“Imħejjija Għal Kull Opra Tajba”

“FAKKARHOM biex joqogħdu għall-​maġistrati u għall-​awtorità, jobduhom u jkunu dejjem imħejjija għal kull opra tajba.” (Titu 3:1) Liema opri tajbin kellu f’moħħu Pawlu meta kiteb dan il-​kliem lil sħabu fit-​twemmin? L-​istudjuż tal-​Bibbja E. F. Scott enfasizza tip wieħed t’opri tajbin, u qal: “Il-​Kristjani mhux biss kellhom jobdu lill-​awtorità, imma għandhom ikunu mħejjija għal kull opra tajba. . . . Kulmeta jkun hemm bżonn, il-​Kristjani għandhom ikunu minn taʼ quddiem biex juru interess fin-​nies. Ħafna drabi kien jaqbad xi nar xi mkien, tfaqqaʼ xi pesta, iqumu gwajijiet differenti, meta ċ-​ċittadini tajbin kollha xtaqu jgħinu lill-​proxxmu tagħhom.”

Il-​Kristjani jieħdu sehem f’ċerti opri li jinteressaw lill-​pubbliku sakemm dawn l-​opri ma jmorrux kontra l-​liġijiet t’Alla. (Atti 5:29) Per eżempju, l-​uffiċċju tal-​fergħa tax-​Xhieda taʼ Jehovah fil-​Ġappun, li jinsab f’Ebina, segwa d-​direzzjoni li ngħata mid-​dipartiment lokali tan-​nar biex kull sena jagħmel eżerċizzju taʼ taħriġ ħalli kulħadd ikun jaf x’għandu jagħmel f’każ li jaqbad xi nar xi mkien. F’dawn l-​okkażjonijiet, il-​membri kollha tal-​familja taʼ Betel jiltaqgħu flimkien biex jisimgħu xi istruzzjonijiet mogħtijin minn rappreżentant tad-​dipartiment lokali tat-​tifi tan-​nar.

Iktar minn hekk, l-​uffiċċju tal-​fergħa kkoopera maʼ l-​awtoritajiet lokali f’wirja sponsorjata li kienet maħsuba biex teduka lin-​nies ħalli jkunu jafu kif jilqgħu lin-​nar minn qabel. Fil-​wirja, il-​kumpaniji tal-​belt juru kemm huma preparati biex jitfu u jikkontrollaw in-​nar. Il-​fergħa spiss ngħatat premjijiet għall-​abbiltajiet u l-​kooperazzjoni tal-​membri tagħha. Fl-​2001, ħadu l-​premju taʼ l-​ewwel post fil-​wirja. Huma mħejjijin biex jagħmlu opra tajba li tistaʼ ssalva l-​ħajja f’każ taʼ nar.

Servizz Siewi

Madankollu, ix-​Xhieda taʼ Jehovah huma interessati f’tip taʼ opra tajba iktar importanti, li ssalva l-​ħajjiet ukoll. Huma jżuru regolarment lill-​proxxmu tagħhom biex jaqsmu l-​aħbar tajba tas-​Saltna t’Alla. (Mattew 24:14) Ix-​Xhieda jinkuraġġixxu lin-​nies biex jitgħallmu u japplikaw il-​prinċipji Bibliċi f’ħajjithom sabiex itejbu l-​kwalità tal-​ħajja tagħhom issa u jkollhom tama taʼ ħajja eterna f’dinja fejn se jittrijonfaw il-​paċi u s-​sigurtà veri.

Xi wħud għandhom mnejn ma japprezzawx kemm hu siewi s-​servizz li jipprovdu x-​Xhieda taʼ Jehovah, imma jqisuhom bħala fitti. Madankollu, l-​Imħallef Jean Crepeau mill-​Qorti Superjuri taʼ Quebec fil-​Kanada kellu opinjoni differenti. Ix-​Xhieda taʼ Jehovah t’hemmhekk appellaw kontra ċerta liġi tal-​belt taʼ Blainville, fil-​Quebec, li kienet titlob li sabiex iżuru lin-​nies minn bieb għal bieb, ix-​Xhieda kellhom bżonn permess. Fid-​deċiżjoni tal-​qorti, l-​Imħallef Crepeau qal: “Iż-​żjajjar mix-​Xhieda taʼ Jehovah huma servizz Kristjan fil-​komunità u . . . il-​pubblikazzjonijiet  li joffru x-​Xhieda lil ċittadini interessati huma letteratura serja, li tittratta dwar suġġetti bħalma huma r-​reliġjon, il-​Bibbja, id-​drogi, l-​alkoħoliżmu, l-​edukazzjoni taż-​żgħażagħ, il-​problemi fiż-​żwieġ u d-​divorzju.” Id-​deċiżjoni kompliet tgħid: “Il-​qorti tistaʼ biss tikkonkludi li meta wieħed iqabbel lix-​Xhieda taʼ Jehovah maʼ bejjiegħa tat-​triq ikun qed jinsulta, jonqos mir-​rispett, iweġġaʼ, u jimmalafama.”

Ix-Xhieda taʼ Jehovah jaħdmu għall-​ġid tal-​komunità fejn jgħixu billi jgħinu lin-​nies jegħlbu l-​problemi fil-​ħajja taʼ kuljum u jagħtuhom tama għall-​futur. Il-​Bibbja tħejjihom biex iwettqu dan ix-​xogħol. “L-​Iskrittura kollha hija mnebbħa minn Alla, u tiswa biex wieħed jgħallem, iċanfar, iwiddeb u jrawwem fis-​sewwa, biex hekk il-​bniedem taʼ Alla jkun perfett, mħejji għal kull ħidma tajba.”—2 Timotju 3:​16, 17.

Tixtieq tkun taf kif ix-​Xhieda taʼ Jehovah isiru “mħejjija għal kull opra tajba”? Nistidnuk taċċetta l-​għajnuna tagħhom biex titgħallem iktar dwar il-​Bibbja, u b’hekk tieħu vantaġġ minn dan is-​servizz vitali li jagħmlu fil-​komunità fl-​inħawi tiegħek u mad-​dinja kollha.

[Stampi f’paġna 30, 31]

Ix-​Xhieda taʼ Jehovah ifittxu li jikkooperaw maʼ l-​awtoritajiet sekulari

[Stampa f’paġna 31]

Ix-​Xhieda huma magħrufin għall-​għajnuna li jagħtu lill-​proxxmu tagħhom