“Li aħna kwalifikati b’mod adegwat jiġi minn Alla, li tabilħaqq ikkwalifikana b’mod adegwat biex inkunu ministri taʼ patt ġdid.”—2 KORINTIN 3:​5, 6, NW.

1, 2. Il-​Kristjani kollha taʼ l-​ewwel seklu liema responsabbiltà kellhom, imma l-​affarijiet kif inbidlu?

 Fl-​ewwel seklu taʼ l-​Era Komuni tagħna, il-​Kristjani kollha kellhom responsabbiltà importanti—id-​dmir li jippridkaw l-​aħbar tajba. Ilkoll kemm huma kienu midlukin u ministri tal-​patt il-​ġdid. Xi wħud kellhom ukoll responsabbiltajiet oħrajn, bħal li jgħallmu fil-​kongregazzjoni. (1 Korintin 12:​27-29; Efesin 4:11) Il-​ġenituri kellhom obbligi importanti fil-​familja. (Kolossin 3:​18-21) Imma lkoll kienu jieħdu sehem fix-​xogħol bażiku u vitali taʼ l-​ippridkar. Fil-​Grieg oriġinali taʼ l-​Iskrittura Kristjana, din ir-​responsabbiltà kienet tissejjaħ di·a·ko·niʹa, jiġifieri, servizz jew ministeru.—Kolossin 4:17.

² Maż-​żmien, l-​affarijiet inbidlu. Żviluppat klassi, magħrufa bħala l-​kleru, u din żammet għaliha l-​privileġġ taʼ l-​ippridkar. (Atti 20:30) Il-​membri tal-​kleru kienu grupp żgħir minn dawk li kienu jsejħu lilhom infushom Kristjani. Il-​maġġuranza saru magħrufin bħala l-​lajċi. Il-​lajċi ġew mgħallmin li għandhom ċerti obbligi, bħal li jagħtu kontribuzzjonijiet għall-​manteniment tal-​kleru. Iżda fejn għandu x’jaqsam l-​ippridkar, il-​biċċa l-​kbira mil-​lajċi ma saru xejn iżjed ħlief semmiegħa passivi.

3, 4. (a) Individwu kif isir ministru fil-​Kristjaneżmu? (b) Min hu meqjus bħala ministru fil-​Kristjaneżmu, u l-​affarijiet għala huma differenti fost ix-​Xhieda taʼ Jehovah?

³ Il-​membri tal-​kleru jsostnu li huma ministri (minn minister, traduzzjoni Latina taʼ  di·aʹko·nos, “qaddej”). a Għal dan, huma jiggradwaw mill-​kulleġġi jew seminarji u jiġu ordnati. The International Standard Bible Encyclopedia tgħid: “‘Ordni’ u ‘ordinazzjoni’ ġeneralment jirreferu għall-​istat speċjali li jingħata lill-​ministri jew qassisin f’ċerimonji uffiċjali minn awtorità superjuri, liema stat jenfasizza l-​awtorità fuq l-​ippridkar tal-​Kelma jew fuq l-​amministrazzjoni tas-​sagramenti, jew fuq it-​tnejn.” Minn min issir l-​ordinazzjoni tal-​ministri? The New Encyclopædia Britannica tgħid: “Fil-​knejjes li żammew l-​episkopat storiku, il-​ministru li jagħmel l-​ordinazzjoni jkun dejjem isqof. Fil-​knejjes Presbiterjani, l-​ordinazzjoni ssir minn ministri tal-​presbiterju.”

⁴ Għaldaqstant, fil-​knejjes tal-​Kristjaneżmu, il-​privileġġ taʼ li tkun ministru ġie limitat għal ċerti wħud biss. Madankollu, m’huwiex hekk fost ix-​Xhieda taʼ Jehovah. Għala le? Għaliex l-​affarijiet fil-​kongregazzjoni Kristjana taʼ l-​ewwel seklu kienu differenti.

Min Huma Tassew il-​Ministri t’Alla?

5. Skond il-​Bibbja, dawk li qed jaqdu bħala ministri lil min jinkludu?

⁵ Skond il-​Bibbja, l-​adoraturi kollha taʼ Jehovah, kemm jekk fis-​sema u kemm jekk fuq l-​art, huma ministri. L-​anġli kienu jaqdu lil Ġesù. (Mattew 4:11; 26:53; Luqa 22:43) Barra minn hekk, l-​anġli “jaqdu lil dawk li għandhom jiksbu s-​salvazzjoni.” (Lhud 1:14; Mattew 18:10) Ġesù kien ministru. Hu qal: “Bin il-​bniedem, ma ġiex biex ikun moqdi, imma biex jaqdi.” (Mattew 20:28; Rumani 15:8) Għalhekk, ladarba s-​segwaċi taʼ Ġesù kellhom ‘jimxu fuq il-​passi tiegħu’ mill-​qrib, m’għandniex għalfejn nistagħġbu li huma wkoll iridu jkunu ministri.—1 Pietru 2:21.

6. Ġesù kif indika li d-​dixxipli tiegħu għandhom ikunu ministri?

⁶ Ftit qabel ma telaʼ s-​sema, Ġesù qal lid-​dixxipli tiegħu: “Morru, . .  agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu, u għallmuhom iħarsu dak kollu li ordnajtilkom jien.” (Mattew 28:​19, 20) Id-​dixxipli taʼ Ġesù kellhom ikunu wħud li jagħmlu dixxipli—ministri. Id-​dixxipli l-​ġodda li jagħmlu huma kellhom jitgħallmu jħarsu dak kollu li ordna Ġesù, inkluż l-​ordni li jmorru u jagħmlu dixxipli. Dixxiplu veru taʼ Ġesù Kristu kellu jkun ministru, sew jekk ikun raġel jew mara, kbir jew żgħir.—Ġoel 3:​1, 2 [2:​28, 29, NW].

7, 8. (a) Liema skritturi juru li l-​veri Kristjani huma lkoll ministri? (b) Liema mistoqsijiet iqumu dwar l-​ordinazzjoni?

⁷ Fi qbil maʼ dan, f’Pentekoste tas-​sena 33 E.K., id-​dixxipli kollha taʼ Ġesù li kienu preżenti, irġiel u nisa, ngħaqdu f’li jxandru “l-​għeġubijiet taʼ Alla.” (Atti 2:​1-11) Iżjed minn hekk, l-​appostlu Pawlu kiteb: “Wieħed jemmen f’qalbu biex ikollu l-​ġustizzja u jistqarr [“pubblikament,” NW] b’xufftejh biex ikollu s-​salvazzjoni.” (Rumani 10:10) Pawlu qal dan il-​kliem, mhux lil xi klassi tal-​kleru biss, imma “lill-​maħbubin kollha taʼ Alla li [kienu] Ruma.” (Rumani 1:​1, 7) Bl-​istess mod, ‘il-​qaddisin f’Efesu u dawk kollha li jemmnu fi Kristu Ġesù’ kellhom ‘ixiddu riġlejhom bil-​ħeġġa taʼ l-​Evanġelju tas-​sliem.’ (Efesin 1:1; 6:15) U dawk kollha li semgħu tinqara l-​ittra indirizzata lil-​Lhud kellhom ‘iżommu sħiħ fl-​istqarrija pubblika tat-​tama tagħhom.’—Lhud 10:23.

 ⁸ Iżda wieħed meta jsir ministru? Fi kliem ieħor, meta jiġi ordnat? U minn min issir l-​ordinazzjoni?

L-​Ordinazzjoni Bħala Ministru—Meta?

9. Ġesù meta ġie ordnat, u minn min?

⁹ Sabiex tara meta wieħed isir ministru u minn min jiġi ordnat, ikkunsidra l-​eżempju taʼ Ġesù Kristu. Hu la kellu ċertifikat taʼ l-​ordinazzjoni u lanqas lawrja minn xi seminarju biex juri li kien ministru, u lanqas ma ġie ordnat minn xi bniedem komuni. Allura, għala nistgħu ngħidu li kien ministru? Għaliex fih twettaq il-​kliem li kien bassar Isaija: ‘L-​Ispirtu tal-​Mulej fuqi, għax hu kkonsagrani biex inwassal il-​bxara t-​tajba.’ (Luqa 4:​17-​19; Isaija 61:1) Dan il-​kliem ma jħallilna l-​ebda dubju li Ġesù kien inkarigat biex ixandar l-​aħbar tajba. Minn min? Ladarba kien l-​ispirtu taʼ Jehovah li dilku għal dan ix-​xogħol, allura jidher ċar li Ġesù ġie ordnat minn Alla Jehovah. Meta ġara dan? L-​ispirtu taʼ Jehovah fil-​fatt niżel fuq Ġesù meta tgħammed. (Luqa 3:21, 22) Għalhekk, hu ġie ordnat fil-​magħmudija tiegħu.

10. Min ‘jikkwalifikah b’mod adegwat’ lil ministru Kristjan?

¹⁰ Xi ngħidu għas-​segwaċi taʼ Ġesù taʼ l-​ewwel seklu? Il-​pożizzjoni tagħhom bħala ministri wkoll ġiet mingħand Jehovah. Pawlu qal: “Li aħna kwalifikati b’mod adegwat jiġi minn Alla, li tabilħaqq ikkwalifikana b’mod adegwat biex inkunu ministri taʼ patt ġdid.” (2 Korintin 3:​5, 6, NW) Jehovah kif jikkwalifikahom lill-​adoraturi tiegħu biex ikunu ministri? Ikkunsidra l-​eżempju taʼ Timotju, li l-​appostlu Pawlu sejjaħlu “[“ministru,” Karm Żammit] fix-​xogħol taʼ Alla għax-​xandir taʼ l-​Evanġelju taʼ Kristu.”—1 Tessalonikin 3:2.

11, 12. Timotju kif għamel progress biex isir ministru?

¹¹ Dan il-​kliem, li kien indirizzat lil Timotju, jgħinna nifhmu kif dan sar ministru: “Imma int ibqaʼ miexi f’dak li tgħallimt u emmint bis-​sħiħ, għax taf mingħand min tgħallimtu, u għax sa minn żgħoritek sirt midħla tal-​Kotba Mqaddsa, li jistgħu jagħtuk l-​għerf li jwassal għas-​salvazzjoni permezz tal-​fidi fi Kristu Ġesù.” (2 Timotju 3:​14, 15) Il-​fidi taʼ Timotju, li kienet se tqanqlu biex jagħmel dikjarazzjoni pubblika, kienet mibnija fuq l-​għarfien taʼ l-​Iskrittura. Ġie dan minn qari persunali biss? Le. Timotju kellu bżonn l-​għajnuna biex jikseb għarfien eżatt u fehma spiritwali dwar dak li kien qed jaqra. (Kolossin 1:9) B’hekk, Timotju  kien ‘ipperswadut biex jemmen’ (NW). Ladarba hu kien jaf l-​Iskrittura ‘minn żgħoritu,’ l-​ewwel għalliema tiegħu x’aktarx li kienu ommu u nanntu, waqt li jidher ċar li missieru ma kienx taʼ l-​istess twemmin.—2 Timotju 1:5.

¹² Madankollu, b’daqshekk Timotju ma sarx ministru. L-​ewwelnett, il-​fidi tiegħu ssaħħet permezz taʼ sħubija maʼ Kristjani f’kongregazzjonijiet fil-​qrib. Kif nafuh dan? Għaliex meta Pawlu ltaqaʼ għall-​ewwel darba maʼ Timotju, iż-​żagħżugħ “kellu fama tajba maʼ l-​aħwa taʼ Listra u Ikonju.” (Atti 16:2) Iżjed minn hekk, f’dak iż-​żmien ċertu aħwa rġiel kienu jiktbu ittri lill-​kongregazzjonijiet sabiex isaħħuhom. U xi indokraturi kienu jżuruhom biex jinkuraġġuhom. Dawn il-​provvedimenti għenu lil Kristjani bħal Timotju biex jimxu ’l quddiem spiritwalment.—Atti 15:​22-32; 1 Pietru 1:1.

13. Timotju meta ġie ordnat bħala ministru, u għala tistaʼ tgħid li l-​progress spiritwali tiegħu ma waqafx hemm?

¹³ Fi qbil mal-​kmand taʼ Ġesù mniżżel f’Mattew 28:​19, 20, nistgħu nibqgħu ċerti li, f’xi mument, il-​fidi taʼ Timotju qanqlitu biex jimita lil Ġesù u jitgħammed. (Mattew 3:​15-​17; Lhud 10:​5-9) Il-​magħmudija ssimbolizzat id-​dedikazzjoni b’qalb sħiħa li Timotju għamel lil Alla. Fil-​magħmudija tiegħu Timotju sar ministru. Minn dakinhar ’il quddiem, ħajtu, saħħtu, u kull ħaġa li kellu saru t’Alla. Din kienet parti integrali mill-​qima tiegħu, “servizz sagru.” Madankollu, Timotju ma waqafx hemm. Hu kompla jikber spiritwalment, u sar ministru Kristjan matur. Dan ġara minħabba s-​sħubija mill-​qrib li Timotju kellu maʼ Kristjani maturi bħal Pawlu, l-​istudju persunali tiegħu, u l-​attività żeluża tiegħu taʼ l-​ippridkar.—1 Timotju 4:​14; 2 Timotju 2:2; Lhud 6:1.

14. Illum, wieħed li ‘jkun dispost sewwa għall-​ħajja taʼ dejjem’ kif jagħmel progress biex isir ministru?

¹⁴ Illum, l-​ordinazzjoni taʼ ministru Kristjan issir bl-​istess mod. Individwu li ‘jkun dispost sewwa għall-​ħajja taʼ dejjem’ jingħata l-​għajnuna biex jitgħallem dwar Alla u l-​iskopijiet tiegħu permezz taʼ studju tal-​Bibbja. (Atti 13:​48, NW) Dan imbagħad jitgħallem japplika l-​prinċipji tal-​Bibbja f’ħajtu. Barra minn hekk, hu jitgħallem ukoll jitlob mill-​qalb u b’mod li juri li tassew iħobb lil Jehovah. (Salm 1:​1-3; Proverbji 2:​1-9; 1 Tessalonikin 5:​17, 18) Hu jassoċja m’oħrajn taʼ l-​istess twemmin u jieħu vantaġġ mill-​provvedimenti u mill-​arranġamenti li jagħmel “l-​ilsir leali u diskret.” (Mattew 24:​45-​47, NW; Proverbji 13:20; Lhud 10:​23-​25) B’hekk, hu jagħmel progress permezz taʼ proċess organizzat t’edukazzjoni.

15. X’jiġri meta persuna titgħammed? (Ara wkoll in-​nota taʼ taħt.)

¹⁵ Maż-​żmien, wara li l-​istudent tal-​Bibbja jkun żviluppa mħabba lejn Alla Jehovah u fidi soda fis-​sagrifiċċju tal-​fidwa, ikun jixtieq jiddedika għalkollox lilu nnifsu lil Missieru tas-​sema. (Ġwann 14:1) Hu jagħmel din id-​dedikazzjoni personalment bit-​talb u mbagħad jitgħammed biex juri pubblikament u b’mod simboliku dan  l-​att privat. Il-​magħmudija tiegħu hija ċ-​ċerimonja taʼ l-​ordinazzjoni tiegħu għaliex dakinhar isir magħruf bħala qaddej dedikat għalkollox, di·aʹko·nos, t’Alla. Hu jrid jibqaʼ separat mid-​dinja. (Ġwann 17:16; Ġakbu 4:4) Hu ppreżenta lilu nnifsu “b’sagrifiċċju ħaj, qaddis, jogħġob lil Alla” mingħajr riżerva jew kundizzjoni. (Rumani 12:1) b Hu ministru t’Alla, u qed jimita lil Kristu.

X’Inhu l-​Ministeru Kristjan?

16. X’kienu xi ftit mir-​responsabbiltajiet taʼ Timotju bħala ministru?

¹⁶ X’kien jinkludi l-​ministeru taʼ Timotju? Hu kellu dmirijiet speċjali bħala s-​sieħeb taʼ Pawlu fil-​vjaġġi tiegħu. Ukoll meta sar anzjan, Timotju ħadem iebes biex jgħallem u jsaħħaħ lil sħabu l-​Kristjani. Imma l-​parti ċentrali tal-​ministeru tiegħu kienet l-​istess bħal dik taʼ Ġesù u Pawlu—l-​ippridkar taʼ l-​aħbar tajba u li jagħmel dixxipli. (Mattew 4:​23; 1 Korintin 3:5) Pawlu qal lil Timotju: “Imma int oqgħod dejjem b’għajnejk miftuħa, stabar fit-​tiġrib, agħmel ħidma taʼ evanġelista, aqdi sewwa l-​ministeru tiegħek.”—Korsiv tagħna; 2 Timotju 4:5.

17, 18. (a) Il-​ministri Kristjani jieħdu sehem f’liema ministeru? (b) Kemm huwa importanti x-​xogħol taʼ l-​ippridkar għal ministru Kristjan?

¹⁷ Dan hu simili għall-​ministri Kristjani llum. Huma jieħdu sehem f’ministeru pubbliku, li huwa xogħol taʼ evanġelizzazzjoni, billi juru lil oħrajn is-​salvazzjoni fuq il-​bażi tas-​sagrifiċċju taʼ Ġesù u jgħallmu lil uħud umlin biex isejħu isem Jehovah. (Atti 2:​21; 4:​10-​12; Rumani 10:13) Huma juru b’mod ċar mill-​Bibbja li s-​Saltna hija l-​unika tama għall-​bniedem li qed ibati u juru li anki issa l-​affarijiet huma aħjar kemm-il darba ngħixu fuq prinċipji divini. (Salm 15:​1-5; Mark 13:10) Imma ministru Kristjan ma jippridkax evanġelju soċjali. Minflok, hu jgħallem li ‘d-​devozzjoni lejn Alla toffri l-​wegħda tal-​ħajja issa u dik li għandha tiġi.’—1 Timotju 4:​8, NW.

¹⁸ Huwa minnu li l-​biċċa l-​kbira mill-​ministri għandhom modi oħrajn taʼ servizz, u dawn ivarjaw minn Kristjan għall-​ieħor. Ħafna għandhom l-​obbligi tal-​familja. (Efesin 5:21–​6:4) L-​anzjani u l-​qaddejja ministerjali għandhom dmirijiet fil-​kongregazzjoni. (1 Timotju 3:​1, 12, 13; Titu 1:5; Lhud 13:7) Ħafna Kristjani jgħinu fil-​bini taʼ Swali tas-​Saltna. Xi wħud għandhom il-​privileġġ meraviljuż li jaħdmu bħala volontieri f’waħda mid-​djar Betel tal-​Watch Tower Society. Madankollu, il-​ministri Kristjani kollha jieħdu sehem fl-​ippridkar taʼ l-​aħbar tajba. M’hemm l-​ebda eċċezzjonijiet. Il-​fatt li nipparteċipaw f’dan ix-​xogħol juri biċ-​ċar jekk aħniex ministri Kristjani tassew.

L-​Attitudni taʼ Ministru Kristjan

19, 20. Il-​ministri Kristjani liema attitudni jridu jikkultivaw?

¹⁹ Ħafna mill-​ministri tal-​Kristjaneżmu jistennew li jirċievu rispett speċjali, u allura jaċċettaw titli bħal “reverendu” u “father.” Madankollu, ministru Kristjan jaf li Jehovah biss jixraqlu l-​ġieħ. (1 Timotju 2:​9, 10, NW) L-​ebda ministru Kristjan ma jistenna rispett kbir bħal dan jew jixxennaq għal xi titlu speċjali. (Mattew 23:​8-​12) Hu jaf li l-​kelma di·a·ko·niʹa tfisser bażikament “servizz.” Kultant, il-​verb marbut maʼ din il-​kelma jintuża fil-​Bibbja fejn jidħlu servizzi persunali, bħal li sservi l-​ikel. (Luqa 4:​39; 17:8; Ġwann 2:​5) Għalkemm fil-​ministeru Kristjan din il-​kelma tintuża b’iktar stima, id-​di·aʹko·nos xorta waħda huwa qaddej.

²⁰ Għalhekk, l-​ebda ministru Kristjan m’għandu għalfejn jimtela bih innifsu. Il-​ministri Kristjani ġenwini, saħansitra dawk li għandhom responsabbiltajiet speċjali fil-​kongregazzjoni, huma lsira umli. Ġesù qal: “Min irid ikun kbir fostkom, għandu jkun qaddej tagħkom, u min irid ikun l-​ewwel fostkom, għandu jkun l-​ilsir tagħkom.” (Mattew 20:​26, 27) Ġesù wera lid-​dixxipli tiegħu liema kienet l-​attitudni xierqa li kellhom jikkultivaw billi ħaslilhom saqajhom, u b’hekk għamel ix-​xogħol taʼ l-​iktar ilsir baxx. (Ġwann 13:​1-15) X’servizz umli! Għaldaqstant, il-​ministri Kristjani jaqdu umilment lil Alla Jehovah u lil Ġesù Kristu. (2 Korintin 6:4; 11:23) Huma  juru umiltà wkoll meta jaqdu lil xulxin. U meta jippridkaw l-​aħbar tajba, huma jaqdu bla egoiżmu lill-​ġirien tagħhom li m’humiex taʼ l-​istess twemmin.—Rumani 1:​14, 15; Efesin 3:​1-7.

Stabar fil-​Ministeru

21. Pawlu kif kien premjat talli ssaporta fil-​ministeru?

²¹ Għal Pawlu, li jkun ministru kien jeħtieġ is-​sabar. Hu qal lill-​Kolossin li kellu jbati ħafna sabiex jippridkalhom l-​aħbar tajba. (Kolossin 1:24, 25) Iżda għax issaporta, ħafna kienu dawk li aċċettaw l-​aħbar tajba u saru ministri. Huma tnisslu bħala wlied Alla u ħut Ġesù Kristu, bil-​prospett li jsiru ħlejjaq spirti maġenbu fis-​sema. Xi premju glorjuż talli ssaportew!

22, 23. (a) Il-​ministri Kristjani għala jeħtieġu s-​sabar illum? (b) Is-​sabar Kristjan jagħti liema frott mill-​aħjar?

²² Illum, is-​sabar huwa bżonnjuż għal min hu tassew ministru t’Alla. Ħafna għandhom ġlieda kontinwa mal-​mard jew maʼ l-​uġigħ tax-​xjuħija. Il-​ġenituri, ħafna minnhom mingħajr is-​sieħeb jew sieħba tagħhom, jaħdmu iebes biex irabbu lil uliedhom. Fl-​iskola, it-​tfal jirreżistu b’kuraġġ l-​influwenzi ħżiena taʼ madwarhom. Ħafna Kristjani jridu jħabbtu wiċċhom maʼ problemi ekonomiċi kbar. U ħafna jġarrbu persekuzzjoni jew jiffaċċjaw tbatijiet minħabba ż-​“żmien iebes” li qed ngħixu fih illum. (2 Timotju 3:1) Iva, il-​ministri taʼ Jehovah, li llum jgħoddu mas-​sitt miljuni, jistgħu jgħidu bħall-​appostlu Pawlu: “F’kollox inqisu ruħna bħala ministri taʼ Alla, bis-​sabar kollu fit-​tiġrib, fit-​tbatija, fid-​djieqa.” (2 Korintin 6:4) Il-​ministri Kristjani ma jaqtgħux qalbhom. Huma għandhom għalfejn jiġu mfaħħrin tassew għas-​sabar tagħhom.

²³ Iktar minn hekk, bħalma ġara fil-​każ taʼ Pawlu, is-​sabar jagħti frott mill-​aħjar. Billi nissaportu, aħna nżommu r-​relazzjoni mill-​qrib li għandna maʼ Jehovah u nferrħulu qalbu. (Proverbji 27:11) Aħna nsaħħu l-​fidi tagħna stess u nagħmlu dixxipli, u b’hekk inkomplu nżidu mal-​fratellanza Kristjana. (1 Timotju 4:16) Matul dawn l-​aħħar jiem, Jehovah ħa ħsieb il-​ministri tiegħu u berikhom fil-​ministeru tagħhom. Bħala riżultat, il-​fdal tal-​144,000 inġabar, u miljuni oħrajn għandhom fiduċja fit-​tama taʼ li jgawdu ħajja taʼ dejjem fuq art magħmula ġenna. (Luqa 23:43; Apokalissi 14:1) Verament, il-​ministeru Kristjan huwa espressjoni tal-​ħniena taʼ Jehovah. (2 Korintin 4:1) Jalla lkoll kemm aħna ngħożżuh u nkunu grati li l-​benefiċċji tiegħu se jibqgħu għal dejjem.—1 Ġwann 2:17.

[Noti taʼ taħt]

Tistaʼ Tispjega?

• Il-​Kristjani kollha taʼ l-​ewwel seklu liema responsabbiltà kellhom?

• Ministru Kristjan meta u minn min jiġi ordnat?

• Liema attitudni għandu jkollu ministru Kristjan?

• Ministru Kristjan għala għandu jissaporti meta jiġi wiċċ imbwiċċ mad-​diffikultajiet?

[Mistoqsijiet taʼ Studju]

[Stampi f’paġna 16, 17]

F’żgħoritu, Timotju tgħallem il-​Kelma t’Alla. Hu sar ministru ordnat meta tgħammed

[Stampa f’paġna 18]

Il-​magħmudija tissimbolizza d-​dedikazzjoni lil Alla u timmarka l-​ordinazzjoni taʼ dak li jkun bħala ministru

[Stampa f’paġna 20]

Il-​ministri Kristjani jaqdu minn qalbhom