Bijografija

KIF RAKKONTAT MINN STANLEY E. REYNOLDS

Twelidt Londra, l-​Ingilterra, fl-​1910. Wara l-​Ewwel Gwerra Dinjija, il-​ġenituri tiegħi marru joqogħdu fir-​raħal ċkejken taʼ Westbury Leigh, ġewwa Wiltshire. Meta kont daqsxejn taʼ ġuvnott, taʼ spiss kont naħseb bejni u bejn ruħi, ‘Min hu Alla?’ Ħadd qatt ma setaʼ jagħtini tweġiba. U qatt ma stajt nifhem għala f’komunità żgħira bħal tagħna kien hemm bżonn taʼ żewġ kappelli u knisja biex in-​nies iqimu lil Alla.

FL-​1935, erbaʼ snin qabel ma bdiet it-​Tieni Gwerra Dinjija, jien u ħija Dick, li kien iżgħar minni, morna bir-​rota sa Weymouth, post li jinsab fuq il-​kosta tan-​nofsinhar taʼ l-​Ingilterra, biex inqattgħu l-​btala tagħna nikkampjaw. Waqt li konna fil-​kamp tagħna nisimgħu x-​xita nieżla, intellgħu u nniżżlu x’se nagħmlu, ġie raġel imdaħħal fiż-​żmien u offrieli tliet kotba bħala għajnuna biex nistudja l-​Bibbja—The Harp of God, Light I, u Light II. Ħadthom kollha, u tgħidx kemm fraħt li kelli xi ħaġa biex naqtaʼ dik il-​monotonija. Dak li kont qed naqra mill-​ewwel beda jaffaxxinani, u lanqas biss kont noħlom li kien se jbiddilli l-​ħajja tiegħi kompletament—u dik taʼ ħija wkoll.

Meta mort lura d-​dar, ommi qaltli li Kate Parsons, li kienet toqgħod fir-​raħal tagħna, kienet tqassam l-​istess tip taʼ letteratura Biblika. Lil din il-​mara kulħadd kien jafha għax, minkejja li kienet imdaħħla fiż-​żmien kienet issuq mutur żgħir biex iżżur lin-​nies imxerrdin ’l hawn u ’l hemm fil-​komunità tagħna. Jien mort għandha, u hi bil-​qalb kollha tatni l-​kotba Creation u Riches kif ukoll letteratura oħra tal-​Watch Tower Society. Qaltli wkoll li kienet waħda mix-​Xhieda taʼ Jehovah.

Wara li qrajt il-​kotba u qabbilthom mal-​Bibbja tiegħi, indunajt li Jehovah hu l-​veru Alla u ridt inqimu. Għalhekk bgħatt ittra lill-​knisja fejn kont immur qabel biex naqtaʼ kull irbit magħha u bdejt nattendi  għal laqgħat biex nistudjaw il-​Bibbja fid-​dar taʼ John u Alice Moody. Dawn kienu joqogħdu f’Westbury, l-​iktar belt qrib taʼ fejn konna noqogħdu aħna. F’dawk il-​laqgħat konna nkunu biss sebaʼ min-​nies. Qabel u wara l-​laqgħat, Kate Parsons kienet iddoqq l-​armonju waqt li aħna konna nkantaw l-​għanjiet tas-​Saltna lkoll flimkien b’entużjażmu kbir!

Is-​Snin tal-​Bidu

Stajt nara li konna qed ngħixu fi żmien tassew importanti, u kelli xewqa kbira li nieħu sehem fix-​xogħol taʼ l-​ippridkar li kien profetizzat f’Mattew 24:14. Għalhekk, qtajt is-​sigaretti, xtrajt briefcase, u għamilt id-​dedikazzjoni tiegħi lill-​Kbir Alla, Jehovah.

F’Awissu taʼ l-​1936, Joseph F. Rutherford, il-​president tal-​Watch Tower Society, kien qed iżur Glasgow, fl-​Iskozja, biex jagħti taħdita dwar is-​suġġett “Armageddon.” Avolja ridt nivvjaġġa xi 600 kilometru biex nasal Glasgow, kont determinat li mmur u nitgħammed f’dik il-​konvenzjoni. Flus ma tantx kelli, u għalhekk ħadt ir-​rota miegħi fuq il-​ferrovija li qbadt biex wasalt Carlisle, belt li tinsab fuq il-​fruntiera taʼ l-​Iskozja. Minn hemmhekk komplejt tielaʼ bir-​rota xi 160 kilometru lejn it-​tramuntana. Il-​biċċa l-​kbira tal-​vjaġġ lura wkoll għamiltu bir-​rota, u għalhekk wasalt id-​dar għajjien mejjet, imma spiritwalment kont b’saħħti iktar minn qabel.

Minn dakinhar ’il quddiem, dejjem kont nuża r-​rota biex immur naqsam it-​twemmin tiegħi man-​nies fl-​irħula li kienu fil-​qrib. Dak iż-​żmien, kull Xhud taʼ Jehovah kellu biljett tat-​testimonjanza li fuqu kien hemm messaġġ skritturali biex jinqara mill-​inkwilini. Konna nużaw ukoll fonografu li jistaʼ jinġarr, biex insemmgħu t-​taħditiet Bibliċi rekordjati li kienu ngħataw mill-​president tas-​Soċjetà. U, m’għandniex xi ngħidu, konna dejjem inġorru basket bir-​rivisti, a li minħabba fih mill-​ewwel kienu jagħrfuna bħala Xhieda taʼ Jehovah.

Ix-​Xogħol taʼ Pijunier fi Żmien il-​Gwerra

Ħija tgħammed fl-​1940. It-​tieni gwerra dinjija kienet bdiet fl-​1939, u t-​tnejn li aħna rajna li kien hemm bżonn urġenti għal predikaturi full-time. Għaldaqstant, tfajna l-​applikazzjoni għax-​xogħol taʼ pijunier. Fraħna ħafna li ġejna assenjati flimkien fid-​dar tal-​pijunieri taʼ Bristol. Hemmhekk ngħaqadna maʼ Edith Poole, Bert Farmer, Tom u Dorothy Bridges, Bernard Houghton, u pijunieri oħrajn li konna nammirawhom ħafna għall-​fidi soda li kellhom.

Ftit wara dan ġie għalina vann żgħir, li fuq il-​ġnub tiegħu kellu miktub b’ittri kbar “XHIEDA TAʼ JEHOVAH.” Ix-​xufier kien Stanley Jones, li iktar tard mar jaqdi bħala missjunarju fiċ-​Ċina u li minħabba l-​attività taʼ l-​ippridkar tiegħu weħel sebaʼ snin ħabs maqful f’ċella għalih waħdu.

 Hekk kif il-​gwerra kompliet tiħrax, rari konna norqdu lejl sħiħ. Fl-​inħawi fejn kien hemm id-​dar tagħna tal-​pijunieri bdew jitwaddbu ħafna bombi, u kellna noqogħdu b’sebaʼ għajnejn il-​ħin kollu li ma mmorrux nirfsu xi mekkaniżmu li jisplodi. Lejla waħda, tlaqna miċ-​ċentru taʼ Bristol wara assemblea mill-​isbaħ li għaliha attendew 200 Xhud, u biex wasalna d-​dar u konna naqra iktar fis-​sigurtà kellna ngħaddu minn xita taʼ xrapnel tal-​bombi tal-​kanuni.

L-għada jien u Dick morna lura l-​belt biex niġbru xi affarijiet li konna ħallejna warajna. Ma stajniex nemmnu lil għajnejna. Bristol kienet diżastru. Fiċ-​ċentru tal-​belt kollox kien imfarrak u maħruq. F’Park Street, fejn kellna s-​Sala tas-​Saltna, ma kienx hemm ħlief gozz terrapien bid-​duħħan ħiereġ minnu. Madankollu, l-​ebda Xhud ma kien ġie maqtul jew ferut. Imnalla konna neħħejna l-​letteratura Biblika mis-​Sala tas-​Saltna u qassamnieha fid-​djar taʼ xi membri tal-​kongregazzjoni. Tgħidx kemm irringrazzjajna lil Jehovah għal dan kollu.

Libertà mhux Mistennija

Fil-​Kongregazzjoni taʼ Bristol, fejn kont naqdi bħala indokratur li jippresiedi, l-​għadd taʼ pubblikaturi Kristjani kien telaʼ għal 64 sakemm jien irċivejt id-​dokumenti biex nidħol fis-​servizz militari. Ħafna Xhieda oħrajn kienu ntbagħtu l-​ħabs minħabba l-​waqfa newtrali tagħhom, u għalhekk stennejt li anki lili kienet se tonqosli l-​libertà li nippriedka, bħalma kien ġralhom huma. Il-​każ tiegħi nstemaʼ fi Tribunal lokali fi Bristol, u deher għalija Ħuna Anthony Buck, li qabel kien jaqdi bħala uffiċjal tal-​ħabs. Dan il-​ħu kien raġel kuraġġuż, ma jaqtax qalbu, u kien jieqaf sod għall-​verità tal-​Bibbja, u minħabba li tkellem tant tajjeb għan-​nom tiegħi, oħroġ il-​għaġeb, ġejt meħlus għalkollox mis-​servizz militari, bil-​kundizzjoni li nkompli fil-​ministeru full-time!

Lanqas stajt nemmen li kelli din il-​libertà, u kont determinat li nużaha biex nippriedka kemm niflaħ. Meta rċivejt telefonata biex immur fl-​uffiċċju tal-​fergħa taʼ Londra biex ikellimni l-​indokratur tal-​fergħa, Albert D. Schroeder, naturalment jien bdejt nhewden x’kien se jiġri. Immaġina x’sorpriża kienet għalija meta ġejt mistieden biex immur Yorkshire ħalli naqdi bħala indokratur li jivvjaġġa, u nżur kongregazzjoni differenti kull ġimgħa biex ngħin u ninkuraġġixxi lill-​aħwa. Veru ħassejt li ma kontx kapaċi biżżejjed għal dan l-​inkarigu, imma ladarba jien kont ġejt meħlus għalkollox mis-​servizz militari ma kien hemm xejn x’iżommni. Għalhekk, aċċettajt id-​direzzjoni li tani Jehovah u mort b’qalbi kollha.

Albert Schroeder introduċieni maʼ l-​aħwa f’assemblea li saret f’Huddersfield, u f’April taʼ l-​1941, bdejt fl-​inkarigu l-​ġdid tiegħi. Kemm kienet esperjenza taʼ ferħ għalija li nsir naf lil dawn l-​aħwa għeżież! L-​imħabba u l-​qalb tajba tagħhom ġagħluni napprezza jerġaʼ iktar li Jehovah għandu nies devoti għalkollox lejh, u li dawn tant iħobbu lil xulxin.—Ġwann 13:35.

Iktar Privileġġi taʼ Servizz

Qatt ma ninsa l-​konvenzjoni nazzjonali taʼ ħamest ijiem li saret fl-​1941 fid-​De Montfort Hall  ġewwa Leicester. Minkejja li l-​ikel kien bir-​razzjon u t-​trasport nazzjonali kien limitat, l-​attendenza baqgħet dejjem tiżdied sakemm il-​Ħadd kien hemm quċċata taʼ 12,000 ruħ—għalkemm f’dak iż-​żmien kien hemm biss ftit iktar minn 11,000 Xhud taʼ Jehovah fil-​pajjiż. Smajna xi taħditiet rekordjati li kienu ngħataw mill-​president tas-​Soċjetà, u ħareġ ktieb ġdid intitolat Children. Dik il-​konvenzjoni ċertament li kienet ġrajja memorabbli fl-​istorja teokratika tan-​nies taʼ Jehovah fil-​Britannja, peress li saret fl-​eqqel tat-​Tieni Gwerra Dinjija.

Ftit wara din il-​konvenzjoni, irċivejt stedina biex immur naqdi flimkien mal-​familja taʼ Betel f’Londra. Hemmhekk kont naħdem fid-​dipartiment fejn jippakkjaw u fid-​dipartiment minfejn jibagħtu l-​letteratura, u iktar tard ħdimt ukoll fl-​uffiċċju, fejn kont inkarigat mill-​affarijiet li kellhom x’jaqsmu mal-​kongregazzjonijiet.

Il-membri tal-​familja Betel kellhom iħabbtu wiċċhom m’attakki mill-​ajru fuq Londra lejl u nhar, kif ukoll maʼ spezzjonijiet spissi mill-​awtoritajiet fuq aħwa responsabbli li kienu jaħdmu hemmhekk. Pryce Hughes, Ewart Chitty, u Frank Platt ilkoll ġew mitfugħin il-​ħabs minħabba l-​waqfa newtrali tagħhom, u wara xi żmien Albert Schroeder ġie deportat lejn l-​Istati Uniti. Minkejja dawn il-​pressjonijiet, xorta baqaʼ jkun hemm min jieħu ħsieb il-​kongregazzjonijiet u x-​xogħol tas-​Saltna.

Privileġġ Ieħor—Gilgħad!

Meta spiċċat il-​gwerra fl-​1945, applikajt biex nieħu taħriġ missjunarju fil-​Watchtower Bible School of Gilead, u ġejt aċċettat biex nattendi t-​tmien klassi fl-​1946. Is-​Soċjetà għamlet arranġamenti biex ftit minna, inkluż Tony Attwood, Stanley Jones, Harold King, Don Rendell, u Stanley Woodburn, jaqbdu l-​vapur minn Fowey, port għas-​sajjieda f’Cornwall. Wieħed mill-​aħwa tal-​lokal kien qatgħalna l-​passaġġ biex nivvjaġġaw fuq vapur żgħir tal-​merkanzija li kien qed iġorr it-​tafal abjad fin. Il-​post li tawna kien żgħir ħafna, u l-​gverta tal-​vapur kienet kważi dejjem miksija bl-​ilma. Tgħidx kemm ħadna r-​ruħ x’ħin fl-​aħħar wasalna fil-​port fejn kellna ninżlu, dak taʼ Filadelfja!

Il-post fejn kienet issir l-​iskola taʼ Gilgħad kien jinsab f’ambjent mill-​isbaħ f’South Lansing, fin-​naħa taʼ fuq taʼ l-​istat taʼ New York, u t-​taħriġ li rċivejt hemmhekk swieli mitqlu deheb. L-​istudenti tal-​klassi tagħna kienu minn 18-il pajjiż differenti​—l-​ewwel darba li s-​Soċjetà rnexxielha ddaħħal daqshekk studenti minn pajjiżi differenti fi klassi waħda​—u lkoll sirna ħbieb sewwa. Veru kont nieħu gost bil-​kumpanija taʼ Kalle Salavaara, il-​ħu mill-​Finlandja li kien fl-​istess kamra miegħi.

Iż-żmien tar, u fl-​aħħar tal-​ħames xhur, il-​president tas-​Soċjetà, Nathan H. Knorr, wasal mill-​kwartieri ġenerali taʼ Brooklyn biex jagħtina d-​diplomi tagħna u jgħidilna fejn kellna naqdu. Dak iż-​żmien, l-​istudenti ma kinux ikunu jafu fejn se jintbagħtu sakemm tasal iċ-​ċerimonja tal-​gradwazzjoni. Lili bagħtuni lura fil-​Betel taʼ Londra biex inkompli x-​xogħol tiegħi hemmhekk.

Lura Londra

Is-​snin taʼ wara l-​gwerra kienu ibsin fil-​Britannja. L-​ikel u ħafna bżonnijiet oħrajn, inkluż il-​karta, baqgħu bir-​razzjon. Imma dejjem għaddejna, u l-​interessi tas-​Saltna taʼ Jehovah komplew javanzaw ’il quddiem. Barra milli kont naħdem f’Betel, kont naqdi wkoll fl-​assembleat distrettwali u tas-​circuit u kont inżur il-​kongregazzjonijiet, inkluż xi kongregazzjonijiet fl-​Irlanda. Kelli wkoll il-​privileġġ li niltaqaʼ maʼ Erich Frost u aħwa oħrajn irġiel u nisa mill-​Ewropa, li mingħandhom sirt naf xi ħaġa dwar l-​integrità taʼ Xhieda sħabna li kienu ffaċċjaw is-​sofferenzi ħorox fil-​kampijiet tal-​konċentrament Nazisti. Il-​privileġġ taʼ servizz f’Betel kien tassew barka.

Lil Joan Webb kont ili nafha għaxar snin—hi kienet taqdi bħala pijuniera speċjali f’Watford, belt ftit ’il bogħod minn Londra. Aħna żżewwiġna fl-​1952. It-​tnejn li aħna ridna nkomplu fis-​servizz full-time u għalhekk, tgħidx kemm ħadna gost meta, wara li kont ħallejt Betel, ġejt maħtur bħala indokratur tas-​circuit. L-​ewwel circuit li kellna kien jinkludi kongregazzjonijiet fuq il-​kosta tan-​nofsinhar taʼ l-​Ingilterra, f’Sussex u Hampshire. Ix-​xogħol tas-​circuit xejn ma kien faċli dak iż-​żmien. Fil-​biċċa l-​kbira konna nivvjaġġaw bil-​karozza tal-​linja, bir-​rota, jew bil-​mixi. Ħafna kongregazzjonijiet kellhom territorji rurali kbar immens, li taʼ spiss kienu diffiċli biex jintlaħqu, imma n-​numru taʼ Xhieda xorta waħda kompla jiżdied dejjem iktar.

Fil-​Belt taʼ New York fl-​1958

Fl-​1957 irċivejt stedina oħra minn Betel: ‘Fl-​1958 se ssir assemblea internazzjonali fil-​belt taʼ New York, fil-​Yankee Stadium u l-​Polo Grounds. Tixtieq  tiġi fl-​uffiċċju ħalli tgħin biex isiru l-​arranġamenti għall-​ivvjaġġar?’ Jien u Joan malajr sibna ruħna nieħdu ħsieb l-​applikazzjonijiet taʼ l-​aħwa biex jivvjaġġaw bl-​ajruplani u l-​vapuri mikrijin mis-​Soċjetà. Din kienet il-​famuża Assemblea Internazzjonali Rieda Divina, li għaliha attendiet udjenza enormi taʼ 253,922 ruħ. F’din il-​konvenzjoni kien hemm 7,136 li ssimbolizzaw id-​dedikazzjoni tagħhom lil Jehovah permezz tat-​tgħaddis fl-​ilma—ħafna iktar mid-​doppju tan-​numru li tgħammdu f’dik l-​okkażjoni storika taʼ Pentekoste tas-​sena 33 E.K., kif imniżżel fil-​Bibbja.—Atti 2:41.

Jien u Joan qatt ma ninsew il-​qalb tajba li wera magħna Ħuna Knorr meta stidinna personalment biex nattendu l-​assemblea ħalli ngħinu biex nieħdu ħsieb id-​delegati li kienu se jaslu fil-​belt taʼ New York minn 123 pajjiż. Din kienet esperjenza taʼ ferħ u sodisfazzjon għalina t-​tnejn.

Il-​Barkiet li Ġabilna s-​Servizz Full-time

Meta rġajna lura, komplejna fix-​xogħol taʼ l-​ivvjaġġar sakemm inqalgħulna xi problemi taʼ saħħa. Joan kellha tidħol l-​isptar, u jien tatni puplesija ħafifa. Għalhekk, minflok fix-​xogħol taʼ l-​ivvjaġġar bdejna naqdu bħala pijunieri speċjali, imma iktar tard kellna l-​privileġġ li nerġgħu naqdu għal ftit żmien fix-​xogħol tas-​circuit. Maż-​żmien, erġajna lura fi Bristol fejn bqajna naqdu fis-​servizz full-time. Ħija Dick jgħix ftit ’il bogħod minna mal-​familja tiegħu, u spiss noqogħdu nirrakkontaw minn xiex għaddejna.

Fl-1971 il-​vista tiegħi marret lura minħabba li f’għajnejja żviluppat kundizzjoni (retina distakkata) li l-​ħsara li għamlitli ma titfejjaqx. Minn dakinhar ’l hawn bqajt insibha ferm diffiċli biex naqra, u minħabba f’hekk, għalija l-​cassettes tal-​letteratura Biblika huma provvediment taʼ l-​għaġeb mingħand Jehovah. Jien u Joan għadna nikkonduċu xi studji tal-​Bibbja, u tul is-​snin kellna l-​privileġġ li ngħinu madwar 40 persuna ssir taf il-​verità, inkluż familja taʼ sebgħa.

Meta ddedikajna ħajjitna lil Jehovah iktar minn 60 sena ilu, ix-​xewqa tagħna kienet li nidħlu fis-​servizz full-time u nkomplu fih għal dejjem. Kemm aħna grati li għad għandna s-​saħħa biex naqdu lill-​Kbir Alla Jehovah, għaliex dan hu l-​uniku mod li bih nistgħu nirringrazzjawh għal dak kollu li għamel magħna u għas-​snin taʼ hena li gawdejna!

[Nota taʼ taħt]

[Stampa f’paġna 25]

Quddiem id-​dar tal-​pijunieri fi Bristol maʼ ħija Dick (bil-wieqfa fit-​tarf, fuq in-​naħa tax-​xellug) u xi pijunieri oħrajn

[Stampa f’paġna 25]

Id-​dar tal-​pijunieri fi Bristol fl-​1940

[Stampi on page 26]

Stanley u Joan Reynolds f’jum it-​tieġ tagħhom, fit-​12 taʼ Jannar, 1952, u llum