“Nittama f’Alla . . . li kemm it-​tajbin u kemm il-​ħżiena għad iqumu minn bejn l-​imwiet.”—ATTI 24:15.

1. Għala nistgħu nittamaw fl-​irxoxt?

 JEHOVAH tana raġunijiet tajbin biex nittamaw fl-​irxoxt. Għandna l-​kelma tiegħu li l-​mejtin se jirxoxtaw, li se jerġgħu jqumu bil-​wieqfa ħajjin. U l-​iskop tiegħu rigward dawk li huma reqdin fil-​mewt żgur li se jitwettaq. (Isaija 55:11; Luqa 18:27) Fil-​fatt, Alla diġà wera l-​qawwa tiegħu li jqajjem il-​mejtin.

2. It-​tama taʼ l-​irxoxt kif tistaʼ tkun taʼ ġid għalina?

² Il-​fidi fil-​provvediment t’Alla li jqajjem il-​mejtin permezz taʼ Ibnu, Ġesù Kristu, tistaʼ twiżinna meta nkunu taħt stress. Il-​fatt li aħna ċerti mit-​tama taʼ l-​irxoxt jistaʼ jgħinna wkoll inżommu l-​integrità lejn Missierna tas-​sema saħansitra sal-​punt li nkunu lesti li mmutu. X’aktarx li t-​tama tagħna fl-​irxoxt se tissaħħaħ hekk kif nagħtu ħarsa lejn każi li nsibuhom miktubin fil-​Bibbja fejn il-​ħajja ngħatat mill-​ġdid. Dawn il-​mirakli twettqu kollha permezz taʼ qawwa mingħand il-​Mulej Sovran Jehovah.

Ħadu Lura l-​Mejtin Tagħhom Irxoxtati mill-​Mewt

3. Elija ngħata l-​qawwa li jagħmel liema ħaġa meta miet l-​iben taʼ waħda armla f’Sarefta?

³ Meta kien qed jagħti ħarsa kommoventi  lura lejn il-​fidi murija minn xhieda taʼ Jehovah taʼ qabel l-​era Kristjana, l-​appostlu Pawlu kiteb: “Nisa ħadu lura l-​mejtin tagħhom irxuxtati mill-​mewt.” (Lhud 11:35; 12:1) Waħda minn dawn in-​nisa kienet armla fqira fil-​belt Feniċja taʼ Sarefta. Talli laqgħet għandha lil Elija, il-​profeta t’Alla, id-​dqiq tagħha b’mod mirakoluż ma spiċċax u ż-​żejt tagħha ma tbattalx matul perijodu taʼ ġuħ li żgur kieku kien joqtol kemm lilha u kemm lil binha. Meta iktar tard miet binha, Elija meddu fuq mitraħ, talab, imtedd tliet darbiet fuqu, u talab bil-​ħniena: “Mulej, Alla tiegħi, ħalli ruħ it-​tifel tarġaʼ lura fih!” Alla, fil-​fatt, ġiegħel li r-​ruħ, jew il-​ħajja, tiġi lura fit-​tifel. (1 Slaten 17:8-24) Immaġina kemm ferħet dik l-​armla meta l-​fidi tagħha ġiet premjata permezz taʼ l-​ewwel irxoxt li nsibuh imniżżel bil-​miktub—dak taʼ binha l-​għażiż!

4. Eliżew liema miraklu wettaq f’Sunem?

⁴ Mara oħra li ħadet lura l-​mejjet tagħha bl-​irxoxt għexet fil-​belt taʼ Sunem. Din, li kienet mart raġel xwejjaħ, uriet qalb tajba mal-​profeta Eliżew u mal-​qaddej tiegħu, u, minħabba f’hekk, ġiet premjata b’iben. Madankollu, iktar tard, wara diversi snin, hi bagħtet għall-​profeta, u meta wasal għandha dan sab lit-​tifel mejjet. Wara li Eliżew talab u ħa ċerti passi, “ġisem it-​tifel beda jisħon.” Dan “għatas sebaʼ darbiet, u bexxaq għajnejh.” Bla dubju, kemm l-​omm u kemm binha ferħu ferm b’dan l-​irxoxt. (2 Slaten 4:8-37; 8:1-6) Imma kemm se jkunu iktar henjin meta jitqajmu għall-​ħajja fuq l-​art fil-​“qawmien aħjar”—qawmien li jpoġġilhom quddiemhom il-​possibbiltà li qatt ma jerġaʼ jkollhom għalfejn imutu! Kemm għandna għalfejn niżżuh ħajr lil dak Alla taʼ l-​irxoxt, li tant iħobbna, Jehovah!—Lhud 11:35.

5. Eliżew kif kien involut f’miraklu saħansitra wara mewtu?

⁵ Saħansitra wara l-​mewt u d-​difna taʼ Eliżew, Alla ta l-​qawwa lil għadmu permezz taʼ l-​ispirtu qaddis. Naqraw: “Meta . . . [ċerti Iżraelin] kienu qegħdin jidfnu wieħed mejjet, raw qatgħa minnhom [mill-Mowabin] u xeħtu r-​raġel fil-​qabar taʼ Eliżew u telqu. Malli r-​raġel mejjet mess maʼ l-​għadam taʼ Eliżew, ħa l-​ħajja, u qam fuq riġlejh.” (2 Slaten 13:20, 21) Min jaf kif issorprenda ruħu u kemm feraħ dak ir-​raġel! Immaġina l-​ferħ li se jħossu meta l-​maħbubin tagħna jitqajmu għall-​ħajja fi qbil maʼ l-​iskop li ma jfallix t’Alla Jehovah!

L-​Iben t’Alla Qajjem il-​Mejtin

6. Ġesù liema miraklu wettaq qrib il-​belt taʼ Najn, u din il-​ġrajja kif tistaʼ teffettwana?

⁶ Ġesù Kristu, l-​Iben t’Alla, tana raġunijiet sodi biex nemmnu li l-​mejtin jistgħu jiġu rxoxtati, bil-​prospett taʼ ħajja taʼ dejjem. Ġrajja li seħħet qrib il-​belt taʼ Najn tistaʼ tgħinna nirrealizzaw li miraklu bħal dan huwa possibbli permezz tal-​qawwa mogħtija minn Alla. Darba minnhom, Ġesù ltaqaʼ maʼ xi reffiegħa jġorru l-​ġisem taʼ żagħżugħ ’il barra mill-​belt biex jidfnuh. Dan kien l-​uniku iben li kellha waħda armla. Ġesù qalilha: “Tibkix.” Imbagħad mess il-​katalett u qal: “Żagħżugħ, qiegħed ngħidlek, qum!” Minnufih, dan qam bil-​qegħda u tkellem. (Luqa 7:11-15) Dan il-​miraklu żgur li jagħmilna iktar konvinti li t-​tama taʼ l-​irxoxt hi ċerta.

7. X’seħħ f’konnessjoni maʼ bint Ġajru?

⁷ Aħseb ftit, ukoll, dwar ġrajja li involviet lil Ġajru, uffiċjal li jippresiedi tas-​sinagoga f’Kafarnahum. Dan talab lil Ġesù biex jiġi jgħin lill-​maħbuba bintu taʼ 12-il sena, li kienet qed tmut. Malajr waslilhom ir-​rapport li t-​tifla kienet mietet. Ġesù ħeġġeġ lil Ġajru, li kien milqut bin-​niket, biex jeżerċita l-​fidi, u mar miegħu d-​dar, fejn kien hemm folla tibki u tixher. Dawn iddieħqu bih meta Ġesù qalilhom: “It-​tfajla m’hijiex mejta, imma rieqda.” Din tabilħaqq li kienet mejta, imma Ġesù kien wasal biex juri li n-​nies jistgħu jitqajmu għall-​ħajja sewwa sew bħalma jistgħu jitqajmu minn raqda fil-​fond. Waqt li qabad lit-​tfajla minn idha, hu qal: “Talitha, qum!” Din qamet minnufih, u l-​“ġenituri tagħha stagħġbu għall-​aħħar” u  riedu jtiru bil-​ferħ. (Mark 5:35-43; Luqa 8:49-56) Bla dubju, membri tal-​familja se ‘jistagħġbu għall-​aħħar’ u jtiru bil-​ferħ meta l-​maħbubin mejtin tagħhom jitqajmu għall-​ħajja fuq art magħmula ġenna.

8. X’għamel Ġesù ħdejn il-​qabar taʼ Lazzru?

⁸ Lazzru kien ilu mejjet erbat ijiem meta Ġesù resaq lejn il-​qabar tiegħu u ordna li titneħħa l-​blata li kien hemm fid-​daħla tal-​qabar. Wara li talab fil-​pubbliku sabiex min jarah ikun jaf li hu kien jiddependi mill-​qawwa li tah Alla, Ġesù qal b’leħen għoli: “Lazzru, oħroġ!” U ħareġ hu! Idejh u saqajh kienu għadhom infaxxati bil-​faxex tad-​difna, u wiċċu kien mgħotti b’maktur. “Ħollulu l-​faxex u ħalluh imur,” qal Ġesù. Meta raw dan il-​miraklu, ħafna li kienu hemmhekk biex ifarrġu lil Marija u lil Marta, ħut Lazzru, poġġew fidi f’Ġesù. (Ġwann 11:1-45) Ma jimlikx dan ir-​rakkont bit-​tama li l-​maħbubin tiegħek jistgħu jitqajmu għall-​ħajja fid-​dinja l-​ġdida t’Alla?

9. Għala nistgħu nkunu ċerti li Ġesù jistaʼ issa jirxoxta l-​mejtin?

⁹ Meta Ġwanni l-​Għammied kien il-​ħabs, Ġesù bagħatlu dan il-​messaġġ inkuraġġanti: “L-​għomja jaraw, . . . il-​mejtin iqumu.” (Mattew 11:4-6) Ladarba, meta kien fuq l-​art, Ġesù rxoxta l-​mejtin, żgur li hu jistaʼ jagħmel dan bħala ħlejqa spirtu setgħan mogħti l-​qawwa minn Alla. Ġesù hu “l-​qawmien u l-​ħajja,” u kemm hu taʼ faraġ li nkunu nafu li fil-​futur qarib “dawk kollha li jkunu fl-​oqbra jisimgħu leħnu u joħorġu”!—Ġwann 5:28, 29; 11:25.

Irxoxtijiet Oħrajn Isaħħulna t-​Tama

10. Kif tiddeskrivih int l-​ewwel irxoxt rapportat li sar minn appostlu?

¹⁰ Meta Ġesù bagħat lill-​appostli tiegħu jippridkaw dwar is-​Saltna, qal: “Qajjmu l-​mejtin.” (Mattew 10:5-8) M’għandniex xi ngħidu, biex jagħmlu dan, kellhom jistrieħu fuq il-​qawwa t’Alla. F’Ġaffa, fis-​sena 36 E.K., il-​mara devota Tabita (Għażżiela) raqdet fil-​mewt. Fost l-​għemejjel tajbin tagħha kien hemm dak li tagħmel ilbiesi għar-​romol li kienu fil-​bżonn, u dawn tgħidx kemm bkew meta semgħu li kienet mietet. Id-​dixxipli ppreparawha għad-​difna u bagħtu għall-​appostlu Pietru, forsi biex jikkonslahom. (Atti 9:32-38) Hu bagħat lil kulħadd ’il barra mill-​kamra taʼ fuq, talab, u qal: “Tabita, qum!” Din fetħet għajnejha, qamet bil-​qegħda, qabdet id Pietru, u dan qajjimha. L-​ewwel irxoxt rapportat li sar minn appostlu qanqal lil ħafna biex isiru jemmnu. (Atti 9:39-42) Dan jagħtina wkoll iżjed raġuni biex nittamaw fl-​irxoxt.

11. Liema hu l-​aħħar irxoxt li nsibu fil-​Bibbja?

¹¹ L-​aħħar irxoxt li nsibu fil-​Bibbja seħħ fi Troas. Meta Pawlu waqaf hemmhekk waqt li kien fuq it-​tieni vjaġġ missjunarju tiegħu, ta  taħdita li baqgħet sejra sa nofsillejl. Żagħżugħ li kien jismu Ewtiku ħassu għajjien ferm forsi minħabba s-​sħana taʼ ħafna msiebaħ u l-​ammont kbir taʼ nies li kien hemm fil-​post tal-​laqgħa. Dan raqad u waqaʼ minn fuq ħoġor it-​tieqa li kienet fit-​tielet sular. Lil dan “refgħuh mejjet,” mhux sempliċi mitluf minn sensih. Pawlu nxteħet għal fuq Ewtiku, għannqu miegħu, u qal lil dawk li kienu qegħdin jarawh: “Tibżgħu xejn, għax ruħu għadha fih.” Pawlu ried ifisser li ż-​żagħżugħ kien reġaʼ ngħata l-​ħajja. Dawk li kienu preżenti “tfarrġu mhux ftit.” (Atti 20:7-12) Illum, il-​qaddejja t’Alla jsibu faraġ kbir għax jafu li wħud minn sħabhom fis-​servizz t’Alla li mietu se jesperjenzaw it-​twettiq tat-​tama taʼ l-​irxoxt.

L-​Irxoxt—Tama li Ilha minn Żmien Żemżem

12. Pawlu liema konvinzjoni esprima meta deher quddiem Feliċ, il-​Gvernatur Ruman?

¹² Meta kien qed jidher quddiem il-​Gvernatur Ruman Feliċ, Pawlu xehed: “Nemmen dak kollu li hemm fil-​Liġi u l-​Profeti, waqt li nittama f’Alla . . . li kemm it-​tajbin u kemm il-​ħżiena għad iqumu minn bejn l-​imwiet.” (Atti 24:14, 15) Partijiet mill-​Kelma t’Alla, bħalma hi l-​“Liġi,” kif jiġbdu l-​attenzjoni lejn il-​qawmien tal-​mejtin?

13. Għala jistaʼ jingħad li Alla rrefera għall-​irxoxt meta lissen l-​ewwel profezija?

¹³ Alla nnifsu ta ħjiel dwar l-​irxoxt meta lissen l-​ewwel profezija f’Għeden. Meta ssentenzja lis-​“Serp tal-​qedem,” Satana x-​Xitan, Alla qal: “Jien inqajjem mibegħda bejnek u bejn il-​mara, bejn nislek u nisilha, u hu jisħaqlek rasek u int tisħaqlu għarqubu.” (Apokalissi 12:9; Ġenesi 3:14, 15) It-​tisħiq t’għarqub in-​nisel tal-​mara kien ifisser li jinqatel Ġesù Kristu. Biex imbagħad dan in-​Nisel ikun jistaʼ jisħaq ras is-​serp, Kristu kellu jitqajjem mill-​imwiet.

14. Kif inhu li Jehovah “m’huwiex Alla tal-​mejtin, iżda tal-​ħajjin”?

¹⁴ Ġesù ddikjara: “Li l-​mejtin iqumu, Mosè wkoll urieh, fir-​rakkont tax-​xitla taʼ l-​għollieq, għax lill-​Mulej isejjaħlu Alla taʼ Abraham, Alla taʼ Iżakk, u Alla taʼ Ġakobb. Issa hu m’huwiex Alla tal-​mejtin, iżda tal-​ħajjin, għax għalih kulħadd jgħix.” (Luqa 20:27, 37, 38; Eżodu 3:6) Abraham, Iżakk, u Ġakobb kienu mejtin, imma l-​iskop t’Alla li jirxoxtahom tant kien ċert li se jitwettaq, li għalih dawn kienu qishom għadhom ħajjin.

15. Abraham għala kellu raġun jemmen fl-​irxoxt?

¹⁵ Abraham kellu raġun jittama fl-​irxoxt, għax meta hu u martu Sara kienu xjuħ sew, u l-​abbiltà tagħhom li jipproduċu t-​tfal kienet mietet, Alla b’mod mirakoluż tahom lura l-​qawwiet riproduttivi tagħhom. Dan kien bħal irxoxt għalihom. (Ġenesi 18:9-11; 21:1-3; Lhud 11:11, 12) Meta binhom Iżakk kellu madwar 25 sena, lil Abraham Alla qallu biex jissagrifikah. Madankollu, malli Abraham kien se jagħti d-​daqqa tal-​mewt lil Iżakk, l-​anġlu taʼ Jehovah żammlu idu. Abraham kien “fehem li Alla kellu s-​setgħa saħansitra li jqajjem [lil Iżakk] mill-​mewt; u, fis-​sens taʼ tixbieha, ħadu tabilħaqq lura mill-​mewt.”—Lhud 11:17-19; Ġenesi 22:1-18.

16. Abraham, li issa jinsab rieqed fil-​mewt, x’qiegħed jistenna?

¹⁶ Abraham ittama f’irxoxt taħt il-​ħakma tal-​Messija, in-​Nisel imwiegħed. Mill-​post vantaġġuż tiegħu qabel ma sar bniedem, l-​Iben t’Alla nnota l-​fidi li kellu Abraham. Bħala l-​bniedem Ġesù Kristu, hu għalhekk qal lil-​Lhud: “Missierkom Abraham qabeż bil-​ferħ għall-​ħsieb li kien se jara l-​jum tiegħi.” (Ġwann 8:56-58; Proverbji 8:30, 31) Abraham jinsab rieqed fil-​mewt, jistenna li jiġi rxoxtat għall-​ħajja fuq l-​art taħt is-​Saltna Messjanika t’Alla.—Lhud 11:8-10, 13.

Evidenza mil-​Liġi u mis-​Salmi

17. “Dak kollu li hemm fil-​Liġi” kif ipponta lejn l-​irxoxt taʼ Ġesù Kristu?

¹⁷ It-​tama taʼ l-​irxoxt taʼ Pawlu kienet f’armonija maʼ “dak kollu li hemm fil-​Liġi.” Alla qal lill-​Iżraelin: “Ġibu l-​ewwel qatta tal-​ħsad lill-​qassis. U [nhar is-​16 taʼ Nisan] hu jxejjirha  quddiem il-​Mulej, biex togħġbuh.” (Levitiku 23:9-14) Forsi għax kellu din il-​liġi f’moħħu, Pawlu kiteb hekk: “Kristu kien imqajjem tassew mill-​imwiet, l-​ewwel frott fost dawk li raqdu.” Bħala “l-​ewwel frott,” Ġesù ġie rxoxtat nhar is-​16 taʼ Nisan tas-​sena 33 E.K. Iktar tard, matul il-​preżenza tiegħu, kellu jkun hemm irxoxt tal-​‘frott taʼ wara’—is-​segwaċi tiegħu midlukin bl-​ispirtu.—1 Korintin 15:20-23; 2 Korintin 1:21; 1 Ġwann 2:20, 27.

18. Pietru kif wera li l-​irxoxt taʼ Ġesù tbassar fis-​Salmi?

¹⁸ Is-​Salmi wkoll jappoġġaw l-​irxoxt. Nhar Pentekoste tas-​sena 33 E.K., l-​appostlu Pietru kkwota minn Salm 16:8-11, billi qal: “David jgħid fuqu [fuq Kristu], ‘Żammejt lill-​Mulej dejjem quddiemi, għax hu fuq il-​lemin tiegħi, biex qatt ma nitħarrek. Għalhekk ferħet qalbi u mtela bl-​hena lsieni; u ġismi wkoll jistrieħ fit-​tama, għax inti ma titlaqx fl-​imwiet lil ruħi, u ma tħallix il-​Qaddis tiegħek jara t-​taħsir.’” Pietru żied: “David ra minn qabel u ħabbar il-​qawmien tal-​Messija, u qal, ‘La kien mitluq fl-​imwiet u lanqas ġismu ma ra t-​taħsir.’ Lil dan Ġesù, Alla qajjmu mill-​imwiet.”—Atti 2:25-32.

19, 20. Pietru meta kkwota minn Salm 118:22, u dan kif ġie assoċjat mal-​mewt u l-​irxoxt taʼ Ġesù?

¹⁹ Xi jiem wara, Pietru deher quddiem is-​Sinedriju u reġaʼ kkwota mis-​Salmi. Meta staqsewh kif fejjaq lil tallab magħtub, l-​appostlu qal: “Kunu afu intom ilkoll, u l-​poplu kollu taʼ Iżrael: jekk dan ir-​raġel hu hawn quddiemkom qawwi u sħiħ, dan ġara bis-​saħħa taʼ l-​isem taʼ Ġesù Kristu taʼ Nazaret, li intom sallabtuh u Alla qajjmu mill-​imwiet. Din hi ‘l-​ġebla [Ġesù] li intom, il-​bennejja, warrabtu u li saret il-​ġebla tax-​xewka.’ F’ħadd ħliefu ma hemm salvazzjoni, għax imkien taħt is-​sema ma hemm isem ieħor mogħti lill-​bnedmin li bih aħna għandna nkunu salvi.”—Atti 4:10-12.

²⁰ Hawnhekk Pietru kkwota minn Salm 118:22, billi applika dak li ntqal hemmhekk għall-​mewt u l-​irxoxt taʼ Ġesù. Il-​Lhud, li xxewxu mill-​mexxejja reliġjużi tagħhom, ċaħduh lil Ġesù. (Ġwann 19:14-18; Atti 3:14, 15) Il-​fatt li ‘l-​bennejja warrbu l-​ġebla’ rriżulta fil-​mewt taʼ Kristu, imma l-​fatt li ‘l-​ġebla saret il-​ġebla tax-​xewka’ ssinjifika l-​qawmien tiegħu għall-​glorja fis-​sema bħala spirtu. Bħalma bassar is-​salmista, ‘dan seħħ bis-​saħħa tal-​Mulej’ Jehovah. (Salm 118:23) Li “l-​ġebla” ssir il-​ġebla tax-​xewka kien jinvolvi li Ġesù jiġi eżaltat bħala Sultan-Nominat.—Efesin 1:19, 20.

Imwiżnin bit-​Tama taʼ l-​Irxoxt

21, 22. Ġob liema tama esprima, bħalma naqraw f’Ġob 14:13-15, u din kif tistaʼ tfarraġ lil dawk li jġarrbu xi telfa llum?

²¹ Għalkemm aħna personalment qatt ma rajna lil xi ħadd imqajjem mill-​imwiet, innotajna ċerti rakkonti Skritturali li jassigurawna li se jkun hemm irxoxt. Għalhekk, jistaʼ jkollna t-​tama espressa mill-​bniedem rett Ġob. Meta kien qed isofri, dan talab bil-​ħrara: “M’hux li kont [Jehovah] taħbini f’Art l-​Imwiet . . . u tiffissali żmien li tiftakar fija. Li kien jistaʼ l-​bniedem imut u jerġaʼ għall-​ħajja. . . . Kont tgħajjatli u jiena nwieġbek, kont titgħaxxaq bl-​opra taʼ jdejk.” (Ġob 14:13-15) Alla ‘se jitgħaxxaq bl-​opra taʼ idejh,’ għax jixtieq b’mod ħerqan li jirxoxtah lil Ġob. X’tama jagħtina dan!

²² Membru tal-​familja li jibżaʼ minn Alla għandu mnejn jimrad serjament, bħalma  marad Ġob, u saħansitra għandu mnejn imut. Dawk li jġarrbu t-​telfa għandhom mnejn ixerrdu dmugħ taʼ niket, saħansitra bħalma beka Ġesù minħabba l-​mewt taʼ Lazzru. (Ġwann 11:35) Imma kemm hu taʼ faraġ li tkun taf li Alla se jsejjaħ lil dawk li qegħdin fil-​memorja tiegħu u huma se jwieġbu! Se jkun bħallikieku jkunu rritornaw minn xi vjaġġ—mhux morda jew immankati, imma f’saħħithom.

23. Xi wħud kif esprimew il-​fiduċja tagħhom fit-​tama taʼ l-​irxoxt?

²³ Il-​mewt taʼ Kristjana anzjana u leali qanqlet lil sħabha fit-​twemmin biex jiktbu hekk: “Jekk jogħġbok aċċetta s-​simpatija l-​iktar profonda tagħna għat-​telfa t’ommok. Ma tantx baqaʼ żmien qabel ma nilqgħuha lura—sabiħa u mimlija ħajja!” Ġenituri li tilfu lil binhom qalu: “Kemm inħarsu ’l quddiem lejn dak il-​jum meta Jason se jistenbaħ tassew! Se jħares madwaru u jara l-​Ġenna taʼ l-​art li tant kien imxennaq għaliha. . . . X’inċentiv għal dawk minna li ħabbewh biex ikunu hemmhekk ukoll.” Iva, u kemm nistgħu nkunu grati aħna li t-​tama taʼ l-​irxoxt hi ċerta!

X’Inhi t-​Tweġiba Tiegħek?

• Il-​fidi fil-​provvediment t’Alla li jqajjem il-​mejtin kif tistaʼ tkun taʼ ġid għalina?

• Liema ġrajjiet miktubin fl-​Iskrittura jagħtuna raġuni biex nittamaw fl-​irxoxt?

• Għala jistaʼ jingħad li l-​irxoxt huwa tama li ilha minn żmien żemżem?

• Liema tama li twiżinna jistaʼ jkollna rigward il-​mejtin?

[Mistoqsijiet taʼ Studju]

[Stampa f’paġna 10]

B’qawwa mingħand Jehovah, elija ta l-​ħajja lura lill-​iben żagħżugħ taʼ waħda armla

[Stampa f’paġna 12]

Meta Ġesù qajjem lil bint Ġajru għall-​ħajja, il-​ġenituri tagħha riedu jtiru bil-​ferħ

[Stampa f’paġna 15]

Nhar Pentekoste tas-​sena 33 E.K., l-​appostlu Pietru xehed bi qlubija li Ġesù kien ġie mqajjem mill-​imwiet