Aħna Minn Dawk Li Għandhom Fidi

FIT-​TAJWAN normalment tinżel xita bil-​qliel, u din tgħin biex wieħed jaħsad żewġ prodotti tajbin taʼ ross kull sena. Kultant, iżda, ix-​xita ma tinżilx f’waqtha, u ż-​żrieragħ imutu. Meta jiġri dan, x’jagħmel il-​bidwi? Jaqtaʼ qalbu? Le. Hu jaf li l-​perseveranza hi meħtieġa. Hu jkabbar żrieragħ ġodda u jiżraʼ l-​għelieqi mill-​ġdid. Imbagħad, jekk il-​kundizzjonijiet jitjiebu, il-​bidwi jaħsad prodott tajjeb. Xi drabi, iż-​żrigħ u l-​ħsad spiritwali huma simili ħafna għal dan.

Jipperseveraw fil-​Ħsad Spiritwali

Mas-​snin, ix-​Xhieda taʼ Jehovah fit-​Tajwan ħadmu iebes biex jiżirgħu u jaħsdu żrieragħ tal-​verità Skritturali fi nħawi li ma kinux jidhru produttivi. Eżempju taʼ dan hu l-​Miao-li County. L-​isforzi li kultant kienu jsiru biex tingħata xiehda f’dawk l-​inħawi ftit li xejn kien ikollhom riżultati. Għalhekk, fl-​1973, koppja miżżewġa taʼ pijunieri speċjali ġew inkarigati jaħdmu hemmhekk bħala proklamaturi tas-​Saltna full-time. Għall-​bidu, kien hemm xi wħud li wrew interess fl-​aħbar tajba. Madankollu, dan l-​interess malajr sfaxxa fix-​xejn. Imbagħad, il-​pijunieri speċjali ngħataw inkarigu band’oħra.

Fl-1991, intbagħtu żewġ pijunieri speċjali oħra hemmhekk. Imma għal darb’oħra l-​iżviluppi indikaw li l-​ambjent ma kienx tajjeb għal tkabbir spiritwali. Ftit snin wara, il-​pijunieri speċjali reġgħu ngħataw inkarigu ieħor f’postijiet oħra bit-​tama li jsibuhom iktar produttivi. B’hekk, għal perijodu taʼ żmien l-​art ma ġietx maħduma.

Sforzi Ġodda Jrendu l-​Frott

F’Settembru taʼ l-​1998 ġie deċiż li jsir sforz sabiex isibu l-​iktar inħawi produttivi fit-​territorju vast u mhux assenjat fit-​Tajwan. Dan kif kellu jseħħ? Xi 40 pijunier speċjali temporanji ġew inkarigati biex jaħdmu t-​territorji mhux assenjati u li l-​iktar li fihom nies.

Żewġt ibliet biswit xulxin fil-​Miao-li County kienu fost dawk it-​territorji magħżulin għall-​kampanja. Erbaʼ aħwa nisa mhux miżżewġin kellhom jaħdmu hemmhekk għal tliet xhur sabiex jipprovaw dak it-​territorju. Xi ftit taż-​żmien wara li waslu, huma kitbu rapporti sbieħ dwar in-​numru taʼ nies interessati li kienu qed jiltaqgħu magħhom. Sakemm spiċċaw it-​tliet xhur tagħhom taʼ pijunier f’dawk l-​inħawi, huma kienu qed jikkonduċu ħafna studji tal-​Bibbja fid-​djar. Huma stabbilew ukoll grupp għall-​istudju tal-​ktieb bl-​għajnuna t’anzjan minn kongregazzjoni fil-​qrib.

Tlieta minn dawn l-​aħwa nisa għamluha ċara li xtaqu jibqgħu jieħdu ħsieb dawn iż-​“żrieragħ” ċkejknin li kienu qed jikbru ġmielhom. Għalhekk, tnejn minnhom inħatru bħala pijunieri speċjali permanenti, u t-​tielet waħda kompliet taħdem hemmhekk bħala pijuniera regulari. Anzjan mill-​kongregazzjoni fil-​qrib mar joqgħod in-​naħa tagħhom sabiex jgħinhom. Iktar minn 60 ruħ attendew għall-​ewwel taħdita pubblika mogħtija f’dawk l-​inħawi. Issa l-​kongregazzjoni fil-​qrib qed tgħin lil dan il-​grupp, li għad m’għandux esperjenza, biex flimkien mad-​diversi studji tal-​ktieb, ikollhom ukoll il-​laqgħat tal-​Ħadd b’mod regulari. Dalwaqt għandha mnejn tiġi fformata kongregazzjoni ġdida f’dawn l-​inħawi.

 Il-​Perseveranza Ġġib Barkiet f’Partijiet Oħrajn tat-​Tajwan

Inħawi oħra wieġbu b’mod simili. Ġewwa l-​lan County fil-​grigal tal-​gżira, ġie stabbilit Studju tal-​Ktieb tal-​Kongregazzjoni ġdid fl-​inħawi fejn ħadmu l-​pijunieri speċjali temporanji.

Darba waħda fil-​għaxija, waqt li kienet qed tippriedka minn dar għal dar, pijuniera speċjali temporanja ltaqgħet maʼ żagħżugħ u wrietu volantin bil-​lista tal-​laqgħat tal-​kongregazzjoni. Hu mill-​ewwel staqsieha: “Nistaʼ nattendi għal-​laqgħa għada fil-​għaxija? U jekk nistaʼ, x’irrid nilbes?” Din il-​pijuniera spiċċat tikkonduċi tmien studji tal-​Bibbja kull ġimgħa maʼ wħud interessati. Fi ftit żmien, ħafna mill-​istudenti tal-​Bibbja kienu qed jippjanaw li jsiru pubblikaturi taʼ l-​aħbar tajba, bil-​mira li jitgħammdu.

Persuna oħra minn din l-​istess belt kienet ilha tmur il-​knisja għal ħafna snin imma ma setgħet issib lil ħadd li jgħallimha l-​Bibbja. Meta semgħet dwar l-​arranġament taʼ l-​istudju tal-​Bibbja, ħatfet l-​opportunità. Hi ġiet inkuraġġita biex tipprepara l-​lezzjoni tagħha minn qabel. Meta l-​pijuniera speċjali temporanja ġiet biex tikkonduċi l-​istudju, sabet li din il-​mara kienet għamlet il-​“ħowmwerk” tagħha billi xtrat pitazz u fih kitbet il-​mistoqsijiet imniżżlin fil-​pubblikazzjoni li kellha għall-​istudju tagħha. Imbagħad, kitbet it-​tweġibiet tagħha għal kull mistoqsija. Fil-​pitazz ikkopjat ukoll l-​iskritturi kollha ċitati fil-​lezzjoni li kellha. Sakemm l-​oħt marret biex tikkonduċi l-​ewwel studju, il-​mara diġà kienet preparat l-​ewwel tliet lezzjonijiet!

Kien hemm riżultati simili fil-​belt taʼ Dongshih fiċ-​ċentru tat-​Tajwan. Il-​pijunieri speċjali temporanji qassmu iktar minn 2,000 browxer fit-​tliet xhur li ħadmu hemmhekk. Sat-​tielet xahar, kienu qed jikkonduċu 16-il studju tal-​Bibbja fid-​djar. Il-​belt sofriet ħsarat kbar minħabba t-​terremot li laqat iċ-​ċentru tat-​Tajwan fil-​21 taʼ Settembru, 1999, imma xi wħud interessati baqgħu jagħmlu progress spiritwali, avolja kellhom jivvjaġġaw madwar siegħa sabiex jattendu l-​laqgħat fl-​eqreb Sala tas-​Saltna. Iva, il-​perseveranza hija meħtieġa biex naħsdu prodott tajjeb, kemm jekk dan ikun wieħed materjali kif ukoll wieħed spiritwali.

[Mappa f’paġna 8]

(Għall-formazzjoni sħiħa tat-​test, ara l-​pubblikazzjoni)

ĊINA

L-​Istrett tat-​Tajwan

TAJWAN

[Sors taʼ l-​istampa]

Mountain High Maps® Copyright © 1997 Digital Wisdom, Inc.