Mistoqsijiet mill-Qarrejja
Mistoqsijiet mill-Qarrejja
David, qaddej leali taʼ Jehovah, għala ħalla lil martu Mikal ikollha xbieha, jew idolu, tat-terafim, kif inhu muri fl-1 Samwel 19:12, 13?
L-ewwelnett, ejja nikkunsidraw il-kuntest fil-qosor. Meta l-aħbar dwar il-komplott tas-Sultan Sawl biex joqtol lil David wasal għand mart David, hi aġixxiet mill-ewwel. Il-Bibbja tgħid: “Mikal niżżlet lil David mit-tieqa, u dan qabad u telaq, u ħeles. U Mikal qabdet it-terafim [li evidentement kien id-daqs u l-forma taʼ raġel], għattietu u qegħditu fil-friex, ħadet biċċa xagħar tal-mogħoż, u qegħditha ħdejn rasu, u għattietu bil-ħwejjeġ.” Meta l-messaġġiera taʼ Sawl ġew biex jaħtfu lil David, Mikal qaltilhom: “Marid!” Din it-tattika tawlet it-tfittxija għal David, u rnexxielu jaħrab.—1 Samwel 19:11-16.
Sejbiet arkeoloġiċi jissuġġerixxu li fiż-żminijiet tal-qedem, ix-xbihat tat-terafim mhux biss kienu jintużaw għal skopijiet reliġjużi iżda wkoll għal skopijiet legali. Hekk bħalma l-kuntratti tal-proprjetà u t-testmenti bil-miktub jiddeterminaw id-drittijiet tal-wirt illum, l-istess kienu x-xbihat tat-terafim ħafna żmien ilu. Milli jidher, li jkollok terafim setaʼ, f’ċerti ċirkustanzi, jagħti lil ħaten id-dritt li jiret il-proprjetà taʼ missier martu li jkun miet. Dan jistaʼ jispjega għala, f’okkażjoni iktar kmieni, Rakel ħadet ix-xbihat tat-terafim mingħand missierha u għala dan kien daqshekk ansjuż biex jiħodhom lura. F’dak il-waqt, Ġakobb, ir-raġel taʼ Rakel, ma kienx jaf dwar dak li kienet għamlet martu.—Ġenesi 31:14-34.
Meta l-Iżraelin saru ġens, irċivew l-Għaxar Kmandamenti, li t-tieni wieħed minnhom jipprojbixxi b’mod speċifiku li jsiru x-xbihat. (Eżodu 20:4, 5) Iktar tard, il-profeta Samwel irrefera għal din il-liġi meta kellem lis-Sultan Sawl. Hu qal: “Ir-ribelljoni daqs id-dnub tas-seħer, u li twebbes rasek daqs il-ħażen tal-qima tax-xbihat [“terafim,” NW].” (1 Samwel 15:23) Minħabba din ir-raġuni, wisq probabbli t-terafim ma kellux skopijiet taʼ wirt ġewwa Iżrael. Minkejja dan, din il-forma antika taʼ superstizzjoni Lhudija tidher li kompliet f’xi familji ġewwa Iżrael. (Mħallfin 17:5, 6; 2 Slaten 23:24) Il-fatt li Mikal kellha x-xbieha tat-terafim fost l-affarijiet li kienet tippossiedi, jissuġġerixxi li qalbha ma kinitx sħiħa maʼ Jehovah. David jew ma kienx jaf dwar ix-xbieha tat-terafim jew ittollerah minħabba li Mikal kienet it-tifla tas-Sultan Sawl.
Il-ħarsa taʼ David dwar id-devozzjoni esklużiva lejn Jehovah hija espressa f’dan il-kliem: “Kbir il-Mulej, taʼ min ifaħħru ħafna, tal-biżaʼ aktar mill-allat kollha. Għax kollha frugħa l-allat tal-popli, Jaħweh hu li għamel is-smewwiet.”—1 Kronaki 16:25, 26.
[Stampa f’paġna 29]
It-tieni mill-Għaxar Kmandamenti kien jipprojbixxi li jsiru xbihat, bħal dak tat-terafim muri hawnhekk
[Sors]
From the book The Holy Land, Vol. II, 1859