“INTOM sirtu mudell għal dawk kollha li emmnu fil-​Maċedonja u l-​Akaja.” L-​appostlu Pawlu kiteb dan il-​kliem lill-​Kristjani leali li kienu joqogħdu Tessalonika. L-​eżempju li ħallew għal sħabhom il-​Kristjani kien tassew taʼ min ifaħħru. Madankollu, it-​Tessalonikin infushom kienu qed jimxu fuq l-​eżempju li kienu ħallew Pawlu u sħabu. Pawlu qal: “Għax l-​Evanġelju tagħna lilkom ma kienx biss bil-​kliem, imma wkoll bil-​qawwa, bl-​Ispirtu s-​Santu u b’persważjoni sħiħa; intom tafu kif ġibna ruħna meta konna fostkom għall-​ġid tagħkom. Intom sirtu tixbhu lilna.”—1 Tessalonikin 1:5-7.

Iva, Pawlu mhux bil-​kliem biss kien jippriedka. Hu kien jagħmel dan bil-​mod kif għex ħajtu—eżempju taʼ fidi, sabar, u taʼ li wieħed jissagrifika lilu nnifsu. Minħabba f’dan, Pawlu u sħabu kellhom influwenza kbira fuq il-​ħajja tat-​Tessalonikin, tant li qanqluhom biex jaċċettaw il-​verità “fost ħafna taħbit [“tribulazzjoni,” NW].” Iżda żgur li Pawlu u sħabu fix-​xogħol ma kinux l-​unika influwenza pożittiva li kellhom f’ħajjithom dawk l-​aħwa. Anki l-​eżempju taʼ oħrajn li ssaportew it-​tribulazzjonijiet kien taʼ inkuraġġiment għalihom. Pawlu kiteb lit-​Tessalonikin: “Għax intom sirtu tixbhu, ħuti, lill-​knejjes taʼ Alla li hemm fil-​Lhudija, fi Kristu Ġesù: intom sofrejtu l-​istess minn għand in-​nies taʼ pajjiżkom, bħalma sofrew huma minn għand il-​Lhud.”—1 Tessalonkin 2:14, Saydon.

Kristu Ġesù—L-​Aqwa Eżemplar

Għalkemm Pawlu nnifsu kien ħalla eżempju taʼ min jimxi fuqu, hu dderieġa l-​attenzjoni lejn Ġesù Kristu bħala l-​eżempju ewlieni li l-​Kristjani għandhom jimitaw. (1 Tessalonikin 1:6) Kristu kien u għadu l-​aqwa Eżemplar li nistgħu nsegwu. L-​appostlu Pietru kiteb: “Għal dan intom kontu msejjħa għax Kristu wkoll bata għalikom u ħallielkom eżempju biex timxu fuq il-​passi tiegħu.”—1 Pietru 2:21.

Madankollu, ħajjet Ġesù bħala bniedem intemmet kważi 2,000 sena ilu. Issa hu “jgħammar f’dawl li ħadd ma jistaʼ jersaq lejh” bħala ħlejqa spirtu immortali. Bħala tali, “ebda bniedem qatt ma rah u anqas qatt jistaʼ jarah.” (1 Timotju 6:16) Allura kif nistgħu nimitawh? Mod wieħed hu billi nistudjaw l-​erbaʼ rakkonti Bibliċi tal-​ħajja taʼ Ġesù. L-​Evanġelji jipprovdulna għarfien profond dwar il-​personalità, il-​ħajja, u l-​“attitudni mentali” tiegħu. (Filippin 2:5-8, NW) Jistaʼ jkollna fehma iktar profonda jekk nistudjaw bir-​reqqa l-​ktieb L-​Aqwa Bniedem Li Qatt Għex, li jiddiskuti l-​ġrajjiet tal-​ħajja taʼ Ġesù fid-​dettall u fl-​ordni kif seħħew. a

L-​eżempju li ħalla Ġesù f’li jissagrifika lilu nnifsu kellu effett qawwi fuq l-​appostlu Pawlu. Hu qal lill-​Kristjani Korintin: “Jiena bil-​qalb kollha nonfoq u nintefaq għall-​ġid taʼ rwieħkom.” (2 Korintin 12:15) X’attitudni li tixbah lil dik taʼ Kristu! Hekk kif nikkontemplaw l-​eżempju perfett li ħallielna, aħna wkoll għandna nitqanqlu biex nimitawh f’ħajjitna.

Per eżempju, Ġesù għallimna li għandna nafdaw fil-​wegħda t’Alla li jipprovdilna l-​affarijiet materjali. Imma hu għamel iktar minn hekk. Kien juri fidi u fiduċja bħal din f’Jehovah kuljum.  Hu qal: “Il-​volpijiet għandhom l-​għerien tagħhom, u l-​għasafar tas-​sema l-​bejtiet; iżda Bin il-​bniedem ma għandux fejn imidd rasu.” (Mattew 6:25; 8:20) Huma l-​ħsibijiet u l-​azzjonijiet tiegħek dominati mit-​tħassib dwar affarijiet materjali? Jew tagħti prova permezz tal-​mod kif tgħix ħajtek li qed tfittex is-​Saltna l-​ewwel? U xi ngħidu dwar l-​attitudni tiegħek lejn is-​servizz taʼ Jehovah? Hija bħal dik li kellu l-​Eżemplar tagħna, Ġesù? Il-​Bibbja turi li Ġesù ma kienx sempliċement jippriedka dwar iż-​żelu imma hu stess wera żelu jaħraq f’ħafna okkażjonijiet. (Ġwann 2:14-17) Iżjed minn hekk, x’eżempju mill-​aħjar ħalla Ġesù rigward l-​imħabba! Hu saħansitra ssagrifika ħajtu stess għad-​dixxipli tiegħu! (Ġwann 15:13) Qiegħed int timita lil Ġesù billi turi mħabba lejn ħutek Kristjani? Jew tħalli l-​imperfezzjonijiet taʼ xi wħud minnhom itellfuk milli turi l-​imħabba lejhom?

Hekk kif nistinkaw biex insegwu l-​eżempju taʼ Kristu, se nonqsu ħafna drabi. Imma żgur li Jehovah jkun kuntent bl-​isforzi tagħna biex ‘nilbsu lil Sidna Ġesù Kristu.’—Rumani 13:14.

“Eżempju tal-​Merħla”

Hemm xi individwi fil-​kongregazzjoni llum li jistgħu jkunu t’eżempju għalina? Dażgur li hemm! Aħwa rġiel li nħatru f’karigi taʼ responsabbiltà jridu jkunu t’eżempju b’mod speċjali. Pawlu qal lil Titu, li kien iżur il-​kongregazzjonijiet ġewwa Kreta u kien jaħtar l-​indokraturi, li kull anzjan maħtur “ma għandu jkollu xejn x’wieħed jgħid fih.” (Titu 1:5, 6) B’mod simili, l-​appostlu Pietru ħeġġeġ lill-​“presbiteri” biex isiru “eżempju tal-​merħla.” (1 Pietru 5:1-3) U xi ngħidu għal dawk li jaqdu bħala qaddejja ministerjali? Dawn ukoll għandhom ikunu rġiel li “jaqdu dmirhom sewwa.”—1 Timotju 3:13.

M’għandniex xi ngħidu, ma nkunux realistiċi jekk nistennew li kull anzjan jew qaddej ministerjali jibbrilla f’kull aspett tal-​ministeru Kristjan. Pawlu qal lill-​Kristjani f’Ruma: “Aħna għandna doni differenti skond il-​grazzja li Alla tana.” (Rumani 12:6) Mhux l-​aħwa kollha għandhom l-​istess kapaċitajiet. Ma jkunx raġunevoli jekk nistennew li kulma jgħidu jew jagħmlu l-​anzjani jkun perfett. “Aħna lkoll niżbaljaw, u taʼ sikwit,” tgħid il-​Bibbja f’Ġakbu 3:2. “Jekk xi ħadd ma jiżbaljax f’dak li jgħid, dan ikun perfett, kapaċi jrażżan ġismu kollu.” Madankollu, minkejja l-​imperfezzjonijiet tagħhom, l-​anzjani xorta jistgħu ‘jkunu t’eżempju għal dawk li jemmnu, fi kliemhom u fl-​imġiba tagħhom, fl-​imħabba, fil-​fidi, fis-​safa,’ bħalma kien Timotju. (1 Timotju 4:12) Meta l-​anzjani jagħmlu hekk, dawk fil-​merħla japplikawha minn qalbhom it-​twiddiba f’Lhud 13:7: “Ftakru f’dawk li jmexxukom, . . .  [“u hekk kif tikkontemplaw dwar x’jiġri bil-​kondotta tagħhom,” NW] imxu fuq l-​eżempju tal-​fidi tagħhom.”

Eżempji Oħrajn fi Żmienna

Kien hemm ħafna u ħafna oħrajn li kienu t’eżempju tajjeb matul dawn l-​aħħar snin. Xi ngħidu għall-​eluf taʼ missjunarji li ssagrifikaw lilhom infushom billi ‘telqu djar jew aħwa subien jew aħwa bniet jew missier jew omm jew tfal jew artijiet’ biex iwettqu l-​inkarigu Kristjan f’artijiet barranin? (Mattew 19:29) Aħseb ukoll dwar l-​indokraturi li jivvjaġġaw u n-​nisa tagħhom, l-​irġiel u n-​nisa li jaqdu bħala volontieri fl-​uffiċċji tal-​Watch Tower Society, u l-​pijunieri li jaqdu lill-​kongregazzjonijiet. Jistgħu dawn l-​eżempji jqanqlu lil oħrajn biex jaġixxu? Evanġelizzatur Kristjan fl-​Asja jiftakar lil wieħed missjunarju mit-​tmien klassi taʼ l-​Iskola taʼ Gilgħad (Watchtower Bible School of Gilead). Hu qal li dan il-​ħu leali kien “lest li jiffaċċja l-​qtajjaʼ tan-​nemus u l-​umdità taqtagħlek nifsek. . . . Barra minn hekk, xi ħaġa iktar impressjonanti kienet il-​kapaċità li kellu biex jagħmel preżentazzjonijiet kemm bil-​lingwa Ċiniża u kemm bil-​lingwa Malajana, għalkemm hu kien mill-​Ingilterra.” X’kien l-​effett taʼ dan l-​eżempju mill-​aħjar? Il-​ħu qal: “Il-​kalma u  l-​kunfidenza li kellu qanqlu fija x-​xewqa li nsir missjunarju meta nikber.” U fil-​fatt dan il-​ħu veru sar missjunarju.

Il-Watch Tower Publications Index fih lista twila ferm t’esperjenzi li dehru fir-​rivisti It-​Torri taʼ l-​Għassa u Stenbaħ! Dawn l-​esperjenzi jirrakkontaw dwar individwi li telqu warajhom karrieri u miri dinjin, għelbu xi dgħjufijiet li kellhom, għamlu bidliet kbar fil-​personalità tagħhom, żammew attitudni pożittiva waqt li ffaċċjaw l-​inkwiet, u wrew bżulija, sabar, lealtà, umiltà, kif ukoll spirtu taʼ ssagrifikar tagħhom infushom. Wieħed mill-​qarrejja kiteb hekk dwar dawn ir-​rakkonti: “Jagħmluni Kristjan iktar umli u grat hekk kif naqra dwar dak li għaddew minnu oħrajn, u għenuni biex ma nkunx imkabbar bija nnifsi jew egoist.”

Iktar minn hekk, tinsiex lil dawk li huma t’eżempju tajjeb fil-​kongregazzjoni tiegħek stess. Hemm il-​kapijiet tal-​familja li kontinwament jieħdu ħsieb kemm tal-​bżonnijiet materjali kif ukoll dawk spiritwali tal-​familji tagħhom. Hemm ukoll l-​aħwa nisa—inkluż ommijiet li jrabbu t-​tfal mingħajr raġel—li jittrattaw mal-​pressjonijiet tat-​trobbija tat-​tfal waqt li xorta jkollhom sehem attiv fil-​ministeru. Imbagħad hemm l-​aħwa mdaħħlin fiż-​żmien jew li jbatu minn nuqqas taʼ saħħa, li jibqgħu leali minkejja li jsiru dejjem iżjed dgħajfin u saħħithom tkompli tmajna. Ma jmissulekx qalbek eżempji bħal dawn?

Veru, id-​dinja mimlija b’eżempji ħżiena. (2 Timotju 3:13) Minkejja dan, ikkunsidra dak li qal Pawlu lill-​Kristjani li kienu jgħixu fil-​Lhudija. Wara li tkellem dwar l-​imġiba eżemplari taʼ ħafna rġiel u nisa leali tal-​qedem, l-​appostlu Pawlu ħeġġiġhom: “Ladarba aħna wkoll għandna madwarna sħaba hekk kbira taʼ xhieda, ejjew . . . b’qalbna qawwija nibqgħu niġru t-​triq tal-​prova li għandna quddiemna; nżommu għajnejna merfugħa lejn Ġesù, li minnu tibda u fih tintemm il-​fidi tagħna.” (Lhud 12:1, 2) Il-​Kristjani llum ukoll huma mdawrin bi ‘sħaba kbira’ t’eżempji tajbin—kemm tal-​qedem u kemm taʼ żmienna. Qiegħed int tassew tibbenefika minnhom? Dan huwa possibbli jekk tkun determinat li ‘ma timxix fuq il-​ħażin, imma fuq it-​tajjeb.’—3 Ġwann 11.

[Nota taʼ taħt]

[Kumment f’paġna 20]

Ma nkunux realistiċi jekk nistennew li kull anzjan jew qaddej ministerjali jkollu tattika eċċezzjonali f’kull aspett tal-​ministeru Kristjan

[Stampi f’paġna 21]

L-​anzjani għandhom ikunu “eżempju tal-​merħla”