Xi Tfisser Għalik l-​Ikla tal-​Mulej?

“Kull min jiekol il-​ħobż jew jixrob il-​kalċi tal-​Mulej bla ma jixraqlu, ikun ħati tal-​ġisem u d-​demm tal-​Mulej.”—1 Korintin 11:27.

1. X’inhi l-​iktar ġrajja importanti pjanata għas-​sena 2003, u kif bdiet?

L-​IKTAR ġrajja importanti pjanata għas-​sena 2003 se tkun fis-​16 t’April wara nżul ix-​xemx. Ix-​Xhieda taʼ Jehovah dak in-​nhar se jiltaqgħu biex josservaw il-​Mafkar tal-​mewt taʼ Ġesù Kristu. Bħalma ntwera fl-​artiklu taʼ qabel, Ġesù waqqaf din l-​osservanza, imsejħa wkoll l-​Ikla tal-​Mulej, wara li hu u l-​appostli tiegħu ċċelebraw il-​Qbiż fl-​14 taʼ Nisan tas-​sena 33 E.K. L-​emblemi tal-​Mafkar, il-​ħobż bla ħmira u l-​inbid aħmar, jissimbolizzaw il-​ġisem bla dnub taʼ Kristu u d-​demm imxerred tiegħu—l-​uniku sagrifiċċju li jistaʼ jifdi lill-​bnedmin mid-​dnub u l-​mewt li wirtu.—Rumani 5:12; 6:23.

2. Liema twissija tinsab fl-​1 Korintin 11:27?

² Dawk li jieħdu sehem mill-​emblemi tal-​Mafkar iridu jagħmlu dan kif jixraq. L-​appostlu Pawlu dan għamlu ċar meta kiteb lill-​Kristjani f’Korintu tal-​qedem, fejn l-​Ikla tal-​Mulej ma kinitx qed tiġi osservata b’mod xieraq. (1 Korintin 11:​20-22) Pawlu kiteb: “Kull min jiekol il-​ħobż jew jixrob il-​kalċi tal-​Mulej bla ma jixraqlu, ikun ħati tal-​ġisem u d-​demm tal-​Mulej.” (1 Korintin 11:27) Xi jfisser dan il-​kliem?

Xi Wħud Osservawh b’Mod Mhux Xieraq

3. Ħafna Kristjani Korintin kif kienu qed iġibu ruħhom fl-​osservanzi taʼ l-​Ikla tal-​Mulej?

³ Ħafna Kristjani Korintin ħadu sehem mill-​Mafkar b’mod mhux xieraq. Kien hemm il-​frid bejniethom, u minn taʼ l-​inqas għal ftit żmien, xi wħud kienu jieħdu l-​ikla tagħhom taʼ fil-​għaxija u jikluha qabel jew matul il-​laqgħa, u taʼ spiss kienu jieklu u jixorbu żżejjed. La kienu jkunu attenti mentalment u lanqas spiritwalment. Minħabba f’hekk kienu ‘ħatja tal-​ġisem  u d-​demm tal-​Mulej.’ Dawk li ma jkunu kielu xejn fil-​għaxija kien jaqbadhom il-​ġuħ u jitilfu l-​konċentrazzjoni. Iva, ħafna ħadu sehem f’din l-​okkażjoni bla ma wrew rispett għaliha u bla ma għarfu bis-​sħiħ is-​serjetà tagħha. Mhux taʼ b’xejn li ġabu kundanna fuqhom infushom!—1 Korintin 11:​27-34.

4, 5. Għala huwa essenzjali għal dawk li s-​soltu jieħdu sehem mill-​emblemi tal-​Mafkar li jeżaminaw sew lilhom infushom?

⁴ Kull sena, hekk kif il-​Mafkar jibda joqrob, ikun essenzjali li kull wieħed u waħda minn dawk li s-​soltu jieħdu sehem mill-​emblemi jeżaminaw sew lilhom infushom. Biex jaqsmu b’mod xieraq f’din l-​ikla taʼ komunjoni, iridu jkunu f’kundizzjoni spiritwali f’saħħitha. Kulmin juri diżrispett, saħansitra disprezz, għas-​sagrifiċċju taʼ Ġesù jkun jinsab fil-​periklu li jiġi ‘maqtugħ minn nies Alla,’ bħalma kien jiġrilu Iżraeli li kien ikun imniġġes u jieħu sehem fl-​ikla taʼ komunjoni.—Levitiku 7:20; Lhud 10:​28-31.

⁵ Pawlu qabbel il-​Mafkar maʼ ikla taʼ komunjoni f’Iżrael tal-​qedem. Hu tkellem dwar l-​għaqda maʼ Kristu taʼ dawk li jieħdu sehem u mbagħad qal: “Ma tistgħux tixorbu x-​xorb tal-​Mulej u x-​xorb tad-​demonji; ma tistgħux taqsmu fil-​Mejda tal-​Mulej u  fil-​mejda tad-​demonji.” (1 Korintin 10:​16-21) Jekk xi ħadd li s-​soltu jieħu sehem mill-​emblemi tal-​Mafkar jagħmel dnub serju, għandu jistqarru maʼ Jehovah u jfittex ukoll l-​għajnuna spiritwali taʼ l-​anzjani tal-​kongregazzjoni. (Proverbji 28:13; Ġakbu 5:​13-16) Jekk verament jindem u jagħmel frott li jixraq lill-​indiema, ma jkunx qed jieħu sehem bla ma jixraqlu.—Luqa 3:8.

Dawk li Jattendu Bħala Osservaturi li Juru Rispett

6. Alla għal min irriservah il-​privileġġ li jieħu sehem mill-​Ikla tal-​Mulej?

⁶ Għandhom dawk li issa qed jagħmlu l-​ġid lill-​fdal tal-​144,000 aħwa taʼ Kristu jieħdu sehem mill-​Ikla tal-​Mulej? (Mattew 25:​31-40; Apokalissi 14:1) Le. Alla rriserva dak il-​privileġġ għal individwi li hu dilek bl-​ispirtu qaddis biex ikunu “werrieta maʼ Kristu.” (Rumani 8:​14-18; 1 Ġwann 2:20) Mela x’inhi l-​pożizzjoni taʼ dawk li jittamaw li jgħixu għal dejjem f’ġenna globali taħt il-​ħakma tas-​Saltna? (Luqa 23:43; Apokalissi 21:​3, 4) Peress li m’humiex werrieta maʼ Ġesù bit-​tama għas-​sema, huma jattendu l-​Mafkar bħala osservaturi li juru rispett.—Rumani 6:​3-5.

7. Il-​Kristjani taʼ l-​ewwel seklu għala kienu jafu li kellhom jieħdu sehem mill-​emblemi tal-​Mafkar?

⁷ Il-​Kristjani veri taʼ l-​ewwel seklu kienu midlukin bl-​ispirtu qaddis. Ħafna minnhom setgħu jużaw wieħed jew iktar mid-​doni mirakolużi taʼ l-​ispirtu, bħal li jitkellmu bl-​ilsna. Għalhekk, ma kienx se jkun diffiċli għal individwi bħal dawn biex ikunu jafu li kienu midlukin bl-​ispirtu u li għandhom jieħdu sehem mill-​emblemi tal-​Mafkar. Madankollu, fi żmienna, dan jistaʼ jiġi determinat fuq il-​bażi taʼ kliem ispirat bħal dan: “Dawk kollha li jmexxihom l-​Ispirtu taʼ Alla huma wlied Alla. Għax intom ma rċevejtux l-​ispirtu li jwassalkom għall-​jasar biex terġgħu taqgħu fil-​biżaʼ, imma rċevejtu l-​Ispirtu li jagħmel minnkom ulied adottivi; u li bih aħna nistgħu ngħajjtu: ‘Abba! Missier!’”—Rumani 8:​14, 15.

8. Min huma rappreżentati mill-​“qamħ” u “s-​sikrana” msemmijin f’Mattew kapitlu 13?

⁸ Matul is-​sekli, il-​midlukin ġenwini kibru bħal “qamħ” f’għalqa tas-​“sikrana,” jew Kristjani foloz. (Mattew 13:​24-30, 36-43) Minn madwar l-​1870 ’l hawn, “il-​qamħ” beda jidher iktar u iktar, u ftit snin wara lill-​indokraturi Kristjani midlukin intqalilhom: “L-​anzjani . . . għandhom ipoġġu quddiem dawk li jiltaqgħu [għall-Mafkar] dawn il-​kundizzjonijiet,—(1) fidi fid-​demm [taʼ Kristu]; u (2) dedikazzjoni lill-​Mulej u s-​servizz tiegħu, anki sal-​mewt. Imbagħad għandhom jistiednu lil dawk kollha li huma taʼ dan l-​istess ħsieb u dedikazzjoni biex jaqsmu fiċ-​ċelebrazzjoni tal-​mewt tal-​Mulej.”—Studies in the Scriptures, is-​VI Serje, The New Creation, paġna 473. *

It-​Tfittxija għan-​“Nagħaġ Oħra”

9. Fl-​1935 kif ġie ċċarat min huma l-​“kotra kbira,” u dan kif effettwa lil xi wħud li kienu jieħdu sehem mill-​emblemi tal-​Mafkar?

⁹ Maż-​żmien, l-​organizzazzjoni taʼ Jehovah bdiet tiffoka l-​attenzjoni fuq oħrajn minbarra s-​segwaċi midlukin taʼ Kristu. F’nofs is-​snin 30 tas-​seklu li għadda seħħ żvilupp notevoli f’konnessjoni maʼ dan. Qabel, il-​poplu t’Alla kien iqis il-​“kotra kbira” t’Apokalissi 7:9 bħala klassi spiritwali sekondarja li kienet se tissieħeb mal-​144,000 uħud midlukin irxoxtati fis-​sema—bħal qaddejja jew sħab taʼ l-​għarusa taʼ Kristu. (Salm 45:​15, 16 [45:​14, 15, NW]; Apokalissi 7:4; 21:​2, 9) Imma fil-​31 taʼ Mejju, 1935, f’taħdita li saret waqt konvenzjoni tax-​Xhieda taʼ Jehovah f’Washington, D.C., l-​Istati Uniti, ngħatat spjegazzjoni Skritturali li l-​“kotra kbira” tirreferi għan-​“nagħaġ oħra” li jgħixu matul iż-​żmien tat-​tmiem. (Ġwann 10:16) Wara din il-​konvenzjoni, xi wħud li qabel kienu ħadu sehem mill-​emblemi tal-​Mafkar waqfu jagħmlu dan għax irrealizzaw li t-​tama tagħhom kienet għall-​art, mhux għas-​sema.

10. Kif tiddeskrivihom it-​tama u r-​responsabbiltajiet tan-​“nagħaġ oħra” taʼ żmienna?

 ¹⁰ Mill-​1935 ’l hawn bdiet għaddejja tfittxija b’mod speċjali għal dawk li jsiru “nagħaġ oħra,” uħud li jkollhom fidi fil-​prezz tal-​fidwa, jiddedikaw ruħhom lil Alla, u jappoġġaw lill-​“merħla ċkejkna” fl-​attività taʼ l-​ippridkar tas-​Saltna. (Luqa 12:32) Dawn in-​nagħaġ oħra jittamaw li jgħixu fuq l-​art għal dejjem, imma fl-​affarijiet l-​oħra kollha, huma jixbhu lill-​fdal preżenti tal-​werrieta tas-​Saltna. Bħall-​barranin f’Iżrael tal-​qedem li qiemu lil Jehovah u ssottomettew ruħhom għal-​Liġi, in-​nagħaġ oħra taʼ llum jaċċettaw ir-​responsabbiltajiet Kristjani, bħal li jippridkaw l-​aħbar tajba flimkien mal-​membri taʼ Iżrael spiritwali. (Galatin 6:16) Madankollu, bħalma l-​barranin ma setgħux isiru slaten jew qassisin taʼ Iżrael, ħadd minn dawn in-​nagħaġ oħra ma jistaʼ jaħkem fis-​Saltna tas-​sema jew jaqdi bħala qassis.—Dewteronomju 17:14b, 15 (17:​15, NW).

11. Id-​data tad-​dedikazzjoni taʼ persuna għala tistaʼ teffettwa t-​tama tagħha?

¹¹ Imbagħad, sas-​snin 30 beda jsir ċar li l-​klassi tas-​sema, b’mod ġenerali, kienet intgħażlet. Issa, it-​tfittxija għan-​nagħaġ oħra, li għandhom tama għall-​art, ilha għaddejja għal bosta snin. Jekk wieħed midluk ma jibqax leali, iċ-​ċans kbir hu li persuna li ilha taqdi lil Alla fedelment bħala waħda min-​nagħaġ oħra se tissejjaħ biex timla l-​post vojt li jkun seħħ fil-​144,000.

Għala Mingħalihom li Huma għas-​Sema

12. Individwu f’liema ċirkustanzi għandu jieqaf jieħu sehem mill-​emblemi tal-​Mafkar, u għala?

¹² Il-​Kristjani midlukin huma assolutament ċerti li għandhom is-​sejħa għas-​sema. Imma xi ngħidu jekk xi individwi li m’għandhomx din is-​sejħa jieħdu sehem mill-​emblemi tal-​Mafkar? Billi issa jafu li qatt ma kellhom it-​tama għas-​sema, żgur li l-​kuxjenza tagħhom se ġġagħalhom jieqfu jieħdu sehem. Alla m’huwiex se japprova lil xi ħadd li jirrappreżenta lilu nnifsu bħala individwu msejjaħ biex ikun sultan u qassis fis-​sema, meta dan ikun jaf li fil-​fatt m’għandux din is-​sejħa. (Rumani 9:16; Apokalissi 20:6) Jehovah qatel lil Koraħ il-​Levita talli kien prużuntuż u fittex li jikseb is-​saċerdozju Aroniku. (Eżodu 28:1; Numri 16:​4-11, 31-35) Jekk xi Kristjan jinduna li bi żball ħa sehem mill-​emblemi tal-​Mafkar, hu għandu jieqaf jieħu sehem u jitlob bl-​umiltà għall-​maħfra taʼ Jehovah.—Salm 19:14 (19:​13, NW).

13, 14. Xi wħud għala jistaʼ jkun mingħalihom li għandhom is-​sejħa għas-​sema?

¹³ Xi wħud għala jkun mingħalihom li għandhom is-​sejħa għas-​sema? Il-​mewt tal-​parti l-​oħra fiż-​żwieġ jew xi traġedja oħra tistaʼ ġġagħalhom jitilfu l-​interess fil-​ħajja fuq l-​art. Jew forsi jkunu jixtiequ l-​istess tama li għandu xi ħabib, jew ħabiba, tal-​qalb li jgħid li hu Kristjan midluk. M’għandniex xi ngħidu, Alla ma qabbad lil ħadd biex jagħżel lil oħrajn għal dan il-​privileġġ. U hu ma jidlikx lill-​werrieta tas-​Saltna billi jġagħalhom jisimgħu xi ilħna b’messaġġi dwar dan.

¹⁴ Minħabba l-​idea reliġjuża falza li n-​nies tajbin kollha jmorru s-​sema, xi wħud jistgħu jaslu biex jaħsbu li għandhom is-​sejħa għas-​sema. Għaldaqstant, għandna bżonn ngħassu kontra l-​influwenza taʼ ideat ħżiena tal-​passat jew fatturi oħra. Per eżempju, xi wħud jistgħu jistaqsu lilhom infushom: ‘Nuża jien xi mediċini li jeffettwaw l-​emozzjonijiet tiegħi? Għandi jien it-​tendenza li nkun persuna emozzjonali ħafna tant li l-​emozzjonijiet nistaʼ nħallihom jiġru bija?’

15, 16. Xi wħud għala jistgħu jikkonkludu b’mod żbaljat li huma midlukin?

¹⁵ Xi wħud jistgħu jistaqsu lilhom infushom: ‘Irrid jien inkun prominenti? Jien ambizzjuż għall-​awtorità issa jew bħala werriet maʼ Kristu fil-​futur?’ Meta l-​werrieta tas-​Saltna ġew imsejħin fl-​ewwel seklu, mhux kollha kellhom pożizzjonijiet taʼ responsabbiltà fil-​kongregazzjoni. U individwi bis-​sejħa għas-​sema ma jfittxux il-​prominenza jew jiftaħru għax huma midlukin. Huma juru l-​umiltà mistennija minn dawk li għandhom “il-​ħsieb taʼ Kristu.”—1 Korintin 2:16.

 ¹⁶ Xi wħud setgħu kkonkludew li għandhom is-​sejħa għas-​sema għax kisbu għarfien mhux ħażin tal-​Bibbja. Imma d-​dlik bl-​ispirtu ma jġibx xi fehma straordinarja, għax Pawlu kellu jgħallem u jwissi lil ċerti wħud midlukin. (1 Korintin 3:​1-3; Lhud 5:​11-14) Alla għandu arranġament biex jipprovdi l-​ikel spiritwali lin-​nies tiegħu kollha. (Mattew 24:​45-47) Għalhekk ħadd m’għandu jaħseb li meta xi ħadd ikun Kristjan midluk ikollu xi għerf superjuri minn dak li għandu t-​tama għall-​art. Il-​fatt li wieħed ikun kapaċi ħafna jwieġeb mistoqsijiet Skritturali, jagħti xiehda, jew jagħti taħditiet mill-​Bibbja ma jindikax li jkun midluk bl-​ispirtu. Hemm Kristjani bit-​tama għall-​art li wkoll huma kwalifikati tajjeb f’dawn l-​aspetti.

17. Id-​dlik bl-​ispirtu minn xiex u minn min jiddependi?

¹⁷ Jekk kredent jistaqsi dwar is-​sejħa għas-​sema, anzjan jew Kristjan matur ieħor jistaʼ jiddiskuti s-​suġġett miegħu. Madankollu, wieħed ma jistax jieħu din id-​deċiżjoni għal ħaddieħor. Individwu li verament għandu din is-​sejħa m’għandux għalfejn jistaqsi lil oħrajn jekk għandux din it-​tama. Il-​midlukin ‘ma tweldux mill-​ġdid minn nisel li jitħassar, imma minn nisel li ma jitħassarx, bis-​saħħa tal-​kelma taʼ Alla li tgħix u tibqaʼ għal dejjem.’ (1 Pietru 1:23) Bl-​ispirtu u bil-​Kelma tiegħu, Alla jiżraʼ ż-​żerriegħa, jew in-​“nisel”, li jagħmel lill-​individwu “ħolqien ġdid,” b’tama għas-​sema. (2 Korintin 5:17) U Jehovah jagħmel l-​għażla. Fejn jidħol id-​dlik bl-​ispirtu, “mhux x’wieħed irid jew kemm jitħabat li jgħodd, iżda għal min Alla jħenn.” (Rumani 9:16) Mela persuna kif tistaʼ tkun ċerta li għandha s-​sejħa għas-​sema?

Għala Huma Ċerti

18. L-​ispirtu t’Alla kif jixhed maʼ l-​ispirtu tal-​midlukin?

¹⁸ Ix-​xiehda taʼ l-​ispirtu t’Alla tikkonvinċi lill-​Kristjani midlukin li għandhom prospetti għas-​sema. “Intom . . . irċevejtu l-​Ispirtu li jagħmel minnkom ulied adottivi,” kiteb Pawlu, “u li bih aħna nistgħu ngħajjtu: ‘Abba! Missier!’ Dan l-​Ispirtu jixhed flimkien maʼ l-​ispirtu tagħna li aħna wlied Alla. Jekk aħna wlied, aħna wkoll werrieta, werrieta taʼ Alla, werrieta maʼ Kristu: ladarba aħna nbatu miegħu, biex miegħu nkunu gglorifikati.” (Rumani 8:​15-17) Taħt l-​influwenza taʼ l-​ispirtu qaddis, l-​ispirtu, jew l-​attitudni li timmotiva, tal-​midlukin iġagħalhom japplikaw għalihom infushom dak li  tgħid l-​Iskrittura dwar it-​tfal spiritwali taʼ Jehovah. (1 Ġwann 3:2) L-​ispirtu t’Alla jġiegħel lil wieħed midluk iħoss ir-​relazzjoni taʼ iben maʼ missieru u jipproduċi fih tama unika. (Galatin 4:​6, 7) Iva, ħajja taʼ dejjem fuq l-​art bħala bnedmin perfetti mdawrin minn membri tal-​familja u ħbieb kienet tkun xi ħaġa sabiħa, imma m’hijiex din it-​tama li tahom Alla. Permezz taʼ l-​ispirtu tiegħu, Alla pproduċa fihom tama għas-​sema tant qawwija li huma lesti li jissagrifikaw kull rabta u prospett fuq l-​art.—2 Korintin 5:​1-5, 8; 2 Pietru 1:​13, 14.

19. Liema rwol għandu l-​patt il-​ġdid fil-​ħajja taʼ Kristjan midluk?

¹⁹ Il-​Kristjani midlukin huma ċerti mit-​tama tagħhom għas-​sema, mill-​fatt li ttieħdu f’patt ġdid. Ġesù dan semmih meta waqqaf il-​Mafkar u qal: “Dan il-​kalċi huwa l-​Patt il-​Ġdid b’demmi, id-​demm li jixxerred għalikom.” (Luqa 22:20) Il-​patt il-​ġdid huwa bejn Alla u l-​midlukin. (Ġeremija 31:​31-34; Lhud 12:​22-24) Ġesù huwa l-​medjatur. Peress li beda jaħdem permezz tad-​demm imxerred taʼ Kristu, il-​patt il-​ġdid ħa poplu, mhux biss mil-​Lhud imma wkoll mill-​ġnus, għal isem Jehovah u għamlu parti min-​“nisel” t’Abraham. (Galatin 3:​26-29; Atti 15:14) Permezz “tal-​patt taʼ dejjem,” l-​Iżraelin spiritwali kollha jistgħu jiġu rxoxtati għal ħajja immortali fis-​sema.—Lhud 13:20.

20. F’liema patt maʼ Kristu jittieħdu l-​midlukin?

²⁰ Il-​midlukin huma ċerti mit-​tama tagħhom. Huma ttieħdu f’patt ieħor, il-​patt tas-​Saltna. Rigward is-​sehem tagħhom maʼ Kristu, Ġesù qal: “Intom dawk li żammejtu sħiħ miegħi fit-​tiġrib kollu li ġie fuqi; u bħalma Missieri ħejja saltna għalija, hekk ukoll jiena nħejji għalikom.” (Luqa 22:​28-30) Dan il-​patt bejn Kristu u s-​slaten imseħbin tiegħu jibqaʼ jgħodd għal dejjem.—Apokalissi 22:5.

L-​Istaġun tal-​Mafkar—Żmien Imbierek

21. Kif nistgħu nibbenefikaw bil-​kbir mill-​istaġun tal-​Mafkar?

²¹ Il-​barkiet fl-​istaġun tal-​Mafkar huma ħafna. Nistgħu nibbenefikaw mill-​qari tal-​Bibbja pjanat għal dak il-​perijodu. Huwa żmien xieraq b’mod speċjali biex nitolbu, nimmeditaw fuq il-​ħajja u l-​mewt taʼ Ġesù fuq l-​art, u nieħdu sehem fix-​xogħol taʼ l-​ippridkar tas-​Saltna. (Salm 77:13 [77:​12, NW]; Filippin 4:​6, 7) L-​osservanza nfisha tfakkarna fl-​imħabba murija minn Alla u Kristu f’konnessjoni mas-​sagrifiċċju taʼ Ġesù bħala prezz tal-​fidwa. (Mattew 20:28; Ġwann 3:16) Dan il-​provvediment jagħtina tama u faraġ u għandu jsaħħaħ id-​determinazzjoni tagħna biex infittxu li nixbhu lil Kristu fil-​ħajja tagħna. (Eżodu 34:6; Lhud 12:3) Il-​Mafkar għandu wkoll isaħħaħna biex inwettqu d-​dedikazzjoni tagħna bħala qaddejja t’Alla u nkunu segwaċi leali taʼ Ibnu l-​għażiż.

22. X’inhi l-​iktar ħaġa tajba li Alla ta lill-​bnedmin, u x’inhu mod wieħed kif nistgħu nuru l-​apprezzament għaliha?

²² Kemm jagħtina affarijiet tajbin Jehovah! (Ġakbu 1:17) Għandna l-​gwida tal-​Kelma tiegħu, l-​għajnuna taʼ l-​ispirtu tiegħu, u t-​tama taʼ ħajja eterna. L-​iktar ħaġa tajba li ta Alla hi s-​sagrifiċċju taʼ Ġesù għad-​dnubiet tal-​midlukin u taʼ dawk kollha li jeżerċitaw il-​fidi. (1 Ġwann 2:​1, 2) Mela kemm hi għażiża għalik il-​mewt taʼ Ġesù? Se tkun int fost dawk li juru l-​gratitudni għaliha billi jinġabru wara nżul ix-​xemx nhar is-​16 t’April, 2003, biex josservaw l-​Ikla tal-​Mulej?

[Nota taʼ taħt]

X’Inhuma t-​Tweġibiet Tiegħek?

• Min għandu jieħu sehem millemblemi tal-​Mafkar?

• “In-​nagħaġ oħra” għala jattendu l-​Ikla tal-​Mulej sempliċement bħala osservaturi li juru rispett?

• Il-Kristjani midlukin kif ikunu jafu li għandhom jieħdu sehem mill-​ħobż u l-​inbid fil-​Mafkar tal-​mewt taʼ Kristu?

• Għalxiex huwa żmien tajjeb l-​istaġun tal-​Mafkar?

[Mistoqsijiet taʼ Studju]

[Graff/Stampi f’paġna 18]

(For fully formatted text, see publication)

Attendenza għall-​Mafkar

BIL-​MILJUNI

15,597,746

15

14

13,147,201

13

12

11

10

 9

 8

 7

 6

 5

4,925,643

 4

 3

 2

 1

878,303

63,146

19351955197519952002

[Stampa f’paġna 18]

Se tkun preżenti għall-​Ikla tal-​Mulej din is-​sena?

[Stampi f’paġna 21]

L-​istaġun tal-​Mafkar huwa żmien mill-​aqwa biex naqraw iktar il-​Bibbja u nieħdu sehem iżjed fix-​xogħol taʼ l-​ippridkar tas-​Saltna