Fi żmienna, hemm ħafna affarijiet li huma differenti minn kif kienu fi żmien Thoreau, li ssemma fl-​artiklu taʼ qabel. Differenza waħda ewlenija hi li llum m’aħniex neqsin mill-​pariri dwar kif nistgħu nsibu serħan. Il-​psikoloġi u l-​awturi tal-​kotba li juruk kif tgħin lilek innifsek—saħansitra dawk li jiktbu fil-​gazzetti—kollha joffru l-​ideat tagħhom. Il-​pariri tagħhom jistgħu jagħtu xi ftit taʼ l-​għajnuna, imma biex tinstab soluzzjoni li jkollha effett fit-​tul, hemm bżonn taʼ xi ħaġa li tilħaq ferm iktar fil-​fond. Hekk skoprew l-​individwi li ssemmew fl-​artiklu taʼ qabel.

ANTÔNIO, Marcos, Gerson, Vania, u Marcelo trabbew f’ambjenti differenti, u kellhom problemi differenti. Imma kellhom mill-​inqas tliet affarijiet komuni bejniethom. L-​ewwelnett, kien hemm żmien meta huma ‘kienu bla tama u bla Alla fid-​dinja.’ (Efesin 2:12) It-​tieni, kienu jixxennqu biex ikollhom il-​paċi tal-​moħħ. U t-​tielet, ilkoll kemm huma sabu s-​serħan li xtaqu wara li aċċettaw studju tal-​Bibbja max-​Xhieda taʼ Jehovah. Hekk kif bdew jagħmlu progress, huma rrealizzaw li Alla kien interessat fihom. Tabilħaqq, bħalma qal Pawlu lill-​Atenjani taʼ żmienu, Alla “m’huwiex ’il bogħod minn kull wieħed minna.”  (Atti 17:27) Li wieħed ikun konvint minn dan huwa fattur ewlieni biex ikollu l-​paċi tal-​moħħ.

Għala Hawn Daqshekk Ftit Paċi?

Il-​Bibbja tagħti żewġ raġunijiet bażiċi għala fid-​dinja hawn nuqqas taʼ paċi—sew jekk paċi tal-​moħħ u sew jekk paċi bejn in-​nies. L-​ewwel waħda hija spjegata f’Ġeremija 10:23: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” Il-​bniedem la għandu l-​għerf u lanqas jistaʼ jara bil-​quddiem sabiex ikun jaf imexxi lilu nnifsu mingħajr għajnuna taʼ ħadd, u l-​unika għajnuna vera li qatt jistaʼ jkollu tiġi biss mingħand Alla. Bnedmin li ma jfittxux il-​gwida t’Alla qatt ma se jkollhom paċi dejjiema. It-​tieni raġuni għala hawn nuqqas taʼ paċi nistgħu nkunu nafuha mill-​kliem taʼ l-​appostlu Ġwanni: “[I]d-dinja kollha qiegħda taħt idejn il-​Ħażin.” (1 Ġwann 5:19) Mingħajr gwida divina, l-​isforzi tal-​bniedem biex ikollu l-​paċi se jkunu dejjem maħnuqin mill-​attivitajiet taʼ dak il-​“Ħażin” li ma jidhirx imma jeżisti tassew—u hu verament b’saħħtu—Satana.

Għal dawn iż-​żewġ raġunijiet—li l-​biċċa l-​kbira tan-​nies ma jfittxux il-​gwida t’Alla u li Satana huwa attiv ħafna fid-​dinja—ir-​razza umana in ġenerali tinsab fi stat imwiegħer. L-​appostlu Pawlu ddeskrivieha tajjeb ħafna: “Aħna nafu li l-​ħolqien kollu għadu s’issa jitniehed bl-​uġigħ tal-​ħlas.” (Rumani 8:22) Kif jistaʼ xi ħadd ma jaqbilx maʼ dan? Kemm f’pajjiżi sinjuri u kemm f’dawk fqar, il-​problemi tal-​familja, il-​kriminalità, l-​inġustizzja, il-​konflitti tal-​personalità, l-​inċertezza ekonomika, il-​mibegħda bejn it-​tribujiet u l-​gruppi etniċi, il-​moħqrija, il-​mard, u ħafna affarijiet oħrajn, iċaħħdu lin-​nies mis-​serħan tal-​moħħ.

Kif Nistgħu Nsibu Serħan

Meta Antônio, Marcos, Gerson, Vania, u Marcelo studjaw il-​Kelma t’Alla, il-​Bibbja, huma tgħallmu affarijiet li biddlulhom ħajjithom. Ħaġa waħda li tgħallmu hi li s-​sitwazzjoni fid-​dinja xi darba se tkun differenti. Dan ma jfissirx li huma sempliċement jisperaw li fl-​aħħar mill-​aħħar kollox imur tajjeb. Minflok, huma għandhom fiduċja vera u msejsa fis-​sod li Alla għandu skop għall-​umanità u li saħansitra issa nistgħu nibbenefikaw minn dan l-​iskop jekk nagħmlu r-​rieda tiegħu. Huma applikaw f’ħajjithom dak li tgħallmu mill-​Bibbja, u s-​sitwazzjoni tagħhom tjiebet. Huma sabu iktar hena u paċi milli qatt ħasbu li setaʼ jkollhom.

Antônio m’għadux jieħu sehem fi protesti u ġlied biex jaqbeż għad-​drittijiet tal-​ħaddiema. Hu jaf li l-​bidliet li jsiru b’riżultat taʼ dan huma limitati u temporanji. Dan ir-​raġel li darba kien mexxej taʼ għaqda tal-​ħaddiema tgħallem dwar is-​Saltna t’Alla. Hija l-​istess Saltna li miljuni jitolbu għaliha meta jgħidu t-​talba tal-​Missierna, li fiha jitolbu lil Alla: “Tiġi saltnatek.” (Mattew 6:10) Antônio tgħallem li s-​Saltna t’Alla hija gvern reali fis-​sema, li se jġib paċi ġenwina għall-​umanità.

Marcos tgħallem ipoġġi fil-​prattika l-​pariri għaqlin tal-​Bibbja dwar is-​suġġett taż-​żwieġ. Bħala riżultat, issa dan ir-​raġel li qabel kien politikant jinsab ferħan wara li reġaʼ ngħaqad maʼ martu. Hu wkoll qed iħares ’il quddiem lejn iż-​żmien, li hu fil-​qrib, meta permezz tas-​Saltna t’Alla se jkun hawn sistema aħjar minflok din is-​sistema dinjija rgħiba u egoista. Is-​sentenza fit-​talba tal-​Missierna, “Ħalli r-​rieda tiegħek tkun magħmula fuq l-​art bħalma hi fis-​sema” tfisser ħafna iktar għalih. (Mattew 6:10b, New International Version) Meta ssir ir-​rieda t’Alla  fuq l-​art, il-​bnedmin se jgħixu ħajja li ħadd qatt ma għex qabel.

Xi ngħidu għal Gerson? Hu m’għadux jiġġerra minn post għall-​ieħor jew jisraq. Il-​ħajja taʼ dan ir-​raġel li kien jgħix fit-​toroq issa għandha skop, għaliex hu ddedika ruħu biex jgħin lil oħrajn isibu l-​paċi tal-​moħħ. Bħalma juru dawn l-​esperjenzi, jekk wieħed jistudja l-​Bibbja u japplika dak li tgħid, dan jistaʼ jġib tibdil kbir għall-​aħjar fil-​ħajja tiegħu.

Serħan f’Dinja Mimlija Inkwiet

L-​iktar persunaġġ storiku importanti fit-​twettiq tar-​rieda t’Alla huwa Ġesù Kristu, u meta n-​nies jistudjaw il-​Bibbja max-​Xhieda taʼ Jehovah, jitgħallmu ħafna dwaru. Fil-​lejl meta twieled, l-​anġli kantaw tifħir lil Alla: “Glorja lil Alla fl-​ogħla tas-​smewwiet, u sliem fl-​art lill-​bnedmin li jogħġbu lilu!” (Luqa 2:14) Meta Ġesù kiber, hu kien interessat f’li jtejjeb il-​ħajjiet tan-​nies. Kien jifhem kif kienu jħossuhom u wera ħafna u ħafna mogħdrija lejn dawk li kienu qed ibatu u lejn il-​morda. U, fi qbil maʼ dak li qalu l-​anġli, sa ċertu punt, hu ġab serħan lill-​ġwejdin. Fi tmiem il-​ministeru tiegħu, hu qal lid-​dixxipli: “Jiena nħallilkom is-​sliem; nagħtikom is-​sliem tiegħi; ma nagħtihulkomx kif tagħtih id-​dinja. Tħallux qalbkom titħawwad u anqas titbeżżaʼ.”—Ġwann 14:27.

Ġesù ma kienx sempliċement bniedem li jħobb jgħin lil ħaddieħor. Hu qabbel lilu nnifsu maʼ ragħaj, u xebbah lis-​segwaċi ġwejdin tiegħu maʼ nagħaġ meta qal: “Jiena ġejt biex ikollkom il-​ħajja, u ħajja bil-​kotra. Jiena r-​ragħaj it-​tajjeb. Ir-​ragħaj it-​tajjeb jagħti ħajtu għan-​nagħaġ tiegħu.” (Ġwann 10:10, 11) Iva, kuntrarju għal tant mexxejja tal-​lum li jpoġġu l-​interessi tagħhom l-​ewwel u qabel kollox, Ġesù ta ħajtu għan-​nagħaġ tiegħu.

Kif nistgħu nibbenefikaw minn dak li għamel Ġesù? Ħafna huma familjari mal-​kliem: “Għax Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” (Ġwann 3:16) Li neżerċitaw fidi f’Ġesù jirrikjedi, l-​ewwelnett, li nieħdu għarfien dwaru u dwar Missieru, Jehovah. Għarfien dwar Alla u Ġesù Kristu jistaʼ jwassal biex ikollna relazzjoni intima m’Alla Jehovah, li se tgħinna biex ikollna l-​paċi tal-​moħħ.

Ġesù qal: “In-​nagħaġ tiegħi jisimgħu leħni, u jiena nagħrafhom, u huma jimxu warajja. U jiena nagħtihom il-​ħajja taʼ dejjem; u huma ma jintilfu qatt, u minn idejja ma jaħtafhomli ħadd.” (Ġwann 10:27, 28) Kemm hu kliem taʼ mħabba u faraġ! Veru, Ġesù lissnu kważi elfejn sena ilu, imma għadu japplika llum daqskemm kien japplika dak iż-​żmien. Qatt tinsa li Ġesù Kristu għadu ħaj u huwa attiv, u issa qiegħed fuq it-​tron jaħkem bħala s-​Sultan tas-​Saltna tas-​sema t’Alla. Hu għadu jimpurtah ħafna minn uħud ġwejdin li jixxennqu biex isibu serħan, l-​istess bħal meta kien hawn fuq l-​art ħafna snin ilu. Iżjed minn hekk, hu xorta għadu r-​Ragħaj tan-​nagħaġ tiegħu. Jekk insegwuh, hu se jgħinna biex ikollna l-​paċi tal-​moħħ. Dan jinkludi li nistgħu nistennew bil-​fiduċja kollha li fil-​futur naraw paċi totali—u dan ifisser li ma se jkun hemm ebda vjolenza, gwerra, u kriminalità.

Li nkunu nafu u nemmnu li Jehovah, permezz taʼ Ġesù, se jgħinna, iġibilna benefiċċji kbar. Tiftakarha lil Vania, li meta kienet żgħira kellha titgħabba b’responsabbiltajiet kbar u kienet taħseb li Alla kien nesieha? Issa Vania taf li Alla m’abbandunahiex. Hi tgħid: “Tgħallimt li Alla hu persuna vera u li għandu kwalitajiet li tant jiġbduk lejh. L-​imħabba tiegħu qanqlitu biex jibgħat lil Ibnu fuq l-​art biex jagħtina l-​ħajja. Huwa importanti ħafna li tkun tafu dan.”

Marcelo jixhed li r-​relazzjoni tiegħu m’Alla hija waħda vera. Dan iż-​żagħżugħ li kien iħobb imur il-​parties jikkummenta: “Taʼ  spiss, iż-​żgħażagħ ma jkunux jafu x’għandhom jagħmlu, u jispiċċaw jagħmlu l-​ħsara lilhom infushom. Xi wħud jibdew jabbużaw mid-​drogi, bħalma għamilt jien. Nispera li jkun hemm ħafna oħrajn li jiġu mberkin bl-​istess mod, billi jitgħallmu l-​verità dwar Alla u Ibnu.”

Permezz taʼ studju tal-​Bibbja fid-​dettall, Vania u Marcelo żviluppaw fidi soda f’Alla, u bdew juru fiduċja fih minħabba li hu ġenwinament irid jgħinhom jittrattaw mal-​problemi tagħhom. Jekk nagħmlu dak li għamlu huma—nistudjaw il-​Bibbja u napplikaw dak li tgħid—se nsibu serħan kbir, l-​istess bħalhom. Imbagħad, l-​inkuraġġiment taʼ l-​appostlu Pawlu tassew se jkun japplika fil-​każ tagħna: “Tħabbtu raskom b’xejn. Fit-​talb kollu tagħkom itolbu u uru lil Alla xi jkollkom bżonn, u iżżuh ħajr. U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.”—Filippin 4:6, 7.

Insibu Paċi Ġenwina Llum

Ġesù Kristu qed jiggwida lil nies li huma għatxana għall-​verità fit-​triq li twassal għall-​ħajja taʼ dejjem f’ġenna taʼ l-​art. Hekk kif jiggwidahom lejn il-​qima pura t’Alla, huma jesperjenzaw paċi bħal dik li hi deskritta fil-​Bibbja: “U l-​poplu tiegħi f’post tas-​sliem, jgħammar bla biżaʼ, mistrieħ fil-​kwiet.” (Isaija 32:18) U din hija biss indikazzjoni żgħira tal-​paċi li se jgawdu fil-​futur. Naqraw: “Imma l-​ġwejdin għad jirtu l-​art, u bi sliem kotran jitgħaxxqu. Il-​ġusti jirtu l-​art, u jgħammru fiha għal dejjem.”—Salm 37:11, 29.

Allura nistgħu nsibu serħan illum? Iva. Iktar minn hekk, nistgħu nibqgħu ċerti li fil-​futur qarib, Alla se jbierek lill-​bnedmin ubbidjenti bil-​paċi iktar minn qatt qabel. Għalhekk, għala ma titolbux biex jagħtik il-​paċi tiegħu? Jekk għandek xi problemi li jċaħħduk mit-​trankwillità, itlob bil-​mod kif talab David: “Serraħli qalbi mid-​dwejjaq, min-​niket tiegħi eħlisni. Ara n-​niket u d-​diqa tiegħi, u aħfirli ħtijieti kollha.” (Salm 25:17, 18) Ibqaʼ ċert li Alla jisimgħu talb bħal dan. Hu jiftaħ idu u jagħti l-​paċi lil dawk kollha li jfittxuha bis-​sinċerità. Bl-​imħabba kollha, jintqalilna b’ċertezza: “Qrib il-​Mulej lejn kull min isejjaħlu, lejn kull min isejjaħlu fis-​sewwa. Jaqtgħalhom xewqithom ’il dawk li jibżgħu minnu, jismaʼ l-​għajta tagħhom, u jsalvahom.”—Salm 145: 18, 19.

[Kumment f’paġna 5]

Il-​bniedem la għandu l-​għerf u lanqas jistaʼ jara bil-​quddiem sabiex ikun jaf imexxi lilu nnifsu mingħajr għajnuna taʼ ħadd, u l-​unika għajnuna vera li qatt jistaʼ jkollu tiġi biss mingħand Alla

[Kumment f’paġna 6]

Għarfien dwar Alla u Ġesù Kristu jistaʼ jwassal biex ikollna relazzjoni intima m’Alla Jehovah, li se tgħinna biex ikollna l-​paċi tal-​moħħ

[Stampa f’paġna 7]

Li nobdu l-​pariri tal-​Bibbja jwassal biex il-​ħajja tal-​familja tkun mimlija paċi