Mistoqsijiet mill-​Qarrejja

Eżekjel f’liema sens sar “imbikkem,” jew mutu, fi żmien l-​assedju u l-​qerda taʼ Ġerusalemm?

Bażikament, fis-​sens li hu ma kellu xejn xi jżid mal-​messaġġ profetiku taʼ Jehovah li kien diġà wassal lin-​nies.

Il-profeta Eżekjel beda s-​servizz tiegħu bħala għassies leali għall-​eżiljati Iżraelin f’Babilonja meta “s-​sultan Ġeħojakin kien ilu ħames snin itturufnat,” jiġifieri, fis-​sena 613 Q.E.K. (Eżekjel 1:​2, 3) Fl-​għaxar jum taʼ l-​għaxar xahar qamri tas-​sena 609 Q.E.K., hu ġie mgħarraf b’ispirazzjoni divina dwar il-​bidu taʼ l-​assedju mill-​Babiloniżi fuq Ġerusalemm. (Eżekjel 24:​1, 2) X’kien se jirriżulta mill-​assedju? Kienu se jeħilsuha Ġerusalemm u l-​abitanti tagħha? Bħala l-​għassies, Eżekjel kien diġà wassal il-​messaġġ ċar taʼ kundanna mingħand Jehovah, u ma kienx hemm għalfejn iżid xi ħaġa miegħu, bħallikieku biex jagħmel dak il-​messaġġ iktar konvinċenti. Eżekjel immuta rigward dak kollu li kellu x’jaqsam maʼ l-​assedju fuq Ġerusalemm.​—Eżekjel 24:​25-​27.

Xi sitt xhur wara l-​qerda taʼ Ġerusalemm fis-​sena 607 Q.E.K., wieħed li rnexxielu jaħrab ġab l-​aħbar dwar il-​ħerba tal-​belt qaddisa lil Eżekjel li kien Babilonja. Il-​lejla taʼ qabel ma wasal il-​maħrub, Jehovah ‘fetaħ fomm [Eżekjel] u ma baqax aktar imbikkem.’ (Eżekjel 33:22) B’hekk, Eżekjel ma baqax mutu.

Kien Eżekjel letteralment mutu matul dak iż-​żmien? Ovvjament li le, għaliex anki wara li “immuta,” hu bassar profeziji diretti l-​iżjed lejn il-​pajjiżi fil-​viċin li ferħu bil-​waqgħa taʼ Ġerusalemm. (Eżekjel, kapitli 25-​32) Iktar kmieni fil-​karriera taʼ Eżekjel bħala profeta u għassies, Jehovah kien qallu: “Nwaħħallek ilsienek maʼ saqaf ħalqek, u titbikkem, u ma tkellimhomx taʼ bniedem li jċanfarhom, għax huma razza taʼ nies rashom iebsa. Imma meta nkellmek, iftaħ fommok u kellimhom.” (Eżekjel 3:​26, 27) Meta Jehovah ma kellu l-​ebda messaġġ għal Iżrael, Eżekjel kellu jibqaʼ sieket dwar dak li kellu x’jaqsam mal-​ġens. Eżekjel kellu jgħid dak li riedu jgħid Jehovah fiż-​żmien speċifiku li Jehovah riedu jgħidu. In-​nuqqas taʼ kliem min-​naħa taʼ Eżekjel kien jimplika li hu kien se jibqaʼ sieket dwar dak li kellu x’jaqsam mas-​sinifikat profetiku għall-​Iżraelin.

Il-​klassi taʼ l-​għassies taʼ żmienna, il-​Kristjani midlukin, ilha tavża dwar il-​kundanna tal-​Kristjaneżmu, Ġerusalemm antitipika. Meta tfaqqaʼ t-​“tribulazzjoni l-​Kbira” (NW) u teqred lill-​“Babilonja l-​Kbira,” l-​imperu dinji taʼ reliġjon falza, il-​klassi midluka taʼ Eżekjel m’hu se jkollha bżonn tgħid xejn iktar dwar it-​tmiem tal-​Kristjaneżmu, li jifforma parti kbira minn dan l-​imperu.​—Mattew 24:21; Apokalissi 17:​1, 2, 5.

Iva, se jasal il-​jum meta l-​membri tal-​fdal midluk u sħabhom se jibqgħu muti, mingħajr xejn iktar x’jgħidu lill-​Kristjaneżmu. Dan se jiġri meta “l-​għaxart iqrun” u l-​“Bhima” salvaġġa jagħmlu lill-​Babilonja l-​Kbira ħerba u għarwiena. (Apokalissi 17:16) Ovvjament, dan ma jfissirx li l-​Kristjani se jkunu mbikkma f’sens letterali. Saħansitra bħalma qed jagħmlu issa, huma se jfaħħru lil Jehovah u jsemmuh kuljum u “minn nisel għal nisel.”​—Salm 45:18 (45:​17, NW); 145:2.