Ittra lil Noè

“GĦAŻIŻ Noè, jien kemm-il darba qrajt fil-​Bibbja dwarek u dwar kif int bnejt arka u dħalt fiha mal-​familja tiegħek, u b’hekk salvajtu mid-​Dilluvju.”

Hekk tibda ittra li Minnamaria, tfajla taʼ 15-il sena, bagħtet għall-​konkors tal-​kitba li sar għall-​istudenti taʼ bejn l-​14 u l-​21 sena. Il-​konkors ġie organizzat mis-​servizzi tal-​posta Finlandiża, mill-​Federazzjoni taʼ l-​Għalliema tal-​Lingwa Finlandiża, u mis-​Soċjetà tal-​Letteratura Finlandiża. Il-​parteċipanti kellhom jiktbu ittra bbażata fuq ktieb. Din setgħet tiġi indirizzata lill-​awtur tal-​ktieb jew lil xi karattru msemmi fih. L-​għalliema għażlu iktar minn 1,400 mill-​ittri taʼ l-​istudenti tagħhom u għaddewhom lill-​membri tal-​ġurija. Dawn imbagħad għażlu l-​aħjar waħda, għaxra oħra li ħadu t-​tieni, u jerġaʼ għaxra oħra li ħadu t-​tielet. Minnamaria ferħet ħafna li l-​ittra tagħha kienet fost dawk li ħadu t-​tielet.

Minnamaria, studenta adoloxxenti, għala qagħdet tindirizza l-​ittra tagħha lil Noè, bniedem li għex mal-​5,000 sena ilu? Hi tikkummenta: “Il-​Bibbja kienet l-​ewwel ħaġa li ġiet f’moħħi. Jien sirt midħla sew tal-​karattri li jissemmew fiha. Tant qrajt dwarhom li għalija qishom għadhom ħajjin. Għażilt lil Noè għaliex ħajtu tant kienet eċċitanti u differenti minn tiegħi.”

L-ittra li Minnamaria kitbet lil Noè tispiċċa bil-​kliem: “Int għadek eżempju taʼ fidi u ubbidjenza. Ħajtek tinkuraġġixxi lil dawk kollha li jaqraw il-​Bibbja biex huma wkoll jaġixxu fi qbil mal-​fidi tagħhom.”

Din l-​ittra taʼ qarrejja żagħżugħa turi tajjeb kemm il-​Bibbja “hi ħajja” u għandha ‘qawwa’ fuq in-​nies, sew jekk żgħażagħ u sew jekk xjuħ.—Lhud 4:12.