“Din hi l-​imħabba taʼ Alla, li nżommu l-​kmandamenti tiegħu.”—1 ĠWANN 5:3.

1. Liema kuntrast fil-​kondotta tan-​nies nistgħu naraw illum?

 Ħafna żmien ilu, il-​profeta Malakija ġie mnebbaħ biex ibassar żmien meta l-​kondotta tal-​poplu t’Alla kellha tispikka ħafna meta mqabbla mal-​kondotta taʼ nies li ma jaqdux lil Alla. Il-​profeta kiteb: “Imbagħad terġgħu taraw id-​differenza bejn il-​ġust u l-​ħażin, bejn min jaqdi lil Alla u bejn min ma jaqdihx.” (Malakija 3:​18, KŻ) Din il-​profezija qegħda titwettaq illum. Jekk nobdu l-​kmandamenti taʼ Jehovah, inkluż dawk dwar il-​ħtieġa għall-​indafa morali, inkunu qed ngħixu ħajjitna bl-​iktar mod għaqli. Madankollu, dan ma jkunx dejjem faċli. Kien għalhekk li Ġesù qal li l-​Kristjani kellhom jistinkaw ħafna biex jiksbu s-​salvazzjoni.—Luqa 13:​23, 24.

2. Liema pressjonijiet minn madwarna jagħmluha diffiċli għal xi wħud biex jibqgħu ndaf moralment?

² Għala huwa diffiċli li nibqgħu ndaf moralment? Raġuni waħda hi li għandna ħafna pressjonijiet minn madwarna. L-​industrija tad-​divertiment tpinġi r-​relazzjonijiet sesswali immorali bħala eċċitanti, taʼ pjaċir, u bħala xi ħaġa tal-​kbar, filwaqt li l-​konsegwenzi negattivi tagħhom tistaʼ tgħid jiġu injorati għalkollox. (Efesin 4:17-19) Il-​biċċa l-​kbira tar-​relazzjonijiet intimi li jintwerew ikunu bejn koppji li m’humiex miżżewġin lil xulxin. Ħafna drabi, ir-​relazzjoni li jkollhom dawk li jagħmlu s-​sess fil-​films u l-​programmi televiżivi tkun relazzjoni li mhix serja, ma jkun fiha rabta taʼ xejn. Normalment, ma jkollhomx affezzjoni jew rispett lejn xulxin. Ħafna nies ilhom jiġu influwenzati minn dawn l-​ideat sa minn meta kienu żgħar. Iktar minn hekk, għandna pressjoni kbira minn dawk taʼ madwarna biex nadottaw il-​moralità permissiva tal-​lum, u dawk li ma jagħmlux hekk xi drabi jiġu ridikolati jew saħansitra mibgħudin.—1 Pietru 4:4.

3. X’inhuma xi raġunijiet għala ħafna nies fid-​dinja jkollhom relazzjonijiet sesswali immorali?

 ³ Il-​pressjoni li nħossu minħabba l-​mod kif aħna magħmulin ukoll tagħmilhielna diffiċli biex nibqgħu ndaf moralment. Jehovah ħalaq lill-​bnedmin b’xewqat sesswali u dawn ix-​xewqat jistgħu jkunu qawwijin. Ix-​xewqat taʼ ġo fina għandhom x’jaqsmu ħafna maʼ dak li naħsbu, u l-​immoralità hi marbuta maʼ ħsibijiet li m’humiex fi qbil mal-​mod kif jaħsibha Jehovah. (Ġakbu 1:​14, 15) Per eżempju, skond stħarriġ li sar dan l-​aħħar, li ġie pubblikat fil-​British Medical Journal, ħafna minn dawk li kellhom x’jaqsmu sesswalment maʼ xi ħadd għall-​ewwel darba għamlu hekk sempliċement għax kienu kurjużi biex ikunu jafu x’jiġifieri li tagħmel is-​sess. Oħrajn kienu jaħsbu li dawk taʼ mparhom kważi kollha hekk kienu jagħmlu, u allura anki huma riedu jitilfu l-​verġinità tagħhom. Jerġaʼ oħrajn qalu li kienu ħallew l-​emozzjonijiet jiġru bihom jew li kienu “xi ftit fis-​sakra dak il-​ħin.” Jekk aħna rridu nogħġbu lil Alla, jeħtieġ li nirraġunaw b’mod differenti. Liema xorta taʼ raġunar jistaʼ jgħinna nibqgħu ndaf moralment?

Kun Konvint Sew

4. X’irridu nagħmlu biex nibqgħu ndaf moralment?

⁴ Biex nibqgħu ndaf moralment, irridu nirrikonoxxu li dan l-​istil taʼ ħajja se jiswielna taʼ ġid. Dan hu fi qbil maʼ dak li kiteb l-​appostlu Pawlu lill-​Kristjani f’Ruma: ‘Agħrfu x’inhi r-​rieda taʼ Alla, x’inhu t-​tajjeb li jogħġbu, x’inhu perfett.’ (Rumani 12:2) Li nirrikonoxxu kemm hu taʼ ġid għalina li nibqgħu ndaf moralment jinvolvi iktar milli sempliċement inkunu nafu li l-​immoralità hija kundannata fil-​Kelma t’Alla. Jeħtieġ li nifhmu r-​raġunijiet għala l-​immoralità hija kundannata u kif se nibbenefikaw jekk naħarbuha. Xi ftit minn dawn ir-​raġunijiet ġew kunsidrati fl-​artiklu taʼ qabel.

5. X’inhi r-​raġuni ewlenija għala l-​Kristjani għandhom ikunu jridu jibqgħu ndaf moralment?

⁵ Iżda, għall-​Kristjani, l-​iktar raġunijiet sodi biex jevitaw l-​immoralità sesswali għandhom x’jaqsmu mar-​relazzjoni li huma għandhom m’Alla. Aħna tgħallimna li hu jaf x’inhu l-​aħjar għalina. L-​imħabba tagħna għalih tgħinna nobogħdu dak li hu ħażin. (Salm 97:​10, KŻ) Alla huwa d-​Donatur taʼ “kull ħaġa tajba li tingħata u kull don perfett.” (Ġakbu 1:17) Hu jħobbna. Billi nobduh, aħna nuruh li nħobbuh u li napprezzaw dak kollu li għamel għalina. (1 Ġwann 5:3) Qatt ma rridu li niddiżappuntaw jew inweġġgħu lil Jehovah billi niksru l-​kmandi ġusti tiegħu. (Salm 78:​41, NW) Ma nixtiqux li minħabba l-​mod kif naġixxu, inġibu tmaqdir fuq it-​triq tal-​verità hekk qaddisa u taʼ tjieba. (Titu 2:5; 2 Pietru 2:2) Billi nibqgħu ndaf moralment, lill-​Wieħed Suprem inferrħulu qalbu.—Proverbji 27:11.

6. Għala huwa t’għajnuna li ngħidu lil oħrajn dwar il-​livelli morali tagħna?

⁶ Ladarba nkunu għamilna deċiżjoni soda biex nibqgħu ndaf moralment, se jkollna iktar protezzjoni jekk ngħidu lil oħrajn li għandna din  il-​konvinzjoni. Uri bil-​miftuħ li int qaddej t’Alla Jehovah u li int determinat li tibqaʼ żżomm il-​livelli għoljin tiegħu. Din hija ħajtek, ġismek huwa tiegħek, u għandek dritt tagħmel dak li tagħżel int. Ftakar li tkun qed tissogra li titlef ir-​relazzjoni prezzjuża tiegħek maʼ Missierna tas-​sema. Għalhekk, agħmilha ċara li m’int se tagħmel ebda kompromess fejn tidħol l-​integrità morali tiegħek. Kun kburi li tistaʼ tirrappreżenta lil Alla billi żżomm il-​prinċipji tiegħu. (Salm 64:11 [64:​10, NW]) Qatt m’għandek tistħi titkellem dwar il-​konvinzjonijiet morali tiegħek m’oħrajn. Il-​fatt li titkellem bil-​miftuħ jistaʼ jsaħħek, jipproteġik, u jinkuraġġixxi lil oħrajn biex jimxu fuq l-​eżempju tiegħek.—1 Timotju 4:12.

7. Kif nistgħu nibqgħu nżommu d-​determinazzjoni tagħna biex nibqgħu ndaf moralment?

⁷ Wara li nkunu ħadna deċiżjoni soda li nibqgħu nżommu prinċipji morali għoljin u nkunu għedna lil oħrajn dwar il-​waqfa tagħna, irridu nieħdu passi biex nibqgħu ngħixu fi qbil mad-​determinazzjoni tagħna. Mod wieħed kif nistgħu nagħmlu dan hu billi noqogħdu attenti liema ħbieb nagħżlu. “Min jagħmilha maʼ l-​għaref, isir għaref,” tgħid il-​Bibbja. Agħmilha maʼ dawk li għandhom l-​istess valuri morali li għandek int, għaliex ħbieb bħal dawn se jsaħħuk. Din l-​iskrittura tkompli tgħid: “Min imur mal-​boloh, jaqaʼ fl-​hemm.” (Proverbji 13:20) Safejn hu possibbli, evita nies li jistgħu jdgħajfulek id-​determinazzjoni tiegħek.—1 Korintin 15:33.

8. (a) Għala għandna nitimgħu lil moħħna b’affarijiet li jsaħħuna? (b) X’għandna nevitaw?

⁸ Iktar minn hekk, irridu nitimgħu lil moħħna affarijiet li huma veri, serji, ġusti, safjin, affarijiet li jiġbdu l-​imħabba, jistħoqqilhom il-​ġieħ, li huma virtużi, u li ħaqqhom tifħir. (Filippin 4:8) Dan nagħmluh billi nagħżlu bir-​reqqa dak li noqogħdu naraw u naqraw u l-​mużika li nisimgħu. Jekk ngħidu li l-​letteratura immorali ma tagħmlilniex ħsara nkunu qisna qed ngħidu li l-​letteratura morali ma tistax teffettwana b’mod pożittiv. Ftakar, huwa faċli ħafna biex il-​bnedmin imperfetti jaqgħu fl-​immoralità. Għalhekk, kotba, rivisti, films, u mużika li jqanqlu fina sentimenti sesswali se jġagħluna nħossu xewqat ħżiena, u dawn maż-​żmien jistgħu jwassluna biex nidinbu. Jekk irridu li nibqgħu ndaf moralment, jeħtieġ li nimlew moħħna b’għerf divin.—Ġakbu 3:17.

Passi li Jwasslu għall-​Immoralità

9-11. Bħalma juri Salamun permezz tar-​rakkont tiegħu, liema passi wasslu bil-​mod il-​mod lil wieħed żagħżugħ biex jaqaʼ fl-​immoralità?

⁹ Taʼ spiss, min jaqaʼ fl-​immoralità ma jagħmilx dan għax ifettillu hekk dak il-​ħin, imma jagħmel ċerti passi li wieħed wara l-​ieħor iwassluh għall-​immoralità. Kull pass jagħmilha dejjem iktar diffiċli għalih li jerġaʼ lura. Innota kif dan hu deskritt fi Proverbji 7:​6-23. Salamun josserva “raġel żagħżugħ nieqes mill-​qalb,” (NW) jew mill-​motiv tajjeb. Iż-​żagħżugħ “għaddej mit-​triq ħdejn il-​kantuniera taʼ darha [dar il-​prostituta], miexi lejn in-​naħa tad-​dar tagħha, fil-​għaxija, fi tmiem il-​jum, xħin kien dieħel il-​lejl u joktor id-​dlam.” Dan hu l-​ewwel żball tiegħu. “Fi tmiem il-​jum” ‘qalbu’ dderiġietu, mhux lejn xi triq kwalunkwe, imma lejn triq fejn kien jaf li s-​soltu kien ikun hemm prostituta.

¹⁰ Imbagħad naqraw: “Ħarġet mara tiltaqaʼ miegħu, liebsa taʼ żienja, qalbha kollha qerq.” Issa jaraha! Jekk irid, jistaʼ jerġaʼ lura u jmur lejn daru, imma issa dan hu iktar diffiċli minn qabel, speċjalment għaliex hu dgħajjef moralment. Hi taqbdu u tbusu. Issa li jkun ħallieha tagħtih bewsa, joqgħod jismagħha hekk kif tipprova tuża l-​persważjoni ħalli twaqqgħu: “Kelli noffri sagrifiċċju tas-​sliem,” tgħid hi. “Illum raddejt il-​wegħdiet tiegħi.” Is-​sagrifiċċju tas-​sliem kien jinkludi laħam, dqiq, żejt, u nbid. (Levitiku 19:5, 6; 22:21; Numri 15:​8-10) Billi semmiet dawn l-​affarijiet, hi setgħet kienet qed tipprova tagħtih x’jifhem li kienet mara spiritwali, u fl-​istess ħin, setgħet kienet qed turih li kellha ħafna ikel u xorb tajjeb fid-​dar tagħha. “Ejja, ħa niskru bl-​għaxqa taʼ l-​imħabba, nitpaxxew bl-​imħabba sa filgħodu.”

¹¹ Faċli nobsru x’ġara mbagħad. “Bil-​kliem ħelu tagħha waqqgħetu.” Hu jsegwiha lejn darha “bħal gendus sejjer għall-​qatla” u “bħal għasfur [li] jittajjar lejn ix-​xibka.” Salamun jikkonkludi b’dan il-​kliem li jagħtina x’naħsbu: ‘Ma jafx li hemm ħajtu fin-​nofs.’ Hemm ħajtu fin-​nofs għaliex  “Alla għad jagħmel ħaqq miż-​żienja u mill-​adulteri.” (Lhud 13:4) X’lezzjoni impressjonanti hi din, kemm għall-​irġiel u kemm għan-​nisa! Għandna nevitaw li nagħmlu saħansitra l-​ewwel passi f’mogħdija li twassal biex nitilfu l-​approvazzjoni t’Alla.

12. (a) L-​espressjoni “nieqes mill-​qalb” xi tfisser? (b) Kif nistgħu nissaħħu moralment?

¹² Innota li ż-​żagħżugħ fir-​rakkont kien “nieqes mill-​qalb.” Din l-​espressjoni turina li l-​ħsibijiet, ix-​xewqat, l-​affezzjonijiet, l-​emozzjonijiet, u l-​miri tiegħu fil-​ħajja ma kinux fi qbil maʼ dak li japprova Alla. Id-​dgħjufija morali tiegħu wasslet għal konsegwenzi traġiċi. F’dan iż-​żmien kritiku taʼ “l-​aħħar jiem,” irridu nagħmlu sforz biex nissaħħu moralment. (2 Timoteus 3:​1, Saydon) Alla jipprovdilna l-​għajnuna. Hu jipprovdi l-​laqgħat tal-​kongregazzjoni Kristjana biex jinkuraġġina ħalli nkomplu mexjin fit-​triq it-​tajba u biex niltaqgħu m’oħrajn li għandhom l-​istess mira li għandna aħna. (Lhud 10:​24, 25) Hemm l-​anzjani tal-​kongregazzjoni, li jieħdu ħsiebna u jgħallmuna l-​mogħdijiet tat-​tjieba. (Efesin 4:​11, 12) Għandna l-​Kelma t’Alla, il-​Bibbja, biex tidderiġina u tiggwidana. (2 Timotju 3:16) U f’kull ħin u f’kull mument, nistgħu nitolbu għall-​ispirtu t’Alla biex jgħinna.—Mattew 26:41.

Nitgħallmu mid-​Dnubiet taʼ David

13, 14. Is-​Sultan David kif wasal biex ikkommetta dnub gravi?

¹³ B’sogħba, iżda, fost dawk li waqgħu fl-​immoralità kien hemm saħansitra qaddejja t’Alla li kienu jispikkaw. Wieħed minn dawn kien is-​Sultan David, li kien qeda lil Alla fedelment għal għaxriet taʼ snin. M’hemm ebda dubju li kellu mħabba profonda għal Alla. Madankollu, hu beda miexi fil-​mogħdija tad-​dnub. Bħal fil-​każ taż-​żagħżugħ li ddeskriva Salamun, David għamel passi li wassluh għad-​dnub u komplew jiggravaw is-​sitwazzjoni.

¹⁴ Dak iż-​żmien, David kien taʼ mezz’età, forsi kien qabeż il-​ħamsin sena. Minn fuq il-​bejt tiegħu, hu ra mara sabiħa jisimha Batseba tinħasel. Hu staqsa dwarha u sar jaf min kienet. Skopra li żewġha, Urija, kien qed jieħu sehem fl-​assedju taʼ Rabba, belt ġewwa Għammon. David bagħat għaliha biex tmur fil-​palazz tiegħu u kellu x’jaqsam magħha. Wara, l-​istorja kkomplikat ruħha meta hi saret taf li kienet tqila minn David. David bagħat għal Urija biex jiġi lura mill-​gwerra, billi ttama li kien se jqattaʼ l-​lejl maʼ martu. B’hekk, kien ikun jidher li Urija kien missier it-​tarbija taʼ Batseba. Imma Urija ma marx id-​dar. Minħabba li kien iddisprat biex jgħatti dnubu, David imbagħad bagħat lil Urija lura lejn Rabba b’ittra għall-​kap taʼ l-​armata. Din l-​ittra kienet tgħid li Urija kellu jitpoġġa f’post fejn ikun faċli li jinqatel. B’hekk, Urija tilef ħajtu, u David iżżewweġ lill-​armla tiegħu qabel ma n-​nies saru jafu li hi kienet tqila.—2 Samwel 11:​1-27.

15. (a) Id-​dnub taʼ David kif inkixef? (b) David kif irreaġixxa għat-​twiddib tattikuż taʼ Natan?

¹⁵ Il-​pjan taʼ David biex jgħatti d-​dnub tiegħu deher li kien ħadem. Għaddew ix-​xhur, u twieled it-​tifel. Jekk David kellu f’moħħu din il-​ġrajja meta kiteb Salm 32, żgur li l-​kuxjenza tiegħu kienet qegħda tħabbtu. (Salm 32:​3-5) Madankollu, Alla xorta waħda kien jaf bid-​dnub tiegħu. Il-​Bibbja tgħid: “Għemil David ma għoġobx lill-​Mulej.” (2 Samwel 11:27) Jehovah bagħat lill-​profeta Natan, li bit-​tattika kollha ffaċċja lil David b’dak li kien għamel. David mill-​ewwel ammetta kollox u talab għall-​maħfra taʼ Jehovah. Minħabba li nidem ġenwinament, hu setaʼ jerġaʼ jkun fil-​paċi m’Alla. (2 Samwel 12:​1-13) David ma rrabjax għax ġie mwiddeb. Minflok, hu wera l-​attitudni deskritta f’Salm 141:5 (Saydon): “Ħa jsawwatni r-​raġel sewwa; tkun din tjubija; ħa jwiddibni; ikun dan żejt għal rasi, żejt li ma twarrbux rasi.”

16. Salamun ta liema twissija u parir għal meta xi ħadd jaqaʼ fid-​dnub?

¹⁶ Salamun, it-​tieni iben taʼ David u Batseba, għandu mnejn qagħad jirrifletti fuq dan il-​perijodu ikrah fil-​ħajja taʼ missieru. Iktar tard, hu kiteb: “Min jaħbi ħtijietu ma jiksibx ġid, imma min jistqarrhom u jaqtagħhom jaqlaʼ l-​ħniena.” (Proverbji 28:13) Jekk naqgħu fi dnub serju, għandna nobdu din it-​twiddiba ispirata, li sservi kemm bħala twissija u kemm bħala parir. Għandna nistqarru kollox maʼ Jehovah u nitolbu l-​għajnuna taʼ l-​anzjani tal-​kongregazzjoni. Waħda mir-​responsabbiltajiet importanti taʼ l-​anzjani hi li  jgħinu lil dawk li jkunu waqgħu fid-​dnub biex jerġgħu jaqbdu t-​triq it-​tajba.—Ġakbu 5:​14, 15.

Inbatu l-​Konsegwenzi tad-​Dnub

17. Għalkemm Jehovah jaħfer id-​dnubiet, x’ma jiskansalniex?

¹⁷ Jehovah ħafirlu lil David. Għala? Għaliex David kien bniedem taʼ integrità, għax hu kien juri ħniena m’oħrajn, u għax l-​indiema tiegħu kienet ġenwina. Minkejja dan, David ma ġiex meħlus mill-​konsegwenzi diżastrużi li ġew wara. (2 Samwel 12:​9-14) Dan japplika għal-​lum ukoll. Għalkemm Jehovah ma jibgħatx id-​deni lil dawk li juru ndiema, hu ma jiskansalhomx il-​konsegwenzi li jġibu magħhom l-​azzjonijiet ħżiena tagħhom. (Galatin 6:7) Xi affarijiet li ġġib magħha l-​immoralità sesswali jistgħu jkunu d-​divorzju, it-​tqala mhix mixtieqa, il-​mard trasmess sesswalment, u li l-​koppja titlef il-​fiduċja u r-​rispett taʼ xulxin.

18. (a) Lill-​kongregazzjoni f’Korintu, Pawlu x’qalilha biex tagħmel meta kien hemm każ taʼ dnub gravi li kien jinvolvi l-​kondotta sesswali? (b) Jehovah kif juri mħabba u ħniena mal-​midinbin?

¹⁸ Jekk aħna stess għamilna dnub serju, huwa faċli li nħossuna skuraġġiti meta nbatu l-​konsegwenzi taʼ l-​iżbalji li għamilna. Minkejja dan, m’għandna nħallu xejn iżommna lura milli nindmu u nerġgħu nkunu fil-​paċi m’Alla. Fl-​ewwel seklu, Pawlu kiteb lill-​Korintin biex ineħħu mill-​kongregazzjoni lil wieħed raġel li kien qed jipprattika ż-​żína maʼ xi ħadd tal-​familja tiegħu. (1 Korintin 5:​1, 13) Wara li dan ir-​raġel nidem ġenwinament, Pawlu qal lill-​kongregazzjoni: ‘Ħennu għalih u farrġuh, [u] uru mħabbitkom għalih.’ (2 Korintin 2:​5-8) Permezz taʼ dan il-​parir ispirat, nistgħu naraw kemm Jehovah juri mħabba u ħniena maʼ midinbin li jindmu. L-​anġli fis-​sema jifirħu meta midneb jerġaʼ lura u jindem.—Luqa 15:10.

19. Liema benefiċċji jistaʼ jkollna meta nħossu n-​niket xieraq minħabba li nkunu żvijajna?

¹⁹ Minkejja li nħossuna mnikktin minħabba li nkunu żvijajna, id-​dispjaċir li nħossu jistaʼ jgħinna biex ‘inqisu li ma ndurux [lura] lejn il-​ħażen.’ (Ġob 36:21) Tabilħaqq, il-​konsegwenzi koroh tad-​dnub għandhom jiskuraġġuna milli nerġgħu naqgħu fl-​istess għemil ħażin. Iktar minn hekk, din l-​esperjenza taʼ niket li għadda minnha minħabba l-​kondotta midinba tiegħu David użaha biex jagħti parir lil oħrajn. Hu qal: “Lill-​midinbin tiegħek ngħallem triqatek, . . . [biex] il-​ħatjin lejk jerġgħu lura.”—Salm 51:15 [51:​13, NW].

Il-​Ferħ Jiġi milli Naqdu lil Jehovah

20. Liema benefiċċji jkollna jekk nobdu l-​ħtiġijiet ġusti t’Alla?

²⁰ “Hienja dawk li jisimgħu l-​kelma taʼ Alla u jħarsuha!” qal Ġesù. (Luqa 11:28) L-​ubbidjenza għall-​ħtiġijiet ġusti t’Alla se ġġibilna l-​ferħ issa u fil-​futur etern. Jekk s’issa bqajna ndaf moralment, jalla nibqgħu hekk billi nużaw dak kollu li Jehovah pprovdielna biex jgħinna nagħmlu dan. Jekk waqajna fl-​immoralità, ejja nagħmlu l-​qalb, billi nafu li Jehovah hu lest li jaħfer lil  dawk li jindmu tassew, u ejja nkunu determinati li qatt ma nerġgħu naqgħu fl-​istess dnub.—Isaija 55:7.

21. Liema twissija li tana l-​appostlu Pietru tistaʼ tgħinna nibqgħu ndaf moralment jekk napplikawha?

²¹ Dalwaqt, din id-​dinja ħażina se tispiċċa, flimkien maʼ l-​attitudnijiet u l-​prattiċi immorali kollha tagħha. Jekk nibqgħu ndaf moralment, se nibbenefikaw issa u għal dejjem. L-​appostlu Pietru kiteb: “Ħuti għeżież, waqt li nistennew dan kollu, qisu li jsibkom fis-​sliem, bla tebgħa u bla dnub. . . . Ladarba tafu dan, għassu sewwa li ma tisfgħux maħkuma mill-​iżbalji taʼ dawn in-​nies bla rażan u taqgħu mnejn tinsabu fis-​sod.”—2 Pietru 3:​14, 17.

Tistaʼ Tispjega?

• Għala jistaʼ jkun diffiċli li nibqgħu ndaf moralment?

• X’nistgħu nagħmlu biex insaħħu d-​determinazzjoni tagħna li nibqgħu ngħixu fi qbil maʼ prinċipji morali għoljin?

• Liema lezzjonijiet nistgħu nitgħallmu mid-​dnubiet taż-​żagħżugħ li semma Salamun?

• L-​eżempju taʼ David x’jgħallimna dwar l-​indiema?

[Mistoqsijiet taʼ Studju]

[Stampa f’paġna 13]

Ikun taʼ protezzjoni għalina li ngħidu lil oħrajn dwar il-​waqfa tagħna fi kwistjonijiet taʼ moralità

[Stampi f’paġna 17]

Minħabba li David nidem sinċerament, Jehovah ħafirlu