Int dejjem tistinka biex tagħmel mill-​aħjar li tistaʼ? M’hemmx dubju, meta tagħmel dan jistaʼ jkun taʼ benefiċċju għalik u għal taʼ madwarek f’ħafna modi. Mill-​banda l-​oħra, xi wħud marru fl-​estrem u saru perfezzjonisti. Dan x’jimplika?

SEWWA, tifsira waħda tal-​kelma “perfezzjoniżmu” hi “tendenza li twarrab kwalunkwe ħaġa li m’hijiex perfetta.” Int x’aktarx li ltqajt maʼ nies li għandhom din it-​tendenza. Tistaʼ tara li huma tant jistennew iżżejjed minn oħrajn li dan jistaʼ joħloq ħafna problemi, u jwassal għal nuqqas taʼ sodisfazzjon u skuraġġiment. Il-​biċċa l-​kbira tan-​nies b’moħħhom f’loku jirrikonoxxu li l-​perfezzjoniżmu, fis-​sens taʼ li jistennew iżżejjed u b’mod mhux raġunevoli minn kull aspett fil-​ħajja, m’huwiex taʼ min jixtiequ. Hija xi ħaġa li trid tingħeleb. Madankollu, il-​problema tinqalaʼ meta niġu għall-​attitudni jew it-​tendenza tagħna stess. Forsi nsibuha diffiċli biex nirrikonoxxu li għandna t-​tendenza li nistennew dan it-​tip taʼ perfezzjoni, u għalhekk hija taʼ sfida għalina biex negħlbuha.

Nelson għandu responsabbiltà kbira kif ukoll ħafna problemi x’isolvi. Hu janalizza regolarment l-​istatistiċi, u għalih, l-​iktar ħaġa importanti hi kemm itellaʼ xogħol. Taʼ spiss il-​perfezzjoniżmu jkun jidher neċessarju biex negozju jkollu suċċess f’suq kompetittiv. Għalkemm xi wħud għandhom mnejn japprezzaw l-​effiċjenza taʼ Nelson, il-​perfezzjoniżmu tiegħu joħloqlu problemi fiżiċi, bħal uġigħ taʼ ras u tensjoni. Taħseb li għandek l-​istess karatteristiċi bħal taʼ Nelson?

Iż-żgħażagħ ukoll jiġu effettwati mill-​perfezzjoniżmu. Meta kienet għadha żgħira Rita, minn Rio de Janeiro, kienet tieħu pjaċir tmur l-​iskola. Hi kienet tipprova ma tidhirx ambizzjuża, iżda meta ma kinitx iġġib l-​ogħla marki kienet tħossha diżappuntata għall-​aħħar. Rita tgħid: “Sa minn tfuliti, kont inqabbel lili nnifsi m’oħrajn li kellhom ħafna ħin, waqt li jien dejjem kont inħossni taħt pressjoni u nagħmel kollox bil-​ġenn. Qatt ma ħassejt li kelli ħin għall-​mistrieħ għax dejjem kien ikolli xi ħaġa x’nagħmel.”

 Meta kienet għadha daqsxejn taʼ tifla, Maria kienet tirrabja meta ma kienx jirnexxilha tpinġi tajjeb bħall-​oħrajn. Iżjed minn hekk, meta kienet qed timmira l-​perfezzjoni artistika fil-​mużika, taʼ spiss kienet taqbadha tensjoni u toqgħod tinkwieta minflok ma kienet tieħu pjaċir iddoqq u tkanta. Tânia, tifla Brażiljana oħra, ipprovat tkun għaqlija u tevita l-​kompetizzjoni. Madankollu, hi tammetti li xorta waħda kienet tpoġġi ċerti livelli għoljin iżżejjed għaliha nfisha, kemm fl-​iskola kif ukoll fid-​dar. Hi kienet tħoss li sakemm xogħolha ma kienx ikun pinna, ma kinitx se tinġieb wisq man-​nies. Iktar minn hekk, xi drabi Tânia kienet tistenna wisq minn oħrajn, u dan kien iġagħalha tħossha diżappuntata u mdejqa.

L-abbiltà, il-​bżulija, u s-​sens taʼ sodisfazzjon persunali huma importanti. Iżda jibqaʼ l-​fatt li jekk wieħed jagħmel miri li ma jistax jilħaqhom dan jistaʼ jirriżulta f’sentimenti negattivi, bħall-​biżaʼ li ma jirnexxix. Il-​ġenituri jew xi persuni oħrajn għandhom mnejn jistabbilixxu ċertu livell taʼ perfezzjoni fix-​xogħol taʼ l-​iskola jew fl-​isports li għaż-​żgħażagħ jistaʼ jkun diffiċli biex jilħquh. Per eżempju, omm Ricardo kienet tistenna ħafna minnu, billi xtaqitu jsir tabib, idoqq il-​pjanu, u jitkellem diversi lingwi. Tistaʼ tara kif b’din l-​attitudni, meta tkun waħda estrema, tkun qed tistieden il-​problemi jew id-​diżappunti?

Għala Għandna Nevitaw il-​Perfezzjoniżmu?

It-​tip taʼ xogħol mitlub huwa dak taʼ kwalità superjuri, fejn wieħed jilħaq livelli għoljin taʼ preċiżjoni u li jibbrilla. Għalhekk, hemm kompetizzjoni kbira fil-​kamp tax-​xogħol. Fattur ieħor li jġiegħel lil ħafna jistinkaw ferm iktar iebes hu l-​biżaʼ li jitilfu l-​mezz t’għajxien tagħhom. Xi ħaddiema jsiru bħal dak l-​atleta li jagħmel sagrifiċċji estremi biex jikser xi rekord. Imbagħad, meta l-​kompetizzjoni tkun waħda ħarxa, jistaʼ jħossu sforzat biex ikompli jżid fit-​taħriġ tiegħu, forsi billi jieħu xi drogi ħalli jtejjeb lilu nnifsu u—jittama—li jirbaħ. Il-​perfezzjoniżmu jieħu post l-​isforzi mill-​aħjar biex jintlaħaq l-​aħjar livell. Minflok, il-​perfezzjoniżmu jġiegħel lin-​nies ikunu “mqanqlin mill-​biżaʼ li ma jirnexxux” jew “motivati biex ikunu taʼ l-​ewwel.”—The Feeling Good Handbook.

Irridu nammettu li xi wħud iħossu li jagħmlu x’jagħmlu fis-​snajjaʼ jew fl-​isports dejjem jistgħu jtejbu l-​livell. Madankollu, skond Dr. Robert S. Eliot, “il-​perfezzjoniżmu huwa stennija li qatt ma tistaʼ ssir realtà.” Hu jżid li l-​perfezzjoniżmu huwa magħmul minn sens taʼ ħtija, attitudni difensiva, u biżaʼ taʼ twaqqigħ għaċ-​ċajt. Għaldaqstant, kemm hu minnu l-​kliem tas-​Sultan għaref Salamun: “Rajt ukoll li t-​taħbit kollu u l-​ħerqa għax-​xogħol m’humiex ħlief għira taʼ wieħed għal ieħor. Dan ukoll frugħa u ġiri wara r-​riħ.”—Koħèlet 4:4.

X’tistaʼ tagħmel jekk għandek it-​tendenza li tistenna l-​perfezzjoni? Huwa veru li iktar ma tistinka, iktar se tkun diżappuntat? Tixtieq li tistenna inqas minnek innifsek u tkun iktar kalm? X’ifisser li tkun perfett? Tixxennaq biex tagħmel użu sħiħ mill-​abbiltajiet kollha tiegħek filwaqt li tevita l-​perfezzjoniżmu? Jekk il-​bnedmin imperfetti jistgħu jużaw il-​kapaċitajiet tagħhom mogħtijin minn Alla sabiex jiskopru affarijiet għall-​benefiċċju t’oħrajn, immaġina x’tistaʼ twettaq l-​umanità taħt kundizzjonijiet perfetti u gwida divina!

[Stampa f’paġna 4]

Il-​ġenituri jew persuni oħrajn jistgħu jistennew il-​perfezzjoni li ż-​żgħażagħ ma jistgħux jiksbuha