“Periklu Moħbi għas-Saħħa Pubblika”
“Periklu Moħbi għas-Saħħa Pubblika”
TIBQAʼ mbellah meta tismaʼ li skond stħarriġ reċenti fuq is-sess on-line, terz mill-adulti li jużaw l-Internet fl-Istati Uniti daħlu f’xi tip taʼ Web site sesswali. Numru kbir taʼ nies illum qegħdin jissodisfaw ix-xewqat sesswali tagħhom permezz taʼ l-Internet. “Dan huwa periklu moħbi għas-saħħa pubblika li qed jinfirex f’daqqa minħabba li sa ċertu punt, ftit huma dawk li jindunaw li huwa hekk jew li jiħduh bis-serjetà,” jgħid Dr. Al Cooper, il-psikologu li mexxa dan l-istħarriġ.
Min jistaʼ faċilment jaqaʼ vittma taʼ dan is-cybersex, jew sess fuq il-kompjuter? “Dawk li s-sesswalità tagħhom setgħet ġiet imrażżna tul ħajjithom kollha” iżda li “f’ħakka t’għajn isibu numru li ma jispiċċa qatt taʼ opportunitajiet sesswali” fuq l-Internet, jgħid Dr. Cooper.
Madankollu, ħafna minn dawk li jżuru dawn is-sites sesswali jaħsbu li dan m’huwiex taʼ ħsara. Huwa minnu dan? Sewwa sew bħalma wieħed drogat jidra d-droga li jkun jiddependi minnha, ħafna minn dawk li jsiru jiddependu mis-cybersex ifittxu “doża” taʼ sesswalità iktar qawwija fuq l-Internet biex jissodisfaw ix-xewqat tagħhom. Huma saħansitra jistgħu jipperikolaw l-impjieg tagħhom u r-relazzjoni maʼ l-imseħbin tagħhom!
Madankollu, dawk li jridu jogħġbu ’l Alla għandhom raġuni oħra biex jevitaw li jżuru sites sesswali fuq l-Internet. Il-Kelma t’Alla twissi: “Mewwtu ġo fikom dak kollu li hu taʼ l-art: żína, faħx, ġibdiet, xewqat ħżiena, u r-regħba li hi idolatrija. Minħabba dan tilħaq il-korla taʼ Alla lil dawk li ma jobdux.” (Kolossin 3:5, 6) Sabiex wieħed ikun jistaʼ ‘jmewwet ġo fih’ dak li għandu x’jaqsam m’aptit sesswali mhux xieraq, għandu bżonn jikkultiva mħabba qawwija lejn Alla Jehovah. (Salm 97:10) Jekk jiġi mħajjar għal dan il-periklu tas-cybersex, għandu jsaħħaħ l-imħabba tiegħu lejn Jehovah billi jistudja l-Kelma t’Alla, il-Bibbja. Sħubija bnina max-Xhieda taʼ Jehovah fil-kongregazzjoni lokali tistaʼ tkun t’għajnuna kbira biex dak li jkun isaħħaħ id-determinazzjoni tiegħu biex jogħġob ’l Alla.
[Tagħrif f’paġna 32]
Tixtieq li Ssirlek Żjara?
Saħansitra f’din id-dinja mimlija inkwiet, int tistaʼ tikseb hena minn għarfien eżatt tal-Bibbja dwar Alla, is-Saltna tiegħu, u l-iskop meraviljuż tiegħu għall-bnedmin. Jekk tixtieq li jkollok iktar tagħrif jew tixtieq li xi ħadd jiġi għandek biex jagħmillek studju tal-Bibbja bla ħlas, jekk jogħġbok ikteb lil IBSA House, Triq il-Waqqafa, Mosta, MST 02, jew fl-indirizz li japplika għalik imniżżel f’paġna 2.