TIDHER il-​paċi dinjija fuq ix-​xefaq? Darba ħafna hekk kienu jaħsbu imma issa huma dubjużi. Skond rapport li jiddiskuti l-​isfidi għall-​futur tagħna, pubblikat fid-​Daily Mail & Guardian taʼ l-​Afrika t’Isfel, “tbassir taʼ ordni internazzjonali ġdid li sar biss 10 snin ilu issa jidher li m’hemmx tama li jitjieb.”

L-awturi jirriflettu fuq l-​ispirtu taʼ tama li kien jeżisti daqs għaxar snin ilu. Il-​Gwerra Bierda kienet għadha kif spiċċat, u l-​ġlieda bejn is-​superpotenzi kienet ġiet fix-​xejn. F’dak li deher bħala l-​bidu taʼ era ġdida, ħafna stennew li l-​bniedem kien se jagħmel progress f’li jsolvi l-​faqar, il-​mard, u kwistjonijiet ambjentali. “Dan it-​tbassir illum jidher ideali imma mhux realistiku,” jgħid ir-​rapport. “Konflitti ġodda faqqgħu f’postijiet li bilkemm konna nafu bihom; il-​faqar fid-​dinja qed ikompli jiżdied. Hemm iżjed pajjiżi b’armamenti nukleari. Ir-​reputazzjoni tal-​ĠM ħadet daqqa taʼ ħarta ġmielha billi ma kinitx kapaċi ssolvi sensiela taʼ kriżijiet umanitarji. L-​attitudni qed tinbidel minn waħda ideali għal dik verament ħażina.”

L-Istudenti tal-​Bibbja jafu li minkejja l-​isforzi li jagħmel il-​bniedem, tajbin kemm huma tajbin, dawn qatt ma jistgħu jirnexxu kompletament. Għala le? Għaliex bħalma tgħid il-​Bibbja, “id-​dinja kollha qiegħda taħt idejn il-​Ħażin.” (1 Ġwann 5:19) Sakemm għadha taħt il-​ħakma taʼ Satana, id-​dinja ma tistax tkun f’kundizzjonijiet taʼ Ġenna kif ħalaqha Alla.

Fl-istess ħin, hemm raġuni għalfejn nistgħu nkunu ottimisti. Alla Jehovah jwiegħed li se jġib paċi dinjija, mhux billi jsewwi lil din is-​sistema t’affarijiet, imma billi jġib “art ġdida” li fiha “tgħammar il-​ġustizzja.” (2 Pietru 3:13) Iva, permezz tas-​Saltna t’Alla l-​globu tagħna se jiġi trasformat f’dar ferriħija, fil-​paċi, fejn il-​ħajja u x-​xogħol iġibu ferħ kontinwu lill-​umanità ubbidjenti. Iktar minn hekk, Alla jwiegħed li “jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed.” Dawn il-​wegħdi m’humiex ibbażati fuq wegħdi fiergħa tal-​bniedem. Imma huma bbażati fuq il-​Kelma li ma tonqosx tal-​Ħallieq li ma jistax jigdeb.—Apokalissi 21:4; Titu 1:2.