Fejn Ħarbu l-​Ġirien?

“Is-​soċjetà moderna ma tirrikonoxxix l-​istat taʼ li tkun ġâr.”—Benjamin Disraeli, politiku Ingliż tas-​seklu 19.

IL-​KUBANI avanzati fl-​età għandhom mod mhux tas-​soltu kif jinkuraġġixxu l-​benesseri soċjali: l-​għaqdiet tal-​ġirien, jew kif isejħulhom huma círculos de abuelos (gruppi tan-​nanniet). Skond rapport taʼ l-​1997, madwar 1 minn kull 5 Kubani mdaħħal fiż-​żmien jagħmel parti minn gruppi bħal dawn. Fihom wieħed jistaʼ jsib kumpanija, appoġġ, u għajnuna prattika dwar kif jgħix stil taʼ ħajja f’saħħitha. “Kulmeta t-​tobba tal-​familja jkollhom bżonn l-​għajnuna biex jagħmlu kampanja taʼ tilqim f’xi lokalità partikulari,” tinnota r-​rivista World-Health, “fiċ-​círculos de abuelos isibu wħud kapaċi u li lesti jagħtu daqqa t’id.”

Madankollu, b’dispjaċir ngħidu li f’ħafna partijiet tad-​dinja hemm postijiet fejn in-​nies tal-​komunità m’għadhomx jimpurtahom minn xulxin. Per eżempju, ejja nieħdu l-​każ traġiku taʼ Wolfgang Dircks, li kien jgħix fi blokk t’appartamenti fil-​punent taʼ l-​Ewropa. Xi snin ilu, The Canberra Times irrapportat li għalkemm is-​17-il familja li kienu jgħixu fl-​istess blokk taʼ Wolfgang kienu nnotaw li dan kien ilu ma jidher, “ħadd ma ġietu f’rasu li jċempillu l-​qanpiena tal-​bieb.” Meta fl-​aħħar is-​sid tal-​blokk wasal u fetaħ l-​appartament, “hu sab skeletru bil-​qiegħda quddiem is-​sett tat-​televixin.” F’ħoġor l-​iskeletru kien hemm gwida tal-​programmi tat-​televixin bid-​data tal-​5 taʼ Diċembru, 1993. Wolfgang kien ilu mejjet ħames snin. X’eżempju taʼ niket li juri r-​realtà taʼ kemm xi ġirien qed jonqsu li juru interess u jaħsbu f’xulxin! Mhux taʼ b’xejn li wieħed kittieb f’The New York Times Magazine qal li l-​komunità lokali tiegħu, bħal ħafna oħrajn, kienet saret “komunità taʼ stranġieri.” Qed tiġri l-​istess ħaġa fl-​inħawi fejn toqgħod int?

Huwa minnu li xi komunitajiet fl-​irħula għadhom igawdu ħbiberija ġenwina fost il-​ġirien u li ċerti komunitajiet li jgħixu fil-​bliet qed jistinkaw biex juru iktar interess f’xulxin. Madankollu, ħafna nies li jgħixu fil-​bliet iħossuhom maqtugħin għalihom u ma jħossuhomx protetti fil-​komunità tagħhom. Huma jgħixu ħajja anonima fejn jidħlu l-​ġirien tagħhom. Dan kif?

 Jgħixu Ħajja Anonima

M’għandniex xi ngħidu, ħafna minna għandna ġirien jgħixu qrib tagħna. Naraw ħafna sinjali li juru li l-​komunità hija “ħajja,” bħal per eżempju d-​dawl iteptep tat-​televixin, iċ-​ċaqliq għaddej minn wara t-​twieqi, id-​dwal jinxtegħlu jew jintfew, il-​ħoss taʼ karozzi ġejjin u sejrin, il-​ħsejjes taʼ passi fil-​kurituri, u ċ-​ċekċik taċ-​ċwievet meta n-​nies jiftħu u jagħlqu l-​bibien. Madankollu, kwalunkwe tifsira vera tal-​kelma ġirien tgħib għalkollox meta n-​nies li jgħixu viċin xulxin jgħixu ħajja anonima, jew inkella jinjoraw lil xulxin fil-​ħajja mgħaġġla taʼ llum. Xi nies għandhom mnejn iħossu li m’hemmx għalfejn jinvolvu ruħhom mal-​ġirien jew ikunu obbligati lejhom b’xi mod. Il-​gazzetta Awstraljana Herald Sun tammetti: “In-​nies huma iktar anonimi fl-​inħawi immedjati fejn jgħixu, u b’hekk ikunu inqas marbutin bl-​obbligi soċjali. Issa sar iktar faċli li tinjora jew tħalli barra lil nies li m’humiex soċjevoli.”

Dan l-​iżvilupp m’huwiex taʼ l-​iskantament. F’dinja fejn in-​nies ‘iħobbu lilhom infushom,’ il-​komunitajiet qed jaħsdu l-​konsegwenzi minħabba l-​istil taʼ ħajja egoistika taʼ wħud bħal dawn. (2 Timotju 3:2) Ir-​riżultat huwa solitudni kbira u iżolament. Min-​naħa l-​oħra, dan iġib nuqqas taʼ fiduċja fost in-​nies, speċjalment meta l-​akkwata tkun miżgħuda bil-​vjolenza u l-​kriminalità. Malli n-​nies ma jibdewx jafdaw lil xulxin, ma jibqgħux juru mogħdrija lejn ħaddieħor.

Hi x’inhi s-​sitwazzjoni fil-​lokalità tiegħek, m’hemmx dubju li taqbel li ġirien tajba huma taʼ ġid għall-​komunità. Jitwettqu ħafna affarijiet meta n-​nies jaħdmu id f’id biex jilħqu għan wieħed. Il-​ġirien tajba jistgħu jkunu wkoll taʼ barka. L-​artiklu li jmiss se juri kif.