Il-Ħolqien Ixandar il-Glorja t’Alla!
Il-Ħolqien Ixandar il-Glorja t’Alla!
“Is-smewwiet ixandru l-glorja taʼ Alla, għemil idejh tħabbar il-firxa tas-sema.” —SALM 19:2 (19:1, NW).
1, 2. (a) Il-bnedmin għala ma jistgħux jaraw direttament il-glorja t’Alla? (b) L-erbgħa u għoxrin xiħ kif jagħtu glorja lil Alla?
“MA TISTAX tara ’l wiċċi, għax ebda bniedem ma jarani u jibqaʼ ħaj.” (Eżodu 33:20) Hekk wissa Jehovah lil Mosè. Minħabba li l-bnedmin magħmulin minn ġisem dgħajjef, huma ma jifilħux jaraw direttament il-glorja t’Alla. Madankollu, f’viżjoni, l-appostlu Ġwanni ngħata dehra spettakolari taʼ Jehovah fuq it-tron glorjuż Tiegħu.—Apokalissi 4:1-3.
2 Kuntrarju għall-bnedmin, il-ħlejjaq spirti leali jistgħu jħarsu lejn wiċċ Jehovah. Fosthom hemm l-“erbgħa u għoxrin Xiħ” fil-viżjoni tas-sema li kellu Ġwanni, li jirrappreżentaw lill-144,000. (Apokalissi 4:4; 14:1-3) Dawn kif iwieġbu għad-dehra li jaraw tal-glorja t’Alla? Skond Apokalissi 4:11, huma jxandru: “Jistħoqqlok, Mulej Alla tagħna, li tilqaʼ l-glorja u l-ġieħ u ssetgħa, għax int ħlaqt il-ħlejjaq kollha, u huma kienu u nħolqu bir-rieda tiegħek.”
Għala “Ma Għandhom Ebda Skuża”
3, 4. (a) Il-fatt li temmen f’Alla għala ma jmurx kontra x-xjenza? (b) Kultant, xi wħud għala jiċħdu l-eżistenza t’Alla?
3 Tħossok imqanqal biex tagħti glorja lil Alla? Il-maġġuranza tal-bnedmin ma jħossuhomx hekk, u xi wħud saħansitra jiċħdu l-eżistenza t’Alla. Per eżempju, wieħed astronomu kiteb: “Kien Alla li involva ruħu u bil-kumdità kollha ddisinja l-univers għall-benefiċċju tagħna? . . . Kemm hu prospett ferrieħi. Sfortunatament nemmen li din hi illużjoni. . . . Alla m’huwiex spjegazzjoni.”
4 Ir-riċerka xjentifika hija limitata—ristretta għal dak li l-bnedmin jistgħu fil-fatt josservaw jew jistudjaw. Il-bqija hija kollha teoriji jew suppożizzjonijiet. Peress li “Alla huwa spirtu,” hu sempliċement ma jistax jiġi eżaminat direttament b’mod xjentifiku. (Ġwanni 4:24) Għalhekk, huwa arroganti li tqis it-twemmin f’Alla bħala li m’huwiex xjentifiku. Ix-xjenzat Vincent Wigglesworth taʼ l-Università taʼ Cambridge osserva li l-metodu xjentifiku fih innifsu ‘jiddependi mill-fidi.’ Dan kif? “Dan jiddependi minn fidi soda fil-fatt li l-fenomeni naturali jaqblu mal-‘liġijiet tan-natura.’” Għalhekk, meta xi ħadd jiċħad l-eżistenza t’Alla, ma jkunx hu qed jiċħad fidi waħda biex jadotta fidi oħra? Kultant, jidher li min ma jemminx minn jeddu jirrifjuta li jiffaċċja din il-verità. Is-salmista kiteb: “[Il-ħażin] fi kburitu jkasbar lill-Mulej, u f’xejn ma jfittxu; u Alla ma jidħolx fi ħsibijietu.”—Korsiv tagħna; Salm 10:4.
5. Għala min ma jemminx f’Alla m’għandux skuża?
5 Madankollu, min jemmen f’Alla ma jkollux fidi għamja, għaliex hemm evidenza abbundanti li Alla jeżisti. (Lhud 11:1) L-astronomu Allan Sandage qal: “Ma tantx naħseb li hu probabbli li daqstant ordni [fl-univers] ġie minn kaos. Bilfors li hemm xi sors t’organizzazzjoni. Għalija Alla hu misteru, imma hu l-ispjegazzjoni għall-miraklu taʼ l-eżistenza, għala hemm xi ħaġa minflok m’hemm xejn.” L-appostlu Pawlu qal lill-Kristjani f’Ruma li “l-kobor [t’Alla] li ma jidhirx, jiġifieri s-setgħa tiegħu taʼ dejjem, u d-divinità tiegħu, huma setgħu jagħrfuh sa mill-ħolqien tad-dinja, permezz tal-ħlejjaq, u għalhekk [dawk li ma jemmnux] ma għandhom ebda skuża.” (Rumani 1:20) Mill-“ħolqien tad-dinja”—speċjalment minn meta nħolqu l-ħlejjaq bnedmin intelliġenti, li setgħu jagħrfu l-eżistenza t’Alla—jidher ċar li hemm Ħallieq taʼ qawwa immensa, Alla li jixraqlu d-devozzjoni. B’hekk, dawk li ma jagħrfux il-glorja t’Alla m’għandhomx skuża. Però, x’evidenza jipprovdi l-Ħolqien?
L-Univers Ixandar il-Glorja t’Alla
6, 7. (a) Is-smewwiet kif ixandru l-glorja t’Alla? (b) Għal liema skop is-smewwiet għamlu “linja”?
6 Salm 19:2 (19:1, NW) iwieġeb billi jgħid: “Is-smewwiet ixandru l-glorja taʼ Alla, għemil idejh tħabbar il-firxa tas-sema.” David għaraf li l-kwiekeb u l-pjaneti li jiddu mill-“firxa tas-sema,” jew l-atmosfera, tawh prova li ma setax imeriha taʼ l-eżistenza glorjuża t’Alla. Hu jkompli: “Jum lil ieħor jagħti l-aħbar, lejl lil ieħor iwassal it-tagħrif.” (Salm 19:3 [19:2, NW]) Jum wara jum u lejl wara lejl, is-smewwiet juru l-għerf t’Alla u l-qawwa tiegħu biex joħloq. Hu bħallikieku s-smewwiet qed ‘jagħtu l-aħbar’ bi kliem taʼ tifħir lil Alla.
7 Madankollu, irid ikollok l-għaqal biex tismaʼ din ix-xiehda. “Ma hemmx aħbar u lanqas kliem; leħinhom ma jinstamax.” Madankollu, ix-xiehda silenzjuża tas-smewwiet hi qawwija. “Il-linja tagħhom tgħaddi maʼ l-art kollha, u kliemhom imur sa tarf id-dinja.” (Salm 19:3, 4, Karm Żammit) Hu bħallikieku s-smewwiet għamlu “linja” biex jiżguraw ruħhom li x-xiehda silenzjuża tagħhom tilħaq kull rokna taʼ l-art.
8, 9. Liema huma xi fatti li jispikkaw dwar ix-xemx?
8 Imbagħad, David jiddeskrivi meravilja oħra tal-ħolqien taʼ Jehovah: “Lix-xemx għamlilha għarix fihom [is-smewwiet viżibbli]; u hi, bħal għarus ħiereġ minn kamartu, ferħana bħal ġgant għall-ġirja tagħha, minn truf is-smewwiet hi toħroġ, sat-truf l-oħra d-dawran tagħha; xejn ma jinħeba mis-sħana tagħha.”—Salm 19:5-7 (4-6, NW).
9 Ix-xemx, meta mqabbla maʼ kwiekeb oħra, hija biss taʼ daqs medju. Madankollu, hi kewkba impressjonanti u ħdejha l-pjaneti l-oħra li jifformaw orbita madwarha jidhru daqs tikka. Sors wieħed jgħid li din tiżen ‘2 segwit minn 27 żero tunnellata’—99.9 fil-mija mill-massa tas-sistema solari tagħna! Il-ġibda tal-gravità tagħha tippermetti li l-art iddur madwarha distanza taʼ 150 miljun kilometru mingħajr ma titbiegħed minnha jew tinġibed lejha. Parti verament ċkejkna mill-enerġija tax-xemx tilħaq il-pjaneta tagħna, imma din hi biżżejjed biex issostni l-ħajja.
10. (a) Ix-xemx kif tidħol u toħroġ mill-“għarix” tagħha? (b) Kif tiġri bħal “ġgant”?
10 Is-salmista juża kliem figurattiv dwar ix-xemx, u jpinġiha bħala “ġgant” li jiġri minn xefaq għall-ieħor matul il-jum u bil-lejl jistkenn f’“għarix.” Meta din il-kewkba qawwija togħdos wara x-xefaq, minn fuq l-art tidher qisha dieħla f’“għarix,” bħallikieku biex tistrieħ. Fil-għodu tidher qisha toħroġ f’daqqa, tiddi bis-sbuħija bħal “għarus ħiereġ minn kamartu.” Bħala ragħaj, David kien jaf kemm jiksaħ sew il-lejl. (Ġenesi 31:40) Hu ftakar kif ir-raġġi tax-xemx kienu jsaħħnu lilu u l-art taʼ madwaru f’ħakka t’għajn. Jidher ċar li din ma kinitx għajjiena fil-“vjaġġ” tagħha mill-punent għal-lvant imma kienet bħal “ġgant,” lesta biex terġaʼ tagħmel il-vjaġġ.
Il-Kwiekeb u l-Galassji taʼ l-Għaġeb
11, 12. (a) X’jispikka dwar il-mod kif il-Bibbja tqabbel il-kwiekeb mar-ramel? (b) Kemm għandu mnejn hu kbir l-univers?
11 Mingħajr teleskopju, David setaʼ jara biss ftit eluf taʼ kwiekeb. Madankollu, skond studju reċenti, l-għadd taʼ kwiekeb fl-univers li jidhru permezz taʼ teleskopji moderni jammontaw għal 70 sistiljun—7 bi 22 żero warajh! Jehovah indika li kien hemm għadd enormi involut meta qabbel l-għadd taʼ kwiekeb mar-“ramel f’xatt il-baħar.”—Ġenesi 22:17.
12 Għal snin sħaħ, l-astronomi osservaw dawk li ġew deskritti bħala “reġjuni żgħar jixegħlu b’dehra mċajpra [nebula], li ma jistgħux jifhmu x’inhuma.” Ix-xjenzati assumew li dawn in-“nebuli f’għamla taʼ garigor” kienu oġġetti fil-galassja tagħna t-Triq tal-Ħalib. Fl-1924, skoprew li l-iktar nebula qrib, Andromeda, kienet fil-fatt galassja fiha nfisha—xi żewġ miljun sena ’l bogħod bid-distanza li jivvjaġġa d-dawl! Ix-xjenzati issa jikkalkulaw li hemm biljuni taʼ galassji, u kull waħda minnhom fiha eluf—kultant biljuni—taʼ kwiekeb. Madankollu, Jehovah “jgħodd in-numru tal-kwiekeb; kollha jsejjħilhom b’isimhom.”—Salm 147:4.
13. (a) X’tistaʼ tammira dwar il-kostellazzjonijiet? (b) Kif inhu evidenti li x-xjenzati ma jafux “il-liġijiet tas-sema”?
13 Jehovah staqsa lil Ġob: “Għandek il-ħila tgħaqqad il-kwiekeb [“kostellazzjoni,” NW] tat-Trajja, jew tħoll minn xulxin l-istilel tal-Ġgant?” (Ġob 38:31) Kostellazzjoni hi għadd taʼ kwiekeb li jidhru forma taʼ disinn partikulari. Għalkemm, fil-fatt, il-kwiekeb jistgħu jkunu ’l bogħod ħafna minn xulxin, huma jibqgħu weqfin fil-pożizzjonijiet relattivi tagħhom meta tħares lejhom mill-art. Peress li l-pożizzjonijiet tagħhom huma tant preċiżi, il-kwiekeb “huma t’għajnuna biex jiggwidaw lil min jivvjaġġa, lill-astronawti biex ikunu jafu l-pożizzjoni tal-vettura spazjali, u biex jiġu identifikati l-kwiekeb.” (The Encyclopedia Americana) Però, ħadd ma jistaʼ jifhem eżatt ‘l-għaqda’ li żżomm lill-kostellazzjonijiet flimkien. Iva, ix-xjenzati għadhom ma jistgħux iwieġbu l-mistoqsija li saret f’Ġob 38:33: “Taf hekk sewwa l-liġijiet tas-sema?”
14. Il-mod kif jitqassam id-dawl f’liema sens għadu misteru?
14 Ix-xjenzati ma jistgħux iwieġbu mistoqsija oħra li saret lil Ġob: “Fejn hija t-triq li minnha jitqassam id-dawl?” (Ġob 38:24, KŻ) Kittieb wieħed sejjaħ din il-mistoqsija dwar id-dawl bħala “mistoqsija xjentifika verament moderna.” F’kuntrast maʼ dan, xi filosfi Griegi kienu jemmnu li d-dawl kien joħroġ mill-għajn tal-bniedem. Fi żminijiet iktar moderni, ix-xjenzati ħasbu li d-dawl hu magħmul minn partiċelli żgħar. Oħrajn immaġinaw li jivvjaġġa f’forma taʼ mewġ. Illum, ix-xjenzati jemmnu li d-dawl jivvjaġġa kemm bħala mewġa u kemm bħala partiċella. Xorta waħda, in-natura tad-dawl u kif “jitqassam” għadu ma jistax jinftiehem għalkollox.
15. Bħal David, kif għandna nħossuna meta naħsbu fil-fond dwar is-smewwiet?
15 Meta dak li jkun jaħseb fil-fond dwar dan kollu, ma jistax ma jħossux bħas-salmista David, li qal: “Nħares lejn is-smewwiet, għemil subgħajk, il-qamar u l-kwiekeb li int qegħedt fihom! X’inhu l-bniedem biex tiftakar fih, bin il-bniedem, biex taħseb fih?”—Salm 8:4, 5 (8:3, 4, NW).
L-Art u l-Ħolqien Tagħha Jigglorifikaw lil Jehovah
16, 17. Il-ħlejjaq fl-“abbissi” tal-baħar kif ifaħħru lil Jehovah?
16 Salm 148 isemmi diversi modi oħra kif il-ħolqien ixandar il-glorja t’Alla. Vers 7 jgħid: “Faħħru l-Mulej minn fuq l-art, mostri tal-baħar u abbissi kollha.” Iva, l-“abbissi” tal-baħar huma kollha meravilji li jġagħlu l-għerf u l-qawwa t’Alla jispikkaw. Il-baliena l-kaħla għandha piż medju taʼ 120 tunnellata—daqs 30 iljunfant! Biss biss, qalbha tiżen iktar minn 450 kilogramma u tiflaħ tippompja xi 6,400 kilogramma demm madwar ġisimha! Huma dawn il-ħlejjaq enormi tal-baħar għajjenin u bla grazzja fil-baħar? Ma tantx. Huma “jivvjaġġaw madwar l-oċeani” b’veloċità li ma bħalha, jgħid rapport mill-European Cetacean Bycatch Campaign. Meta segwewha bis-satellita’ “baliena minnhom ivvjaġġat distanza taʼ iktar minn 16,000 kilometru f’10 xhur.”
17 Tip taʼ denfil b’geddumu qasir is-soltu jinżel f’fond taʼ 45 metru, imma l-aqwa rekord taʼ kemm jinżel fil-fond denfil kien taʼ 547 metru! Kif jibqaʼ ħaj dan il-mammal meta jinżel daqshekk fil-fond? Qalbu tibda tħabbat iktar bil-mod waqt li jkun nieżel u d-demm imur fil-qalb, fil-pulmuni, u fil-moħħ. Ukoll, il-muskoli tiegħu fihom kimika li tiġmaʼ l-ossiġnu. L-iljunfant tal-baħar u tip taʼ baliena kbira li tissejjaħ sperm whale jistgħu jinżlu saħansitra iktar fil-fond. Ir-rivista Discover tgħid li “minflok ma jirreżistu l-pressjoni, huma jħalluha twaqqfilhom il-pulmuni għalkollox.” Huma jaħżnu fil-muskoli tagħhom ħafna mill-ossiġnu li jkollhom bżonn. Jidher ċar li dawn il-ħlejjaq huma xiehda ħajja taʼ l-għerf t’Alla li jistaʼ kollox!
18. L-ilma baħar kif juri l-għerf taʼ Jehovah?
18 Anki l-ilma baħar jirrifletti l-għerf taʼ Jehovah. Ir-rivista Scientific American tgħid: “Kull qatra ilma fl-ewwel 100 metru tal-baħar fiha eluf taʼ flora mikroskopika tiġri ’l hawn u ’l hemm imsejħa fitoplankton.” Din il-“foresta inviżibbli” tnaddaf l-arja tagħna billi tiġbed biljuni taʼ tunnellati taʼ dijossidu karboniku. Il-fitoplankton jipproduċi iktar minn nofs l-ossiġnu li nużaw aħna.
19. In-nar u l-borra kif iwettqu l-iskop taʼ Jehovah?
19 Salm 148:8 jgħid: “In-nar u s-silġ, il-borra u ċ-ċpar, l-irwiefen, li jisimgħu kelmtu.” Iva, Jehovah juża wkoll il-qawwiet bla ħajja tan-natura sabiex iwettaq ir-rieda tiegħu. Ikkunsidra n-nar. Fil-passat, meta tinħaraq foresta kienet titqies biss bħala xi ħaġa taʼ ħsara kbira. Ir-riċerkaturi issa jemmnu li n-nar għandu rwol ekoloġiku importanti għaliex jelimina s-siġar xjuħ jew li jkunu qed imutu, iqanqal lil ħafna żerriegħa biex tinbet, jerġaʼ jġedded is-sustanzi, u saħansitra jnaqqas ir-riskju li jaqbad nar kiefer li jinfirex malajr. Il-borra hi vitali wkoll biex issaqqi u tiffertilizza l-art, iġġedded ix-xmajjar, u tipproteġi l-pjanti u l-annimali minn temperaturi friżati.
20. Il-muntanji u s-siġar kif inhuma taʼ benefiċċju għall-bnedmin?
20 Salm 148:9 jkompli jgħid: “Il-muntanji u l-għoljiet kollha, is-siġar tal-frott u ċ-ċedri kollha.” Il-muntanji maestużi jixhdu dwar il-qawwa kbira taʼ Jehovah. (Salm 65:7 [65:6, NW]) Imma dawn iservu wkoll għal skop prattiku. Rapport mill-Istitut tal-Ġeografija f’Bern, l-Isvizzera, jgħid: “Ix-xmajjar il-kbar tad-dinja ġejjin kollha mill-muntanji. Iktar minn nofs l-umanità tiddependi mill-ilma frisk li jinġemaʼ fil-muntanji . . . Dawn il-[‘ġibjuni’] taʼ l-ilma huma vitali għall-benesseri tal-bniedem.” Anki siġra komuni tagħti glorja lill-Ħallieq tagħha. Rapport mill-Programm tal-Ġnus Magħquda għall-Ambjent jgħid li s-siġar “huma importanti għall-benesseri tan-nies fil-pajjiżi kollha . . . Ħafna speċi taʼ siġar għandhom importanza ekonomika kbira bħala s-sors taʼ prodotti bħall-injam, il-frott, il-ġewż, ir-raża, u l-gomma. Madwar id-dinja, 2 biljun ruħ jiddependu mill-injam biex isajru u jqabbdu n-nar.”
21. Spjega kif werqa sempliċi turi li hemm min iddisinjaha.
21 Saħansitra mill-mod kif inhi disinjata siġra jidher ċar li jeżisti ħallieq għaref. Ikkunsidra sempliċi werqa. Minn barra għandha kisja qisha tax-xemgħa biex ma tinxifx. Eżatt taħt il-kisja fil-parti taʼ fuq hemm għadd taʼ ċelluli li fihom il-kloroplast. Dawn fihom il-klorofilla, li tixrob l-enerġija tad-dawl. Permezz taʼ proċess li jissejjaħ fotosinteżi, il-weraq isir “fabbriki taʼ l-ikel.” L-ilma jittellaʼ mill-għeruq tas-siġra u jinġarr lejn il-weraq permezz taʼ “sistema taʼ l-ilma” sofistikata. Eluf taʼ “kanen” żgħar (li jissejħu stoma) fil-parti taʼ taħt tal-werqa jinfetħu u jingħalqu, u b’hekk jassorbu d-dijossidu karboniku. Id-dawl jipprovdi l-enerġija biex l-ilma u d-dijossidu karboniku jitħalltu u jipproduċu l-karboidrati. Issa l-pjanta tistaʼ tiekol l-ikel li ħolqot hi stess. Madankollu, din il-“fabbrika” ma tagħmilx ħsejjes u hi sabiħa. Minflok ma tniġġes, din titfaʼ l-ossiġnu bħala prodott sekondarju.
22, 23. (a) Liema abbiltajiet rimarkevoli għandhom xi għasafar u annimali taʼ l-art? (b) Liema mistoqsijiet għad irridu nikkunsidraw?
22 “Il-bhejjem selvaġġi u l-annimali kollha, il-bhejjem li jitkaxkru u l-għasafar li jtiru,” jgħid Salm 148:10. Ħafna annimali taʼ l-art u ħlejjaq li jtiru juru li għandhom abbiltajiet taʼ l-għaġeb. L-albatross Laysan jistaʼ jtir għal distanzi enormi (f’każ minnhom 40,000 kilometru f’90 jum). Il-blackpoll warbler (Dendroica striata), għasfur taʼ l-għana, jaqsam l-Amerika minn fuq s’isfel waqt li jibqaʼ fl-ajru għal iktar minn 80 siegħa bla ma jieqaf. Il-ġemel jaħżen l-ilma, mhux fil-ħotba tiegħu bħalma jaħsbu ħafna, imma fis-sistema tiegħu tad-diġestjoni, u għalhekk jistaʼ jibqaʼ għaddej għal żmien twil mingħajr ma jinxef mill-ilma. Mela mhux taʼ b’xejn li l-inġiniera josservaw ir-renju taʼ l-annimali bir-reqqa meta jiddisinjaw xi magni jew materjali ġodda. Il-kittieba Gail Cleere tgħid: “Jekk trid tibni xi ħaġa li taħdem tajjeb . . . u ma tagħmilx ħsara fl-ambjent tagħha, probabbilment se ssib eżempju tajjeb tagħha xi mkien fin-natura.”
23 Iva, il-ħolqien tabilħaqq ixandar il-glorja t’Alla! Mis-smewwiet kollhom kwiekeb sal-pjanti u l-annimali, kull wieħed u waħda minnhom ifaħħar lill-Ħallieq bil-mod tiegħu. Imma xi ngħidu għalina l-bnedmin? Kif nistgħu nfaħħru lil Alla bħalma tagħmel in-natura?
X’Tiftakar?
• Għala min jiċħad l-eżistenza t’Alla m’għandux skuża?
• Il-kwiekeb u l-pjaneti kif jigglorifikaw ’l Alla?
• Il-baħar u l-annimali taʼ l-art kif jagħtu xiehda li jeżisti Ħallieq kollu mħabba?
• Il-qawwiet bla ħajja tan-natura kif iwettqu r-rieda taʼ Jehovah?
[Mistoqsijiet taʼ Studju]
[Stampa f’paġna 10]
Ix-xjenzati jikkalkulaw li l-għadd taʼ stilel li nistgħu naraw jammontaw għal 70 sistiljun!
[Sors]
Frank Zullo
[Stampa f’paġna 12]
Denfil b’geddumu qasir
[Stampa f’paġna 13]
Borra
[Sors]
snowcrystals.net
[Stampa f’paġna 13]
Beċċun t’albatross “Laysan”