegħu li permezz t’Abraham l-​umanità kollha kellha tgawdi barkiet futuri. (Ġenesi 12:​3, 4 [12:​3, NW]) Kien għalhekk li Eligħeżer beda t-​talba tiegħu bil-​kliem: “Mulej, Alla taʼ sidi Abraham.”

Ġesù Kristu kien id-​dixxendent t’Abraham li kien se jkun il-​mezz li bih titbierek l-​umanità ubbidjenti kollha. (Ġenesi 22:18) Illum, jekk aħna rridu li t-​talb tagħna jinstemaʼ, jeħtieġ li nirrikonoxxu umilment il-​mod li bih Alla jittratta maʼ l-​umanità permezz taʼ Ibnu. Ġesù Kristu qal: “Jekk tibqgħu fija u kliemi jibqaʼ fikom,  itolbu kull ma tridu, u jingħatalkom.”—Ġwann 15:7.

Wieħed mis-​segwaċi taʼ Kristu li esperjenza l-​verità taʼ dan il-​kliem taʼ Ġesù kien l-​appostlu Pawlu. It-​twemmin tiegħu fil-​qawwa tat-​talb ċertament li ma kienx għalxejn. Hu inkuraġġixxa lill-​Kristjani sħabu biex jersqu lejn Alla permezz tat-​talb u jgħidulu bl-​ansjetajiet kollha tagħhom, waqt li xehed: “Għal kollox niflaħ bis-​saħħa taʼ dak li jqawwini.” (Filippin 4:​6, 7, 13) Ifisser dan li t-​talbiet kollha li Pawlu ressaq quddiem Alla ġew milqugħa? Ejja naraw.

Mhux it-​Talbiet Kollha Jiġu Milqugħa

Matul il-​ministeru tiegħu li wettaq mingħajr egoiżmu, Pawlu kien ibati minn xi ħaġa li hu ddeskrivieha bħala ‘xewka f’ġismu.’ (2 Korintin 12:7) Dan setaʼ kien inkwiet mentali u emozzjonali minħabba wħud li jopponu u “aħwa foloz.” (2 Korintin 11:26; Galatin 2:4) Jew inkella setaʼ kien qed iħossu skomdu fiżikament minħabba difett kroniku f’għajnejh. (Galatin 4:15) Kien x’kien il-​każ, din ix-​‘xewka f’ġismu’ kellha effett li jdgħajjef fuq Pawlu. “Tliet darbiet tlabt il-​Mulej biex hi titbiegħed minni,” kiteb hu. Madankollu, it-​talba taʼ Pawlu ma ġietx mismugħa. Ġie spjegat lil Pawlu li l-​benefiċċji spiritwali li kien diġà rċieva mingħand Alla, bħalma hi l-​qawwa biex ikun jiflaħ jissaporti l-​provi, kienu biżżejjed. Barra minn hekk, Alla qal: “Il-​qawwa tiegħi tidher fl-​aqwa tagħha fejn hemm id-​dgħajjef.”—2 Korintin 12:​8, 9.

X’nitgħallmu mill-​eżempji taʼ Eligħeżer u taʼ Pawlu? Alla Jehovah tassew jismaʼ t-​talb taʼ dawk li b’umiltà jfittxu li jaqduh. Imma dan ma jfissirx li hu dejjem jilqaʼ t-​talbiet tagħhom għaliex Alla jistaʼ jara l-​affarijiet iktar fil-​bogħod. Hu jaf iktar minna x’inhu l-​aħjar għalina. Iktar importanti minn hekk, hu dejjem jaġixxi fi qbil maʼ l-​iskop mistqarr tiegħu kif imniżżel fil-​Bibbja.

Żmien taʼ Fejqan Spiritwali

Alla jwiegħed li se jfejjaq lill-​umanità mill-​mard fiżiku, mentali, u emozzjonali kollu matul ir-​Renju t’Elf Sena meta Ibnu se jkun qed jaħkem għal fuq l-​art. (Apokalissi 20:​1-3; 21:​3-5) Kristjani sinċieri jistennewh bil-​ħerqa dan il-​futur imwiegħed, b’fidi sħiħa li Alla għandu l-​qawwa li jagħmlu realtà. Waqt li ma jistennewx li fejqan mirakoluż bħal dan iseħħ issa, huma jitolbu lil Alla għall-​faraġ u s-​saħħa biex ikampaw mal-​provi. (Salm 55:23 [55:​22, NW]) Meta jimirdu, huma jistgħu wkoll jitolbu għall-​gwida t’Alla biex jgħinhom jagħżlu l-​aħjar kura medika li jkunu jistgħu jaffordjaw.

Xi reliġjonijiet jinkuraġġixxu lill-​morda biex jitolbu ħalli jitfejqu issa, billi jirreferu għall-​fejqan mirakoluż imwettaq minn Ġesù u l-​appostli tiegħu. Imma dawn il-​mirakli qdew skop speċjali. Dawn servew biex jagħtu prova li Ġesù Kristu kien il-​Messija veru u biex juru li l-​favur t’Alla kien ġie trasferit mill-​ġens Lhudi għall-​kongregazzjoni Kristjana ġdida. Lura f’dak iż-​żmien, kien hemm bżonn taʼ doni mirakolużi biex tissaħħaħ il-​fidi tal-​kongregazzjoni Kristjana li kienet għadha kemm ġiet stabbilita. Meta l-​kongregazzjoni ġdida qamet fuq saqajha, biex ngħidu hekk, u saret matura, id-​doni mirakolużi ‘għebu.’—1 Korintin 13:​8, 11.

F’dan iż-​żmien kruċjali, Alla Jehovah qiegħed jidderieġi lill-​adoraturi tiegħu fix-​xogħol iktar importanti taʼ fejqan spiritwali. Waqt li għad għandhom iċ-​ċans, huwa urġenti li n-​nies iwieġbu għal dan l-​appell: “Fittxu l-​Mulej sakemm tistgħu ssibuh, sejjħulu sakemm hu fil-​qrib! Ħa jħalli triqtu l-​midneb, u l-​bniedem il-​ħażin fehmietu; ħa jerġaʼ lura għand il-​Mulej u jħenn għalih, għand Alla tagħna għax hu jaħfer ħafna.”—Isaija 55:​6, 7.

Il-fejqan spiritwali taʼ midinbin niedma qed jitwettaq permezz taʼ l-​ippridkar taʼ l-​aħbar tajba tas-​Saltna t’Alla. (Mattew 24:14) Billi jagħti l-​qawwa lill-​qaddejja tiegħu biex iwettqu dan ix-​xogħol li jsalva l-​ħajjiet, Alla Jehovah qed jgħin lil miljuni taʼ nies mill-​ġnus kollha biex jindmu minn dnubiethom u jaslu biex ikollhom relazzjoni favorevoli miegħu qabel ma jasal it-​tmiem taʼ din is-​sistema mill-​agħar. It-​talb taʼ dawk kollha li jitolbu b’sinċerità għal fejqan spiritwali bħal dan u taʼ dawk kollha li jitolbu għall-​għajnuna biex iwettqu dan ix-​xogħol taʼ fejqan qiegħed tabilħaqq jiġi mwieġeb.

[Sors tal-​istampa f’paġna 3]

Eligħeżer u Rebekka/The Doré Bible Illustrations/Dover Publications