Kif Għandna Nqisuhom il-Provi?

TIĠRIB! Provi! Kulħadd irid iħabbat wiċċu magħhom. Dawn jistgħu jkunu kaġunati minħabba differenzi fil-​personalitajiet, diffikultajiet ekonomiċi, nuqqas taʼ saħħa, tentazzjonijiet, pressjoni minn dawk taʼ madwarna biex nagħmlu l-​ħażin, persekuzzjoni, sfidi minħabba l-​waqfa tagħna rigward in-​newtralità jew kontra l-​idolatrija, u ħafna affarijiet oħra. Ikunu xi jkunu l-​provi li niffaċċjaw, dawn spiss jikkaġunaw ansjetà kbira. Kif nistgħu nittrattawhom b’suċċess? Nistgħu aħna nibbenefikaw minnhom b’xi mod?

L-​Aqwa Appoġġ

Is-​Sultan David tal-​qedem għex ħajja mimlija provi, madankollu hu miet leali. Kif irnexxielu jissaporti? Hu rrefera għas-​sors li pprovdielu s-​saħħa meta qal: “Il-​Mulej hu r-​ragħaj tiegħi, xejn ma jonqosni.” Imbagħad qal: “Mqar jekk nimxi f’wied mudlam, ma nibżax mill-​ħsara, għax inti miegħi. Il-​ħatar tiegħek u l-​għasluġ tiegħek, huma jwennsuni.” (Salm 23:​1, 4) Iva, Jehovah huwa sors t’appoġġ bla limitu. Hu ggwida lil David meta kien għaddej minn żmien ikrah ħafna, u hu lest li jagħmel l-​istess magħna meta jkun hemm bżonn.

Kif nistgħu niksbuh l-​appoġġ taʼ Jehovah? Il-​Bibbja turina kif nistgħu nagħmlu dan meta tgħid: “Ippruvaw u taraw kemm hu tajjeb il-​Mulej.” (Salm 34:9 [34:​8, NW]) Din hija stedina mill-​qalb, imma xi tfisser? Din tinkuraġġina biex naqdu lil Jehovah u nġibu ħajjitna kompletament fi qbil mar-​rieda tiegħu. Mod taʼ ħajja bħal dan jirrikjedi li niċċaħħdu ftit mil-​libertà li għandna billi nagħmlu sagrifiċċji. F’ċerti każi, dan saħansitra jistaʼ jwassal għal provi—persekuzzjoni u sofferenza. Madankollu, dawk li b’qalb sħiħa jaċċettaw l-​istedina taʼ Jehovah qatt ma se jiddispjaċihom talli għamlu dan. Jehovah se jkun ħanin ħafna magħhom. Hu se jiggwidahom u jieħu ħsiebhom spiritwalment. Waqt il-​provi, hu se jsostnihom permezz tal-​Kelma tiegħu, l-​ispirtu qaddis tiegħu, u l-​kongregazzjoni Kristjana. U eventwalment, hu se jippremjahom b’ħajja taʼ dejjem.—Salm 23:6; 25:​9, Karm Żammit; Isaija 30:21; Rumani 15:5.

Dawk li jiddeċiedu li jibdlu ħajjithom sabiex jaqdu lil Jehovah u jżommu maʼ dik  id-​deċiżjoni, jirrealizzaw li Jehovah iwettaq il-​wegħdi tiegħu. Din kienet l-​esperjenza taʼ l-​Iżraelin li segwew lil Ġożwè għal ġo l-​Art Imwiegħda. Ladarba kienu qasmu l-​Ġordan, huma kellhom provi x’jissaportu, battalji x’jitqabdu, u lezzjonijiet iebsa x’jitgħallmu. Imma dik il-​ġenerazzjoni kienet iktar leali minn missirijiethom, li kienu ħarġu mill-​Eġittu u mietu fid-​deżert. Għalhekk, Jehovah appoġġa lill-​uħud leali, u rigward il-​qagħda tagħhom lejn tmiem il-​ħajja taʼ Ġożwè, il-​Bibbja tgħid: “Il-​Mulej serraħhom minn kullimkien, skond ma kien ħalef lil missirijiethom . . . Ebda [“wegħda,” NW] ma kien baqaʼ li ma seħħitx skond ma kien wiegħed il-​Mulej lid-​dar taʼ Iżrael. Kollox seħħ!” (Ġożwè 21:​44, 45) Aħna wkoll nistgħu nesperjenzaw dan jekk kemm-il darba nistrieħu kompletament fuq Jehovah meta nkunu qed niffaċċjaw xi provi u fi kwalunkwe żmien ieħor.

X’jistaʼ jdgħajjef il-​fiduċja tagħna f’Jehovah? Ġesù semma mod wieħed meta qal: “Ħadd ma jistaʼ jaqdi żewġ sidien . . . Ma tistgħux taqdu lil Alla u lill-​flus.” (Mattew 6:​24) Jekk nafdaw f’Jehovah, m’aħniex se nfittxu s-​sigurtà fejn ħafna wħud fid-​dinja jfittxuha, jiġifieri fl-​affarijiet materjali. Ġesù ta dan il-​parir lis-​segwaċi tiegħu: “Mela fittxu l-​ewwel is-​Saltna u l-​ġustizzja taʼ Alla, u dan kollu [l-affarijiet materjali neċessarji] jingħatalkom ukoll.” (Mattew 6:​33) Kristjan li jżomm ħarsa bilanċjata dwar l-​affarijiet materjali u jpoġġi s-​Saltna t’Alla l-​ewwel post f’ħajtu, jagħmel l-​aħjar għażla. (Ekkleżjażti 7:​12, KŻ) M’għandniex xi ngħidu, dan se jiswieh xi ħaġa. Għandu mnejn ikollu jissagrifika xi affarijiet materjali. Imma hu se jaħsad ħafna barkiet. U Jehovah se jappoġġah.​—Isaija 48:​17, 18.

Dak li Nitgħallmu mill-​Provi

M’għandniex xi ngħidu, li niddeċiedu li ‘nipprovaw u naraw kemm hu tajjeb il-​Mulej’ ma jipproteġiniex minn ċirkustanzi jew ġrajjiet m’humiex mistennija fil-​ħajja; lanqas ma jħarisna kompletament mill-​attakki taʼ Satana u l-​aġenti umani tiegħu. (Koħèlet 9:​11) Bħala riżultat, is-​sinċerità u d-​determinazzjoni taʼ Kristjan għandhom mnejn jiġu mġarrba. Jehovah għala jħalli lill-​aduraturi tiegħu jgħaddu minn provi bħal dawn? L-​appostlu Pietru ta raġuni waħda meta kiteb: “Għal ftit żmien ieħor, jeħtiġilkom titnikktu taħt ħafna provi. Bħalma d-​deheb, li jintemm, jgħaddi mill-​prova tan-​nar, hekk tgħaddi mill-​prova l-​fidi tagħkom, li tiswa aktar mid-​deheb, biex ikun jistħoqqilha tasal għat-​tifħir, għall-​glorja, u għall-​ġieħ, meta jidher Ġesù Kristu.” (1 Pietru 1:​6, 7) Iva, il-​provi jippermettulna nuru l-​kwalità tal-​fidi tagħna u l-​imħabba li għandna għal Jehovah. U jgħinuna nagħtu tweġiba għat-​tagħjir u l-​akkużi taʼ Satana x-​Xitan.​—Proverbji 27:11; Apokalissi 12:10.

Il-​provi jgħinuna wkoll niżviluppaw kwalitajiet Kristjani oħra. Bħala eżempju, ikkunsidra l-​kliem tas-​salmista: “[Jehovah] iħares lejn min hu umli: iżda lill-​imkabbrin jagħrafhom mill-​bogħod.” (Salm 138:​6, KŻ) Għal ħafna minna, li juru l-​umiltà ma tiġix b’mod naturali, imma l-​provi jgħinuna niżviluppaw din il-​kwalità bżonnjuża. Ftakar fil-​ġrajja taʼ żmien Mosè meta xi Iżraelin xebgħu jieklu l-​manna ġimgħa wara ġimgħa, xahar wara l-​ieħor. Milli jidher, din kienet prova għalihom, avolja l-​manna kienet provvediment mirakoluż. X’kien l-​iskop taʼ din il-​prova? Mosè qalilhom: “[Jehovah] temgħek bil-​manna fix-​xagħri . . . sabiex jumiljak u sabiex jittestjak.”​—Dewteronomju. 8:​16, NW.

Bl-istess mod, l-​umiltà tagħna tistaʼ tiġi  mġarrba. Kif? Per eżempju, aħna kif nirreaġixxu meta jsir tibdil fl-​organizzazzjoni? (Isaija 60:17) Nappoġġawh b’qalb sħiħa x-​xogħol taʼ l-​ippridkar u t-​tagħlim? (Mattew 24:14; 28:​19, 20) Naċċettawhom bil-​ħerqa l-​ispjegazzjonijiet tal-​veritajiet bibliċi kif jipprovdihom “l-​ilsir leali u diskret”? (Mattew 24:​45-​47, NW; Proverbji 4:​18) Nirreżistu aħna l-​pressjoni biex ikollna l-​aħħar apparat li ħareġ fis-​suq, ħwejjeġ taʼ l-​aħħar moda, jew l-​aħħar mudell taʼ karozza? Persuna umli tkun tistaʼ tirrispondi fl-​affermattiv għal mistoqsijiet bħal dawn.—1 Pietru 1:​14-​16; 2 Pietru 3:​11.

Il-​provi jgħinuna niżviluppaw fina saħansitra kwalità vitali oħra—is-​sabar. Id-​dixxiplu Ġakbu qal: “Ħuti, għoddu kollox b’ferħ meta tħabbtu wiċċkom maʼ kull xorta taʼ tiġrib, għax għandkom tkunu tafu li t-​tiġrib tal-​fidi tagħkom inissel is-​sabar.” (Ġakbu 1:​2, 3) Li nissaportu b’suċċess prova wara l-​oħra b’fidi sħiħa f’Jehovah jgħinna nżommu sħaħ, nibqgħu konsistenti, u nżommu l-​integrità. Dan jgħinna nirreżistu l-​attakki li Satana—dak alla rrabjat taʼ din id-​dinja—jistaʼ jagħmlilna fil-​futur.​—1 Pietru 5:​8-​10; 1 Ġwann 5:​19; Apokalissi 12:12.

Żomm Ħarsa Xierqa Lejn il-​Provi

L-​Iben perfett t’Alla, Ġesù Kristu, ħabbat wiċċu maʼ ħafna provi meta kien fuq l-​art, u talli ssaporta ħasad ħafna barkiet. Pawlu kiteb li Ġesù “tgħallem minn dak li bata xi tfisser l-​ubbidjenza.” (Lhud 5:8) Il-​lealtà tiegħu sal-​mewt ġabet tifħir għal isem Jehovah u għamlitha possibbli għal Ġesù biex joffri l-​valur tal-​ħajja umana perfetta tiegħu bħala fidwa għall-​umanità. Dan fetaħ it-​triq għal dawk li eżerċitaw fidi f’Ġesù biex ikollhom il-​prospett li jgħixu għal dejjem. (Ġwann 3:​16) Minħabba li Ġesù baqaʼ leali taħt prova, issa hu l-​Qassis il-​Kbir u s-​Sultan renjanti tagħna.​—Lhud 7:​26-​28; 12:​2, KŻ.

U xi ngħidu għalina? Bl-​istess mod, meta nħabbtu wiċċna maʼ provi, il-​lealtà tagħna se ġġibilna barkiet kbar. Dwar dawk li għandhom it-​tama għas-​sema, il-​Bibbja tgħid: “Hieni l-​bniedem li jistabar fit-​tiġrib, għax wara li jkun għeleb it-​tiġrib, jaqlaʼ l-​kuruna tal-​ħajja li l-​Mulej wiegħed lil dawk li jħobbuh.” (Ġakbu 1:​12) Dawk li għandhom it-​tama għall-​art huma żgurati li jekk jissaportu lealment, huma se jirtu ħajja taʼ dejjem f’Ġenna taʼ l-​art. (Apokalissi 21:​3-6) Iktar importanti minn hekk, is-​sabar leali tagħhom iġib tifħir għal isem Jehovah.

Hekk kif nimxu fil-​passi taʼ Ġesù, nistgħu nibqgħu ċerti li se nkampaw b’suċċess mal-​provi kollha li niltaqgħu magħhom f’din is-​sistema. (1 Korintin 10:​13, KŻ; 1 Pietru 2:​21) Kif? Billi nistrieħu fuq Jehovah, li jipprovdi “qawwa iktar min-​normal” lil dawk li jistrieħu fuqu. (2 Korintin 4:​7, NW) Jalla l-​konvinzjoni tagħna tkun bħal dik taʼ Ġob, li saħansitra filwaqt li ssaporta provi ħorox b’fiduċja qal: “Meta jġarrabni, noħroġ bħad-​deheb.”​—Ġob 23:​10, KŻ.

[Stampa f’paġna 31]

Il-​lealtà taʼ Ġesù taħt prova ġabet tifħir għal isem Jehovah. L-​istess tistaʼ tagħmel tagħna