‘Ilbsu s-Sabar’
‘Ilbsu s-Sabar’
“Ilbsu mela sentimenti taʼ ħniena . . . u sabar.”—KOLOSSIN 3:12.
1. Irrakkonta eżempju mill-aħjar taʼ wieħed li wera s-sabar.
RÉGIS, li jgħix fil-lbiċ taʼ Franza, sar Xhud mgħammed taʼ Jehovah fl-1952. Martu damet snin sħaħ tagħmel kulma setgħet biex ma tħallihx jaqdi lil Jehovah. Ipprovat tniżżillu t-tajers tal-karozza biex ma tħallihx imur għal-laqgħat, u darba minnhom saħansitra marret warajh meta kien qed ixandar il-messaġġ tal-Bibbja minn dar għal dar u bdiet twaqqgħu għaċ-ċajt hu u jkellem lill-inkwilini dwar l-aħbar tajba tas-Saltna. Minkejja din l-oppożizzjoni kontinwa, Régis baqaʼ juri s-sabar. B’hekk, Régis hu eżempju mill-aħjar għall-Kristjani kollha, ladarba Jehovah jirrikjedi li l-adoraturi kollha tiegħu juru s-sabar meta jittrattaw maʼ ħaddieħor.
2. X’inhi t-tifsira letterali tal-kelma Griega għal “sabar,” u l-kelma x’tindika?
2 Il-kelma Griega għal “sabar” tfisser letteralment “tul taʼ l-ispirtu.” Il-Bibbja taʼ l-Għaqda Biblika Maltija tittraduċi din l-espressjoni tnax-il darba bħala “sabar,” darba bħala “sabar kbir,” u darba bħala “ġenerożità.” Kemm l-espressjoni Ebrajka u kemm dik Griega tradotti “sabar” jinkludu l-ħsieb taʼ li wieħed ikun paċenzjuż, jissaporti, u jdum biex jagħdab.
3. Il-mod kif il-Kristjani kienu jqisu s-sabar kif kien differenti minn kif kienu jqisuh il-Griegi taʼ l-ewwel seklu?
3 Il-Griegi taʼ l-ewwel seklu ma kinux iqisu s-sabar bħala virtù. Il-kelma nfisha qatt ma ntużat mill-filosfi Stojċi. Skond l-istudjuż tal-Bibbja, William Barclay, is-sabar “huwa preċiż l-oppost tal-virtù Griega,” li, fost affarijiet oħrajn, kienet magħrufa “li ma kienet tittollera ebda insult jew offiża.” Hu jgħid: “Għall-Grieg, il-bniedem taʼ rġulija kien dak li ried jivvendika ruħu akkost taʼ kollox. Għall-Kristjan, il-bniedem taʼ rġulija huwa dak li, saħansitra meta jkun jistaʼ, jirrifjuta li jagħmel dan.” Jistaʼ jkun li l-Griegi qiesu s-sabar bħala sinjal taʼ dgħjufija, imma hawnhekk, bħal f’każi oħrajn, “il-bluha taʼ Alla hija għarfa iktar mill-bnedmin, u d-dgħjufija taʼ Alla hija aqwa mill-bnedmin.”—1 Korintin 1:25.
L-Eżempju tas-Sabar taʼ Kristu
4, 5. Ġesù pprovda liema eżempju meraviljuż taʼ sabar?
4 F’dak li hu sabar, Kristu Ġesù tana eżempju mill-aħjar, li Jehovah biss jistaʼ jgħaddih. Meta kien taħt pressjoni kbira, Ġesù wera rażna taʼ l-għaġeb. Dwaru kien profetizzat: “Ħaqruh, u hu qagħad għalihom bla biss ma fetaħ fommu; bħal ħaruf meħud għall-qatla, u bħal nagħġa mbikkma f’id min iġiżżha, ma fetaħx fommu.”—Isaija 53:7.
5 X’sabar taʼ l-għaġeb wera Ġesù matul il-ministeru tiegħu fuq l-art! Hu ssaporta l-mistoqsijiet qarrieqa taʼ l-għedewwa tiegħu u l-insulti taʼ dawk li opponewh. (Mattew 22:15-46; 1 Pietru 2:23) Kien paċenzjuż mad-dixxipli tiegħu, anki meta argumentaw kontinwament dwar min minnhom kien l-akbar. (Mark 9:33-37; 10:35-45; Luqa 22:24-27) U x’rażna taʼ min jammiraha wera Ġesù fil-lejl li ġie tradut, meta Pietru u Ġwanni marret għajnhom bihom wara li kien għadu kif qalilhom biex ‘jishru’!—Mattew 26:36-41.
6. Pawlu kif ibbenefika mis-sabar taʼ Ġesù, u x’nitgħallmu minn dan?
6 Wara l-mewt u l-irxoxt tiegħu, Ġesù kompla juri s-sabar. L-appostlu Pawlu kien konxju taʼ dan b’mod partikulari, għaliex qabel hu kien jippersegwita lill-Kristjani. Pawlu kiteb: “Din hija kelma taʼ min jemminha u jilqagħha għalkollox: li Kristu Ġesù ġie fid-dinja biex isalva l-midinbin; u fosthom, lili l-ewwel wieħed. Iżda jien minħabba f’hekk sibt il-ħniena, biex bija, bħala l-ewwel wieħed, Kristu Ġesù juri s-sabar kollu tiegħu, b’eżempju għal dawk li kienu għad iridu jemmnu fih biex ikollhom il-ħajja taʼ dejjem.” (1 Timotju 1:15, 16) Minkejja dak kollu li stajna għamilna fl-imgħoddi, jekk inpoġġu l-fidi tagħna f’Ġesù, hu se juri s-sabar magħna—waqt li, m’għandniex xi ngħidu, jistenna li nipproduċu “opri xierqa taʼ ndiema.” (Atti 26:20; Rumani 2:4) Il-messaġġi mibgħutin minn Kristu lis-sebaʼ kongregazzjonijiet fl-Asja Minuri juru li waqt li hu jdum jistabar, mill-banda l-oħra jistenna li nagħmlu progress.—Apokalissi, kapitli 2 u 3.
Waħda mill-Frott taʼ l-Ispirtu
7. X’relazzjoni hemm bejn is-sabar u l-ispirtu qaddis?
7 F’kapitlu 5 taʼ l-ittra tiegħu lill-Galatin, Pawlu jagħmel kuntrast bejn l-għemejjel tal-ġisem u l-frott taʼ l-ispirtu. (Galatin 5:19-23) Ladarba s-sabar huwa wieħed mill-attributi taʼ Jehovah, din il-kwalità toriġina minnu u hija waħda mill-frott taʼ l-ispirtu tiegħu. (Eżodu 34:6, 7) Tabilħaqq, is-sabar insibuh fir-rabaʼ post fid-deskrizzjoni mogħtija minn Pawlu dwar il-frott taʼ l-ispirtu, flimkien maʼ “l-imħabba, l-hena, is-sliem, . . . il-ħniena, it-tjieba, il-fidi, il-ħlewwa, ir-rażan.” (Galatin 5:22, 23) Għalhekk, meta l-qaddejja t’Alla juru s-sabar, jew il-kwalità taʼ paċenzja li juri Alla, dan jagħmluh għax ikunu influwenzati mill-ispirtu qaddis.
8. X’jistaʼ jgħinna nikkultivaw il-frott taʼ l-ispirtu, inkluż is-sabar?
8 Madankollu, dan ma jfissirx li Jehovah jimponi l-ispirtu tiegħu fuqna. Minn jeddna rridu nħalluh jinfluwenzana. (2 Korintin 3:17; Efesin 4:30) Jekk nikkultivaw il-frott tiegħu f’kulma nagħmlu, inkunu qed inħallu l-ispirtu jaġixxi f’ħajjitna. Wara li semma dwar l-għemejjel tal-ġisem u l-frott taʼ l-ispirtu, Pawlu żied: “Jekk ngħixu bl-Ispirtu, ħalli nimxu bl-Ispirtu. Titqarrqux; Alla ma jidħak bih ħadd. Dak li bniedem jiżraʼ, dak huwa jaħsad. Min jiżraʼ f’ġismu jaħsad mill-ġisem it-taħsir; min jiżraʼ fl-ispirtu, jaħsad mill-ispirtu l-ħajja taʼ dejjem.” (Galatin 5:25; 6:7, 8) Jekk irridu li jkollna suċċess f’li nikkultivaw is-sabar, irridu nikkultivaw ukoll il-bqija tal-frott li l-ispirtu qaddis jipproduċi fil-Kristjani.
“L-Imħabba Taf Tistabar”
9. Pawlu għala, x’aktarx, qal lill-Korintin li “l-imħabba taf tistabar”?
9 Pawlu wera li teżisti relazzjoni speċjali bejn l-imħabba u s-sabar meta qal: “L-imħabba taf tistabar.” (1 Korintin 13:4) Albert Barnes, studjuż tal-Bibbja, jissuġġerixxi li Pawlu enfasizza dan minħabba l-ġlied u t-tilwim li kien hemm fil-kongregazzjoni Kristjana f’Korintu. (1 Korintin 1:11, 12) Barnes jgħid: “Il-kelma użata hawnhekk [għal sabar] hija l-oppost taʼ l-għaġla; t’espressjonijiet u ħsibijiet imqanqlin, u taʼ tnervis. Tindika l-istat mentali li kapaċi JDUM JISSAPORTI meta jkun maħqur, provokat.” L-imħabba u s-sabar għadhom jikkontribwixxu bil-kbir għas-sliem tal-kongregazzjoni Kristjana.
10. (a) L-imħabba b’liema mod tgħinna nuru s-sabar, u l-appostlu Pawlu x’parir jagħti f’dan ir-rigward? (b) Studjuż tal-Bibbja liema kumment għamel fuq is-sabar u l-ħniena t’Alla? (Ara n-nota taʼ taħt.)
10 “L-imħabba taf tistabar u tħenn; l-imħabba . . . ma tfittixx dak li hu tagħha, xejn ma tinkorla.” Għaldaqstant, b’ħafna modi, l-imħabba tgħinna biex nuru s-sabar. * (1 Korintin 13:4, 5) Bis-saħħa taʼ l-imħabba nkunu nistgħu nissaportu lil xulxin bil-paċenzja u niftakru li aħna lkoll imperfetti u għandna ħtijiet u nuqqasijiet. Tgħinna naħfru u nuru konsiderazzjoni. L-appostlu Pawlu jinkuraġġina biex nimxu ‘bl-umiltà kollha, bil-ħlewwa u bis-sabar, biex naħmlu u nħobbu ’l xulxin.’ Hu jżid: “Ħabirku biex iżżommu spirtu wieħed bir-rabta tas-sliem.”—Efesin 4:1-3.
11. Għala huwa importanti b’mod partikulari li nuru s-sabar fil-komunitajiet Kristjani?
11 Fil-komunitajiet Kristjani, is-sabar min-naħa tal-membri tagħhom jikkontribwixxi għas-sliem u l-hena. Dan japplika kemm jekk huma kongregazzjonijiet, djar Betel, djar missjunarji, timijiet tal-bini, jew skejjel. Peress li hemm differenzi fil-personalità, fil-gosti, fit-trobbija, fil-livell t’edukazzjoni, saħansitra fl-iġjene, minn żmien għal żmien jistgħu jqumu sitwazzjonijiet taʼ dwejjaq. Dan jistaʼ jiġri wkoll fil-familji. Huwa vitali li ma nitilfux il-paċenzja malajr. (Proverbji 14:29; 15:18; 19:11) Is-sabar, jiġifieri, il-perseveranza u l-paċenzja, bit-tama li l-affarijiet jinbidlu għall-aħjar, huwa meħtieġ minn kulħadd.—Rumani 15:1-6.
Is-Sabar Jgħinna Nipperseveraw
12. Is-sabar għala huwa importanti f’ċirkustanzi taʼ dwejjaq?
12 Is-sabar jgħinna nissaportu sitwazzjonijiet taʼ dwejjaq li donnhom jidhru ma jintemmu qatt jew li ma jkollhomx soluzzjoni taʼ malajr. Dan kien minnu dwar Régis, li ssemma fil-bidu taʼ dan l-artiklu. Għal snin sħaħ, martu opponiet l-isforzi tiegħu biex jaqdi lil Jehovah. Madankollu, darba minnhom resqet lejh bid-dmugħ f’għajnejha u qaltlu: “Naf li din hi l-verità. Għinni. Irrid nistudja l-Bibbja.” Wara ftit taż-żmien, hi tgħammdet bħala Xhud. Jgħid Régis: “Dan wera li Jehovah bierek dawk is-snin taʼ taqbid, paċenzja, u perseveranza.” Is-sabar tiegħu ġie premjat.
13. X’kien li għen lil Pawlu biex jippersevera, u l-eżempju tiegħu kif jistaʼ jgħinna nipperseveraw?
13 Lura fl-ewwel seklu taʼ l-E.K., l-appostlu Pawlu tana eżempju mill-aħjar f’dak li hu sabar. (2 Korintin 6:3-10; 1 Timotju 1:16) Lejn tmiem ħajtu, meta kien qed jagħti parir lil sieħbu Timotju li kien iżgħar minnu, Pawlu wissieh li l-Kristjani kollha kellhom iħabbtu wiċċhom mal-provi. Pawlu semma l-eżempju tiegħu stess u rrikkmanda xi kwalitajiet Kristjani bażiċi li huma bżonnjużi għalina biex nipperseveraw. Hu kiteb: “Inti mxejt warajja fit-tagħlim tiegħi, fl-imġiba tiegħi, fil-pjan u t-twemmin tiegħi; fis-sabar, fl-imħabba u fil-perseveranza tiegħi; fil-persekuzzjonijiet u t-tbatijiet li ġew fuqi f’Antijokja, f’Ikonju u f’Listra. X’persekuzzjonijiet għaddejt minnhom! Iżda ħelisni l-Mulej minnhom kollha. U dawk li jridu jgħixu ħajja tajba fi Kristu Ġesù lkoll jgħaddu mill-persekuzzjoni.” (2 Timotju 3:10-12; Atti 13:49-51; 14:19-22) Sabiex nipperseveraw, ilkoll kemm aħna għandna bżonn il-fidi, l-imħabba, u s-sabar.
Nilbsu s-Sabar
14. Pawlu maʼ liema ħaġa xebbahhom il-kwalitajiet divini bħalma hu s-sabar, u x’parir tahom lill-Kristjani f’Kolossi?
14 L-appostlu Pawlu xebbah is-sabar u kwalitajiet divini oħrajn maʼ lbies li għandu jintlibes mill-Kristjan wara li jkun neżaʼ dawk il-prattiċi li jikkaratterizzaw “il-bniedem il-qadim.” (Kolossin 3:5-10) Hu kiteb: “Intom il-magħżulin taʼ Alla, il-qaddisin u l-maħbubin tiegħu. Ilbsu mela sentimenti taʼ ħniena, tjieba, umiltà, ħlewwa u sabar. Stabru b’xulxin, u, jekk xi ħadd minnkom ikollu xi jgħid maʼ ħaddieħor, aħfru lil xulxin; bħalma l-Mulej ħafer lilkom, hekk agħmlu intom ukoll. U fuq kollox ilbsu l-imħabba, li hi l-qofol tal-perfezzjoni.”—Kolossin 3:12-14.
15. X’jirriżulta meta l-Kristjani ‘jilbsu’ s-sabar u kwalitajiet divini oħrajn?
15 Meta l-membri taʼ kongregazzjoni ‘jilbsu’ l-mogħdrija, il-qalb tajba, l-umiltà, il-ħlewwa, is-sabar, u l-imħabba, ikunu jistgħu jsolvu l-problemi u jimxu ’l quddiem magħqudin fis-servizz taʼ Jehovah. B’mod partikulari, l-indokraturi Kristjani għandhom bżonn juru s-sabar. Kultant forsi jkollhom bżonn iwiddbu lil xi Kristjan ieħor, imma hemm modi differenti kif dan jistaʼ jsir. Pawlu ddeskriva l-aqwa attitudni meta kiteb lil Timotju: “Ċanfar, widdeb, wissi, bis-sabar kollu u bit-tagħlim.” (2 Timotju 4:2) Iva, in-nagħaġ taʼ Jehovah dejjem għandhom jiġu trattati bis-sabar, bid-dinjità, u bit-tenerezza.—Mattew 7:12; 11:28; Atti 20:28, 29; Rumani 12:10.
‘Nistabru b’Kulħadd’
16. X’jistaʼ jirriżulta meta ‘nistabru b’kulħadd’?
16 Is-sabar taʼ Jehovah lejn l-umanità jobbligana moralment li ‘nistabru b’kulħadd.’ (1 Tessalonikin 5:14) Dan ifisser li nkunu paċenzjużi mal-membri tal-familja tagħna li ma jkunux Xhieda, mal-ġirien, maʼ sħabna fuq ix-xogħol u taʼ l-iskola. Bosta preġudizzji ntgħelbu minn Xhieda li, ġieli għal ħafna snin, issaportew rimarki sarkastiċi jew oppożizzjoni diretta minn individwi li huma sħabhom fuq ix-xogħol jew taʼ l-iskola. (Kolossin 4:5, 6) L-appostlu Pietru kiteb: “Ġibu rwieħkom sewwa qalb il-pagani biex, jekk huma jgħidu fuqkom bħallikieku kontu nies ħżiena, jaraw sewwa l-għemil tajjeb tagħkom u jsebbħu ’l Alla meta jasal jum iż-żjara tiegħu.”—1 Pietru 2:12.
17. Kif nistgħu nimitaw l-imħabba u s-sabar taʼ Jehovah, u għala għandna nagħmlu dan?
17 Is-sabar taʼ Jehovah se jkun ifisser salvazzjoni għal miljuni sħaħ taʼ nies. (2 Pietru 3:9, 15) Jekk nimitaw l-imħabba u s-sabar taʼ Jehovah, se nkomplu bil-paċenzja nippridkaw l-aħbar tajba tas-Saltna t’Alla u ngħallmu lil oħrajn biex jissottomettu ruħhom lejn il-ħakma tas-Saltna taʼ Kristu. (Mattew 28:18-20; Mark 13:10) Kieku kellna nieqfu nippridkaw, kien ikun bħallikieku rridu npoġġu limitu għas-sabar taʼ Jehovah u ma nirrikonoxxux l-iskop tiegħu li jressaq lin-nies għall-indiema.—Rumani 2:4.
18. X’kienet it-talba taʼ Pawlu għall-Kolossin?
18 Meta kiteb lill-Kristjani f’Kolossi, l-Asja Minuri, Pawlu qal: “Għalhekk aħna wkoll, mindu smajna bikom, ma hedejniex nitolbu għalikom, u nibqgħu nitolbu li tagħrfu sewwa r-rieda taʼ Alla bl-għerf kollu u d-dehen spiritwali. Hekk tkunu tistgħu tgħixu sewwa kif jixraq lill-Mulej u togħġbuh f’kollox bil-frott taʼ kull opra tajba, u tikbru fl-għarfien taʼ Alla, titwettqu bil-qawwa kollha li tiġi mill-qawwa tal-glorja tiegħu, biex tkunu tifilħu ġġarrbu kollox bis-sabar. Ifirħu.”—Kolossin 1:9-11.
19, 20. (a) Kif nistgħu nevitaw li nħarsu lejn is-sabar kontinwu taʼ Jehovah bħala prova? (b) X’benefiċċji se nieħdu jekk nibqgħu nistabru?
19 Il-paċenzja u s-sabar kontinwu taʼ Jehovah mhux se jkunu taʼ prova għalina jekk ‘nagħrfu sewwa r-rieda taʼ Alla bl-għerf kollu.’ Din ir-rieda hi li “l-bnedmin kollha jsalvaw u jaslu biex jagħrfu l-verità.” (1 Timotju 2:4) Aħna se nkomplu ‘nogħġbuh f’kollox bil-frott taʼ kull opra tajba,’ b’mod partikulari billi nippridkaw “dan l-Evanġelju tas-Saltna.” (Mattew 24:14) Jekk inkomplu nagħmlu dan fedelment, Jehovah se ‘jwettaqna bil-qawwa kollha,’ u b’hekk inkunu nistgħu ‘nġarrbu kollox bis-sabar u bil-ferħ.’ Jekk nagħmlu hekk, se nkunu ‘nistgħu ngħixu sewwa kif jixraq lill-Mulej,’ u se jkollna s-sliem li jiġi milli nkunu nafu li qegħdin ‘nogħġbuh f’kollox.’
20 Jalla nkunu konvinti għall-aħħar dwar l-għerf tas-sabar taʼ Jehovah. Dan jirriżulta fis-salvazzjoni tagħna u taʼ dawk li jagħtu widen għall-ippridkar u t-tagħlim tagħna. (1 Timotju 4:16) Il-fatt li nikkultivaw il-frott taʼ l-ispirtu—l-imħabba, il-ħniena, it-tjieba, il-ħlewwa, u r-rażan—se jgħinna nibqgħu nistabru bil-ferħ. Se nkunu iktar nistgħu ngħixu fis-sliem mal-membri tal-familja tagħna kif ukoll maʼ ħutna rġiel u nisa ġewwa l-kongregazzjoni. Is-sabar se jgħinna wkoll inkunu paċenzjużi maʼ sħabna fuq ix-xogħol jew taʼ l-iskola. U s-sabar tagħna se jkollu skop, dak li nsalvaw lil dawk li jiżbaljaw u li nigglorifikaw lil Jehovah, dak Alla taʼ sabar kbir.
[Nota taʼ taħt]
^ Waqt li jikkummenta fuq l-istqarrija taʼ Pawlu li “l-imħabba taf tistabar u tħenn,” Gordon D. Fee, studjuż tal-Bibbja, jikteb: “Fit-teoloġija Pawlina dawn [is-sabar u l-ħniena] jirrappreżentaw iż-żewġ naħat taʼ l-attitudni divina lejn l-umanità (qabbel Rum. 2:4). Minn banda waħda, is-sabar u l-imħabba t’Alla jintwerew billi hu jżomm lura l-għadab tiegħu għall-irvell tal-bniedem; mill-banda l-oħra, il-qalb tajba tiegħu tinsab fl-espressjonijiet tal-ħniena li hu wera għal elf darba iżjed. B’hekk, id-deskrizzjoni taʼ Pawlu dwar l-imħabba tibda b’din id-deskrizzjoni doppja dwar Alla, li permezz taʼ Kristu wera s-sabar u l-qalb tajba tiegħu lejn dawk li jistħoqqilhom il-ħaqq divin.”
Tistaʼ Tispjega?
• Kristu b’liema modi hu eżempju taʼ l-għaġeb f’dak li hu sabar?
• X’se jgħinna nikkultivaw is-sabar?
• Is-sabar kif jgħin lill-familji, lill-komunitajiet Kristjani, u lill-anzjani?
• Il-fatt li nibqgħu nistabru kif se jġib benefiċċji lilna u lil oħrajn?
[Mistoqsijiet taʼ Studju]
[Stampa f’paġna 15]
Saħansitra meta kien taħt pressjoni kbira, Ġesù kien paċenzjuż mad-dixxipli tiegħu
[Stampa f’paġna 16]
L-indokraturi Kristjani huma mħeġġin biex ikunu taʼ eżempju tajjeb f’dak li hu sabar meta jittrattaw maʼ ħuthom
[Stampa f’paġna 17]
Jekk nimitaw l-imħabba u s-sabar taʼ Jehovah, se nkomplu nippridkaw l-aħbar tajba
[Stampa f’paġna 18]
Pawlu talab għall-Kristjani biex ‘jibqgħu jistabru bil-ferħ’