Qis b’Mod Xieraq il-Valur tar-Rigal tal-Ħajja
Qis b’Mod Xieraq il-Valur tar-Rigal tal-Ħajja
‘Id-demm taʼ Kristu [se] inaddaf il-kuxjenza tagħna mill-għemil mejjet biex taqdu lil Alla ħaj!’—LHUD 9:14.
1. X’juri li aħna nqisu l-valur tal-ħajja bħala imprezzabbli?
KIEKU xi ħadd jistaqsik kemm tiswa ħajtek, xi prezz tagħtih? Aħna nqisu l-valur tal-ħajja bħala imprezzabbli—kemm tagħna u kemm t’oħrajn. Dan jistaʼ jidher mill-fatt li meta nimirdu x’aktarx li mmorru għand it-tabib għal kura jew għal eżami mediku regulari. Irridu nibqgħu ħajjin u f’saħħitna. Anki l-biċċa l-kbira minn dawk li huma xjuħ jew għandhom xi diżabilità ma jixtiqux imutu; huma jixtiequ jibqgħu jgħixu.
2, 3. (a) Liema obbligu hu enfasizzat fi Proverbji 23:22? (b) Alla kif inhu involut fl-obbligu li jissemma fi Proverbji 23:22?
2 Ir-relazzjonijiet tiegħek m’oħrajn jiġu effettwati minn kemm int tqis il-ħajja taʼ valur. Per eżempju, il-Kelma t’Alla tgħidilna: “Ismaʼ minn missierek li tak il-ħajja, u tmaqdarx ’l ommok meta tixjieħ.” (Proverbji 23:22) Li “tismaʼ minn” ifisser iktar milli sempliċement tismaʼ xi kliem; dan il-proverbju jfisser li tismaʼ u mbagħad tobdi. (Eżodu 15:26; Dewteronomju 7:12; 13:19 [13:18, NW]; 15:5; Ġożwè 22:2; Salm 81:14 [81:13, NW]) Il-Kelma t’Alla liema raġuni tagħti biex int tismaʼ minn missierek u ommok? Dan ma tagħmlux sempliċement għax missierek jew ommok huma akbar minnek jew għax għandhom iktar esperjenza. Ir-raġuni li tingħata hi li ‘tawk il-ħajja.’ Verżjoni oħra tagħti dan il-vers: “Ismaʼ minn missierek li kkaġuna t-twelid tiegħek.” Huwa raġunevoli li jekk tqis ħajtek taʼ valur, int tħoss obbligu lejn is-sors taʼ ħajtek.
3 M’għandniex xi ngħidu, jekk int Kristjan veru, int tirrikonoxxi lil Jehovah bħala s-Sors li minnu oriġinalment ġiet ħajtek. Permezz tiegħu ‘tgħix,’ tistaʼ ‘titħarrek,’ tistaʼ tkun ħlejqa li għandha sentimenti; u issa int ‘teżisti’ (NW), u tistaʼ taħseb dwar il-ġejjieni tiegħek jew tippjana għalih, inkluż il-ħajja bla tmiem. (Atti 17:28; Salm 36:10 [36:9, NW]; Koħèlet 3:11) Fi qbil maʼ Proverbji 23:22, huwa xieraq li “tismaʼ minn” Alla b’ubbidjenza, u tkun tixtieq tifhem u tkun gwidat minn dak li jgħid hu dwar il-ħajja u mhux tippreferi timxi fuq xi opinjoni oħra dwar il-valur tal-ħajja.
Uri Rispett għall-Ħajja
4. Fil-bidu taʼ l-istorja tal-bniedem, ir-rispett għall-ħajja kif sar kwistjoni importanti?
4 Fil-bidu taʼ l-istorja tal-bniedem, Jehovah għamilha ċara li hu ma ħalliex f’idejn il-bniedem biex juża l-ħajja (jew jabbuża minnha) kif ifettillu. Kajjin, mimli rabja minħabba l-għira li kellu, qered ħajja innoċenti, dik taʼ ħuh Abel. Taħseb li Kajjin kellu dritt jieħu deċiżjoni bħal dik dwar il-ħajja? Alla ma ħasibhiex hekk. Hu sejjaħ lil Kajjin biex jagħti kont: “X’għamilt! Leħen id-demm taʼ ħuk qiegħed jgħajjatli mill-art.” (Ġenesi 4:10) Innota li d-demm t’Abel fl-art kien jirrappreżenta lil ħajtu, li ġiet imqassra ħesrem, u kien qed jgħajjat lil Alla għall-vendetta.—Lhud 12:24.
5. (a) Alla liema ħaġa pprojbixxa fi żmien Noè, u għal min kienet tapplika? (b) Din il-projbizzjoni f’liema sens kienet pass importanti?
5 Wara d-Dilluvju, il-bniedem kellu bidu ġdid permezz taʼ tmienja min-nies biss. F’dikjarazzjoni li kienet tapplika għall-bnedmin kollha, Alla rrivela iktar dwar il-valur li hu jagħti lill-ħajja u d-demm. Hu qal li l-bnedmin setgħu jieklu l-laħam taʼ l-annimali, imma poġġa din ir-restrizzjoni: “Kull ma hu ħaj u jitħarrek fl-art ikun ikel għalikom; u wkoll il-ħaxix aħdar, kollox nagħtikom. Imma l-laħam b’demmu ġo fih, li hu ħajtu, la tikluhx.” (Ġenesi 9:3, 4) Xi Lhud jinterpretaw dan bħala li jfisser li l-bnedmin ma kellhomx jieklu l-laħam jew id-demm taʼ xi annimal li kien ikun għadu ħaj. Imma ż-żmien kellu juri ċar li dak li Alla kien qed jipprojbixxi hawnhekk kien li wieħed jieħu d-demm biex isostni l-ħajja. Iktar minn hekk, id-digriet li Alla ta permezz taʼ Noè kien pass importanti lejn it-twettiq taʼ l-iskop grandjuż Tiegħu li kien jinvolvi d-demm—skop li kien se jagħti ċans lill-bnedmin jiksbu l-ħajja taʼ dejjem.
6. Permezz taʼ Noè, Alla kif enfasizza l-mod kif Hu jqis il-valur tal-ħajja?
6 Alla kompla: “U jien nitlob kont taʼ demmkom, li hu ħajjitkom; nitolbu mingħand kull bhima, mingħand kull bniedem; mingħand kull wieħed nitħallas tal-ħajja taʼ bniedem ieħor bħalu. Kull min ixerred demm taʼ bniedem, minn bniedem ieħor jixxerred demmu. Għax skond ix-xbieha tiegħu, ħalqu lill-bniedem Alla.” (Ġenesi 9:5, 6) Minn din id-dikjarazzjoni lill-familja umana kollha tistaʼ tara li Alla jqis id-demm tal-bniedem bħala li jirrappreżenta l-ħajja tiegħu. Huwa l-Ħallieq li jagħti l-ħajja lil individwu, u ħadd m’għandu jieħu dik il-ħajja li hija rappreżentata mid-demm. Jekk individwu joqtol lil xi ħadd, bħalma għamel Kajjin, il-Ħallieq għandu d-dritt ‘jitlob’ lura l-ħajja tal-qattiel.
7. Għala għandna nkunu interessati fid-dikjarazzjoni t’Alla lil Noè dwar id-demm?
7 Bid-dikjarazzjoni li għamel, Alla kien qed jikkmanda lill-bnedmin biex ma jużawx id-demm b’mod ħażin. Qatt ħsibt għala? X’kienet ir-raġuni għala Alla kien iqis id-demm b’dan il-mod? Fil-fatt, it-tweġiba tinvolvi tagħlim mill-iktar importanti tal-Bibbja. Dan it-tagħlim hu fil-qalba tal-messaġġ Kristjan, għalkemm ħafna organizzazzjonijiet reliġjużi jippreferu jinjorawh. X’inhu dan it-tagħlim, u l-ħajja, id-deċiżjonijiet, u l-azzjonijiet tiegħek kif inhuma involuti?
Id-Demm—Kif Setaʼ Jintuża?
8. Fil-Liġi, Jehovah liema restrizzjoni poġġa fuq l-użu tad-demm?
8 Jehovah ipprovda iktar dettalji dwar il-ħajja u d-demm meta lill-Iżraelin tahom il-kodiċi tal-Liġi. Dan kien pass ieħor fit-twettiq taʼ l-iskop tiegħu. X’aktarx li taf li l-Liġi kienet tirrikjedi li jsiru offerti lil Alla, bħalma huma offerti tal-qamħ, taż-żejt, u taʼ l-inbid. (Levitiku 2:1-4; 23:13; Numri 15:1-5) Kienu jsiru wkoll sagrifiċċji taʼ l-annimali. Alla qal hekk dwar dawn: “Għax ħajjet il-laħam hi fid-demm, u jien tajthulkom għal fuq l-artal biex tagħmlu bih l-espjazzjoni għalikom. Għaliex bid-demm, li hu l-ħajja, issir l-espjazzjoni. Għalhekk għedt lil ulied Iżrael: ‘Ħadd minn fostkom ma għandu jiekol id-demm.’” Jehovah żied li jekk xi kaċċatur jew bidwi joqtol annimal biex jieklu, hu kellu jxerred demmu u jgħattih bit-trab. L-art hi l-banketta li fuqha Alla jpoġġi riġlejh, u meta individwu jxerred id-demm fl-art ikun qed jirrikonoxxi li l-ħajja kienet qed terġaʼ tmur għand id-Donatur tal-Ħajja.—Levitiku 17:11-13; Isaija 66:1.
9. X’kien l-uniku użu li setaʼ jsir mid-demm kif indikat fil-Liġi, u x’kien l-iskop taʼ dan?
9 Dik il-liġi ma kinitx sempliċement xi ritwal reliġjuż li m’għandu ebda importanza għalina. Innotajt għala l-Iżraelin ma kellhomx jieħdu demm? Alla qal: “Għalhekk għedt lil ulied Iżrael: ‘Ħadd minn fostkom ma għandu jiekol id-demm.’” X’kienet ir-raġuni? “Jien tajthulkom [id-demm] għal fuq l-artal biex tagħmlu bih l-espjazzjoni għalikom.” Qiegħed int tara kif dan jipprovdi dehen dwar għala Alla kien qal lil Noè li l-bnedmin ma kellhomx jieklu d-demm? Il-Ħallieq iddeċieda li jqis id-demm bħala li għandu sinifikat superjuri, u għażel li jwarrbu għal użu speċjali wieħed li setaʼ jsalva ħafna ħajjiet. Dan kellu jkollu l-irwol vitali biex jgħatti d-dnubiet (jew ipatti għalihom). Mela skond il-Liġi, l-uniku użu li kien awtorizzat minn Alla kien fuq l-artal biex ipatti għall-ħajjiet taʼ l-Iżraelin li kienu qed ifittxu l-maħfra mingħand Jehovah.
10. Id-demm taʼ l-annimali għala ma setax iwassal għall-maħfra kompleta, imma s-sagrifiċċji li saru taħt il-Liġi liema tfakkira pprovdew?
10 Dan il-konċett għandu x’jaqsam ħafna mal-Kristjanità. Meta rrefera għal din il-karatteristika tal-Liġi mogħtija minn Alla, l-appostlu Kristjan Pawlu qal: “Skond il-Liġi, tistaʼ tgħid kollox jissaffa bid-demm; u bla tixrid tad-demm ma hemmx maħfra.” (Lhud 9:22) Pawlu għamilha ċara li s-sagrifiċċji mitluba mil-Liġi m’għamlux lill-Iżraelin perfetti u bla dnub. Hu kiteb: “B’dawn l-istess sagrifiċċji ssir it-tifkira tad-dnubiet minn sena għal oħra. Għax ma jistax ikun li d-demm tal-gniedes u tal-mogħoż ineħħi d-dnubiet.” (Lhud 10:1-4) Minkejja dan, sagrifiċċji bħal dawn kellhom skop. Dawn kienu jfakkru lill-Iżraelin li huma kienu midinbin u kellhom bżonn xi ħaġa oħra sabiex jiksbu maħfra kompleta. Imma jekk id-demm li rrappreżenta l-ħajjiet taʼ l-annimali ma setax jgħatti kompletament id-dnubiet tal-bnedmin, kien hemm xi demm li setaʼ jagħmel dan?
Is-Soluzzjoni tad-Donatur tal-Ħajja
11. Kif nafu li s-sagrifiċċji tad-demm taʼ l-annimali kienu qed jiġbdu l-attenzjoni lejn xi ħaġa?
11 Il-Liġi kienet fil-fatt qed tiġbed l-attenzjoni lejn xi ħaġa bil-wisq iktar effettiva biex twettaq ir-rieda t’Alla. Pawlu staqsa: “Għalfejn il-Liġi, mela?” Hu wieġeb: “Kienet żjieda li saret minħabba fid-dnub, sakemm ma jkunx ġie n-nisel li għalih saret il-wegħda, li kienet imxandra mill-anġli permezz taʼ medjatur [Mosè].” (Galatin 3:19) Bl-istess mod, Pawlu kiteb: “Il-Liġi . . . għandha biss id-dell tal-ġid li għandu jiġi, u mhux dan l-istess ġid [“realtà,” NW].”—Lhud 10:1.
12. Kif nistgħu aħna naraw l-iskop t’Alla rigward id-demm jinkixef bil-mod il-mod quddiemna?
12 Mela s’issa rajna li fi żmien Noè, Alla ħareġ digriet fejn stqarr li l-bnedmin setgħu jieklu l-laħam taʼ l-annimali biex jgħixu, imma ma setgħux jieħdu d-demm. Iktar tard, Alla stqarr li “ħajjet il-laħam hi fid-demm.” Iva, hu għażel li jqis id-demm bħala li jfisser il-ħajja u qal: “Jien tajthulkom [id-demm] għal fuq l-artal biex tagħmlu bih l-espjazzjoni għalikom.” Iżda, kienet se tinkixef xi ħaġa oħra taʼ l-għaġeb dwar l-iskop t’Alla. Il-liġi kienet dell tal-ġid li kien għadu jrid jiġi. Dawn l-affarijiet x’inhuma?
13. Il-mewt taʼ Ġesù għala kienet importanti?
13 Ir-realtà kienet tiċċentra fuq il-mewt taʼ Ġesù Kristu. Bħalma taf, Ġesù kien torturat u msammar maʼ zokk. Ngħata mewta taʼ kriminal. Pawlu kiteb: “Meta aħna konna bla saħħa, Kristu, meta wasal iż-żmien, miet għall-ħżiena. . . . Alla wriena l-imħabba tiegħu meta Kristu miet għalina, aħna li konna għadna midinbin.” (Rumani 5:6, 8) Meta Kristu miet għalina, hu pprovda fidwa biex tgħatti dnubietna. Din il-fidwa hija l-qalba tal-messaġġ Kristjan tagħna. (Mattew 20:28; Ġwanni 3:16; 1 Korintin 15:3; 1 Timotju 2:6) Il-fidwa x’konnessjoni għandha mad-demm u l-ħajja, u ħajtek kif inhi involuta?
14, 15. (a) Xi traduzzjonijiet t’Efesin 1:7 kif jenfasizzaw il-mewt taʼ Ġesù? (b) Liema fatt tistaʼ ma tindunax bih f’Efesin 1:7?
14 Xi reliġjonijiet jenfasizzaw il-mewt taʼ Ġesù, u l-membri tagħhom jgħidu affarijiet bħal “Ġesù miet għalija.” Ikkunsidra kif xi traduzzjonijiet tal-Bibbja jittraduċu Efesin 1:7: “Huwa fih u permezz tal-mewt tiegħu li għandna l-ħelsien, jiġifieri, it-tneħħija tad-dnubiet tagħna.” (The American Bible, minn Frank Scheil Ballentine, 1902) “Permezz tal-mewt taʼ Kristu aħna ninħelsu, u dnubietna jinħafru.” (Today’s English Version, 1966) “Huwa fi Kristu u permezz tiegħu u s-sagrifiċċju taʼ ħajtu li aħna ġejna liberati, liberazzjoni li tfisser il-maħfra tad-dnubiet.” (The New Testament, minn William Barclay, 1969) “Huwa permezz tal-mewt taʼ Kristu li dnubietna jinħafru u aħna ninħelsu.” (The Translator’s New Testament, 1973) F’dawn it-traduzzjonijiet tistaʼ tara li l-enfasi hi fuq il-mewt taʼ Ġesù. ‘Imma,’ forsi xi wħud jgħidu, ‘Il-mewt taʼ Ġesù hija verament importanti. Allura, x’hemm nieqes f’dawn it-traduzzjonijiet?’
15 Tabilħaqq, li kieku kellek tiddependi biss minn traduzzjonijiet bħal dawn, forsi ma kontx tinduna b’punt importanti ferm, u b’hekk kien ikun diffiċli li tifhem għalkollox il-messaġġ tal-Bibbja. Traduzzjonijiet bħal dawn jaħbu l-fatt li fit-test oriġinali t’Efesin 1:7 hemm il-kelma Griega li tfisser “demm.” B’hekk, ħafna Bibbji, bħall-Bibbja taʼ l-Għaqda Biblika Maltija, iqarrbu iktar lejn it-test oriġinal: “Fih aħna għandna l-fidwa bid-demm tiegħu, il-maħfra tad-dnubiet, skond l-għana tal-grazzja tiegħu.”—Korsiv tagħna.
16. Il-frażi tradotta “d-demm tiegħu” fiex għandha tfakkarna?
16 It-traduzzjoni “bid-demm tiegħu” għandha tifsira sinifikanti ferm u għandha tfakkarna f’ħafna aspetti li jinvolvu d-demm. Kien hemm bżonn taʼ iktar minn mewt, saħansitra l-mewt tar-raġel perfett Ġesù. Hu wettaq dak li kien iffigurat bil-quddiem fil-Liġi, partikolarment f’Jum l-Espjazzjoni. F’dak il-jum speċjali kienu jiġu sagrifikati annimali li kienu speċifikati mil-Liġi. Imbagħad il-qassis il-kbir kien jieħu ftit mid-demm tagħhom fil-post l-Iktar Qaddis tat-Tabernaklu jew tempju, u hemm jippreżentah quddiem Alla, bħallikieku kien fil-preżenza tiegħu.—Eżodu 25:22; Levitiku 16:2-19.
17. Ġesù kif wettaq dak li kien iffigurat bil-quddiem minn Jum l-Espjazzjoni?
17 Bħalma spjega Pawlu, Ġesù wettaq dak li kien iffigurat bil-quddiem minn Jum l-Espjazzjoni. L-ewwel, hu semma li l-qassis il-kbir f’Iżrael kien jidħol fl-Iktar Qaddis darba fis-sena bid-demm li offra ‘għalih innifsu u għan-nuqqasijiet li jkun għamel il-poplu bla ma kien jaf.’ (Lhud 9:6, 7) Fi qbil maʼ dak li ġara f’jum l-espjazzjoni, wara li Ġesù ġie mqajjem bħala spirtu, hu daħal fis-sema stess. Bħala spirtu, li ma kellu ebda ġisem tad-demm u l-laħam, hu setaʼ jidher għalina quddiem “Alla.” Xi ppreżentalu lil Alla? Mhux xi ħaġa fiżika imma xi ħaġa sinifikanti ferm. Pawlu kompla: “Imma Kristu ġie bħala l-qassis il-kbir . . . ; hu daħal darba għal dejjem fis-Santwarju, mhux bis-saħħa tad-demm tal-mogħoż u taʼ l-għoġiela, imma bis-saħħa taʼ demmu stess, u hekk kiseb fidwa għal dejjem. Jekk id-demm tal-mogħoż u tal-gniedes . . . jistaʼ jqaddishom billi jagħtihom l-indafa tal-ġisem, kemm aktar id-demm taʼ Kristu, li bl-Ispirtu taʼ dejjem offra lilu nnifsu vittma safja lil Alla, jistaʼ jnaddaf il-kuxjenza tagħkom mill-għemil mejjet biex taqdu lil Alla ħaj!” Iva, Ġesù ppreżenta l-valur taʼ demmu lil Alla.—Lhud 9:11-14, 24, 28; 10:11-14; 1 Pietru 3:18.
18. L-istqarrijiet tal-Bibbja dwar id-demm għala għandhom ikunu importanti għall-Kristjani llum?
18 Din il-verità mingħand Alla tgħinna nifhmu l-aspetti meraviljużi kollha taʼ dak li l-Bibbja tgħid dwar id-demm—ir-raġuni għala Alla jqisu b’dan il-mod, kif aħna għandna nqisuh, u għala għandna nirrispettaw ir-restrizzjonijiet li Alla poġġa fuq kif nużaw id-demm. Meta taqra l-kotba taʼ l-Iskrittura Griega Kristjana se ssib ħafna referenzi għad-demm taʼ Kristu. (Ara l-kaxxa.) Dawn jagħmluha ċara li kull Kristjan għandu jkollu fidi f’“demmu,” jiġifieri fid-demm taʼ Ġesù. (Rumani 3:25) Il-maħfra mingħand Alla u l-paċi miegħu huma possibbli biss ‘bid-demm imxerred’ taʼ Ġesù. (Kolossin 1:20, korsiv tagħna.) Dan ċertament iseħħ fil-każ taʼ dawk li magħhom Ġesù għamel patt speċjali biex isaltnu miegħu fis-sema. (Luqa 22:20, 28-30; 1 Korintin 11:25; Lhud 13:20) Ċertament li se jseħħ ukoll fil-każ taʼ dawk li jifformaw il-“kotra kbira” llum, li se jsalvaw mit-tribulazzjoni l-kbira u se jgawdu ħajja taʼ dejjem fuq art magħmula ġenna. B’mod figurattiv, huma ‘ħaslu l-ilbiesi tagħhom u bajduhom fid-demm tal-Ħaruf.’—Korsiv tagħna; Apokalissi 7:9, 14.
19, 20. (a) Alla għala għażel li jagħmel restrizzjoni fuq l-użu tad-demm, u aħna kif għandna nħossuna dwar dan? (b) Għalhekk, x’għandna nkunu interessati li nsiru nafu?
19 Jidher ċar li d-demm għandu tifsira speċjali f’għajnejn Alla. Għandu jkollu tifsira speċjali għalina wkoll. Il-Ħallieq, li hu konċernat dwar il-ħajja, lill-bnedmin għandu dritt jagħmlilhom restrizzjonijiet dwar id-demm. Minħabba li hu konċernat ħafna anki dwar ħajjitna, hu determinat li jħalli d-demm jintuża b’mod wieħed biss li hu importanti ferm, l-uniku mod li jistaʼ jagħmel il-ħajja taʼ dejjem possibbli. Dan il-mod kien jinvolvi d-demm prezzjuż taʼ Ġesù. Kemm għandna nkunu grati li Alla Jehovah aġixxa għall-ġid tagħna billi uża d-demm—id-demm taʼ Ġesù—b’dan il-mod li jsalva l-ħajja! U kemm għandna nkunu grati lejn Ġesù talli hu xerred demmu għalina permezz tas-sagrifiċċju tiegħu! Nistgħu verament nifhmu s-sentimenti li esprima l-appostlu Ġwanni: “Lil Dak li ħabbna, u li ħallna minn dnubietna bis-saħħa taʼ demmu, u li għamilna Saltna, Qassisin għal Alla tiegħu Missieru, lilu l-glorja u s-setgħa għal dejjem taʼ dejjem. Amen.”—Apokalissi 1:5, 6.
20 Alla tagħna mimli għerf, li hu d-Donatur tal-Ħajja, f’moħħu kellu għal żmien twil dan l-irwol li jsalva l-ħajja. Mela, forsi nistaqsu, ‘Dan x’effett għandu jkollu fuq id-deċiżjonijiet u l-azzjonijiet tagħna?’ L-artiklu li jmiss se jiddiskuti din il-mistoqsija.
Int Kif Twieġeb?
• X’nistgħu nitgħallmu dwar il-mod kif Alla jqis id-demm mir-rakkonti dwar Abel u Noè?
• Fil-Liġi, Alla liema limiti poġġa dwar l-użu tad-demm, u għala?
• Ġesù kif wettaq dak li kien iffigurat bil-quddiem minn Jum l-Espjazzjoni?
• Id-demm taʼ Ġesù kif jistaʼ jsalvalna ħajjitna?
[Mistoqsijiet taʼ Studju]
[Kaxxa f’paġna 18]
ID-DEMM TAʼ MIN ISALVA L-ĦAJJA?
“Oqogħdu attenti għalikom infuskom u għall-merħla kollha li minnha l-ispirtu qaddis ħatarkom indokraturi biex tirgħu l-kongregazzjoni t’Alla, li xtara bid-demm taʼ Ibnu stess.”—Atti 20:28, NW.
“Kemm aktar u aktar issa li aħna ġġustifikati b’demmu, nsalvaw permezz tiegħu mill-korla taʼ Alla!”—Rumani 5:9.
“Kontu bla tama u bla Alla fid-dinja! Imma issa, fi Kristu Ġesù, intom, li darba kontu ’l bogħod, issa tqarribtu bis-saħħa tad-demm taʼ Kristu.”—Efesin 2:12, 13.
“Hekk Alla għoġbu li tgħammar fih il-milja kollha: bih Alla għoġbu jerġaʼ jħabbeb kollox miegħu: bid-demm tiegħu, mxerred fuq [“iz-zokk tat-tortura,” NW].”—Kolossin 1:19, 20.
“Ħuti għandna l-fiduċja li nidħlu fis-Santwarju bis-saħħa tad-demm taʼ Ġesù.”—Lhud 10:19.
“Intom kontu mifdija mill-ħajja tagħkom fiergħa li ħadtu mingħand missirijietkom, . . . , imma bid-demm għażiż taʼ Kristu, li kien bħal ħaruf bla għajb u bla tebgħa.”—1 Pietru 1:18, 19.
“Iżda jekk nimxu fid-dawl, kif inhu fid-dawl hu stess, aħna nissieħbu flimkien, u d-demm taʼ Ġesù Kristu Ibnu jnaddafna minn kull dnub.”—1 Ġwann 1:7.
“Int jistħoqqlok tieħu l-ktieb, u tiftaħ is-siġilli tiegħu, għax int kont maqtul, u b’demmek ksibt għal Alla bnedmin minn kull tribù u lsien, minn kull poplu u ġens.”—Apokalissi 5:9.
“Twaddab ’il barra dak li jixli ’l ħutna . . . U huma ħarġu rebbieħa fuqu permezz tad-demm tal-Ħaruf u bis-saħħa tal-kelma li xehdu.”—Apokalissi 12:10, 11.
[Stampa f’paġna 16]
Permezz tal-Liġi, Alla għamilha ċara li d-demm setaʼ jaqdi rwol fil-maħfra tad-dnubiet
[Stampa f’paġna 17]
Permezz tad-demm taʼ Ġesù setgħu jiġu salvati ħafna ħajjiet