Tħallix Qalb Uliedek bla Ebda Gwida!
Tħallix Qalb Uliedek bla Ebda Gwida!
F’IDEJN fuħħari tas-sengħa, ċappa tafal bla valur tistaʼ tiġi trasformata f’kontenitur sabiħ. Ftit mill-artiġjani jirnexxilhom jagħmlu kwantitajiet kbar t’affarijiet utli minn xi ħaġa daqshekk sempliċi. Is-soċjetà ilha tiddependi għal eluf taʼ snin mill-fuħħari għal kikkri, platti, borom, vażetti, u vażuni dekorattivi.
Il-ġenituri wkoll jagħtu kontribut imprezzabbli lis-soċjetà billi jifformaw il-karattru u l-personalità taʼ wliedhom. Il-Bibbja tqabbel lil kull wieħed u waħda minna mat-tafal, u Alla ta biċċa xogħol vitali lill-ġenituri biex dawn jifformaw it-tafal jew “tajn” taʼ wliedhom. (Ġob 33:6; Ġenesi 18:19) Bħalma m’huwiex faċli li toħloq biċċa xogħol sabiħa tal-fuħħar, hekk ukoll m’huwiex faċli li tittrasforma lil uliedek f’adulti responsabbli u bilanċjati. Trasformazzjoni bħal din ma tiġix b’kumbinazzjoni.
Hawn ħafna influwenzi qawwijin li qed jaħdmu biex isawru qalb uliedna. Sfortunatament, xi wħud minn dawn l-influwenzi huma distruttivi. Għalhekk, minflok ma jħalli qalb uliedu tiżviluppa bla ebda gwida taʼ xejn, ġenitur għaqli jħarreġ lil uliedu biex ‘jimxu fit-triq it-tajba,’ fiduċjuż li ‘ma joħorġux minnha lanqas meta jixjieħu.’—Proverbji 22:6.
Matul il-proċess twil u eċċitanti tat-trobbija tat-tfal, ġenituri Kristjani għaqlin se jkollhom jiddedikaw ħin biex jiskansawhom minn influwenzi negattivi li jheddu qalb uliedhom. L-imħabba tagħhom se tiġi testjata mhux ħażin hekk kif bil-paċenzja jagħtu lil uliedhom “it-tagħlim, u l-korrezzjoni, li huma parti mit-trobbija Kristjana.” (Efesin 6:4, The New English Bible) M’għandniex xi ngħidu, il-biċċa xogħol li għandhom il-ġenituri se tkun ħafna iktar faċli jekk jibdew iħarrġu lil uliedhom minn kmieni.
Bidu minn Kmieni
Il-fuħħari jħobb jaħdem b’tafal li jkun artab biżżejjed biex jinħadem malajr, iżda fl-istess ħin ikun daqstant sod biex iżomm il-forma li jingħata. Wara li t-tafal jiġi rfinut, il-fuħħari jippreferi jużah fi żmien sitt xhur. Bl-istess mod, l-aħjar żmien biex il-ġenituri jibdew jifformaw qalb uliedhom hu meta l-qalb tkun iktar
f’qagħda li l-iktar lesta li tismaʼ u tiġi fformata faċilment.L-ispeċjalisti tat-tfal jgħidu li sakemm it-trabi jkollhom tmien xhur, dawn ikunu diġà tgħallmu jagħrfu l-ħsejjes tal-lingwa tal-post, ifformaw rabta soda mal-ġenituri, żviluppaw l-abbiltà li jużaw is-sensi biex jitgħallmu, u bdew jesploraw id-dinja taʼ madwarhom. L-aħjar żmien biex wieħed jibda jsawrilhom qalbhom hu meta jkunu għadhom żgħar. X’vantaġġ ikun għal uliedek jekk bħal Timotju, ‘sa minn żgħorithom isiru midħla tal-Kotba Mqaddsa’!—2 Timotju 3:15. *
Hija ħaġa naturali li t-trabi jimitaw lill-ġenituri. Minbarra li jimitaw il-ħsejjes, l-espressjonijiet, u l-ġesti, huma jitgħallmu dwar l-imħabba, il-qalb tajba, u l-mogħdrija meta jaraw lill-ġenituri tagħhom juru dawn il-kwalitajiet. Jekk irridu nħarrġu lil uliedna skond il-liġijiet taʼ Jehovah, il-kmandamenti t’Alla jridu l-ewwel u qabel kollox ikunu fi qlubna stess. Apprezzament mill-qalb bħal dan se jqanqal lill-ġenituri jkellmu lil uliedhom regolarment dwar Jehovah u dwar il-Kelma tiegħu. “Tkellem fuqhom,” tagħtina parir il-Bibbja, “meta tkun f’darek, u meta tkun miexi fit-triq, u meta timtedd, u meta tqum.” (Dewteronomju 6:6, 7) Francisco u Rosa jispjegaw kif jagħmlu dan maż-żewġt itfal żgħar tagħhom. *
“Minbarra l-konversazzjonijiet normali taʼ kuljum, nipprovaw inkellmu lil uliedna individwalment minn taʼ l-inqas 15-il minuta kuljum. Meta naraw li hemm xi problema, inqattgħu ftit iktar ħin—u problemi fil-fatt dejjem ikun hemm. Per eżempju, it-tifel tagħna li għandu ħames snin dan l-aħħar ġie mill-iskola u qalilna li ma kienx jemmen b’Jehovah. Milli jidher, xi ħadd minn sħabu tal-klassi kien waqqgħu għaċ-ċajt u qallu li m’hemmx Alla.”
Dawn il-ġenituri rrealizzaw li t-tfal jeħtieġ li jiżviluppaw fidi fil-Ħallieq tagħhom. Fidi bħal din tistaʼ tinbena fuq il-mod naturali kif it-tfal huma affaxxinati mill-ħolqien t’Alla. Kemm jieħdu gost it-tfal imissu xi annimal, jaqtgħu xi fjuri salvaġġi, jew jilagħbu fuq ir-ramel ħdejn il-baħar! Il-ġenituri jistgħu jgħinuhom jassoċjaw il-ħolqien mal-Ħallieq. (Salm 100:3; 104:24, 25) Ir-riverenza profonda u r-rispett li huma jiżviluppaw għall-ħolqien taʼ Jehovah jistgħu jibqgħu magħhom tul ħajjithom kollha. (Salm 111:2, 10) Flimkien m’apprezzament bħal dan, it-tfal jistgħu jiżviluppaw xewqa li jogħġbu lil Alla u biżaʼ li ma jogħġbuhx. Dan se jqanqalhom biex ‘jaħarbu l-ħażen.’—Proverbji 16:6.
Għalkemm il-biċċa l-kbira mit-tfal huma kurjużi u jitgħallmu malajr, l-ubbidjenza tistaʼ ma tkunx daqshekk faċli. (Salm 51:7 [51:5, NW]) Kultant jistgħu jinsistu li tgħaddi tagħhom jew li tagħtihom kulma jridu. Il-ġenituri jeħtieġ li jkunu sodi, paċenzjużi, u juru d-dixxiplina biex ma jħallux dawn l-attitudnijiet irabbu l-għeruq f’uliedhom. (Efesin 6:4) Hekk għamlu Phyllis u Paul, li rnexxielhom irabbu sew lill-ħamest itfal tagħhom.
Phyllis tiftakar: “Għalkemm kull wieħed minn uliedna kellu personalità differenti, ilkoll kemm huma riedu li tgħaddi tagħhom. Kienet biċċa xogħol iebsa, imma maż-żmien tgħallmu xi tfisser il-kelma ‘le.’” Ir-raġel tagħha, Paul, qal: “Spiss, meta kienu jkunu taʼ età li jifhmu, konna ngħidulhom ir-raġuni għala nkunu ħadna dik id-deċiżjoni partikulari. Għalkemm dejjem ipprovajna nkunu qalbna tajba, għallimniehom
jirrispettaw l-awtorità tagħna mogħtija minn Alla.”Filwaqt li jistaʼ jkun hemm problemi matul it-tfulija, ħafna ġenituri jsibu li l-akbar sfida tiġi fis-snin taʼ l-adolexxenza, meta l-qalb immatura tiffaċċja ħafna provi ġodda.
Kif Tilħaq Qalb l-Adolexxent
Il-fuħħari jrid jilħaq jagħmel xogħlu qabel jinxiflu t-tafal. Biex jirbaħ il-ħin, forsi jżid xi ftit ilma ħalli t-tafal jibqagħlu niedi u artab. Bl-istess mod, il-ġenituri jridu jaħdmu iebes biex ma jħallux qalb l-adolexxent issir iebsa. M’għandniex xi ngħidu, l-għodda prinċipali tagħhom hija l-Bibbja. Permezz tagħha huma jistgħu ‘jċanfru, iwiddbu, u jħejju lil uliedhom għal kull ħidma tajba.’—2 Timotju 3:15-17.
Madankollu, adolexxent forsi ma jiħux gost jaċċetta l-parir tal-ġenituri bħalma kien jaċċettah meta kien iżgħar. L-adolexxenti jistgħu jibdew jagħtu iktar kas taʼ dak li jgħidulhom sħabhom, u għalhekk il-komunikazzjoni bil-miftuħ u spontanja mal-ġenituri tagħhom forsi tistaʼ tibda tonqos. F’dan iż-żmien il-ġenituri jeħtieġ li jkunu iktar paċenzjużi u tas-sengħa għaliex issa l-irwol tagħhom u taʼ wliedhom ikun differenti minn qabel. L-adolexxenti jkollhom jaddattaw ruħhom għall-bidliet fiżiċi u emozzjonali tagħhom. Iridu jibdew jagħmlu deċiżjonijiet u miri li jistgħu jeffettwaw il-bqija taʼ ħajjithom. (2 Timotju 2:22) Matul dan il-perijodu diffiċli, huma jridu jħabbtu wiċċhom maʼ forza li jistaʼ jkollha effett diżastruż fuq qalbhom—il-pressjoni minn dawk taʼ mparhom.
Din il-pressjoni rari tiġi f’darba u b’mod li l-adolexxenti jkunu jistgħu jindunaw biha. Pjuttost, ġeneralment din tkun permezz taʼ serje taʼ kummenti jew sitwazzjonijiet li jħallu effett ħażin fuqhom. Dawn jattakkaw id-dgħjufija li jbatu minnha l-biċċa l-kbira miż-żgħażagħ—il-biżaʼ ġewwieni li jiġu mwarrbin minn żgħażagħ oħra. Peress li jkunu qed jiġġieldu mal-mistħija u mal-fatt li jixtiequ jiġu aċċettati mill-oħrajn, xi żgħażagħ jistgħu jibdew japprovaw ‘dak li hemm fid-dinja’ kif jagħmlu ż-żgħażagħ l-oħra.—1 Ġwann 2:15-17; Rumani 12:2.
Biex is-sitwazzjoni tkompli titgħarraq, ix-xewqat naturali tal-qalb imperfetta għandhom mnejn jaqblu maʼ dak li jkunu qed jgħidulhom dawk taʼ mparhom. Pariri bħal “Gawdi” u “Agħmel dak li jogħġbok” forsi jinstemgħu sbieħ għal widnejhom. María tiftakar fl-esperjenza tagħha: “Kont nismaʼ mill-adolexxenti sħabi li kienu jemmnu li ż-żgħażagħ għandhom id-dritt igawdu kemm jifilħu, u ma joqogħdux iqisu l-konsegwenzi. Peress li ridt nagħmel bħalma kienu jagħmlu sħabi taʼ l-iskola, għal naqra ma dħaltx f’inkwiet serju.” Bħala ġenitur, trid tgħin lill-adolexxent tiegħek biex jirbaħ pressjoni bħal din, imma dan kif tistaʼ tagħmlu?
Proverbji 20:5) Mill-mod kif iġib ruħu u mill-burdati tiegħu tistaʼ tinduna bin-niket jew il-konfużjoni li jkun għaddej minnha. Wieġeb għall-karba tiegħu għall-għajnuna, u ‘farraġlu qalbu.’—Kolossin 2:2, Saydon.
Bi kliemek u bl-azzjonijiet tiegħek, assigurah kemm-il darba li int jimpurtak minnu. Agħmel ħiltek biex tiskopri kif iħossu dwar ċerti affarijiet, u ipprova ifhem il-problemi tiegħu, li jistgħu jkunu ferm iktar diffiċli minn dawk li ffaċċjajt int meta kont l-iskola. F’dan iż-żmien partikulari, l-adolexxent jeħtieġ li jqisek bħala xi ħadd li jistaʼ jiftaħ qalbu miegħu. (M’għandniex xi ngħidu, huwa importanti li tibqaʼ sod għal dak li hu tajjeb. Ħafna ġenituri sabu li kultant żmien jiffaċċjaw battalja maʼ wliedhom, imma ma jistgħux iċedu meta d-deċiżjoni tagħhom tkun ibbażata fuq is-sod. Mill-banda l-oħra, qis li tifhem is-sitwazzjoni sew qabel tiddeċiedi li tuża d-dixxiplina bl-imħabba u kif se tagħmel dan meta jkun hemm bżonnha.—Proverbji 18:13.
Saħansitra minn ġol-Kongregazzjoni
Reċipjent tal-fuħħar jistaʼ jidher li jkun lest, imma jekk ma jkunx inħema ġol-forn, jistaʼ jsir difettuż bl-istess likwidi li jitpoġġew fih. Il-Bibbja tqabbel il-provi u d-diffikultajiet maʼ dan il-proċess bin-nar, peress li dawn juru liema xorta taʼ nies aħna tassew. M’għandniex xi ngħidu, il-Bibbja qed titkellem partikolarment dwar provi tal-fidi tagħna, imma b’mod ġenerali, dan jgħodd ukoll għal provi oħrajn. (Ġakbu 1:2-4) Ħaġa taʼ l-iskantament, xi ftit mill-provi diffiċli li jiffaċċjaw iż-żgħażagħ għandhom mnejn jiġu minn ġol-kongregazzjoni.
Għalkemm l-adolexxent tiegħek ikun jidher b’saħħtu spiritwalment, minn ġewwa forsi jkun qed jissielet maʼ qalb maqsuma bejn żewġ affarijiet. (1 Slaten 18:21) Per eżempju, Megan kellha tħabbat wiċċha maʼ ideat dinjin li nibtu fost żgħażagħ oħra li kienu jiġu s-Sala tas-Saltna.
“Ġejt influwenzata minn grupp taʼ żgħażagħ li ħassew li l-Kristjanità kienet monotona u li kienet qed iżżommhom lura milli jieħdu pjaċir. Kienu jgħidu affarijiet bħal: ‘Kif nagħlaq it-18-il sena, nitlaq mill-verità,’ jew ‘Għandi sebaʼ mitt sena sakemm nitlaq.’ Ma kinux jieħdu gost jagħmluha maʼ żgħażagħ li kienu jaħsbuha mod ieħor, u kienu jgħajruhom qaddisin.”
Biżżejjed ikun hemm wieħed jew tnejn li jkollhom attitudni ħażina biex iġennu lill-bqija jagħmlu bħalhom. Individwi fi grupp ġeneralment jagħmlu dak li tagħmel il-maġġuranza. Il-bluha u l-fanfarunati jistgħu jieħdu post l-għerf u d-deċenza. X’ħasra hi li f’ħafna pajjiżi kien hemm każi taʼ żgħażagħ Kristjani li ġew fl-inkwiet għax għamlu bħal dawk taʼ madwarhom.
M’għandniex xi ngħidu, l-adolexxenti għandhom bżonn ċertu ammont taʼ sħubija pjaċevoli. Kif tistaʼ int bħala ġenitur tipprovdilhom din is-sħubija? Rumani 12:13) Inkuraġġixxi lil uliedek biex isegwu xi attività li tkun taʼ ġid għalihom, bħal ngħidu aħna li jitgħallmu jdoqqu xi strument jew jitgħallmu xi lingwa oħra jew xi sengħa. Fil-biċċa l-kbira mill-każi, dawn ikunu jistgħu jagħmluhom fl-ambjent protett tad-dar.
Aħseb bis-serjetà dwar id-divertiment li jogħġobhom, u ippjana attivitajiet interessanti mal-familja jew maʼ xi grupp taʼ żgħażagħ u kbar flimkien. Sir af il-ħbieb taʼ wliedek. Stidinhom għal xi ikla, jew qattaʼ xi serata magħhom. (L-Edukazzjoni Tistaʼ Tkun taʼ Protezzjoni
L-edukazzjoni taʼ adolexxent tistaʼ wkoll tgħinu jżomm id-divertiment f’postu. Loli, li ilha 20 sena taħdem bħala amministratriċi fi skola kbira, tgħid: “Rajt ħafna Xhieda żgħażagħ fl-iskola. Ħafna minnhom kienu taʼ min ifaħħarhom minħabba l-kondotta tagħhom, imma oħrajn lanqas biss kienu jintgħarfu mill-istudenti l-oħra. Dawk li kienu t’eżempju tajjeb kienu bla dubju dawk li ħadu interess fl-istudji tagħhom. B’qalbi kollha nagħti parir lill-ġenituri biex jieħdu interess attiv fil-progress akkademiku taʼ wliedhom, isiru jafu lill-għalliema tagħhom, u jikkonvinċu lil uliedhom li hu importanti ħafna li jkollhom reputazzjoni tajba. Ikun hemm xi wħud li jibbrillaw, imma lkoll kemm huma jistgħu jaslu biex ikollhom livelli sodisfaċenti u jiksbu r-rispett taʼ l-għalliema tagħhom.”
Edukazzjoni bħal din tistaʼ tgħin ukoll lill-adolexxenti jimxu ’l quddiem spiritwalment. Tistaʼ tgħallimhom drawwiet tajbin taʼ studju, dixxiplina mentali, u sens taʼ responsabbiltà. L-abbiltà li jaqraw tajjeb u jifhmu sew l-ideat bla dubju se tinkuraġġihom ikunu studenti u għalliema aħjar tal-Kelma t’Alla. (Neħemija 8:8) Ix-xogħol taʼ l-iskola u l-istudji spiritwali jirrikjedu ħafna ħin, u dan jgħinhom biex iżommu r-rikreazzjoni fil-post xieraq tagħha.
Sors taʼ Unur Għalikom u għal Jehovah
Fil-Greċja tal-qedem ħafna mill-vażuni kellhom żewġ firem, waħda tal-fuħħari li għamilhom u l-oħra tal-pittur li pinġa fuqhom. Bl-istess mod, fil-familja ġeneralment ikun hemm tnejn li jieħdu sehem fil-formazzjoni tat-tfal. Kemm il-missier u kemm l-omm jieħdu sehem f’li jsawru qalb uliedhom, u b’mod figurattiv l-ulied ikollhom żewġ “firem” fuqhom. Bħal fuħħari u/jew pittur taʼ suċċess, int tistaʼ tħossok kburi bix-xogħol li tkun għamilt biex issawwar żagħżugħ li jkun prezzjuż u sabiħ.—Proverbji 23:24, 25.
Is-suċċess taʼ din il-biċċa xogħol grandjuża jiddependi fil-biċċa l-kbira minn kemm int tkun sawwart il-qalb taʼ wliedek. Nittamaw li tkun tistaʼ tgħid: “Il-liġi taʼ Alla tiegħu għal qalbu, ma jitfixkilx fil-mixi tiegħu.” (Salm 37:31) Il-kundizzjoni taʼ qalb it-tfal hija importanti wisq biex inħalluha tiżviluppa bla ebda gwida taʼ xejn.
[Noti taʼ taħt]
^ par. 8 Xi ġenituri jaqraw il-Bibbja lit-trabi tat-twelid. Il-vuċi kalma flimkien maʼ din l-esperjenza pjaċevoli jistgħu jġagħlu lit-tfal ikollhom apprezzament għall-qari għall-bqija t’għomorhom.
^ par. 9 Xi ismijiet ġew mibdulin.