Proklamaturi tas-​Saltna Jirrapportaw

Insibu lin-​Nies fuq il-​Post tax-​Xogħol Tagħhom

L-​APPOSTLI Mattew, Pietru, Indrì, Ġakbu, u Ġwanni x’kellhom komuni bejniethom? Ilkoll kemm huma ġew imsejħin minn Ġesù waqt li kienu fuq il-​post tax-​xogħol tagħhom. Pietru, Indrì, Ġakbu, u Ġwanni kienu medhijin sew bin-​negozju tagħhom tas-​sajd meta Ġesù stidinhom u qalilhom: “Ejjew warajja.” Mattew kien f’uffiċċju tat-​taxxi meta ġie mistieden biex isir dixxiplu taʼ Ġesù.—Mattew 4:18-21; 9:9.

Il-fatt li nagħtu xiehda lil uħud fuq il-​post tax-​xogħol tagħhom jistaʼ jkun premjanti. Billi rrikonoxxew dan, ix-​Xhieda taʼ Jehovah fil-​Ġappun dan l-​aħħar għamlu sforz speċjali sabiex ikollhom sehem f’dan l-​aspett tal-​ministeru. X’kienu r-​riżultati? Fi ftit xhur, saru eluf taʼ żjajjar lura, u nbdew madwar 250 studju tal-​Bibbja. Ikkunsidra l-​esperjenzi li ġejjin.

Ministru full-time f’Tokjo ltaqaʼ maʼ maniġer taʼ restorant li kien tkellem maʼ Xhud madwar 30 sena qabel, meta kien għadu tifel taʼ l-​iskola. Għalkemm dak iż-​żmien il-​maniġer ma tantx kien fehem dak li tkellmu dwaru, hu beda jinteressa ruħu fil-​Bibbja. Issa li reġaʼ kebbes l-​interess, hu aċċetta mill-​qalb studju tal-​Bibbja mill-​ktieb Għarfien Li Jwassal Għall-​Ħajja Taʼ Dejjem. * Barra minn hekk, beda jaqra l-​Bibbja waħdu kull fil-​għaxija qabel jidħol jorqod.

Pijuniera speċjali żaret uffiċċju u talbet lir-​receptionist biex iċċempel lill-​maniġer. Għalkemm il-​maniġer ma setax ikellimha, it-​tfajla li wieġbet it-​telefon minfloku staqsietha, “Jimporta għalik jekk tkellem lili?” Wara diskussjoni qasira fuq it-​telefon, din it-​tfajla ħarġet u qalet li kienet interessata li taqra l-​Bibbja. Il-​pijuniera speċjali ftehmet biex terġaʼ żżurha u ġġibilha Bibbja. Wara, inbeda studju tal-​Bibbja magħha li kienu jagħmluh kmieni fil-​għodu qabel ix-​xogħol fi ġnien fil-​viċin.

F’uffiċċju ieħor, raġel ra lil waħda mill-​kollegi tiegħu taċċetta r-​rivisti t-​Torri taʼ l-​Għassa u Stenbaħ! imma malajr irmiethom x’ħin ix-​Xhud telaq. Meta dan ir-​raġel wasal id-​dar, qal lil martu li hi Xhud b’dak li kien ġara u qal li għallinqas hu kien joqgħod jismaʼ li kieku offrewlu r-​rivisti. It-​tifla tiegħu, li semgħet dak li qal, qalet b’kollox lil Xhud li jaħdem it-​territorju tan-​negozju. Ix-​Xhud ma damx ma żar lil dan ir-​raġel fl-​uffiċċju u beda studju tal-​Bibbja miegħu. Ir-​raġel malajr beda jattendi regolarment il-​laqgħat taʼ nhar taʼ Ħadd.

L-għoti taʼ xiehda fuq il-​post tax-​xogħol ġab benefiċċji oħra. Ħafna pubblikaturi fil-​Ġappun saru iktar tas-​sengħa fiż-​żjajjar lura f’territorju fejn hemm il-​ħwienet, il-​fabbriki, u l-​uffiċini. Barra minn hekk, permezz taʼ dan it-​tip taʼ ppridkar, ħafna wħud inattivi reġgħu ġew kuntattjati u nbdew studji magħhom. Ir-​riżultati kienu mill-​aqwa. Kongregazzjoni minnhom fiċ-​ċentru taʼ Tokjo dan l-​aħħar irrapportat 108 studji tal-​Bibbja fid-​djar, iktar mid-​doppju tan-​numru rapportat sena ilu.

[Nota taʼ taħt]