Għala Ma Jkollhomx Tfal?
Għala Ma Jkollhomx Tfal?
DELE u martu Fola * kienu jgħixu u jaħdmu fl-uffiċċju tal-fergħa tal-Watch Tower Society fin-Niġerja. Ftit wara li bdew jaqdu hemmhekk, marret iżżurhom omm Fola. Kienet vjaġġat mhux ħażin biex tiddiskuti kwistjoni li min jaf kemm-il darba ma setgħetx torqod minħabba fiha.
“Tant tagħmlu miegħi,” qaltilhom. “Tibagħtuli r-rigali, u tiġu żżuruni. Veru napprezzaha l-imħabba li turuni. Imma fl-istess ħin inħossni qalbi sewda għax dejjem moħħni jekk hux se jkun hemm min jagħmel l-istess magħkom meta taslu fl-età tiegħi. Issa ilkom sentejn miżżewġin, u għadkom bla tfal. Ma taħsbux li wasal iż-żmien li titilqu minn Betel biex ikollkom it-tfal?”
L-omm irraġunat hekk: Dele u Fola ilhom biżżejjed f’Betel. Issa wasal iż-żmien li jaħsbu għall-futur tagħhom. Żgur li hemm ħaddieħor li jistaʼ jagħmel xogħolhom. Dele u Fola xorta waħda jistgħu jkomplu fil-ministeru full-time, però f’xi aspett ieħor taʼ servizz fejn ikun jistaʼ jkollhom it-tfal u jġarrbu l-ferħ li jiġi milli jkunu ġenituri.
It-Tħassib taʼ l-Omm
Wieħed jistaʼ jifhem għala l-omm kienet tant imħassba. Ix-xewqa li wieħed ikollu t-tfal hija xi ħaġa fundamentali u tinsab f’kull soċjetà u f’kull żmien. Meta wieħed ikollu t-tfal jibda jħoss sentimenti profondi taʼ ferħ u taʼ tama. “Wirt il-Mulej huma l-ulied, ħlas tiegħu hu frott il-ġuf,” tgħid il-Bibbja. Iva l-abbiltà li xi ħadd jiled tarbija hija rigal prezzjuż mingħand Alla.—Salm 127:3.
F’ħafna soċjetajiet, issir pressjoni soċjali kbira fuq il-koppji miżżewġin biex dawn ikollhom it-tfal. Per eżempju, fin-Niġerja, fejn ġeneralment mara jkollha sitt itfal, huwa komuni li tismaʼ lin-nies jagħtu dawn ix-xewqat sbieħ lill-miżżewġin friski: “Disaʼ xhur oħra, nistennew li nisimgħu tarbija tibki f’darkom.” Għandu mnejn li l-għarus u l-għarusa jingħataw benniena għat-tarbija bħala rigal tat-tieġ. Il-kunjati joqogħdu b’sebaʼ għajnejn għall-kalendarju. Jekk fi żmien sena l-għarusa tkun għadha ma ħarġitx tqila, jibdew jitkixxfu biex jaraw jekk hemmx xi problema u jekk jistgħux jgħinu biex din tissolva.
Għal ħafna ommijiet ir-raġuni għala tnejn min-nies jiżżewġu hi biex ikollhom it-tfal, li ma tmurx tispiċċa r-razza. Omm Fola qaltilha: “Għalfejn iżżewwiġt la ma tridx tfal? La xi ħadd wiled lilek int ukoll trid tiled lil uliedek.”
Minbarra dan, hemm kwistjonijiet prattiċi x’wieħed jikkunsidra. F’ħafna pajjiżi taʼ l-Afrika, ftit li xejn għandhom provvedimenti governattivi għall-għajnuna lix-xjuħ. Is-soltu, huma t-tfal li jieħdu ħsieb il-ġenituri anzjani tagħhom, sewwa sew bħalma dawk l-istess ġenituri jkunu ħadu ħsiebhom meta kienu żgħar. Għalhekk, omm Fola rraġunat li jekk uliedha ma jkollhomx tfal, iċ-ċans hu li meta jixjieħu jibqgħu waħedhom, abbandunati, foqra, u lanqas biss min jidfinhom ma jkollhom.
Fl-Afrika, hija saħta li ma jkollokx tfal. F’ċerti nħawi, in-nisa huma mistennija li jagħtu prova li kapaċi jkollhom it-tfal saħansitra qabel iż-żwieġ.
Dawk li ma jirnexxilhomx joħorġu tqal jagħmlu minn kollox biex isibu mediċini u kura ħalli ma jibqgħux bla tfal.Minħabba dawn l-attitudnijiet, ħafna jqisu lil dawn il-koppji li jagħżlu li ma jkollhomx tfal bħala li qed jiċċaħħdu minn xi ħaġa li hija taʼ ġid għalihom. B’hekk ħafna jqisuhom bħala strambi, li jaraw sa mneħirhom, u li huma taʼ min jitħassarhom.
Ferħ u Responsabbiltà
In-nies taʼ Jehovah jafu kemm hu taʼ ferħ li trabbi t-tfal, però jafu wkoll li dan jirrikjedi responsabbiltà. Il-Bibbja tgħid hekk fl-1 Timotju 5:8: “Jekk xi ħadd ma jiħux ħsieb niesu, l-aktar dawk tal-familja tiegħu, dan ċaħad il-fidi u hu agħar minn wieħed li ma jemminx.”
Il-ġenituri jridu jipprovdu għall-familji tagħhom kemm materjalment u kemm spiritwalment, u dan jirrikjedi ħin u sforz konsiderevoli. Ma jirraġunawx li, ladarba huwa Alla li pprovdielhom it-tfal, għandu jieħu ħsiebhom hu. Huma jirrealizzaw li jridu jrabbu t-tfal skond il-prinċipji tal-Bibbja. Din hija responsabbiltà li ngħatat lill-ġenituri minn Alla biex iwettquha l-ħin kollu, u għalhekk m’hijiex xi ħaġa li għandhom iħalluha f’idejn ħaddieħor.—Dewteronomju 6:6, 7.
It-trobbija tat-tfal hija biċċa xogħol iebsa speċjalment f’dawn l-“aħħar jiem” taż-“żminijiet kritiċi li iebes biex issib tarfhom.” (2 Timotju 3:1-5, NW) Minbarra l-kundizzjonijiet ekonomiċi li dejjem sejrin għall-agħar, hemm ukoll il-ħażen li dejjem qed jiżdied fis-soċjetà u li jkompli jżid maʼ l-isfidi li hemm biex wieħed irabbi t-tfal illum. Xorta waħda, madwar id-dinja kollha hemm għadd taʼ koppji Kristjani li laqgħu din l-isfida u qed jirnexxilhom irabbu tfal devoti “fid-dixxiplina u t-twiddib tal-Mulej.” (Efesin 6:4) Jehovah jħobbhom u jberikhom lil dawn il-ġenituri għax-xogħol iebes tagħhom.
Għala Xi Wħud Jibqgħu bla Tfal
Mill-banda l-oħra, ħafna koppji Kristjani m’għandhomx tfal. Xi wħud minnhom għax m’humiex fertili, però dawn xorta waħda ma jadottawx tfal. Koppji oħra li jistaʼ jkollhom it-tfal jiddeċiedu li jibqgħu bla tfal. Dawn il-koppji ma jkollhomx tfal mhux għax ma jridux jidħlu għar-responsabbiltà, jew għax jibżgħu jiffaċċjaw l-isfidi taʼ li jkunu ġenituri. Anzi, huma ddeċidew li jidħlu b’ruħhom u b’ġisimhom għall-aspetti differenti tal-ministeru full-time li x’aktarx ma kinux ikunu possibbli kieku kellhom it-tfal. Xi wħud jaqdu bħala missjunarji. Oħrajn jaqdu lil Jehovah bħala indokraturi li jivvjaġġaw jew f’Betel.
Bħal kull Kristjan, huma jirrealizzaw li hemm xogħol urġenti x’isir. Ġesù qal: “Dan l-Evanġelju tas-Saltna jixxandar fid-dinja kollha, biex il-ġnus kollha jkollhom xhieda. Mbagħad jiġi t-tmiem.” Dan ix-xogħol qed isir illum. Huwa xogħol vitali, ladarba “t-tmiem” ikun ifisser il-qerda taʼ dawk li ma jagħtux kas taʼ l-aħbar tajba.—Mattew 24:14; 2 Tessalonikin 1:7, 8.
Il-perijodu li qed ngħixu fih aħna jixbah iż-żmien taʼ meta Noè u l-familja tiegħu bnew l-arka enormi li permezz tagħha baqgħu ħajjin meta ġie d-Dilluvju l-kbir. (Ġenesi 6:13-16; Mattew 24:37) Għalkemm it-tliet ulied taʼ Noè kienu lkoll miżżewġin, ħadd minnhom ma kellu tfal ħlief wara d-Dilluvju. Raġuni waħda setgħet kienet li dawn il-koppji riedu jmiddu għonqhom u jużaw l-enerġija kollha tagħhom għax-xogħol li kellhom jagħmlu. Forsi raġuni oħra setgħet kienet li ma xtaqux iġibu t-tfal f’dinja korrotta u vjolenti fejn il-“ħażen tal-bnedmin kien kiber . . . u f’qalbu ma kienx għajr li jfassal il-ħażen il-jum kollu.”—Ġenesi 6:5.
Ħafna koppji Kristjani ma jkollhomx tfal biex ikollhom iktar ċans għax-xogħol urġenti li Jehovah inkariga lin-nies tiegħu jagħmlu, però ma jfissirx li huwa ħażin li xi ħadd ikollu t-tfal illum. Xi koppji stennew ftit, qabel ma kellhom it-tfal; oħrajn iddeċidew li jibqgħu ma jkollhomx tfal u jaħsbu dwar il-possibbiltà li jkollhom it-tfal fid-dinja l-ġdida taʼ tjieba li se jġib Jehovah. Qegħdin dawn jaraw biss sa mneħirhom? Qegħdin huma jaħlu ħajjithom? Huma dawn taʼ min jitħassarhom?
Ħajjiet fis-Sigurtà u Ferħanin
Dele u Fola, li ssemmew iktar kmieni, issa ilhom għaxar snin miżżewġin, u għadhom determinati li jibqgħu bla tfal. “Qrabatna għadhom jiffittawna biex ikollna t-tfal,” jgħid Dele. “L-iktar ħaġa li tinkwetahom hija s-sigurtà tagħna fil-futur. Dejjem ngħidulhom li napprezzaw kemm jieħdu ħsiebna, imma bit-tattika nispjegawlhom li ninsabu kuntenti ħafna b’dak li qed nagħmlu. Inkwantu għas-sigurtà, nuruhom ċar li l-fiduċja tagħna qegħda f’Jehovah, li tant jieħu ħsieb dawk kollha li jibqgħu juru l-fedeltà u l-lealtà lejh. Nispjegaw ukoll li l-ġenituri m’għandhom ebda garanzija li għax għandhom it-tfal se jkollhom min jieħu ħsiebhom meta jixjieħu. Jeżistu nies li ftit li xejn jimpurtahom mill-ġenituri, oħrajn li ma jistgħux jgħinuhom, u jerġaʼ oħrajn imutu qabel il-ġenituri tagħhom. Mill-banda l-oħra, il-futur tagħna huwa assigurat f’idejn Jehovah.”
Dele u oħrajn bħalu jafdaw b’qalbhom kollha fil-wegħda li Jehovah għamel lill-qaddejja leali tiegħu: “Jien m’iniex se nħallik, anqas nitilqek.” (Lhud 13:5) Huma jemmnu wkoll li “id il-Mulej ma qsaritx li ma ssalvax, lanqas widnejh ma tqalu biex jisimgħu.”—Isaija 59:1.
Raġuni oħra għal fiduċja tiġi milli wieħed josserva kif Jehovah jsaħħaħ lill-qaddejja leali tiegħu. Is-sultan David kiteb: “Kont żagħżugħ, u issa xjeħt, u qatt ma rajt il-ġust minsi.” Aħseb ftit dwar dan. Taf int b’xi qaddej leali taʼ Jehovah li kien “minsi” għalkollox?—Salm 37:25.
Dawk li qattgħu ħajjithom jaqdu lil Jehovah u lil sħabhom Kristjani ma joqogħdux iħarsu lura lejn ħajjithom u jiddispjaċihom. Anzi, huma jirriflettu fuq ħajjithom b’sodisfazzjon kbir. Ħuna Iro Umah ilu jaqdi fis-servizz full-time għal 45 sena u fil-preżent qed jaqdi bħala indokratur li jivvjaġġa fin-Niġerja. Hu jgħid: “Għalkemm jien u marti m’għandniex tfal, aħna nżommu f’moħħna li Jehovah dejjem ħa ħsiebna kemm b’mod spiritwali kif ukoll b’mod materjali. Qatt ma naqasna xejn. Mhux se jabbandunana hekk kif nikbru fl-età. Dawn is-snin li qattajna fis-servizz full-time kienu l-iktar snin li ġabulna ferħ f’ħajjitna. Inħossuna grati li nistgħu naqdu lil ħutna, u dawn japprezzaw is-servizz tagħna u jgħinuna.”
Għalkemm ħafna koppji ma wildux tfal, dawn kellhom tip differenti taʼ tfal—dixxipli Kristjani li jqimu lil Jehovah. L-appostlu Ġwanni kellu madwar 100 sena meta kiteb: “Ma nafx b’ferħ akbar minn dak li nħoss meta nismaʼ li wliedi mexjin fil-verità.” (3 Ġwann 4) Ġwanni tgħidx kemm kien ikun ferħan meta kien jara l-fedeltà taʼ ‘wliedu,’ dawk li ġab f’kuntatt mal-“verità.”
Illum hemm abbundanza taʼ ferħ bħal dan. Bernice, mara Niġerjana, ilha miżżewġa għal 19-il sena u għażlet li ma jkollhiex tfal. Għal dawn l-aħħar 14-il sena qdiet bħala pijuniera. Hekk kif qed toqrob lejn l-età li ma jkunx jistaʼ jkollha t-tfal tagħha stess, ma jiddispjaċiha xejn li ħajjitha qed tqattagħha tagħmel dixxipli. Hi tgħid: “Kemm inħossni ferħana li qed nara lil uliedi spiritwali jikbru. Kieku kelli t-tfal tiegħi stess, niddubita jekk kinux ikunu ħaġa waħda miegħi daqs dawn li għenthom isibu l-verità. Jistmawni bħal ommhom, jiddiskutu miegħi l-ferħ u l-problemi tagħhom u jiġu għandi biex nagħtihom xi parir. Huma jiktbuli l-ittri, u nżuru lil xulxin.
“Xi wħud jaħsbu li jekk xi ħadd ma jkollux tfal ikollu s-saħta. Jgħidu li meta tixjieħ se tbati. Imma jien ma narahiex hekk. Naf li sakemm naqdi lil Jehovah b’ruħi kollha, hu se jippremjani u jieħu ħsiebi. Qatt ma se jabbandunani meta nixjieħ.”
Alla Jħobbna u Japprezzana
Dawk li wildu u rabbew tfal li jibqgħu “mexjin fil-verità” għandhom għalfejn ikunu grati. Mhux taʼ b’xejn li l-Bibbja tgħid: “Missier il-ġust għandu ħafna għax jifraħ, min għandu ibnu għaref jithenna bih. Jithennew bik missierek u ommok, u tifraħ bik dik li wilditek!”—Proverbji 23:24, 25.
Dawk il-Kristjani li ma kellhomx il-privileġġ li jġibu t-tfal fid-dinja ġew imberkin b’modi oħrajn. Ħafna minn dawn il-koppji kellhom irwol vitali f’li jkunu minn taʼ quddiem biex javanzaw l-interessi tas-Saltna. L-esperjenza, l-għerf u
s-sengħa li kisbu matul is-snin għenuhom biex jikkontribwixxu ferm għax-xogħol tas-Saltna. Ħafna minnhom huma minn taʼ quddiemnett f’dan ix-xogħol.Għalkemm baqgħu bla tfal biex ikunu jistgħu javanzaw l-interessi tas-Saltna, Jehovah berikhom b’familja spiritwali li tħobbhom u li tapprezza ferm is-sagrifiċċji li għamlu. Hu preċiż bħalma qal Ġesù: “Fost dawk kollha li minħabba fija u l-Evanġelju jħallu [letteralment “ma jibqgħux iżommu”] lil darhom jew lil ħuthom jew lil ommhom jew lil missierhom jew lil uliedhom jew l-għelieqi tagħhom, ma hemm ħadd fosthom li minn issa, f’din id-dinja stess, ma jirċevix, għal mitt darba iktar, djar, aħwa, subjien u bniet, ommijiet, ulied u għelieqi . . . u l-ħajja taʼ dejjem fiż-żmien li ġej.”—Mark 10:29, 30.
Kemm huma prezzjużi għal Jehovah dawk kollha li huma leali! Lil nies leali bħal dawn, kemm dawk li għandhom it-tfal u kemm dawk li m’għandhomx, l-appostlu Pawlu jaċċertahom: “Għax Alla m’hux se jkun hekk inġust li jinsa dak li intom għamiltu u l-imħabba li wrejtu lejn ismu meta qdejtu u għadkom taqdu lill-qaddisin.”—Lhud 6:10.
[Nota taʼ taħt]
^ par. 2 L-ismijiet ġew mibdulin.
[Stampi f’paġna 23]
Koppji bla tfal ġew imberkin b’familja spiritwali li tħobbhom