“Għall-​bnedmin m’hemmx aħjar milli jkunu ferħana u jgawdu ġidhom f’ħajjithom. Għax li wieħed jiekol u jixrob u jduq mill-​frott taʼ xogħlu, dan ukoll hu don taʼ Alla.”—KOĦÈLET 3:​12, 13.

1. Għala nistgħu nħarsu lejn il-​futur b’ottimiżmu?

 ĦAFNA nies jaħsbu li Alla li Jistaʼ Kollox hu aħrax u sever. Madankollu, is-​silta t’hawn fuq hija verità li ssibha fil-​Kelma mnebbħa tiegħu. Din taqbel mal-​fatt li hu Alla hieni u li poġġa lill-​ewwel ġenituri tagħna f’ġenna taʼ l-​art. (1 Timotju 1:11; Ġenesi 2:​7-9) Meta nfittxu dehen dwar il-​futur li Alla jwiegħed għall-​poplu tiegħu, m’għandniex niskantaw jekk nitgħallmu dwar kundizzjonijiet li se jġibulna tgawdija dejjiema.

2. Liema huma xi affarijiet li int tħares ’il quddiem lejhom?

² Fl-artiklu taʼ qabel, eżaminajna tlieta mill-​erbaʼ postijiet fil-​Bibbja fejn din tbassar “smewwiet ġodda u art ġdida.” (Isaija 65:17) Waħda minn dawn it-​tbassiriet taʼ min joqgħod fuqhom insibuha f’Apokalissi 21:1. Il-​versi taʼ wara jitkellmu dwar iż-​żmien meta Alla li Jistaʼ Kollox se jbiddel drastikament il-​kundizzjonijiet taʼ fuq l-​art għall-​aħjar. Hu se jixxotta d-​dmugħ kaġunat min-​niket. In-​nies qatt iżjed ma se jmutu bix-​xjuħija, bil-​mard, jew bid-​diżgrazzji. In-​niket, l-​għajat, u l-​uġigħ se jispiċċaw. Xi prospett meraviljuż! Imma kif nistgħu nkunu żguri li dan se jseħħ, u dan il-​prospett x’impatt jistaʼ jkollu fuqna minn issa stess?

 Raġunijiet għal Fiduċja

3. Għala nistgħu nafdaw fil-​wegħdi tal-​Bibbja dwar il-​futur?

³ Innota kif jissokta Apokalissi 21:5. Jikkwota lil Alla, bil-​qegħda fuq it-​tron tiegħu fis-​sema, bħala li qed jiddikjara: “Ara, se nġedded kollox.” Din il-​wegħda divina hija aħjar minn kwalunkwe dikjarazzjoni nazzjonali taʼ indipendenza, kwalunkwe stqarrija moderna taʼ drittijiet, jew kwalunkwe ambizzjoni umana għall-​futur. Din hija dikjarazzjoni assolutament taʼ min joqgħod fuqha mingħand Dak li l-​Bibbja tgħid li “ma jigdibx.” (Titu 1:2) Bir-​raġun forsi tħoss li nistgħu nieqfu hawn u noqogħdu sempliċement nitpaxxew b’dan il-​prospett mill-​isbaħ, u nafdaw f’Alla. Imma m’hemmx għalfejn nieqfu. Hemm ħafna iżjed x’nitgħallmu dwar il-​futur tagħna.

4, 5. Liema profeziji fil-​Bibbja li diġà kkunsidrajna jistgħu jżidu l-​fiduċja tagħna f’dak li ġej?

⁴ Irrifletti dwar dak li stabbilixxa l-​artiklu taʼ qabel inkwantu għall-​wegħdi tal-​Bibbja dwar smewwiet ġodda u art ġdida. Isaija bassar sistema ġdida bħal din, u l-​profezija tiegħu kellha twettiq wieħed meta l-​Lhud irritornaw lejn art twelidhom u stabbilew mill-​ġdid il-​qima vera. (Esdra 1:​1-3; 2:​1, 2; 3:​12, 13) Madankollu, dan biss riedet tindika l-​profezija taʼ Isaija? Ċertament li le! L-​affarijiet li bassar kellhom jitwettqu b’mod iktar grandjuż fil-​futur imbiegħed. Għala naslu għal din il-​konklużjoni? Minħabba dak li qrajna fit-​2 Pietru 3:13 u Apokalissi 21:​1-5. Dawn is-​siltiet jiġbdulna l-​attenzjoni lejn smewwiet ġodda u art ġdida li l-​Kristjani se jibbenefikaw minnhom fuq skala globali.

⁵ Bħalma nnotajna qabel, il-​Bibbja tuża l-​frażi “smewwiet ġodda u art ġdida” erbaʼ darbiet. Aħna s’issa kkunsidrajna tlieta minnhom u wasalna għal konklużjonijiet inkuraġġanti. Il-​Bibbja tbassar b’enfasi li Alla se jelimina l-​ħażen u l-​affarijiet oħrajn li jikkaġunaw is-​sofferenza u li mbagħad se jkompli jbierek lill-​bnedmin fis-​sistema l-​ġdida li wiegħed.

6. Xi tbassar ir-​rabaʼ profezija li ssemmi “smewwiet ġodda u art ġdida”?

⁶ Ejja neżaminaw issa s-​silta li baqaʼ fejn tidher din l-​espressjoni “smewwiet ġodda u art ġdida,” f’Isaija 66:​22-24: “‘Bħalma jibqgħu quddiemi s-​smewwiet ġodda, u l-​art ġdida li jiena nagħmel,’ jgħid il-​Mulej, ‘hekk jibqaʼ nisilkom u isimkom. U jiġri li minn xahar għal xahar, u minn Sibt għal Sibt, kulħadd jiġi jinxteħet quddiemi,’ jgħid il-​Mulej. ‘U meta joħorġu, jaraw l-​iġsma tan-​nies li xxewwxu kontrija. Id-​dud tagħhom ma jmutx, lanqas jintefa n-​nar tagħhom, u kulħadd jistmellhom.’”

7. Għala għandna nikkonkludu li Isaija 66:​22-24 se jkollu twettiq fiż-​żmien li ġej?

⁷ Din il-​profezija kienet tapplika għal-​Lhud li kienu stabbiliti mill-​ġdid f’arthom, imma kellu jkun hemm twettiq ieħor. Dan bilfors li kellu jseħħ ħafna snin wara li nkitbu t-​tieni ittra taʼ Pietru u l-​ktieb taʼ l-​Apokalissi, ladarba dawn indikaw li kellu jkun hemm ‘sema ġdid u art ġdida’ fil-​futur. Nistgħu nħarsu lejn dan it-​twettiq grandjuż u komplet fis-​sistema l-​ġdida. Ikkunsidra xi wħud mill-​kundizzjonijiet li nistgħu nistennew li se ngawdu.

8, 9. (a) Il-​poplu t’Alla f’liema sens ‘jibqaʼ quddiemu’? (b) X’inhu s-​sinjifikat tal-​profezija li l-​qaddejja taʼ Jehovah se jqimuh “minn xahar għal xahar, u minn Sibt għal Sibt”?

⁸ Apokalissi 21:4 indika li l-​mewt mhix se tkun iżjed. Is-​silta f’kapitlu 66 taʼ Isaija taqbel maʼ dan. Nistgħu naraw minn vers 22 li Jehovah jaf li s-​smewwiet ġodda u l-​art ġdida mhux se jkunu temporanji, taʼ tul taʼ żmien limitat. Barra minn hekk, in-​nies tiegħu se jibqgħu jissaportu; se ‘jibqgħu quddiemu.’ Dak li Alla għamel diġà għall-​poplu magħżul tiegħu jagħtina raġuni biex ikollna fiduċja. Il-​Kristjani veri ffaċċjaw persekuzzjoni ħarxa, u saħansitra saru sforzi fanatiċi biex jeqirduhom. (Ġwann 16:2; Atti 8:1) Madankollu, anki għedewwa b’saħħithom ferm tal-​poplu t’Alla, bħalma kienu l-​Imperatur Ruman Neruni u Adolf Hitler, ma kellhomx il-​ħila jeqirdu lil dawk leali lejn Jehovah, li jġorru ismu.  Alla pproteġieha l-​kongregazzjoni tal-​poplu tiegħu, u nistgħu nkunu ċerti li jistaʼ jibqaʼ jżommha wieqfa għal dejjem.

⁹ B’mod simili, dawk li huma leali lejn Alla bħala parti mill-​art ġdida, is-​soċjetà t’adoraturi veri fid-​dinja l-​ġdida, se jibqgħu weqfin bħala individwi għaliex se jkunu qed jagħtu qima safja lill-​Ħallieq taʼ kollox u kulħadd. Din mhix se tkun qima taʼ kultant u kif ġie ġie. Il-​Liġi t’Alla, provduta lil Iżrael permezz taʼ Mosè, kienet tesiġi ċerti atti taʼ qima kull xahar, kif immarkat mill-​qamar ġdid, u kull ġimgħa, kif immarkata minn jum is-​Sabat. (Levitiku 24:​5-9; Numri 10:10; 28:​9, 10; 2 Kronaki 2:4) Mela Isaija 66:23 jindika qima regulari u kontinwa lil Alla, ġimgħa wara ġimgħa u xahar wara xahar. L-​ateiżmu u l-​ipokresija reliġjuża mhux se jkunu jeżistu f’dak iż-​żmien. “Kulħadd jiġi jinxteħet” quddiem Jehovah.

10. Għala tistaʼ tkun fiduċjuż li d-​dinja l-​ġdida mhux se tkun imħassra mill-​ħżiena għal dejjem?

¹⁰ Isaija 66:24 jiżgurana li l-​paċi u t-​tjieba taʼ l-​art l-​ġdida qatt ma se jkunu fil-​periklu. Nies mill-​agħar mhux se jirvinawha. Ftakar li t-​2 Pietru 3:7 jgħid li għandna quddiemna “jum il-​ġudizzju, li jkun jum it-​telfien tal-​ħżiena.” Dawk li se jiġu fi tmiemhom huma dawk li jiċħdu ’l Alla. Mhux se ssir ħsara lill-​innoċenti, bħalma jiġri spiss fil-​gwerer tal-​bniedem, fejn ikun hemm iktar pajżana li jiġu feruti jew maqtula milli jkun hemm suldati. L-​Imħallef il-​Kbir jiggarantilna li l-​jum tiegħu se jġib il-​qerda tal-​ħżiena.

11. Isaija x’juri li se jkun il-​futur għal dawk li jduru kontra Alla u l-​qima tiegħu?

¹¹ It-twajbin li jibqgħu ħajjin se jaraw li l-​kelma profetika t’Alla hija vera. Vers 24 ibassar li l-​“iġsma tan-​nies li xxewwxu” kontra Jehovah se jkunu prova tal-​ġudizzju tiegħu. Il-​lingwaġġ grafiku wżat minn Isaija jistaʼ jidher pjuttost taʼ tkexkix. Madankollu, dan hu konsistenti maʼ fatt storiku. Barra s-​swar taʼ Ġerusalemm tal-​qedem kien hemm postijiet fejn kien jintrema l-​iskart u fejn, xi drabi, kienu jintefgħu wkoll l-​iġsma taʼ kriminali maqtulin li jkunu ġew ġudikati bħala li ma tixirqilhomx difna diċenti. a Id-​dud u n-​nar jaqbad hemmhekk malajr kienu jeliminaw kemm l-​iskart u kemm lil dawn l-​iġsma. Evidentement, Isaija għamel użu minn dan il-​lingwaġġ figurattiv biex jagħti stampa taʼ kemm hu aħħari l-​ġudizzju taʼ Jehovah fuq dawk li jiksru l-​liġi tiegħu.

 Dak li Wiegħed

12. Isaija liema indikazzjonijiet oħrajn jagħti rigward il-​ħajja fid-​dinja l-​ġdida?

¹² Apokalissi 21:4 jgħidilna dwar xi affarijiet li mhux se jeżistu fis-​sistema ġdida li ġejja. Madankollu, x’se jkun jeżisti f’dak iż-​żmien? Il-​ħajja kif se tkun? Jistaʼ jkollna xi ħjiel taʼ min jorbot fuqu? Iva. Isaija kapitlu 65 jiddeskrivi profetikament il-​kundizzjonijiet li se ngawdu jekk ikollna l-​approvazzjoni taʼ Jehovah biex ngħixu meta hu joħloq, fis-​sens finali, dawn is-​smewwiet ġodda u art ġdida. Dawk li jitbierku b’post dejjiemi fl-​art ġdida mhux se jixjieħu u mbagħad ikollhom imutu. Isaija 65:20 jiżgurana: “Ma jkunx hemm iżjed fiha tarbija li tgħix ftit jiem, lanqas xiħ li ma jimteliex bl-​għomor. Għax iż-​żagħżugħ imut taʼ mitt sena, u taʼ mitt sena jkun il-​midneb meta jieħu l-​kastig.”

13. Isaija 65:20 kif jiżgurana li l-​poplu t’Alla se jgawdi s-​sigurtà?

¹³ Meta dan twettaq għall-​ewwel darba fuq il-​poplu taʼ Isaija, kien ifisser li t-​trabi fil-​pajjiż kienu fis-​sigurtà. Ma kinux ġejjin għedewwa, bħalma għamlu darba l-​Babiloniżi, biex ikaxkru magħhom lit-​trabi tal-​ħalib jew biex jeqirdu rġiel fil-​fjur taʼ ħajjithom. (2 Kronaki 36:​17, 20) Fid-​dinja l-​ġdida li ġejja, in-​nies se jkunu salvi, se jkunu jgħixu fis-​sigurtà, u se jkunu jistgħu jgawdu ħajjithom. Jekk wieħed jagħżel li jirribella kontra Alla, mhux se jitħalla jkompli jgħix. Alla se jneħħih min-​nofs. Xi ngħidu jekk il-​midneb ribelluż ikollu mitt sena? Dan se jmut qisu għadu “żagħżugħ” meta tqabblu mal-​ħajja bla tmiem li jkun tilef.—1 Timotju 1:​19, 20; 2 Timotju 2:​16-19.

14, 15. Fuq il-​bażi taʼ Isaija 65:​21, 22, int tistaʼ tħares ’il quddiem lejn liema attivitajiet taʼ barka?

¹⁴ Minflok ma joqgħod jiddiskuti kif jistaʼ jitneħħa min-​nofs wieħed midneb stinat, Isaija jiddeskrivi l-​kundizzjonijiet t’għajxien li se jkun hemm fid-​dinja l-​ġdida. Ipprova immaġina lilek innifsek f’dik ix-​xena. Forsi l-​ewwel ma jiġuk f’moħħok huma affarijiet li jeffettwawk mill-​qrib. Isaija jittratta dan fil-​versi 21 u 22: “Huma għad jibnu djarhom u jgħammru fihom, iħawwlu d-​dwieli u jieklu frotthom. Ma jibnux biex jgħammar ħaddieħor, u ma jħawwlux biex jiekol ħaddieħor; għax il-​poplu tiegħi jgħix daqs kemm jgħixu s-​siġar, u l-​magħżulin tiegħi jistgħallu xogħol idejhom.”

¹⁵ Jekk għad m’għandekx esperjenza fil-​bini jew qatt m’għamiltha taʼ ġardinar, il-​profezija taʼ Isaija tissuġġerixxi li hemm kors taʼ tagħlim jistenniek. Iżda, tkun lest li titgħallem bl-​għajnuna taʼ mgħallmin kapaċi, forsi ġirien qalbhom tajba li bil-​ferħ lesti li jagħtuk daqqa t’id? Isaija ma jgħidx jekk darek ikollhiex twieqi kbar bla ħġieġ u bil-​persjani, sabiex tkun tistaʼ tgawdi ż-​żiffa tropikali, jew twieqi magħluqin bil-​ħġieġ li minnhom tkun tistaʼ tosserva staġun wara l-​ieħor. Se tiddisinnja  darek b’saqaf imżerżaq biex ma jżommx xita u borra? Jew il-​klima lokali se tiffavorixxi bejt—bħal xi wieħed minn dawk li hemm fil-​Lvant Nofsani—li fuqu tistaʼ tinġabar mal-​familja tiegħek biex tieklu xi ikla tajba u tgħidu xi kelma?—Dewteronomju 22:8; Neħemija 8:16.

16. Għala tistaʼ tistenna li d-​dinja l-​ġdida tibqaʼ tagħti sodisfazzjon għal dejjem?

¹⁶ Huwa iktar importanti għalik li tkun taf li se jkollok ir-​residenza tiegħek stess milli li tkun taf id-​dettalji. Se tkun tiegħek—mhux bħalma jiġri llum fejn forsi tbati biex tibni dar imma mbagħad igawdiha ħaddieħor. Isaija 65:21 jgħid ukoll li int se tħawwel u tiekol mill-​frott taʼ xogħlok. B’mod ċar, dan jiġbor fil-​qosor is-​sitwazzjoni ġenerali. Se jkollok sodisfazzjon profond mill-​isforzi li tagħmel, mill-​frott taʼ ħidmietek. U dan se tkun tistaʼ tagħmlu matul ħajja twila—“daqs kemm jgħixu s-​siġar.” Kemm verament jaqbel mad-​deskrizzjoni ‘kollox isir ġdid’!—Salm 92:​13-15 [92:​12-14, NW].

17. Il-​ġenituri liema wegħda se jsibuha inkuraġġanti b’mod speċjali?

¹⁷ Jekk int għandek it-​tfal, dan il-​kliem se jmisslek qalbek: “Ma jitħabtux għal xejn u ma jildux tfal biex jinqerdu ħesrem, għax ikunu nisel imbierek mill-​Mulej, u hekk ukoll uliedhom. Qabel ma jsejjħuli, nwieġeb; nismagħhom, meta għadhom ikellmuni.” (Isaija 65:​23, 24) Ġarrabt int l-​uġigħ li jiġi meta ‘twelled tfal għall-​inkwiet’? M’għandniex għalfejn nagħmlu lista tal-​problemi li jistaʼ jkollhom it-​tfal u li jġibu inkwiet lill-​ġenituri u lil oħrajn. Maʼ dan, ilkoll kemm aħna osservajna ġenituri li tant huma preokkupati bil-​karrieri, bl-​attivitajiet, jew bil-​pjaċiri tagħhom infushom li ftit li xejn ikollhom ħin għal uliedhom. F’kuntrast maʼ dan, Jehovah jiżgurana li hu se jismagħna u jwieġeb għall-​ħtiġijiet tagħna, saħansitra qabel ma nitolbuh aħna għalihom.

18. Għala tistaʼ tistenna li tgawdihom l-​annimali fid-​dinja l-​ġdida?

¹⁸ Waqt li tkun qed taħseb dwar dak li tistaʼ tgawdi fid-​dinja l-​ġdida, ġib quddiem għajnejk ix-​xena li l-​kelma profetika t’Alla tifrex quddiemek: “‘Il-​lupu u l-​ħaruf jirgħu flimkien, l-​iljun, bħall-​barri, jiekol it-​tiben, u t-​trab ikun ikel is-​serp. Ma jagħmlux deni u lanqas ħsara fuq l-​għolja mqaddsa tiegħi kollha,’ jgħid il-​Mulej.” (Isaija 65:25) Xi pitturi pprovaw ipinġuha din ix-​xena, imma din m’hijiex xi sempliċi deskrizzjoni immaġinarja li tistaʼ taraha biss fil-​pittura. Din se tkun realtà. Il-​paċi se tkun tirrenja fost il-​bnedmin u dawn se jkollhom bl-​istess mod paċi maʼ l-​annimali. Ħafna bijoloġi u wħud li jħobbu l-​annimali jqattgħu l-​aħjar żmien taʼ ħajjithom jitgħallmu dwar ftit tipi t’annimali, jew forsi dwar xi  speċi jew xi razza waħda biss. F’kuntrast maʼ dan, aħseb ftit x’se tkun tistaʼ titgħallem meta l-​annimali ma jkunux maħkumin mill-​biżaʼ mill-​bniedem. Imbagħad se tkun tistaʼ anki tersaq qrib l-​għasafar u l-​ħlejjaq ċkejknin li jabitaw fil-​foresti jew fil-​ġungla—iva, tosservahom, titgħallem minnhom, u tgawdihom. (Ġob 12:​7-9) U dan se tkun tistaʼ tagħmlu fis-​sigurtà, mingħajr periklu, la mill-​bnedmin u lanqas mill-​annimali. Jehovah jgħid: “Ma jagħmlux deni u lanqas ħsara fuq l-​għolja mqaddsa tiegħi kollha.” X’bidla minn dak li naraw u nesperjenzaw illum se tkun din!

19, 20. In-​nies t’Alla għala huma differenti ħafna mill-​biċċa l-​kbira tan-​nies illum?

¹⁹ Bħalma ssemma qabel, il-​bnedmin ma jistgħux ibassru l-​futur b’eżattezza, minkejja li kullimkien hemm ansjetà kbira dwar il-​millennju l-​ġdid. Dan lil ħafna jħallihom frustrati, konfużi, jew iddisprati. Peter Emberley, direttur f’università Kanadiża, kiteb: “Ħafna [adulti] qegħdin finalment iħabbtu wiċċhom maʼ mistoqsijiet bażiċi dwar l-​eżistenza. Min jien? Għalxiex qiegħed verament nistinka? X’se nħallilha lill-​ġenerazzjoni taʼ warajja? Dawk taʼ mezz’età qegħdin jissieltu biex jiksbu l-​ordni u s-​sinjifikat f’ħajjithom.”

²⁰ Tistaʼ tifhem għala ħafna nies iħossuhom hekk. Għandhom mnejn ifittxu li jgawdu l-​ħajja permezz taʼ passatempi jew għamliet eċċitanti taʼ rikreazzjoni. Madankollu, ma jafux x’ġej fil-​futur, u għalhekk ħajjithom forsi ma fihiex sinjifikat, ordni, jew tifsir veru. Issa qabbel dan mal-​ħarsa tiegħek, meta tqis dak li kkunsidrajna flimkien. Int taf li fis-​smewwiet ġodda u l-​art ġdida mwegħdin minn Jehovah se nkunu nistgħu nħarsu madwarna u ngħidu minn qiegħ qalbna, ‘Verament, Alla għamel kollox ġdid!’ Kemm se nieħdu gost b’dan!

21. Liema element komuni nsibu f’Isaija 65:25 u Isaija 11:9?

²¹ M’hijiex prużunzjoni li timmaġina l-​ħajja fid-​dinja l-​ġdida t’Alla. Hu jistidinna, saħansitra jħeġġiġna, biex inqimuh bil-​verità issa u biex nikkwalifikaw ħalli ngħixu meta ‘ma jagħmlux deni u lanqas ħsara fuq l-​għolja mqaddsa tiegħu kollha.’ (Isaija 65:25) Iżda, kont taf li iktar kmieni Isaija għamel kumment simili u li inkluda fattur li huwa kruċjali għalina biex verament ingawdu d-​dinja l-​ġdida? Isaija 11:9 jgħid: “Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.”

22. Il-​fatt li kkunsidrajna erbaʼ profeziji mill-​Bibbja għandu jsaħħaħ id-​determinazzjoni tagħna biex nagħmlu liema ħaġa?

²² L-“għarfien tal-​Mulej.” Meta Alla jagħmel kollox ġdid, l-​abitanti taʼ l-​art se jkollhom għarfien eżatt dwaru u dwar ir-​rieda tiegħu. Dan se jinvolvi ferm iktar milli nitgħallmu mill-​annimali. Hemm involuta l-​Kelma mnebbħa tiegħu. Per eżempju, irrifletti ftit dwar kemm tgħallimna billi eżaminajna biss erbaʼ profeziji li jsemmu “smewwiet ġodda u art ġdida.” (Isaija 65:17; 66:22; 2 Pietru 3:13; Apokalissi 21:1) Għandek raġuni tajba għalxiex taqra l-​Bibbja kuljum. Huwa dan parti mir-​rutina tiegħek? Jekk le, x’aġġustamenti tistaʼ tagħmel sabiex kuljum taqra ftit minn dak li Alla għandu x’jgħidilna? Se ssib li, minbarra li tħares ’il quddiem biex tgawdi d-​dinja l-​ġdida, se tirċievi iktar tgawdija issa stess, bħalma rċieva s-​salmista.—Salm 1:​1, 2.

[Nota taʼ taħt]

Int kif Twieġeb?

• Għala nistgħu nikkonkludu li Isaija 66:​22-24 ibassar dak li għadu ġej fil-​futur?

• B’mod speċjali lejn liema ħaġa tħares ’il quddiem fost l-​affarijiet li ssemmew fil-​profeziji f’Isaija 66:​22-24 u Isaija 65:​20-25?

• Liema raġunijiet għandek biex tkun fiduċjuż dwar il-​futur?

[Mistoqsijiet taʼ Studju]

[Stampi f’paġna 15]

Isaija, Pietru, u Ġwanni bassru xi fatturi dwar is-​“smewwiet ġodda u art ġdida”