Mill-Kalzrijiet Mudlama għall-Alpi Svizzeri
Bijografija
Mill-Kalzrijiet Mudlama għall-Alpi Svizzeri
KIF RAKKONTATA MINN LOTHAR WALTHER
Wara li qattajt tliet snin twal fil-kalzrijiet mudlama tal-ħabsijiet Komunisti fil-Ġermanja tal-Lvant, kelli ġenn biex induq it-togħma ħelwa tal-libertà u s-sħubija kollha mħabba tal-familja tiegħi.
MADANKOLLU, ma kontx lest għall-ħarsa mħawda li kellu fuq wiċċu Johannes, ibni taʼ sitt snin. Fit-tieni nofs taʼ ħajtu, hu ma kienx ra lil missieru. Għalih, jien kont stranġier għalkollox.
Kuntrarju għal ibni, jien gawdejt is-sħubija tal-ġenituri tiegħi li tant kienu jħobbuni. Id-dar tagħna f’Chemnitz, il-Ġermanja, fejn twilidt fl-1928, kienet mimlija b’atmosfera taʼ mħabba. Missieri kien jitkellem fil-beraħ dwar kemm ma kienx kuntent bir-reliġjon. Hu kien jiftakar li matul l-ewwel gwerra dinjija, meta kien jasal il-25 taʼ Diċembru, is-suldati “Kristjani” fuq kull naħa kienu jixtiequ “l-Milied it-tajjeb” lil xulxin, biex l-għada kienu jerġgħu jibdew joqtlu lil xulxin. Għalih, ir-reliġjon kienet l-agħar forma taʼ ipokrisija.
Il-Fidi Tieħu Post id-Diżappunt
B’ferħ ngħid li jien ma kellix l-istess diżappunt. It-tieni gwerra dinjija spiċċat meta kelli 17-il sena, u skappajt bi żbrixx milli ninkiteb għal-lieva. Xorta waħda, kont inkwetat b’mistoqsijiet bħal, ‘Għala hawn dan il-qtil kollu? Lil min nistaʼ nafda? Fejn nistaʼ nsib sigurtà vera?’ Il-Ġermanja tal-Lvant, fejn konna noqogħdu, ġiet taħt il-kontroll tas-Sovjetiċi. L-ideali tal-Komunisti dwar il-ġustizzja, l-ugwaljanza, u r-relazzjonijiet paċifiċi ħajru lil dawk li kienu mifluġa mill-ħsara tal-gwerra. Dalwaqt, ħafna minn dawn l-uħud sinċieri
kienu se jisfaw diżappuntati bil-kbir—din id-darba, mhux mir-reliġjon, imma mill-politika.Kien waqt it-tfittxija tiegħi għal tweġibiet sinifikanti li waħda miz-zijiet tiegħi, li kienet waħda mix-Xhieda taʼ Jehovah, kellmitni dwar it-twemmin tagħha. Hi tatni pubblikazzjoni bbażata fuq il-Bibbja li qanqlitni biex naqra—għall-ewwel darba f’ħajti—il-kapitlu 24 kollu taʼ Mattew. Laqtuni ħafna l-ispjegazzjonijiet raġunevoli u konvinċenti li kien fih il-ktieb, li jidentifikaw iż-żmien tagħna bħala “tmiem id-dinja” u li jippontaw lejn il-kaġun prinċipali għall-problemi taʼ l-umanità.—Mattew 24:3; Apokalissi 12:9.
Malajr irċivejt iktar pubblikazzjonijiet tax-Xhieda taʼ Jehovah, u jien u naqrahom b’entużjażmu kbir, irrealizzajt li sibt il-verità li tant kont ili nfittex bil-ħerqa. Kemm fraħt meta sirt naf li Ġesù Kristu sar Sultan fl-1914 u li dalwaqt se jrażżan l-elementi li jiċħdu lil Alla ħalli jġib il-barkiet għall-bnedmin ubbidjenti kollha! Għalija, skoperta kbira oħra kienet il-fehma ċara dwar il-fidwa. Għenitni nersaq iktar qrib Alla Jehovah b’talb mill-qalb biex nitolbu maħfra. L-istedina ħelwa f’Ġakbu 4:8 verament messitli qalbi. Din tgħid: “Ersqu lejn Alla, u hu jersaq lejkom.”
Minkejja li jien kont qed infur bl-entużjażmu minħabba t-twemmin li kont għadni kif ksibt, il-ġenituri tiegħi u oħti għall-ewwel ma ridux jaċċettaw dak li għedtilhom. Madankollu, dan ma naqqaslix ix-xewqa tiegħi li nattendi l-laqgħat Kristjani li kienu jsiru ħdejn Chemnitz minn grupp żgħir taʼ Xhieda. Kont verament sorpriż meta l-ġenituri tiegħi u oħti ġew miegħi għall-ewwel laqgħa! Dan kien fix-xitwa taʼ l-1945/46. Iktar tard meta ġie fformat grupp għall-istudju tal-Bibbja f’Harthau, fejn konna noqogħdu, il-familja tiegħi bdiet tattendi regolarment.
“Għadni Żgħir”
It-tagħlim li ħadt dwar veritajiet Bibliċi importanti u s-sħubija regulari man-nies taʼ Jehovah wassluni biex niddedika ruħi lil Jehovah u nitgħammed fil-25 taʼ Mejju, 1946. B’sodisfazzjon kbir għalija, il-membri tal-familja tiegħi wkoll għamlu progress spiritwali, u maż-żmien it-tlieta li huma saru Xhieda leali. Oħti għadha taqdi bħala membru attiv f’waħda mill-kongregazzjonijiet f’Chemnitz. Il-ġenituri tiegħi qdew lealment sakemm mietu, ommi fl-1965 u missieri fl-1986.
Sitt xhur wara li tgħammidt bdejt naqdi bħala pijunier speċjali. Dan kien il-bidu taʼ ħajja twila taʼ servizz fi żmien favorevoli u fi żmien taʼ inkwiet. (2 Timotju 4:2) Malajr infetħu opportunitajiet ġodda taʼ servizz. Kien hemm bżonn taʼ evanġelizzaturi full-time f’post imbiegħed fil-lvant tal-Ġermanja. Jien u ħu ieħor applikajna għall-inkarigu, imma ħassejt li la kelli l-esperjenza u lanqas il-maturità għal din ir-responsabbiltà. Peress li kelli biss 18-il sena, ħassejtni bħal Ġeremija: “Ah, . . . Mulej, ma nafx nitkellem, għadni żgħir.” (Ġeremija 1:6) Minkejja l-biżaʼ tiegħi, l-aħwa responsabbli b’qalb tajba ddeċidew li jagħtuna ċ-ċans. Għalhekk, intbgħatna naqdu f’Belzig, belt żgħira fl-istat taʼ Brandenburg.
L-ippridkar f’dan it-territorju kien verament taʼ sfida, imma pprovdieli taħriġ prezzjuż. Maż-żmien, diversi negozjanti nisa prominenti aċċettaw il-messaġġ tas-Saltna u saru Xhieda taʼ Jehovah. Madankollu, il-pożizzjoni tagħhom bħala Xhieda kienet tmur kontra t-tradizzjonijiet qawwija u s-suspetti taʼ din il-komunità iżolata u żgħira. Il-kleru Kattoliku u dak Protestant opponew bl-aħrax u xerrdu l-malafama kontrina minħabba x-xogħol tagħna taʼ l-ippridkar. Imma minħabba li fdajna f’Jehovah għall-gwida u l-protezzjoni, stajna ngħinu lil għadd taʼ wħud interessati biex iħaddnu l-verità.
L-Intolleranza Tidher Riesqa
Is-sena 1948 ġabet magħha kemm barkiet u kemm diffikultajiet mhux mistennija. L-ewwel, ngħatajt l-inkarigu li naqdi bħala pijunier f’Rudolstadt, Thuringia. Hemm sirt naf ħafna aħwa leali u gawdejt il-kumpanija tagħhom. Barka importanti oħra waslet f’Lulju taʼ dik is-sena. Iżżewwiġt lil Erika Ullmann, mara żagħżugħa Kristjana leali u attiva li kont ili nafha minn meta bdejt nattendi l-laqgħat fil-Kongregazzjoni taʼ Chemnitz. Bdejna naqdu bħala pijunieri flimkien f’Harthau, ir-raħal tiegħi. Madankollu, maż-żmien Erika ma setgħetx tkompli fis-servizz full-time minħabba problemi taʼ saħħa u raġunijiet oħra.
Dawn kienu żminijiet diffiċli għan-nies taʼ Jehovah. Id-Dipartiment tax-Xogħol f’Chemnitz annulla l-karta li kienet tippermettili nixtri ċertu ammont taʼ ikel bi prezz fiss. Dan għamlu sabiex jisforzani nieqaf mix-xogħol taʼ l-ippridkar u nfittex xogħol sekulari full-time. Xi aħwa responsabbli użaw il-każ tiegħi biex jitolbu rikonoxximent legali mill-Istat. Dan ġie miċħud, u fit-23 taʼ Ġunju, 1950, ngħatajt is-sentenza biex inħallas multa jew jitfgħuni 30 jum il-ħabs. Appellajna għad-deċiżjoni, imma l-qorti għolja ċaħdet l-appell, u ntbgħatt il-ħabs.
Dan kien biss il-bidu taʼ l-oppożizzjoni u l-inkwiet li kienu qed jiżdiedu bil-mod il-mod. Inqas minn xahar wara, f’Settembru taʼ l-1950, wara li beda kampanja taʼ malafama fuq il-mezzi tax-xandir, ir-reġim Komunista pprojbixxa l-attivitajiet tagħna. Minħabba li żdidna malajr u bqajna newtrali, tawna t-tikketta taʼ aġenzija taʼ spiji mill-Punent, li twettaq “attività dubjuża” waqt li tippretendi li hi reliġjon. Dakinhar stess li ħarġet il-projbizzjoni, marti wildet f’darna lit-tifel tagħna Johannes, meta jien kont il-ħabs. Minkejja li l-qâbla pprotestat, l-uffiċjali tas-Sigurtà taʼ l-Istat daħlu bil-forza fl-appartament tagħna u fittxew għall-evidenza sabiex jagħtu prova taʼ l-akkużi tagħhom. M’għandniex xi ngħidu, huma ma sabu xejn. Minkejja dan, iktar tard irnexxielhom ideffsu spija fil-kongregazzjoni tagħna. Dan wassal biex f’Ottubru taʼ l-1953, l-aħwa rġiel responsabbli ġew arrestati, inkluż jien.
Fil-Kalzrijiet Mudlama
Wara li ġejna dikjarati ħatja u ngħatajna sentenzi li jibdew minn tliet snin sa sitt snin, ngħaqadna maʼ għadd taʼ aħwa fil-kalzri inkallati tal-Kastell Osterstein, fi Zwickau. Minkejja l-kundizzjonijiet terribbli f’dan il-post, veru fraħna bis-sħubija li kellna maʼ aħwa maturi. In-nuqqas taʼ libertà tagħna ma kienx ifisser nuqqas taʼ ikel spiritwali. Għalkemm
konna mibgħudin u projbiti mir-reġim, It-Torri taʼ l-Għassa daħal baxx baxx il-ħabs u dritt fiċ-ċelel tagħna! Kif?Xi aħwa kienu inkarigati jaħdmu f’minjieri tal-faħam fejn setgħu jiltaqgħu maʼ Xhieda mhux ħabsin li tawhom ir-rivisti. Imbagħad l-aħwa kienu jġibu r-rivisti bil-moħbi fil-ħabs u b’għaqal kbir irnexxielhom jgħaddulna lkoll l-ikel spiritwali li tant kellna bżonn. Verament kont kuntent u inkuraġġit minħabba li esperjenzajt l-attenzjoni u d-direzzjoni taʼ Jehovah b’dan il-mod!
Sa l-aħħar tas-sena 1954, intbgħatna fil-ħabs mistkerrah taʼ Torgau. Ix-Xhieda taʼ dan il-post ferħu bina. Sa dakinhar kienu baqgħu b’saħħithom spiritwalment billi rripetew dak li setgħu jiftakru minn artikli antiki tat-Torri taʼ l-Għassa. Kemm kienu jixxennqu għal provvista ġdida taʼ ikel spiritwali! Issa kien imiss lilna li naqsmu magħhom il-punti li studjajna fi Zwickau. Imma kif stajna nagħmlu dan minħabba li kien projbit strettament li nkellmu lil xulxin waqt il-mixjiet tagħna taʼ kuljum? Fil-fatt, l-aħwa kienu tawna xi suġġerimenti prezzjużi dwar kif kellna naġixxu, u l-id qawwija taʼ protezzjoni taʼ Jehovah kienet fuqna. Dan għallimna kemm hu importanti li nħabirku fl-istudju tal-Bibbja u fil-meditazzjoni meta nkunu liberi u jkollna l-opportunità biex nagħmlu dan.
Żmien għal Deċiżjonijiet Importanti
Bl-għajnuna taʼ Jehovah bqajna sħaħ fil-fidi. B’sorpriża kbira, xi wħud minna nħlisna fl-aħħar tas-sena 1956. Ma nistax nispjega l-ferħ li ħassejna meta nfetħu l-bibien tal-ħabs! Sa dakinhar, ibni kellu sitt snin, u tgħidx kemm fraħt meta stajt nerġaʼ ningħaqad maʼ marti fit-trobbija taʼ binna. Għal xi żmien Johannes ittrattani qisni barrani, imma malajr żviluppat rabta taʼ mħabba bejnietna.
Ix-Xhieda taʼ Jehovah fil-Ġermanja tal-Lvant kienu qed jiffaċċjaw żmien tassew diffiċli. Minħabba li bdiet tiżdied l-oppożizzjoni lejn il-ministeru Kristjan u l-pożizzjoni newtrali tagħna, kellna ngħixu taħt theddida kontinwa—ħajja mimlija perikli, inkwiet, u keded. Għalhekk, jien u Erika kellna neżaminaw sew is-sitwazzjoni tagħna bit-talb, u ħassejna l-bżonn li mmorru ngħixu xi mkien ieħor sabiex ikollna kundizzjonijiet iktar favorevoli ħalli ma ninfnewx bl-inkwiet. Ridna l-libertà biex naqdu lil Jehovah u nilħqu l-miri spiritwali tagħna.
Fir-rebbiegħa taʼ l-1957, ġietna opportunità biex immorru ngħixu fi Stuttgart, fil-Ġermanja tal-Punent. Hemmhekk, ix-xogħol taʼ l-ippridkar ma kienx projbit, u aħna stajna nissieħbu maʼ ħutna bil-libertà kollha. L-appoġġ kollu mħabba tagħhom kien taʼ l-għaġeb. Qattajna sebaʼ snin mal-kongregazzjoni taʼ Hedelfingen. Matul dawk is-snin, it-tifel beda l-iskola u għamel progress tajjeb. F’Settembru taʼ l-1962, gawdejt il-privileġġ li nattendi l-Iskola tal-Ministeru tas-Saltna f’Wiesbaden. Hemmhekk ġejt inkuraġġit biex immur ngħix mal-familja tiegħi fejn kien hemm bżonn taʼ għalliema tal-Bibbja li jitkellmu l-Ġermaniż. Dan inkluda ċerti nħawi fil-Ġermanja u l-Isvizzera.
Għal fuq l-Alpi Svizzeri
Għalhekk, fl-1963 morna l-Isvizzera. Ngħatajna d-direzzjoni biex naħdmu maʼ kongregazzjoni żgħira fi Brunnen, ħdejn il-Lag sabiħ taʼ Lucerne, fil-parti ċentrali taʼ l-Alpi Svizzeri. Għalina, konna qisna qegħdin f’ġenna taʼ l-art. Kellna nidraw id-djalett Ġermaniż li jitkellmu f’dan il-post, l-istil taʼ ħajja lokali, u l-mentalità tan-nies. Minkejja dan, ħadna pjaċir fix-xogħol u l-ippridkar qalb dawn in-nies paċifiċi. Għamilna 14-il sena fi Brunnen. It-tifel kiber f’dan il-post.
Fl-1977, meta kelli kważi 50 sena, ġejna mistidnin naqdu fil-Betel taʼ l-Isvizzera f’Thun. Rajnieh bħala privileġġ mhux mistenni u aċċettajnieh b’apprezzament kbir. Jien u marti Salm 9:2 (9:1, NW).
għamilna disaʼ snin fis-servizz f’Betel, u dan ngħożżuh bħala xi ħaġa taʼ importanza speċjali fil-ħajja Kristjana u fl-iżvilupp spiritwali tagħna. Gawdejna wkoll l-ippridkar mal-pubblikaturi lokali f’Thun u fil-viċinanzi, fejn dejjem kellna veduta taʼ l-‘għeġubijiet’ taʼ Jehovah, il-muntanji maestużi bil-qċaċet kollha borra fl-Alpi ħdejn Bern.—Immorru Ngħixu xi Mkien Ieħor
Fil-bidu taʼ l-1986, għal darb’oħra morna ngħixu xi mkien ieħor. Intlabna mmorru naqdu bħala pijunieri speċjali f’territorju kbir ħafna assenjat lill-kongregazzjoni taʼ Buchs fil-parti tal-lvant taʼ l-Isvizzera. Kellna nerġgħu nidraw stil taʼ ħajja differenti. Madankollu, peress li konna mqanqlin mix-xewqa tagħna biex naqdu lil Jehovah kulfejn stajna nintużaw bl-aħjar mod, dħalna għal dan l-inkarigu ġdid, u esperjenzajna l-barka tiegħu. Ġieli kont sostitut għall-indokraturi li jivvjaġġaw, inżur u nsaħħaħ lill-kongregazzjonijiet. Għaddew tmintax-il sena minn dakinhar, u gawdejna ħafna esperjenzi hienja fl-ippridkar f’dawn l-inħawi. Il-kongregazzjoni f’Buchs kibret, u aħna ngawdu l-laqgħat tagħna f’Sala tas-Saltna mill-isbaħ li ġiet dedikata ħames snin ilu.
Jehovah ħa ħsiebna b’ġenerożità kbira. Qattajna l-biċċa l-kbira minn ħajjitna fil-ministeru full-time, imma qatt ma naqasna xejn. Għandna l-ferħ u s-sodisfazzjon li naraw lit-tifel u ’l martu, u ’l uliedhom, kif ukoll il-familji taʼ wliedhom, mexjin lealment fil-mogħdija taʼ Jehovah.
Meta nħares lura, inħoss li, tabilħaqq, qdejna lil Jehovah fi żmien favorevoli u fi żmien taʼ inkwiet. L-isforzi tiegħi fil-ministeru Kristjan ħaduni mill-kalzrijiet mudlama tal-ħabsijiet Komunisti għall-muntanji kollhom ġmiel taʼ l-Alpi Svizzeri. Jien u l-familja tiegħi m’għandna l-ebda dispjaċir.
[Kaxxa f’paġna 28]
“Vittmi Darbtejn” Iżommu Sod fil-Persekuzzjoni
Taħt ir-Repubblika Demokratika Ġermaniża (GDR), magħrufa wkoll bħala l-Ġermanja tal-Lvant, ix-Xhieda taʼ Jehovah ġew mgħakksin bil-kbir. Dokumenti miktubin juru li iktar minn 5,000 Xhud intbagħtu fil-kampijiet tax-xogħol iebes forzat u fiċ-ċentri tad-detenzjoni minħabba l-ministeru u n-newtralità Kristjana.—Isaija 2:4.
Xi wħud minnhom ġew deskritti bħala li sfaw “vittmi darbtejn.” Xi 325 minnhom intefgħu l-ħabs fil-kampijiet tal-konċentrament u l-ħabsijiet tan-Nazi. Imbagħad fl-1950, ġew imfittxijin u mitfugħin il-ħabs mill-iStasi, is-Servizzi tas-Sigurtà taʼ l-Istat tal-GDR. Anki xi wħud mill-ħabsijiet servew għal żewġ skopijiet—l-ewwel bħala ħabsijiet tan-Nazi u mbagħad bħala ħabsijiet taʼ l-iStasi.
Matul l-ewwel għaxar snin taʼ persekuzzjoni qawwija, mill-1950 sa l-1961, total taʼ 60 Xhud—rġiel u nisa—mietu fil-ħabs minħabba trattament ħażin, nuqqas taʼ nutriment, mard, jew l-età avanzata. Tnax-il Xhud ngħataw sentenzi l-ħabs għal ħajjithom kollha u iktar tard tnaqqsulhom għal 15-il sena ħabs.
Illum, f’dawk li qabel kienu l-kwartieri ġenerali taʼ l-iStasi f’Berlin, hemm wirja permanenti li tiffoka fuq l-40 sena taʼ persekuzzjoni uffiċjali fuq ix-Xhieda taʼ Jehovah fil-Ġermanja tal-Lvant. Ir-ritratti u r-rakkonti persunali li jintwerew hawnhekk jagħtu xiehda silenzjuża tal-kuraġġ u s-saħħa spiritwali taʼ dawn ix-Xhieda li baqgħu leali meta għaddew minn prova tan-nar.
[Mappa f’paġna 24, 25]
IL-ĠERMANJA TAL-LVANT
Rudolstadt
Belzig
Torgau
Chemnitz
Zwickau
[Stampa f’paġna 25]
Il-Kastell Osterstein, fi Zwickau
[Sors]
Fotosammlung des Stadtarchiv Zwickau, Deutschland
[Stampa f’paġna 26]
Maʼ marti, Erika