‘Hi Għallmitna Nirrispettaw ir-Reliġjon Tagħha’
‘Hi Għallmitna Nirrispettaw ir-Reliġjon Tagħha’
WAĦDA mix-Xhieda taʼ Jehovah mill-provinċja taʼ Rovigo, l-Italja, saret taf li kellha tumur u li l-kundizzjoni tagħha kienet serja. Hi ddaħħlet l-isptar diversi drabi, u kull darba kienet titlob li jikkurawha mingħajr trasfużjonijiet tad-demm. Wara li kienet toħroġ mill-isptar kienet tingħata l-kura fid-dar tagħha minn infermieri li jagħtu s-servizz fil-komunità lil dawk morda bil-kanċer.
Il-fidi soda taʼ din il-pazjenta taʼ 36 sena u l-fatt li kienet lesta tikkoopera impressjona bil-kbir lit-tobba u l-infermieri li ħadu ħsiebha. Ftit qabel ma l-pazjenta mietet minħabba l-kanċer, wieħed mill-infermieri li għenha kiteb f’rivista għall-infermieri dwar l-esperjenza mal-pazjenta li hu sejħilha Angela.
“Angela hija mimlija ħeġġa u għandha xewqa kbira li tgħix. Hi taf bil-kundizzjoni tagħha u bil-marda serja li qed tiffaċċja, u bħalma konna nagħmlu aħna fis-sitwazzjoni tagħha, hi qed tfittex soluzzjoni, rimedju, jew mediċina. . . . Aħna l-infermieri sirna nafuha ftit ftit. Hi m’opponietx l-għajnuna tagħna. Għall-kuntrarju, il-fatt li Angela kienet sinċiera għamel l-affarijiet eħfef. Kien il-pjaċir tagħna li nieħdu ħsiebha, għax konna nafu li fil-ħin li nqattgħu maʼ din il-mara sinċiera lkoll konna se nibbenefikaw. . . . Aħna mill-ewwel indunajna li r-reliġjon tagħha kienet se tkun t’ostaklu biex nittrattaw il-marda tagħha.” Din kienet l-opinjoni tiegħu għax hu ħass li Angela kellha tingħata trasfużjonijiet tad-demm, li hi rrifjutat.—Atti 15:28, 29.
“Bħala professjonisti fil-kura tas-saħħa, aħna għedna lil Angela li ma konniex naqblu mad-deċiżjoni tagħha, imma bl-għajnuna tagħha, aħna stajna nifhmu li l-ħajja kienet tfisser ħafna għaliha. Fhimna wkoll l-importanza tar-reliġjon tagħha kemm għaliha u kemm għall-familja tagħha. Angela ma qatgħetx qalbha. Ma ċedietx għall-marda. Hi kuraġġuża ħafna. Trid tgħix, lesta li tiġġieled, u trid tibqaʼ ħajja. Hi esprimiet id-determinazzjoni tagħha u t-twemmin tagħha. Għandha determinazzjoni li spiss aħna stess m’għandniex, fidi, li fil-każ tagħna m’hijiex daqshekk b’saħħitha. . . . Angela għallmitna l-importanza li nirrispettaw ir-reliġjon tagħha, xi ħaġa differenti ħafna mill-etika professjonali tagħna. . . . Aħna nemmnu li dak li għallmitna Angela hu taʼ importanza kbira, għax aħna niltaqgħu maʼ kull tip taʼ nies, kull tip taʼ ċirkustanzi, u kull tip taʼ reliġjon, u aħna nistgħu nitgħallmu minnhom u huma jitgħallmu minna.”
L-artiklu mbagħad ġibed l-attenzjoni għall-Kodiċi taʼ l-Etika Professjonali għall-Infermieri Taljani, approvat fl-1999, li jgħid: “L-infermiera jaġixxu b’tali mod li juri li jikkunsidraw il-valuri reliġjużi, etiċi, u kulturali taʼ l-individwu, kif ukoll ir-razza u s-sess tiegħu.” Xi drabi, forsi jkun diffiċli għat-tobba u l-infermieri biex jirrispettaw it-twemmin reliġjuż tal-pazjent, u wieħed ma jistax ma japprezzax lil dawk li huma lesti jirrispettawhom.
Id-deċiżjonijiet li jieħdu x-Xhieda taʼ Jehovah rigward il-kura medika u tas-saħħa tagħhom jiġu meħudin wara li jkunu ħasbu sew dwarhom. Huma jikkunsidraw bis-serjetà dak li tgħid l-iskrittura, u kif inhu muri fil-każ t’Angela, huma m’humiex fanatiċi. (Filippin 4:5, NW) Madwar id-dinja, numru li jiżdied taʼ professjonisti fil-kura tas-saħħa huma lesti li jirrispettaw il-kuxjenza tal-pazjenti tagħhom li huma Xhieda.