Dejjem Għandek Bżonn Kmand tal-Bibbja?
Dejjem Għandek Bżonn Kmand tal-Bibbja?
META kont żgħir, x’aktarx li l-ġenituri tiegħek għamlulek ħafna regoli. Waqt li bdejt tikber, sirt tapprezza li huma kienu qed jagħmlu dan għall-ġid tiegħek. Issa li int adult, forsi għadek tgħix fi qbil maʼ ċerti prinċipji li huma naqqxu ġo fik, avolja m’għadekx taħt l-awtorità tagħhom.
Missierna tas-sema, Jehovah, jagħtina numru taʼ kmandi diretti permezz tal-Kelma tiegħu, il-Bibbja. Per eżempju, hu jipprojbixxi l-idolatrija, il-fornikazzjoni, l-adulterju, u s-serq. (Eżodu 20:1-17; Atti 15:28, 29) Waqt li aħna “nikbru f’kollox” spiritwalment, nibdew napprezzaw li Jehovah irid l-aħjar għalina u li l-kmandi tiegħu m’humiex restrittivi żżejjed.—Efesin 4:15; Isaija 48:17, 18; 54:13.
Madankollu, hemm ħafna sitwazzjonijiet li għalihom m’hemmx kmand dirett. Għalhekk, xi wħud iħossu li peress li m’hemmx liġi diretta fil-Bibbja, huma ħielsa li jagħmlu dak li jridu. Huma jgħidu li jekk Alla ħass li kien neċessarju, kieku hu kien jesprimi r-rieda tiegħu permezz taʼ kmand dirett.
Dawk li jħossuhom hekk spiss jieħdu deċiżjonijiet mhux għaqlin biex imbagħad iktar tard jiddispjaċihom. Huma jonqsu li jaraw li l-Bibbja fiha mhux biss liġijiet imma wkoll indikazzjonijiet dwar kif jaħsibha Alla. Waqt li nistudjaw il-Bibbja u nsiru nafu kif Jehovah iħares lejn l-affarijiet, aħna niżviluppaw kuxjenza mħarrġa fuq il-Bibbja u niġu megħjunin nieħdu deċiżjonijiet li jirriflettu l-mogħdijiet tiegħu. Meta nagħmlu dan, aħna nferrħulu qalbu u naħsdu l-benefiċċji li jirriżultaw milli nieħdu deċiżjonijiet għaqlin.—Efesin 5:1.
Eżempji Bibliċi li Jispikkaw
Meta nħarsu lejn rakkonti Bibliċi taʼ qaddejja t’Alla fi żminijiet tal-qedem, insibu sitwazzjonijiet fejn dawn qiesu kif jaħsibha Jehovah anki meta ma kinux taħt kmand dirett. Ikkunsidra l-eżempju taʼ Ġużeppi. F’dak iż-żmien meta kien qed jiffaċċja tentazzjonijiet immorali mill-mara taʼ Putifar, ma kien hemm ebda liġi ispirata minn Alla kontra l-adulterju. Madankollu, saħansitra mingħajr liġi diretta, Ġużeppi fehem li l-adulterju kien dnub mhux biss kontra l-kuxjenza tiegħu stess imma anki “kontra Alla.” (Ġenesi 39:9) B’mod evidenti, Ġużeppi rrikonoxxa li l-adulterju hu vjolazzjoni kontra l-ħsieb u r-rieda t’Alla, bħalma wera Alla nnifsu f’Għeden.—Ġenesi 2:24.
Ikkunsidra eżempju ieħor. F’Atti 16:3, aħna nitgħallmu li qabel ma ħa lil Timotju fil-vjaġġi Kristjani tiegħu, Pawlu għamillu ċ-ċirkonċiżjoni. Madankollu, fil-vers 4 naqraw li Pawlu u Timotju mbagħad ivvjaġġaw fil-bliet iwasslu “d-digrieti taʼ l-appostli u l-presbiteri taʼ Ġerusalemm.” Fost dawk id-digrieti kien hemm id-deċiżjoni li l-Kristjani ma kinux għadhom taħt il-liġi li jagħmlu ċ-ċirkonċiżjoni! (Atti 15:5, 6, 28, 29) Pawlu għala ħass li kien neċessarju li Timotju jagħmel iċ-ċirkonċiżjoni? ‘Minħabba l-Lhud taʼ dawk l-inħawi, għax kollha kienu jafu li missier [Timotju] kien Grieg.’ Pawlu ma riedx jikkaġuna offiża jew ikun taʼ tfixkil bla bżonn. Hu kien konċernat dwar li l-Kristjani jħallu ‘l-kuxjenza taʼ kull bniedem tiġġudikah hi quddiem Alla.’—2 Korintin 4:2; 1 Korintin 9:19-23.
Dan it-tip taʼ tħassib kien tipiku għal Pawlu u Timotju. Aqra rakkonti bħal Rumani 14:15, 20, 21 u l-1 Korintin 8:9-13; 10:23-33, u ara kemm Pawlu kien verament konċernat dwar is-saħħa spiritwali t’oħrajn, speċjalment taʼ dawk li setgħu jitfixklu minħabba xi ħaġa li, wara kollox, ma kinitx ħażina. U Pawlu kiteb dwar Timotju: “’Il ħadd ma għandi bħalu li minn qalbu jieħu ħsiebkom sewwa. Kulħadd ifittex li jaqbel lilu u mhux dak li hu taʼ Ġesù Kristu. Intom tafu bit-tiġrib tiegħu; kif bħal iben maʼ missieru ħadem miegħi għat-tixrid taʼ l-Evanġelju.” (Filippin 2:20-22) X’eżempju mill-aqwa ħallew għalina llum dawn iż-żewġt irġiel Kristjani! Minflok m’għażlu dak li jaqblilhom jew dak li jippreferu personalment meta ma kinux taħt kmand divin, huma imitaw l-imħabba taʼ Jehovah u taʼ Ibnu billi kkunsidraw kif id-deċiżjonijiet persunali tagħhom setgħu jeffettwaw lil oħrajn spiritwalment.
Ikkunsidra lil Ġesù Kristu, l-aqwa eżempju. Fil-Priedka taʼ fuq il-Muntanja, hu spjega biċ-ċar li wieħed li jifhem l-ispirtu tal-liġijiet t’Alla se jobdihom saħansitra iżjed minn dak li hu kmandat jew projbit speċifikament. (Mattew 5:21, 22, 27, 28) La Ġesù, la Pawlu, la Timotju, u lanqas Ġużeppi m’addottaw ir-raġunar li fejn m’hemmx liġi divina speċifika, bniedem jistaʼ jagħmel li jrid. Sabiex jaqblu mal-ħsieb t’Alla, dawn l-irġiel għexu b’dak li Ġesù identifikahom bħala l-aqwa żewġ kmandamenti—li tħobb lil Alla u li tħobb lil għajrek.—Mattew 22:36-40.
Xi Ngħidu għall-Kristjani Llum?
Huwa ċar li m’għandniex inħarsu lejn il-Bibbja bħallikieku xi dokument legali—billi nistennew li kull obbligu jkun imniżżel bl-eżatt, kelma b’kelma. Kemm inferrħu bil-kbir lil qalb Jehovah meta nagħżlu li nagħmlu dak li jirrifletti l-ħsieb tiegħu, anki meta m’hemmx liġi speċifika biex tgħidilna x’għandna nagħmlu. Fi kliem ieħor, minflok ma dejjem nistennew li xi ħadd jgħidilna x’għandna nagħmlu, aħna nistgħu nfittxu jew ‘nagħrfu x’inhi r-rieda tal-Mulej.’ (Efesin 5:17; Rumani 12:2, korsiv tagħna.) Dan għala jferraħ lil Jehovah? Għaliex juri li m’aħniex iktar konċernati dwar li nfittxu l-preferenzi persunali u d-drittijiet tagħna milli li nogħġbu lilu. Juri wkoll li aħna napprezzaw l-imħabba tiegħu sal-punt li nkunu rridu nimitawha, billi nagħmlu din l-imħabba l-qawwa li timmotivana. (Proverbji 23:15; 27:11) Iktar minn hekk, azzjonijiet ibbażati fuq dak li hu indikat fl-Iskrittura jikkontribwixxu għal saħħa spiritwali u ħafna drabi fiżika wkoll.
Ejja naraw kif dan il-prinċipju jistaʼ jiġi applikat f’affarijiet persunali.
L-Għażla tad-Divertiment
Ikkunsidra l-każ taʼ żagħżugħ li jixtieq jixtri album ġdid tad-diski. Dak li ġa semaʼ mill-album huwa tal-widna, imma hu mħasseb peress li l-qoxra taʼ wara tindika li l-kliem huwa espliċitu sesswalment u profan. Imbagħad, ukoll, hu jara li ħafna mid-diski taʼ l-artist huma taʼ ton irrabjat u aggressiv. Bħala xi ħadd li jħobb lil Jehovah, dan iż-żagħżugħ hu
interessat fil-ħsibijiet u s-sentimenti Tiegħu fuq il-kwistjoni. Kif jistaʼ jagħraf x’inhi r-rieda t’Alla f’dan?Fl-ittra tiegħu lill-Galatin, l-appostlu Pawlu jsemmi l-għemejjel tal-ġisem u l-frott taʼ l-ispirtu t’Alla. X’aktarx li taf f’hiex jikkonsisti l-frott taʼ l-ispirtu t’Alla: l-imħabba, l-hena, il-paċi, is-sabar, il-ħniena, it-tjieba, il-fidi, il-ħlewwa, u r-rażan. Imma l-attivitajiet taʼ l-għemejjel tal-ġisem f’hiex jikkonsistu? Pawlu jikteb: “L-għemejjel tal-ġisem huma magħrufa: żína, faħx, nuqqas taʼ rażan, idolatrija, seħer, mibegħda, ġlied, għira, korla, ambizzjoni, firda, partiti, invidja, sokor, tbahrid, u ħwejjeġ bħal dawn. Nwissikom, bħalma wissejtkom qabel, min jagħmel dawn il-ħwejjeġ ma jiritx is-saltna taʼ Alla.”—Galatin 5:19-23.
Innota l-aħħar espressjoni f’dik il-lista—“ħwejjeġ bħal dawn.” (Korsiv tagħna.) Pawlu ma tax lista li ma tieqaf qatt taʼ dak kollu li jistaʼ jitqies bħala għemejjel tal-ġisem. Ma jfissirx li wieħed jistaʼ jirraġuna, ‘L-Iskrittura tħallini nieħu sehem fi kwalunkwe attività li mhix fil-lista taʼ Pawlu taʼ l-għemejjel tal-ġisem.’ Minflok, il-qarrejja jridu jużaw il-qawwiet perċettivi tagħhom sabiex jidentifikaw l-affarijiet li forsi m’humiex fuq din il-lista imma huma “bħal dawn.” Dawk li bla ndiema jkomplu jieħdu sehem fi prattiċi li m’humiex imsemmijin imma huma “bħal dawn” mhux se jirtu l-barkiet tas-Saltna t’Alla.
B’hekk, irridu nifhmu, jew nagħrfu, dak li ma jogħġobx lil Jehovah. Huwa diffiċli dan? Ejja ngħidu li t-tabib jgħidlek li għandek bżonn tiekol iktar frott u ħaxix, u biex tevita l-ġelat u affarijiet bħal dawn. Ikun diffiċli li tiddetermina fuq liema lista għandu jitpoġġa l-kejk? Issa erġaʼ ħares lejn il-frott taʼ l-ispirtu t’Alla u l-għemejjel tal-ġisem. Maʼ liema lista għandu jitpoġġa l-album tad-diski msemmi fuq? Żgur li m’għandu xejn x’jaqsam maʼ l-imħabba, it-tjieba, ir-rażan, jew il-kwalitajiet l-oħra assoċjati mal-frott taʼ l-ispirtu t’Alla. Wieħed m’għandux bżonn liġi diretta biex jagħraf li dan it-tip taʼ mużika mhux fi qbil maʼ kif jaħsibha Alla. L-istess prinċipji japplikaw għal dak li naqraw, films, programmi tat-televixin, logħob tal-kompjuter, Web sites, u nibqgħu sejrin.
Dehra Persunali Aċċettabbli
Il-Bibbja tipprovdi wkoll prinċipji li jitfgħu dawl fuq il-kwistjonijiet taʼ l-ilbies u d-dehra persunali. Dawn iħallu lil kull Kristjan ikun gwidat biex iżomm dehra persunali xierqa u li tingħoġob. F’dan l-aspett ukoll, dak li jħobb lil Jehovah jara opportunità f’dan, mhux biex jagħmel dak li jrid, imma biex jagħmel dak li jferraħ lil Missieru tas-sema. Bħalma diġà rajna, il-fatt li Jehovah ma taniex regoli speċifiċi fuq il-kwistjoni ma jfissirx li ma jinteressahx f’dak li jagħmlu n-nies tiegħu. L-istili huma differenti minn post għall-ieħor, u anki fl-istess post dawn jistgħu jinbidlu kull tant żmien. Madankollu, Alla jipprovdi prinċipji bażiċi li għandhom jiggwidaw lill-poplu tiegħu f’kull ħin u f’kull post.
Per eżempju, l-1 Timotju 2:9, 10 jgħid: “Hekk ukoll nixtieq li n-nisa jiżżejjnu bi lbies xieraq, bil-modestja u bl-għaqal, mhux b’xagħarhom midfur, anqas bid-deheb jew ġawhar jew ilbies lussuż, imma bl-għemil it-tajjeb, kif jixraq lil nisa li [“jgħidu li jqimu lil Alla,” NW].” B’hekk, nisa Kristjani—kif ukoll irġiel—għandhom jaħsbu dwar liema tip t’apparenza jistennew in-nies taʼ fejn joqogħdu huma mingħand nies li “jgħidu li jqimu lil Alla.” Huwa xieraq b’mod speċjali li Kristjan jaħseb sew dwar kif l-apparenza tiegħu se ġġiegħel lil oħrajn jaħsbu dwar il-messaġġ tal-Bibbja li hu jġorr. (2 Korintin 6:3) Kristjan eżemplari mhux biss se jkun konċernat iżżejjed mill-preferenzi tiegħu jew id-drittijiet imma, minflok, dwar li ma jsirx sors taʼ distrazzjoni jew taʼ xkiel għall-oħrajn.—Mattew 18:6; Filippin 1:10, NW.
Meta Kristjan isib li ċertu stil fid-dehra persunali għandu effett li joffendi jew ifixkel 1 Korintin 11:1) U dwar Ġesù, Pawlu kiteb: “Kristu ma fittixx jogħġob lilu nnifsu.” L-istruzzjoni taʼ Pawlu lil Kristjani hija ċara: “Aħna li aħna sħaħ fil-fidi għandna ngħinu lid-dgħajfa jerfgħu l-piż tagħhom u mhux infittxu nogħġbu lilna nfusna. Kull wieħed minna għandu jfittex jogħġob lil għajru għall-ġid tiegħu.”—Rumani 15:1-3.
lil oħrajn, hu jistaʼ jimita lill-appostlu Pawlu billi jpoġġi t-tħassib dwar is-saħħa spiritwali t’oħrajn qabel il-preferenza persunali tiegħu. Pawlu qal: “Ixbhu lili bħalma jien nixbah lil Kristu.” (Insaħħu l-Qawwiet Perċettivi Tagħna
Kif nistgħu niżviluppaw il-qawwiet perċettivi tagħna sabiex inkunu nafu kif nogħġbu lil Jehovah anki meta ma jkunx tana direzzjoni speċifika dwar xi kwistjoni? Jekk naqraw il-Kelma tiegħu kuljum, nistudjawha regolarment, u nimmeditaw fuq dak li naqraw, se nikbru fil-qawwiet perċettivi tagħna. Dan it-tkabbir ma jseħħx f’daqqa. Bħal tifel żgħir li jikber fiżikament, it-tkabbir spiritwali huwa pass wara pass u ma tistax tagħrfu mill-ewwel. Għalhekk hemm bżonn il-paċenzja, u m’għandniex nirrabjaw jekk ma ninnotawx titjib mill-ewwel. Mill-banda l-oħra, iż-żmien biss mhux se jsaħħaħ il-qawwiet perċettivi tagħna. Dan il-ħin għandu jimtela b’konsiderazzjoni regulari tal-Kelma t’Alla bħalma semmejna qabel, u għandna napplikaw il-Kelma f’ħajjitna bl-aħjar mod li nistgħu.—Lhud 5:14.
Jistaʼ jingħad li waqt li l-liġijiet t’Alla jittestjaw l-ubbidjenza tagħna, il-prinċipji tiegħu jittestjaw kemm l-ispiritwalità tagħna hija profonda u kemm hija kbira x-xewqa li nogħġbuh. Waqt li nikbru spiritwalment, aħna se npoġġu iktar enfasi fuq li nimitaw lil Jehovah u lil Ibnu. Aħna se nkunu ħerqanin biex nibbażaw id-deċiżjoni tagħna fuq kif jaħsibha Alla fuq kwistjonijiet bħalma hu indikat fl-Iskrittura. Waqt li nferrħu lil Missierna tas-sema f’dak kollu li nagħmlu, aħna se nsibu li l-ferħ tagħna stess se jiżdied ukoll.
[Stampi f’paġna 23]
Stili taʼ ħwejjeġ huma differenti minn post għal ieħor, imma l-prinċipji Bibliċi għandhom jiggwidaw l-għażliet tagħna