Proklamaturi tas-​Saltna Jirrapportaw

JEHOVAH bierek lil Ġużeppi b’ħafna għerf u dixxerniment. (Atti 7:10) B’riżultat taʼ dan, id-​dehen li wera Ġużeppi tgħidx kemm “għoġbu lill-​Fargħun u l-​qaddejja tiegħu.”​—Ġenesi 41:37.

L-istess illum, Jehovah jagħti lin-​nies tiegħu dehen u dixxerniment hekk kif huma jistudjaw il-​Bibbja. (2 Timotju 3:​16, 17) L-​għerf u d-​dixxerniment jipproduċu frott tajjeb meta huma japplikaw il-​pariri tal-​Bibbja. Il-​kondotta tajba tagħhom taʼ spiss ‘għoġbot lil dawk li josservawha,’ kif juru dawn l-​esperjenzi li ġejjin miż-​Żimbabwe.

• Kien hemm waħda mara li l-​ġirien tagħha kienu Xhieda taʼ Jehovah. Għalkemm din il-​mara ma kellhiex grazzja max-​Xhieda, hi kienet tammira l-​kondotta tagħhom, speċjalment il-​ħajja tal-​familja tagħhom. Hi osservat li dan ir-​raġel u martu kellhom relazzjoni tajba ferm bejniethom, u li t-​tfal tagħhom tgħidx kemm kienu jobduhom. L-​iktar ħaġa li laqtitha kienet kemm ir-​raġel kien iħobb lil martu.

Twemmin komuni f’xi kulturi taʼ l-​Afrika hu li jekk raġel ikun iħobb lil martu, il-​mara bilfors li tkun użat xi maġija biex “timmansah.” Għalhekk, din il-​mara avviċinat lix-​Xhud u staqsietha: “Jekk jogħġbok tistaʼ tagħtini r-​riċetta tal-​maġija li wżajt mar-​raġel tiegħek ħalli anki żewġi jsir iħobbni daqskemm żewġek iħobb lilek?” Ix-​Xhud wieġbet: “Mela le, għada wara nofsinhar inġibhielek.”

L-għada, l-​oħt marret iżżur lill-​ġâra tagħha bir-​riċetta tagħha tal-​“maġija.” Din x’kienet? Kienet il-​Bibbja, flimkien mal-​pubblikazzjoni Għarfien Li Jwassal Għall-​Ħajja Taʼ Dejjem. Wara li kkunsidraw flimkien xi informazzjoni mill-​ktieb Għarfien fuq is-​suġġett “Nibnu Familja li Tonora lil Alla,” l-​oħt qalet lill-​ġâra tagħha: “Din hi l-​‘maġija’ li jien u żewġi nużaw biex ‘nimmansaw’ lil xulxin, u hu għalhekk li nħobbu ħafna lil xulxin.” Inbeda studju tal-​Bibbja, u dik il-​mara malajr għamlet progress u waslet sal-​punt li ssimbolizzat id-​dedikazzjoni tagħha lil Jehovah permezz tal-​magħmudija billi ġiet mgħaddsa kompletament fl-​ilma.

• Żewġ pijunieri speċjali, li ntbagħtu jaqdu f’kongregazzjoni żgħira qrib il-​fruntiera tal-​grigal bejn iż-​Żimbabwe u l-​Możambik, kienu ilhom ma jmorru fil-​ministeru tagħhom minn dar għal dar għal ġimagħtejn sħaħ. Għala? Għaliex in-​nies bdew ġejjin għandhom biex jisimgħu x’kellhom x’jgħidu. Wieħed mill-​pijunieri jirrakkonta dan kif ġara: “Konna qed nivvjaġġaw 15-il kilometru kull ġimgħa biex nikkonduċu studju tal-​Bibbja maʼ persuna interessata. Ma kienx faċli għalina li mmorru f’dawn l-​inħawi. Kien ikollna ngħaddu mit-​tajn, u naqsmu xmajjar li kienu qed ifuru u li kienu jlaħħqulna sa għonqna. Dan kien jinvolvi li nżommu ħwejjiġna u ż-​żraben tagħna bilanċjati sew fuq rasna waqt li naqsmu x-​xmara, u mbagħad meta naslu n-​naħa l-​oħra konna nerġgħu nilbsuhom.

“Il-​ġirien tal-​persuna li konna qed nistudjaw magħha baqgħu impressjonati ferm biż-​żelu tagħna. Fost dawk li osservaw dan kien hemm il-​mexxej taʼ organizzazzjoni reliġjuża lokali. Hu qal lis-​segwaċi tiegħu: ‘Ma tixtiqux tkunu żelużi bħal dawn iż-​żewġt irġiel żgħażagħ li huma Xhieda taʼ Jehovah?’ L-​għada, ħafna mis-​segwaċi tiegħu ġew id-​dar tagħna biex isiru jafu għala konna tant persistenti. Barra minn hekk, fil-​ġimagħtejn taʼ wara, tant ġew nies iżuruna li lanqas biss kellna ħin nippreparaw x’nieklu!”

Wieħed mill-​individwi li mar id-​dar tal-​pijunieri matul dan il-​perijodu taʼ ġimagħtejn kien dak il-​mexxej reliġjuż. Immaġina kemm ferħu dawn il-​pijunieri meta hu aċċetta studju tal-​Bibbja!