“IX-​XJENZATI bdew jagħmlu xi riċerki li qegħdin juru li l-​maħfra tistaʼ verament ittejjeb is-​saħħa emozzjonali, u wisq probabbli, anki s-​saħħa fiżika,” tirrapporta l-​gazzetta Kanadiża The Toronto Star. Madankollu, il-​Professur Carl Thoresen, mill-​Università taʼ Stanford, fl-​Istati Uniti, li qed imexxi r-​riċerka għall-​Proġett taʼ Stanford dwar il-​Maħfra, josserva li huma “ftit wisq in-​nies li jifhmu x’inhi l-​maħfra u kif din jistaʼ jkollha effetti tajbin.”

Il-maħfra ġenwina hija meqjusa bħala aspett vitali tal-​Kristjanità. Ir-​rapport f’The Toronto Star ifissirha bħala li “tagħraf li xi ħadd naqsek, twarrab is-​sentimenti taʼ rabja li tħoss minħabba f’dan, u mbagħad tittratta mal-​persuna li tkun naqsitek b’mogħdrija u mħabba.” Trid tagħmel differenza bejn dan u li taċċetta l-​offiża, li tiskużaha, li tinsieha, jew li tiċħadha. Li taħfer lanqas ma jfisser li terġaʼ tpoġġi lilek innifsek f’sitwazzjoni fejn l-​offiża tistaʼ tibqaʼ tirrepeti ruħha b’abbuż. Ir-​rapport jgħid li l-​vera maħfra hi “li twarrab għalkollox ir-​rabja u s-​sentimenti negattivi.”

Ir-riċerkaturi jgħidu li hemm bżonn taʼ iktar studju dwar il-​benefiċċji fiżiċi taʼ li wieħed jaħfer. Madankollu, huma jirrapportaw li dan jirriżulta f’benefiċċji psikoloġiċi, inkluż “inqas stress, ansjetà u dipressjoni.”

Raġuni nobbli għala wieħed għandu jaħfer insibuha f’Efesin 4:32, li jgħid: “Kunu twajba maʼ xulxin, ħennu għal xulxin, aħfru lil xulxin, bħalma Alla ħafer lilkom fi Kristu.” (Korsiv tagħna.) Fejn tidħol il-​maħfra, bħal f’ħafna aspetti oħrajn, aħna mħeġġin biex nimitaw lil Alla.—Efesin 5:1.

Jekk nirrifjutaw li naħfru lil oħrajn meta jkun hemm bażi biex nuru ħniena, ir-​relazzjoni tagħna m’Alla tistaʼ tiġi effettwata b’mod negattiv. Jehovah jistenna li aħna naħfru lil xulxin. Imbagħad inkunu nistgħu nitolbuh biex jaħfer lilna.—Mattew 6:14; Mark 11:25; 1 Ġwann 4:11.